Pe Mafai Ona E Faatalitali?

FAAMATA e mafai ona e faaata i lou mafaufau le tele o le taimi o loo faaalu e tagata i tausaga taʻitasi i le tau lava ina faatalitali? Latou te faatalitali i laina i faleoloa po o le pamu penisini. Latou te faatalitali seʻi oo i le taimi e maua ai a latou taumafataga i le faleʻaiga. Latou te faatalitali seʻi oo i le taimi e vaai ai le fomaʻi po o le fomaʻi nifo. Latou te faatalitali mo pasi ma nofoaafi. Ioe, e tele lava se taimi o le olaga o le tagata o loo faaalu e faatalitalia mea e tutupu. E tusa ai o se tasi iloiloga, i le na o Siamani lava ia, e faaalu ai le 4.7 piliona itula i se tausaga i le na o le faatalitali lava pe a poloka taavale i le alatele! Fai mai se tasi tagata, e tusa o itula nei e mafai ona faatalitalia e ola ai le pe ā o le 7,000 tagata.

E mafai ona avea le faatalitali o se mea e tigā ai. I nei aso, ua lē o mafai ona toe lava se taimi e fai ai mea uma, ma i le manatu atu i isi mea ia ua tatau ona tatou faia, e mafai ona avea ai le faatalitali o se mea e tigā ai. Na faapea mai se tusitala e suafa ia Alexander Rose: “O le tele o mea e tigā ai i le olaga e māfua mai le faatalitali.”

Sa silafia e le faitōfā Amerika o Benjamin Franklin e faapea e mafai foʻi ona taugatā le faatalitali. I le sili atu i le 250 tausaga talu ai, sa ia mātauina ai e faapea: “O le taimi e pei lava o le tupe.” O le māfuaaga lena e saʻilia ai e pisinisi ia auala e ʻalofia ai le telegese o le faagasologa o galuega e aunoa ma se māfuaaga tatau. A tele mea e mafai ona fai i se taimi puupuu o lona uiga ua tele tupe faasili. O pisinisi o loo latou tautuaina tuusaʻo lava le lautele ua taumafai e ofo atu se auaunaga faavavevave e pei o—taumafa e saunia faavavevave i le taimi lava e manaʻomia ai, o teugatupe i se auala e mafai ona alu atu se tasi i lana taavale faaaogā masini o le faletupe e aunoa ma le tau oso i fafo ma le taavale, ma isi lava mea—auā ua latou iloa o le faamalieina o tagata e aofia ai le faaitiitia o le taimi e faatalitali ai.

Faamaʻimauina o o Tatou Olaga

I se tasi taimi sa faitio mai ai le fatusolo Amerika o le sefuluiva senituri o Ralph Waldo Emerson e faapea: “Paga le tele o le vaega o le olaga o le tagata  o loo maʻimau i le faatalitali!” Talu ai nei lava, na faitio ai le tusitala o Lance Morrow e faatatau i le fiu ma le lē mautonu o lenei mea o le faatalitali. Ona ia talanoa lea e faatatau i “le tigā iloagatā o le faatalitali.” O le ā na ia uiga i ai? “O le iloaina lea e faapea o le alagaʻoa sili ona tautele a se tasi, le taimi, o se vaega o le olaga o se tasi, ua aveesea, o se mea ua leiloa e lē toe maua mai.” E faanoanoa e fai atu, peitaʻi o le mea moni. O le taimi ua leiloa ona o le faatalitali e lē toe maua mai.

O le mea moni lava ia, ana lē puupuu le olaga, semanū e lē avea le faatalitali o se mea e manatu mamafa i ai. Peitaʻi e puupuu le olaga. Na taʻua e le faisalamo, ua faitau afe nei tausaga talu ai: “O tausaga o matou olaga e fitugafulu ia tausaga; a e afai e valugafulu tausaga ona o le malosi, a o lo latou malosi o i ai le tiga ma le puapuaga; auā e vave ona mavae atu ia, ma matou lele ese.” (Salamo 90:10) Po o fea lava o tatou ola ai ma po o ai foʻi i tatou, o o tatou ola—o aso, o itula, o minute o loo i o tatou luma talu mai le taimi na tatou fananau mai ai—e tapulaa. Ae ui i lea, e lē mafai ona tatou ʻalofia tulaga ia e tatau ai ona tatou faamaʻimau nisi o na taimi tāua e faatalitali ai i tagata po o mea tutupu.

Faamasani i le Auala e Faatalitali Ai

O le toʻatele o i tatou ua oo i le tulaga o le faimalaga i se taavale o loo aveina e se avetaavale o lē e taumafai lava e pāsia so o se taavale e muamua atu ia te ia. E masani lava, e leai se manaʻoga faanatinati na te faia ai faapea—e leai se mea patino o nanati i ai le avetaavale. Ae ui i lea, e lē mafai ona ia onosaia le manatu faapea o loo taofiofia lona alualu i luma ona o le isi avetaavale. O le leai o sona onosai ua faamaonia mai ai e leʻi faamasani lea tagata i le uiga o le faatalitali. Faamasani? Ioe, o le faamasani e faatalitali o se lesona e ao ona aʻoaʻoina. E leai se tasi na fanau mai ma le tomai e mafai ai ona faatalitali. E manaʻomia e pepe le uaʻi vave atu loa ia i latou pe a fia ʻaai po o se mea ua mananaʻo ai. Seʻiloga lava ua matutua ona latou malamalama lea o nisi taimi e ao ona latou faatalitali mo mea latou te mananaʻo ai. O lona uiga la, ona o le faatalitali o se vaega o le olaga e lē mafai ona ʻalofia, o le faamasani la e faatalitali ma le onosai pe a manaʻomia o se faailoga e iloa ai se tagata matua.

O le mea moni lava ia, e iai tulaga faanatinati e ono talafeagai ai le lē onosai. E talafeagai le lē onosai o se tane talavou pe a tulaʻi mai se tulaga e faatuai ai a o faanatinati atu e ave lana avā i le falemaʻi ona ua toeitiiti fanau mai le la pepe fou. O agelu ia sa nanati atu ia Lota e tuua loa Sotoma sa leʻi mananaʻo e faatalitali a o faatuatuai Lota. Ua oo mai le faaumatiaga, ma sa lamatia ai ola o Lota ma lona aiga. (Kenese 19:15, 16) Peitaʻi, i le tele lava o mea tutupu, e lē o lamatia ola o tagata i taimi e ao ai ona latou faatalitali. I taimi la na, e ono sili atu ona lelei le tulaga o mea pe afai e faamasani ona onosai tagata uma—e tusa lava pe na māfua le faatalitali ona o le faatamala o se isi ia po o le leai foʻi o se popole mai. E lē gata i lena, o le a faigofie ona onosai pe a faamasani tagata uma e faaaogā le taimi o loo faatalitali ai i se auala aogā. O le pusa i le itulau e 5 o loo iai nisi o fautuaga i le faaaogāina o le taimi e faatalitali ai ia lē gata i le onosaia ae ia aogā.

Aua neʻi faagaloina o le agaga o le lē onosai atonu e faailoa mai ai se uiga fiatagata, le manatu faapea o ia e tāua tele e lē tatau ona umi o faatalitali. So o se tasi o iai lena uiga, e tāua le manatu i upu nei mai le Tusi Paia: “E sili ona lelei o le ua onosai i le ua loto faamaualuga.” (Failauga 7:8) O le faamaualuga, po o le faasausili, o se uiga faaletagata ua fai ma vaivaiga matuiā, ma ua fai mai le faataoto faale-Tusi Paia: “E inosia e Ieova atoa uma e ua loto faamaualuga.” (Faataoto 16:5) O le faamasani la e onosai—faamasani e faatalitali—atonu e manaʻomia ai le iloilo lelei o i tatou lava ma la tatou faiā ma tagata o loo tatou faifaimea faatasi.

E Tauia le Onosai

E masani lava ona faigofie ona tatou faatalitali pe afai tatou te iloa e talafeagai le mea o loo tatou faatalitali i ai ma o le a oo moni mai lava. I lenei la tulaga, e lelei le manatunatu i le mea moni e faapea o tagata tapuaʻi faamaoni uma lava i le Atua o loo faatalitali i le faataunuuga o ana folafolaga matagofie o loo i le Tusi Paia. Mo se faaaʻoaʻoga, ua taʻu mai ia i tatou i se salamo faagaeeina tauatua e faapea: “E fai lava le nuu mo tagata amiotonu, e nonofo ai pea i latou.” Sa toe faaleo mai foʻi e le aposetolo o Ioane lenei folafolaga ina ua ia faapea mai: “A o lē fai le finagalo o le Atua, e tumau lea e faavavau.” (Salamo 37:29; 1 Ioane 2:17) E manino lava la, pe a na fai e mafai ona tatou ola e faavavau, e lē o se faafitauli telē le faatalitali. Peitaʻi tatou te lē o ola e faavavau i le taimi nei. Faamata la o se mea ua talafeagai le talanoa i le ola e faavavau?

 A o leʻi avatua se tali, ia manatua na foafoaina e le Atua o tatou uluaʻi mātua faatasi ai ma le avanoa e ola ai e faavavau. Na faatoʻā leiloa lena avanoa mo i laʻua atoa ai ma la fanau—e aofia ai ma i tatou—ina ua la agasala. Peitaʻi, ina ua faatoʻā uma lava ona la agasala, na faasilasila mai ai e le Atua lana fuafuaga e toe suia ai iʻuga o lo la lē usiusitai. Sa ia folafolaina le oo mai o le “fanau,” lea na faamaonia o ia lea o Iesu Keriso.—Kenese 3:15; Roma 5:18.

Pe tatou te maua taʻitoʻatasi aogā mai le faataunuuga o ana folafolaga, o la tatou lava filifiliga lena e fai. Ina ia tatou faia lea mea e manaʻomia ai le onosai. Ina ia fesoasoani ia i tatou e faamasani i lea ituaiga onosai, ua faalaeiauina i tatou e le Tusi Paia ina ia manatunatu loloto i le faaaʻoaʻoga a se faifaatoʻaga. Pe a uma ona totō ana fatu e manaʻomia ona faatalitali ma le onosai—fai le mea na te mafaia e puipuia ai lana faatoʻaga—seʻi oo i le taimi o le seleselega. O le taimi lena e tauia ai lona onosai, ina ua ia vaai i fua o ana galuega. (Iakopo 5:7) Sa taʻua e le aposetolo o Paulo se isi faaaʻoaʻoga o le onosai. Sa ia faamanatu mai ia i tatou ia tane ma fafine faatuatua anamua. Sa latou vaavaai i luma i le faataunuuga o fuafuaga a le Atua, peitaʻi sa tatau ona latou faatalitali i le taimi atofaina a le Atua. Sa faalaeiau mai Paulo tatou te faaaʻoaʻo ia i latou na, “e ua maua i le faatuatua ma le onosai mea na folafolaina.”—Eperu 6:11, 12.

Ioe, o le faatalitali o se vaega o le olaga e lē mafai ona ʻalofia. Peitaʻi e lē tatau ona avea ma faapogai faifai pea o le tigā. Mo i latou o loo faatalitali atu i le faataunuuga o folafolaga a le Atua, e mafai ona avea o se puna o le olioli. E mafai ona latou faaaogā le taimi lea e faatalitali ai e ati aʻe ai se faiā vavalalata ma le Atua atoa ma le faia o galuega e faataʻitaʻia mai ai lo latou faatuatua. Ma e ala i le tatalo, i suʻesuʻega, ma le manatunatu loloto, e mafai ona latou ati aʻe ai se mautinoa lē maluelue i mea uma ua folafola mai e le Atua e faapea o le a faataunuuina i lona lava taimi.

[Pusa i le itulau 5]

FAAITIITIA MAFATIAGA O LE FAATALITALI!

Ia fuafua mamao mo mea e tutupu mai! Afai e te iloa o le a e faatalitali, sauniuni se mea e faitau, e tusi, e lalaga, pe kolosē, ia po o le fai o nisi gaoioiga e aogā.

Faaaogā le taimi e manatunatu loloto ai, o se tasi lea o mea ua matuā faigatā lava ona fai i lo tatou lalolagi ua tele mea e ao ona fai.

Tuu i tafatafa o le telefoni ni mea e ono faitau e mafai ona faaaogā pe a umi le taimi e te faatalitali ai; i le lima po o le sefulu minute, e mafai ona e faitauina ai ni nai itulau.

Pe afai e toʻatele nisi o tou faatalitali, faaaogā le avanoa, pe a talafeagai, i le amataina o ni talanoaga ma isi ma fetufaaʻi i ni manatu e ati aʻe ai ma i latou.

Tuu se api e fai ai au faamaumauga po o se tusi faitau i lau taavale e faaaogā pe a teʻi ua faafuaseʻi ona e faatalitali i se taimi.

Moeiini ou mata, toʻa lelei aua le gaoiā, ia po o le tatalo.

O LE TAULAU MANUIA I LE FAATALITALI E FAALAGOLAGO LAVA I AUALA O LOO MAFAUFAU AI ATOA MA LE UTAGA MAMAO.