Ia Faaatagia le Uiga Faalemafaufau o Keriso

“Ia foai atu foi ia te outou e le Atua, o ia e tupu mai ai le onosai ma le faamafanafana, ina ia gatasitasi o outou loto e tusa ma le finagalo o Keriso Iesu.”—ROMA 15:5.

1. E mafai faapefea ona aafia le olaga o se tasi i ona uiga?

E FAIA e uiga se eseesega tele i le olaga. E mafai e se uiga faifai mālie po o se uiga filigā, se uiga mautinoa po o se uiga lē mautinoa, se uiga faatautee po o se uiga felagolagomaʻi, se uiga faitio po o se uiga lotofaafetai, ona malolosi a latou taaʻiga i le auala e feutagaʻi ai se tagata ma tulaga ma le auala e tali mai ai isi tagata ia te ia. O se uiga lelei e mafai ai e se tasi ona fiafia e tusa pe fesagaʻi ma ni tulaga e fai lava sina faigatā. O se tagata o loo iai sona uiga leaga, e leai lava se mea e lelei i lana vaai, e tusa lava—pe a fua i le tulaga moni—o loo lelei le olaga.

2. E faapefea ona aʻoaʻoina e se tagata uiga o loo ia faaalia?

² O uiga—lelei pe leaga—e mafai ona aʻoaʻoina. O le mea moni, o ni mea e tatau ona aʻoaʻoina. I le tautala e faatatau i se pepe faatoʻā fanau mai, ua taʻua e le Collier’s Encyclopedia faapea: “O uiga e iʻu ina ia te ia e mautinoa o ni uiga ua ia maua pe aʻoaʻoina mai se isi, e tai pei lava ona ia maua pe aʻoaʻoina se gagana po o se isi lava tomai.” E faapefea ona tatou aʻoaʻoina uiga? E ui ina tele mea e ono aofia ai, ae o le siʻomaga ma aumea o vala na e sili ona malolosi a la taaʻiga. Fai mai se faamatalaga a le lomifefiloi lea na muaʻi taʻua: “Tatou te aʻoaʻoina pe mitiia uiga o i latou o loo tatou aumea vavalalata.” I le faitau afe o tausaga ua mavae, na taʻua ai e le Tusi Paia se manatu e talitutusa: “O lē latou te feoai ma tagata popoto, e poto lava ia; a o le uo a e valelea, e leaga ai lava ia.”—Faataoto 13:20; 1 Korinito 15:33.

Se Faaaʻoaʻoga mo Uiga Talafeagai

3. O ai sa avea ma faaaʻoaʻoga lelei i ona uiga, ma e mafai faapefea ona tatou faataʻitaʻi atu ia te ia?

³ E pei ona iai i isi uma tulaga, e faapena foʻi i le tulaga e faatatau i uiga, ua faataatia ai e Iesu Keriso le faaaʻoaʻoga e sili ona lelei. Na ia fetalai: “Ua ou avatu le faaaʻoaʻo ia te outou, e pei ona ou faia ia te outou, ia faapea lava e outou ona fai.” (Ioane 13:15) Ina ia pei o Iesu, e tatau ona tatou muaʻi aʻoaʻoina mea e faatatau ia te ia. * Tatou te suʻesuʻeina le soifuaga o Iesu ma se faanaunauga e faia le mea na fautua mai ai le aposetolo o Peteru e faapea: “Na valaauina outou ona o lea lava mea; auā na tigaina Keriso lava mo outou, ua tuuina mai ai e ia le faaaʻoaʻo mo outou, ina ia outou mulimuli atu i ona tulagāaao.” (1 Peteru 2:21, LF ) O lo tatou sini ina ia tatou pei o Iesu i se tele e mafai ai. E aofia i lena mea le atiina aʻe o le uiga faalemafaufau sa ia te ia.

4, 5. O le ā le vala o le uiga faalemafaufau o Iesu ua faamatilatila mai i le Roma 15:1-3, ma e mafai faapefea e Kerisiano ona faataʻitaʻi ia te ia?

⁴ O le ā e aofia ai i le mauaina o le uiga faalemafaufau sa ia Keriso Iesu? O le mataupu e 15 o le tusi a Paulo i uso i Roma e fesoasoani ia i tatou e taliina lena fesili. I uluaʻi fuaiupu o lenei mataupu, o loo faasino atu ai Paulo i se uiga matilatila o Iesu ina ua ia faapea mai: “O i tatou o e malolosi ia tatou fesoasoani i le vaivai o e ua le lavā e tatau ai; a e aua neʻi faafiafia i o tatou lava loto. Auā ia  taitasi o i tatou ma faafiafia i lē la te tuaoi ina ia lelei ai o ia, e faamafanafanaina [“atiina aʻe,” NW] ai. Auā o Keriso lava e lei faafiafia o ia i lona lava finagalo; a e pei ona tusia, Ua oo mai ia te au upu faifai a latou e na faifai atu ia te oe.”—Roma 15:1-3.

⁵ I le faataʻitaʻi atu i le uiga o Iesu, ua faalaeiauina ai Kerisiano ina ia sauniuni e auauna atu ma le lotomaulalo i manaʻoga o isi na i lo le mananaʻo e faamalie o latou lava manaʻoga. O le mea moni, o lena naunautaʻi ma le lotomaulalo e auauna mo isi o se uiga e mātaulia ai i latou “o e malolosi.” O Iesu, o lē sa sili atu lona malosi faaleagaga na i lo se isi lava tagata na soifua mai, na ia fetalai e faatatau ia te ia lava e faapea: “O le Atalii o le tagata e lei sau ia ina ia auauna mai tagata ia te ia, a ia auauna atu ia, ma foaiina atu lona ola e fai ma togiola e sui aʻi tagata e toatele.” (Mataio 20:28) Ona o i tatou o Kerisiano, ua faapena foʻi ona tatou mananaʻo e fai taumafaiga ina ia auauna atu i isi, e aofia ai “o e ua le lavā.”

6. O le ā le auala e mafai ona tatou faataʻitaʻi ai i le tali atu a Iesu i teteega ma le faalumaina?

⁶ O le isi uiga lelei e mātaulia ai Iesu sa ia faaalia o se ituaiga o mafaufauga ma gaoioiga na mautinoa i taimi uma. Sa lē taitai ona faatagaina uiga lē mautinoa o isi e taaʻina ai ona lava uiga lelei i le auauna atu i le Atua; ma e lē tatau foʻi ia i tatou ona faia faapea. Ina ua faalumaina ma sauāina ona o le tapuaʻi atu ma le faamaoni i le Atua, sa tumau ma le onosai Iesu e aunoa ma se faitio. Na ia silafia o teteega mai se lalolagi lē talitonu ma le lē malamalama e mafai ona faatalitalia e i latou o ē taumafai e faafiafia o latou tuaoi i mea e “lelei ai o ia, e atiina aʻe ai.”

7. Na faaalia faapefea e Iesu le onosai, ma aiseā e tatau ai ona tatou faaalia lea lava uiga?

⁷ Sa faaalia e Iesu se uiga talafeagai i isi foʻi auala. Sa lē taitai faaalia sona lē onosai ia Ieova ae sa ia faatalitali ma le onosai i le taimi o le a faagaoioia ma faataunuuina ai Ana fuafuaga. (Salamo 110:1; Mataio 24:36; Galuega 2:32-36;  Eperu 10:12, 13) E lē gata i lea, sa lava pea le onosai o Iesu i ona soo. Na ia taʻu atu ia i latou: “Ia outou faaaʻoaʻo ia te au”; talu ai sa “agamalu” o ia, o lea na avea ai lana faatonuga o se faamalosiauga ma faafouina ai. Ma talu ai sa “loto maulalo” o ia, na lē taitai ai lava mitamitavale pe faualuga o ia. (Mataio 11:29) Ua faalaeiauina i tatou e Paulo ina ia faataʻitaʻi atu i nei vala o le uiga o Iesu ina ua ia fetalai: “Ia ia te outou foi lea lava manatu sa ia Keriso Iesu, o ia sa uiga faatasi ma le Atua, e lei manatu ia o se mea faoa ina ia tusa lava o ia ma le Atua; a ua faamaulalo e ia ia te ia, ua uiga o ia faatasi ma le pologa, ina ua faia o ia faapei o se tagata.”—Filipi 2:5-7, LT.

8, 9. (a) Aiseā e tatau ai ona tatou galulue ina ia ati aʻe se uiga lē manatu faapito? (e) Aiseā e lē tatau ai ona tatou lotovaivai pe afai ua lē mafai ona tatou mulimuli atoatoa i le faaaʻoaʻoga na faataatia e Iesu, ma na faapefea ona avea Paulo ma faaaʻoaʻoga lelei i lenei itu?

⁸ E faigofie ona faapea atu tatou te mananaʻo e auauna i isi ma mananaʻo e faamuamua o latou manaʻoga na i lo tatou. Peitaʻi o se iloiloga faamaoni o o tatou uiga faalemafaufau e ono iloa ane ai e lē o matuā uaʻi atoatoa atu o tatou loto i lena lagona. Aiseā ua leai ai? Muamua, talu ai ua tuufaasolo mai ia i tatou uiga manatu faapito o Atamu ma Eva; lona lua, talu ai o loo tatou ola i se lalolagi o loo uunaʻia ai le manatu faapito. (Efeso 4:17, 18) O le faatupuina o se uiga lē manatu faapito e masani lava ona uiga i le ati aʻe ai o se ituaiga o mafaufauga e feteenaʻi ma lo tatou tulaga moni lē lelei atoatoa na fananau mai ma i tatou. O lena tulaga e manaʻomia ai le maumauaʻi ma taumafaiga.

⁹ O le manino mai o lo tatou tulaga lē lelei atoatoa, lea e matuā eseese lava ma le tulaga lelei atoatoa sa faataatia e Iesu mo i tatou, e iai nisi taimi e ono avea ai ma pogai o lo tatou lotovaivai. Tatou te ono masalosalo pe faamata e mafai ona tatou maua le uiga faalemafaufau lava lea e tasi sa iai foʻi ia Iesu. Peitaʻi seʻi mātau upu faalaeiau a Paulo: “Ua ou iloa e leai se mea lelei ua nofo i totonu ia te au, o loʻu tino lea; auā ua ia te au le loto atu, a ou te lei iloa ona fai o le mea lelei; auā ou te le faia o le mea lelei ou te loto i ai, a o le mea leaga ou te le loto i ai, o le mea lea ou te faia. Auā ou te fiafia i le tulafono a le Atua i le tagata i totonu. A ua ou iloa le tulafono ese i oʻu tino, o loo tau le taua i le tulafono a loʻu mafaufau, ua fai foi aʻu ma tagata o taua i le tulafono a le agasala o loo i oʻu tino.” (Roma 7:18, 19, 22, 23) O le mea moni, o le lē lelei atoatoa o Paulo na taofia soo ai o ia mai lona tauaveina o le finagalo o le Atua e pei ona ia faanaunau i ai, peitaʻi o ona uiga—le auala sa ia mafaufau ma lagona ai e faatatau ia Ieova ma Lana tulafono—sa avea o se faaaʻoaʻoga. E mafai foʻi ona tupu ia i tatou lena mea.

Faasaʻoina o Uiga Sesē

10. O le ā le uiga faalemafaufau na faalaeiauina e Paulo uso i Filipi ina ia latou ati aʻe?

¹⁰ Faamata e ono manaʻomia e nisi ona faasaʻoina se uiga sesē o ia i latou? Ioe. Sa manino le moni o lenei manatu i nisi Kerisiano i le uluaʻi senituri. I lana tusi na avatu i uso i Filipi, sa taʻua ai e Paulo le iai o le uiga saʻo. Na ia tusi e faapea: “E le peiseai ua ou maua nei, [le soifuaga faalelagi e ala mai i le uluaʻi toetū] po ua ou atoatoa ona lelei nei; a ou te tausisi atu pea pe mafai ona ou maua o le mea na maua ai aʻu e Keriso Iesu. Le au uso e, ou te le manatu ua ou maua, a o le mea e tasi ou te faia, ou te faagalogalo i mea ua tuanaʻi, ou te momoʻe punou aʻi foi i mea o lumanai, ou te tausisi atu i le faailoga, ia maua ai le taui na valaauina ai aʻu mai lugā e le Atua ia Keriso Iesu. O lenei, o i tatou uma o e ua fai ma tagata matua, ia tatou manatunatu faapena.”—Filipi 3:12-15, LF.

11, 12. I ā auala ua faaali mai ai e Ieova ia i tatou se uiga faalemafaufau e talafeagai?

¹¹ E faaalia i upu a Paulo faapea o so o se tasi lava, ina ua māeʻa ona avea ma Kerisiano, e lē o ia te ia se faalogona e fia agaʻigaʻi i luma o lona uiga o loo ia te ia se uiga lē lelei. O lona uiga e lē o ia te ia le uiga faalemafaufau o Keriso. (Eperu 4:11; 2 Peteru 1:10; 3:14) Po ua aunoa ea la lena tagata ma se faamoemoe? E matuā leai lava. E mafai e le Atua ona fesoasoani mai ia i tatou ina ia suia o tatou uiga pe afai tatou te mananaʻo moni i ai. Ua faapea mai atili Paulo: “Afai . . . e ese so outou manatu i se isi itu, o le a outou maua se faaaliga mai le Atua e faatatau i ai.”—Filipi 3:15, LF.

¹² Ae peitaʻi, pe afai tatou te mananaʻo ia faaali mai e Ieova ia i tatou le uiga talafeagai, e ao la ona  fai la tatou vaega. O le suʻesuʻeina faatasi ma le tatalo o le Afioga a le Atua faapea ma le fesoasoani a lomiga faa-Kerisiano ua saunia mai e “le auauna faamaoni ma le mafaufau” o le a mafai ai e i latou ua ‘ese so latou manatu’ ona ati aʻe se uiga talafeagai. (Mataio 24:45) O le a fiafia toeaina Kerisiano, ua tofia e le agaga paia “ia leoleo atu i le ekalesia a le Atua,” e lagolago mai. (Galuega 20:28) Maʻeu lo tatou agaga faafetai ona o loo amanaʻia e Ieova o tatou tulaga lē lelei atoatoa ma ofoina mai ai ma le agalelei le fesoasoani ia i tatou! Seʻi o tatou talia loa.

Aʻoaʻoina Lesona Mai Isi

13. O le ā tatou te aʻoaʻoina e faatatau i se uiga talafeagai mai le tala a le Tusi Paia e faatatau ia Iopu?

¹³ I le Roma mataupu e 15, o loo faaalia ai e Paulo faapea o le faataʻitaʻi atu i faaaʻoaʻoga mataʻina anamua e mafai ona fesoasoani ia i tatou e toe fetuunaʻi ai o tatou uiga. Ua ia tusi mai e faapea: “O mea uma . . . na tusia anamua, na tusia ia e aʻoaʻo mai ai ia te i tatou; ina ia tatou maua le faamoemoe e tupu mai i le onosai, ma le faamafanafana mai o Tusi.” (Roma 15:4) O nisi o auauna faamaoni a Ieova i taimi ua teʻa sa manaʻomia ona latou faasaʻo ni vala patino o o latou uiga. Mo se faaaʻoaʻoga, i le tulaga lautele lava ia, sa iai ia Iopu se uiga lelei. Sa lē taitai ona tuuaʻia se mea leaga ia Ieova, ma na lē taitai ona faatagaina ona mafatiaga ina ia maluelue ai lona mautinoa i le Atua. (Iopu 1:8, 21, 22) Peitaʻi, sa ia te ia se faanaunauga ina ia taʻutonuina ia lava. Sa taʻitaʻiina mai e Ieova Eliu ina ia fesoasoani ia Iopu e toe faasaʻo lenei faanaunauga. Sa leʻi tigā Iopu i le aʻoaʻiga ae na ia talia ma le lotomaulalo le manaʻoga ina ia suia ona uiga ma nofosauni e toe faasaʻo.—Iopu 42:1-6.

14. E mafai faapefea ona tatou faapei o Iopu pe a fautuaina i tatou e tusa ai o o tatou uiga?

¹⁴ Pe o le a tatou faaalia ea le uiga lea na faaalia e Iopu pe afai e taʻu mai ma le agalelei e se uso Kerisiano ia i tatou faapea, ua iai ni faamaoniga o se uiga lē lelei ua aliali atu ia i tatou? Tau ina ia tatou pei o Iopu, ia aua lava neʻi o tatou ‘taʻu valeina le Atua.’ (Iopu 1:22) Pe afai tatou te puapuagatia i se faiga lē tonu, seʻi aua lava neʻi o tatou faitio pe tuuaʻia Ieova i ni faigatā e oo mai ia i tatou. Tau ina ia tatou ʻalofia le taumafai e taʻutonuina i tatou lava, i le manatua faapea, e tusa lava po o ā o tatou faaeaga atonu o iai i le auaunaga a Ieova, ae o loo avea pea i tatou o ni “auauna le aoga.”—Luka 17:10.

15. (a) O le ā le uiga sesē sa iai i nisi soo o Iesu? (e) Na faapefea ona faaalia e Peteru se uiga lelei?

¹⁵ A o faagasolo le uluaʻi senituri, na faaalia ai e nisi o ē na faalogologo ia Iesu se uiga lē talafeagai.  I se tasi taimi, na faia ai e Iesu se faamatalaga sa faafaigatā ona malamalama i ai. I le tali atu, “ua faalogologo ai isi ona soo e toatele, ona faapea ai lea o i latou, ‘O le upu faigata lena; o ai ea se na te mafaia ona faalogologo i ai?’” O i latou na tautatala faapenei e manino mai lava le sesē o le uiga sa ia i latou. Ma o o latou uiga sesē na māfua ai ona latou lē fia faalogo atu ia Iesu. Ua faapea mai le tala: “Talu ai ua o ese isi o ona soo e toatele i tua, a e lei toe feoai i latou ma ia.” Pe o tagata uma lava sa leaga o latou uiga? E leai. Ua faaauau mai le tala: “Ona faapea atu lea o Iesu i le toasefulu ma le toalua, ‘Pe tou te fia o ese foi?’ Ona tali mai lea o Simona Peteru ia te ia, ‘Le Alii e, a matou o ea ia te ai?’” Lona uiga o lea na toe tali e Peteru lana lava fesili: “O ia te oe upu o le ola [e] faavavau.” (Ioane 6:60, 66-68) Maʻeu se uiga lelei! Pe a tatou fesagaʻi ma ni faamatalaga po o ni toe faasaʻosaʻoga i le malamalamaga o le Tusi Paia atonu e faigatā ona tatou taliaina i le uluaʻi taimi e oo mai ai, pe lē o se mea lelei ea le faaalia o le uiga lea na faaalia e Peteru? Pagā le valea pe afai o le a taofia le toe auauna atu ia Ieova pe tautala i se uiga e feteenaʻi ma le “matua o upu e ola ai” ona o ni mea sa muaʻi faigatā ona malamalama i ai!—2 Timoteo 1:13.

16. O le ā se uiga e faateʻia ai na faaalia e taʻitaʻi lotu Iutaia i aso o Iesu?

¹⁶ Sa leʻi taulau i taʻitaʻi lotu Iutaia o le uluaʻi senituri ona latou faaalia le uiga faalemafaufau lea sa ia Iesu. O la latou filifiliga maumauaʻi e lē faalogo atu ia Iesu sa faaalia mai ina ua faatū aʻe e Iesu Lasalo mai le oti. So o se tasi lava e ia te ia se uiga lelei, na tatau ona avea lena vavega ma faamaoniga maumaututū o le auina mai o Iesu e le Atua. Peitaʻi, tatou te faitau i ai e faapea: “Ona faapotopoto lea o le fono e le au ositaulaga sili ma le au faresaio, ua latou faapea ane, ‘Se a sa tatou mea e fai? Auā ua faia faailoga e tele e lea tagata. Afai e faapenei ona tatou tuu ai pea o ia, e talia o ia e tagata uma lava; e o mai foi tagata Roma, ona faaumatia lea o la tatou nei mea atoa ma lo tatou nuu.’” O le ā sa latou vaifofō? “Talu foi i lea aso ua latou taupulepule ai e fasioti ia te ia.” E lē gata i le taupulepule e fasiotia Iesu, ae na latou taumafai foʻi e faatamaʻia le faamaoniga olaola o lona avea ma sē e faia vavega. “A ua taupulepule le au ositaulaga sili, e fasioti foi ia Lasalo.” (Ioane 11:47, 48, 53; 12:9-11) Pagā se inosia pe afai tatou te faatupuina se uiga faapena ma tatou lē malilie pe feita i ni mea sa tatau moni lava ona tatou olioli ai! Ioe, ae pagā foʻi le mataʻutia!

Faataʻitaʻi i le Uiga Mautinoa o Keriso

17. (a) I lalo o ā tulaga na faaalia ai e Tanielu se uiga lē fefe? (e) Na faapefea ona faaalia e Iesu lona lototele?

¹⁷ E tausisia e auauna a Ieova se uiga mautinoa. Ina ua faufau fili o Tanielu e pāsia se tulafono e faasā ai mo aso e 30 ona toe faia ni olega i se isi atua pe i se isi tagata seʻi vaganā le tupu, sa iloa lelei e Tanielu o lenei mea o le a solia ai le la faiā ma Ieova le Atua. Pe o le a taofia ea lona tatalo atu i le Atua mo aso e 30? E leai, sa ia faaauau pea ma le lē fefe ona tatalo atu ia Ieova e faatolu taimi i le aso, e pei ona ia masani ai. (Tanielu 6:6-17) Na faapena foʻi ona lē fefe Iesu i ona fili. I se tasi aso Sapati, sa la fetaiaʻi ai ma se tamāloa e pē lona lima. Na silafia e Iesu e toʻatele tagata Iutaia sa iai iinā o le a lē fiafia pe afai na te faamālōlōina se tasi i le aso Sapati. Ona ia fesili saʻo atu lava lea i ai ina ia faaali mai ni o latou manatu i le mataupu. Ina ua latou mumusu, ona faamālōlō loa lea e Iesu le tamāloa. (Mareko 3:1-6) Sa lē taitai solomuli Iesu i le faataunuuina o lona tofiga sa ia lagona o se mea e talafeagai ona fai.

18. Aiseā e tetee mai ai nisi ia i tatou, peitaʻi e tatau faapefea ona tatou tali atu i o latou uiga lē lelei?

¹⁸ E iloa lelei e Molimau a Ieova i aso nei le lē tatau foʻi ia i latou ona fefefe i tali lē lelei mai a tagata tetee. Pe afai latou te fefefe, o lona uiga o le a  latou lē faaalia le uiga faalemafaufau sa ia Iesu. E toʻatele tagata e tetee i Molimau a Ieova, o nisi e tetee talu ai latou te lē o iloa lelei mea moni, a o isi ona o lo latou feita i Molimau po o la latou feʻau. Ae seʻi aua lava neʻi o tatou faataga o latou uiga lē faaleuō e aafia ai fua o tatou uiga mautinoa. E lē tatau lava ona tatou faataga isi e puleaina le auala o loo tatou tapuaʻi ai.

19. E mafai faapefea ona tatou faaalia le uiga faalemafaufau lea sa ia Iesu Keriso?

¹⁹ Sa faaalia pea e Iesu se uiga mautinoa faalemafaufau i ona soo ma i faatulagaga a le Atua, e tusa lava pe sa faigatā le faia o lena mea. (Mataio 23:2, 3) E ao ona tatou faataʻitaʻi i lana faaaʻoaʻoga. O le mea moni, e lē lelei atoatoa o tatou uso, ae faapena foʻi i tatou. Ma o fea lava se isi mea e mafai ona tatou maua i ai ni aumea e sili atu ona lelei ma ni uō e matuā faamaoni na i lo o lo tatou lava ʻauuso i le lalolagi aoao? E leʻi oo ina tuuina mai e Ieova ia i tatou se malamalamaga atoatoa o lana Afioga tusia, ae pe iai ea se isi vaega faalotu o sili atu so latou malamalamaga? Tau ina ia iai pea ia i tatou le uiga tonu faalemafaufau, le uiga faalemafaufau lea sa ia Iesu Keriso. O se tasi o mea e aofia ai, o lona silafia lea o le auala e faatalitali atu ai ia Ieova, e pei ona o le a tatou talanoaina i le mataupu o sosoo mai.

[Faamatalaga pito i lalo]

Pe Mafai Ona E Faamatala?

• Ua faapefea ona aafia o tatou olaga i o tatou uiga?

• Faamatala mai le uiga faalemafaufau o Iesu Keriso.

• O le ā se mea e mafai ona tatou aʻoaʻoina mai uiga o Iopu?

• O le ā le uiga saʻo e tatau ona iai a o fesagaʻi ma teteega?

[Fesili mo le Suʻesuʻega]

[Ata i le itulau 7]

O se Kerisiano o loo iai le uiga saʻo e taumafai e fesoasoani atu i isi

[Ata i le itulau 9]

O le suʻesuʻeina o le Afioga a le Atua faatasi ma le tatalo e fesoasoani ia i tatou ina ia maua ai le uiga faalemafaufau sa ia Keriso