Se Saʻiliga Tauia ua Loa Ona Fai

“IEOVA? O ai Ieova?” Na vaaia e Silivia ua valu tausaga le matua lena suafa i se Tusi Paia Aminia, o se ʻoa tāua a se aiga na faaalia atu e se tasi teineitiiti ia te ia. Sa ia fesilisili solo, ae leai ma se tasi i Yerevan, i Aminia, le mea sa ia nofo ai na mafai ona ia taʻu atua po o ai Ieova—e lē iloa e ona mātua, lona faiaʻoga, e oo lava foʻi i faifeʻau o le lotu i lena vaipanoa latou te lē iloa foʻi.

Na tuputupu aʻe Silivia, faaiʻuina ana aʻoga ma maua sana galuega, ae sa leʻi mafai lava ona ia iloa po o ai Ieova. I le avea ai o se tamaʻitaʻi talavou, sa ao ai ona ia sola ese mai Aminia, ma ina ua mavae ni nai taimi sa nofo ai o ia i Polani, i se tamaʻi potu faatasi ma nisi tagata sulufaʻi. O se tasi o i latou ia latou te potu faatasi e masani lava ona asiasi atu i ai nisi. Na fesili atu Silivia: “O ai au malo ia e asiasi mai?” “O i latou o Molimau a Ieova, e ō mai e aʻoaʻo mai le Tusi Paia ia te aʻu,” o le tali mai lea a le tagata.

Sa matuā faatumulia le loto o Silivia i le fiafia ina ua ia faalogo i le suafa o Ieova. Mulimuli ane, na amata ona ia aʻoaʻoina po o ai Ieova ma maʻeu se Atua agaalofa e iai o ia. E leʻi umi, ae ao loa ona ia tuua Polani. Sa ia saʻili atu mo se nofoaga saogalemu i Tenemaka, e āsā ai le Baltic Sea. Sa ia tauaveina tau lava o ni nai meatotino, ae e aofia ai i na mea se lomiga faale-Tusi Paia na lomia e Molimau a Ieova. I le pito i tua o se tasi o lomiga, na maua ai e Silivia se lisi o tuatusi o ofisa o lālā a le Sosaiete o le Olo Matamata. O se tasi lena o ana meatotino e sili ona tāua—lona piitaga ia Ieova!

I Tenemaka, na avatu ai Silivia i se nofoaga o tagata sulufaʻi, ma na vave lava ona ia saʻilia Molimau a Ieova. Mai lana lisi o tuatusi, na ia iloa ai o le ofisa o le lālā a le Sosaiete o le Olo Matamata i Tenemaka e i le taulaga o Holbæk. Ae o fea e iai lena nofoaga? Sa momoli Silivia i se isi nofoaga i se nofoaafi, ma a o malaga atu iinā, na pāsia ai e le nofoaafi ia Holbæk! O lea, na toe faagaeetia ai foʻi lona loto i le fiafia.

E leʻi leva lava lena mea i se aso mūgalā, na toe malaga atu ai Silivia i se nofoaafi i Holbæk ma ia savali atu ai mai le nofoaga e taunuu i ai nofoaafi agaʻi atu i le ofisa o le lālā. Na te manatua pea faapea: “Ina ua ou oo atu i le togalaau, sa ou nofo ifo i lalo i se nofoa ma ou faapea ifo ia te aʻu, ‘O le parataiso lenei!’” Sa faafeiloaʻia ma le māfana o ia i le lālā ma mulimuli ane na mafai ona faia ai lana lava suʻesuʻega faale-Tusi Paia.

Ae na iai foʻi isi nofoaga na siitia i ai o ia. Mai lea nofoaga mo tagata sulufaʻi i isi nofoaga na malaga atu ai Silivia, na ia saʻilia Molimau a Ieova ma toe faia ai pea lava pea lana suʻesuʻega faale-Tusi Paia. O lea, ina ua mavae tausaga e lua, ua lava ma totoe mea ua ia aʻoaʻoina ina ia mafai ai ona tuutoina atu lona ola ia Ieova. Sa papatisoina o ia ma e leʻi umi lava ae ulu atu loa i le faiva faataimi atoa. I le 1998 na tuuina atu ai e le malo o Tenemaka ia te ia se nofoaga saogalemu.

Ua 26 nei tausaga o Silivia ma o loo auauna i le nofoaga na faamanatu atu ai ia te ia le parataiso, le ofisa o le lālā o Molimau a Ieova i Tenemaka. Fai mai lana faamatalaga: “O le ā saʻu tala a fai? Ua loa ona ou saʻilia Ieova talu mai lava o oʻu teineitiiti. O lea ua ou mauaina o ia. Sa ou moemiti i le faaaluina o loʻu olaga i lana auaunaga, ma o lenei ua ou iai i Peteli. Ou te tatalo ia avea pea lea ma oʻu aiga mo le tele o tausaga o loo sau!”