Ua Lalata Mai “Tausaga e Toe Fuatai ai Mea”!

A o toeitiiti lava afio aʻe Iesu i le lagi, na fesili atu ai ia te ia nisi o ona soo faamaoni e faapea: “Le Alii e, o ona po nei ea e te toe fuatai mai ai le malo ia Isaraelu?” I le tali a Iesu na faaalia ai e faapea, o le a i ai se taimi e va ai a o leʻi oo mai le Malo. A o faagasolo lena taimi, e iai se galuega sili o le a faia e ona soo. Sa tatau ona latou molimau ia Iesu “i Ierusalema, ma Iutaia uma lava, ma Samaria, e oo lava i le tuluʻiga o le lalolagi.”—Galuega 1:6-8.

O LENA tofiga e lē mafai ona faataunuuina i na o ni nai aso, vaiaso, po o ni masina. Ae peitaʻi, e aunoa lava ma sina faalotolotolua o le ʻausoo, sa amata loa ona latou talaʻi. Ae latou te leʻi faagaloina foʻi le naunau i le mataupu e uiga i le toe fuataʻiina o mea. Na lauga atu le aposetolo o Peteru i ni tagata se toʻatele sa faapotopoto i Ierusalema e uiga i le toe fuataʻiina o mea i lona faapea atu: “Ina salamo ia ma liliu, ina ia sōloiesea a outou agasala, ina ia oo mai ai o tausaga e filemu ai mai luma o le Alii [o Ieova]; ina ia auina mai foi e ia le na muai talaʻiina ia te outou, o Iesu Keriso lea; e tatau ona nofo o ia i le lagi seia oo i tausaga e toe fuatai ai mea uma lava, ua fetalaia mai e le Atua i fofoga o ana perofeta paia uma lava talu mai anamuā.”—Galuega 3:19-21, LF.

O nei “tausaga e toe fuatai ai mea” sa tatau ona oo mai ai “o tausaga e filemu ai” mai ia Ieova. O le toe fuataʻiina o mea lea na valoia, sa tatau ona tupu i vaitaimi eseese e lua. Muamua, o le a iai se toe fuataʻiina e faafouina ai faaleagaga, lea o loo faagasolo nei. Lua, ona sosoo ai lea ma le faavaeina o se parataiso faaletino i le lalolagi.

Ua Amata le Taimi e Toe Fuataʻi ai Mea

E pei ona faailoa atu e le aposetolo o Peteru i lena motu o tagata i Ierusalema e faapea, ‘sa nofo Iesu’ i le lagi. O le tulaga lena sa iai seʻia oo i le 1914, ina ua maua e Iesu lona mana tautupu ma amata loa lana pulega i le avea ma Tupu tofia a le Atua. I lena taimi, na valoia ai e Peteru e faapea, o le a “auina mai” e Ieova lona Alo i se uiga e faapea, o le a Ia faatagaina Iesu e faia lana vaega i le avea o lē e autū i fuafuaga a le Atua. Ua faamatalaina e le Tusi Paia i se gagana faafaatusa le mea na tupu e faapea: “Ua fanau foi e [le faalapotopotoga faalelagi a le Atua] o le tama tane, [le Malo o le Atua i aao o Iesu Keriso] o le na te pule i nuu uma i le tootoo uamea.”—Faaaliga 12:5.

Ae sa leʻi iai se faanaunauga o atunuu e gauaʻi atu i le pulega a Keriso. O le mea moni na latou teteʻe i ona tagatanuu faamaoni, ua lauiloa i aso nei o Molimau a Ieova. I le pei o aposetolo o ē na muamua ia i latou, ua faia ai ma le lē faalotolotolua e Molimau “le mau ia Iesu.” (Faaaliga 12:17) Na mapuna aʻe ai teteega i le galuega sa faia e nei Kerisiano faamaoni i lea atunuu ma lea atunuu. I le 1918, na tuuina atu ai i faamasinoga faauluuluga o le ʻaufaigaluega i le ofisa ulu o le Sosaiete o le Olo Matamata i Brooklyn, Niu Ioka, i ni moliaga sesē ma faasalaina ai ma le lē tonu i le falepuipui mo ni taimi uumi. Mo se taimi, e foliga mai na toetoe lava a lē taulau  le galuega molimau atu faaonaponei lea e ao ona faia “e oo lava i le tuluʻiga o le lalolagi.”—Faaaliga 11:7-10.

Ae peitaʻi, i le 1919, na faasaʻolotoina ai ia sui o le ʻaufaigaluega i le ofisa ulu, ma mulimuli ane, na taʻumamāina ai i latou uma mai na moliaga sesē. Sa latou leʻi faamaumauina se taimi ae amata loa ona toe faia le galuega o le toe fuataʻiina faaleagaga. Talu mai lena taimi, sa olioli ai tagata o Ieova i se tulaga olaola faaleagaga sa leʻi faapea ona iai muamua.

Na faia se tauiviga tele ina ia aʻoaʻoina tagata o atunuu uma ina ia tausi i mea na poloaʻi mai ai Keriso i ona soo e faia. (Mataio 28:20) Maʻeu se faafouina ai i le vaai atu i nisi sa faaalia muamua uiga e pei o ni manu ua suia o latou manatu! Ua latou tō ese le tagata tuai lea na māfua ai ona faaalia ia uiga e pei o le “lotoa,” “upu leaga,” ma “upu matagā,” ma oofu i le tagata fou, “o le ua faafouina i le poto [“saʻo,” NW ], e faatatau ia foliga i le [Atua] na faia o ia.” I se uiga faaleagaga, ua faataunuuina ai upu a le perofeta o Isaia e oo lava i le taimi nei e faapea: “E nofo faatasi le luko [o se tagata o lē sa faaalia muamua uiga e pei se luko] ma le tamai mamoe [o se tagata ua faaalia uiga agamalu], e taoto foi le nameri faatasi ma le tamai ʻoti; e faatasi foi le tamai povi ma le leona taanoa atoa ma le manu peti.”—Kolose 3:8-10; Isaia 11:6, 9.

Se Isi Toe Fuataʻiina ua Lalata Mai!

E faaopoopo i le toe fuataʻiina lea ua iʻu ai i se parataiso faaleagaga i aso nei, ua matuā vave lava le oo mai o le taimi o le a avea ai lo tatou paneta ma parataiso faaletino. Sa avea se vaega laʻitiiti o lo tatou lalolagi ma parataiso ina ua tuu e Ieova o tatou tupuaga o Atamu ma Eva i le faatoʻaga i Etena. (Kenese 1:29-31) O le māfuaaga lena e mafai ai ona tatou fai atu o le a toe fuataʻiina le Parataiso. Ae peitaʻi, a o leʻi tupu lena mea, e tatau ona tafiesea mai le lalolagi ia lotu sesē e lē o faamamaluina le Atua. O faiga faapolotiki la a lenei lalolagi o le a faia lena mea. (Faaaliga 17:15-18) Ona sosoo ai lea ma le faaumatiaina o faiga faapolotiki ma faiga faapisinisi, faatasi ma i latou o loo lagolagoina. Mulimuli lava, o ē totoe o fili o le Atua—Satani le Tiapolo ma ana temoni—o le a taofiofia mo le afe tausaga—o le umi lena o le polokalame o le toe fuataʻiina o mea. A o faagasolo lena taimi, “e olioli ona o i latou le vao lafulafua, ma le nuu naumati; e fiafia le toafa, ma fua mai e pei o le aute.” (Isaia 35:1) O le a leai se mea e toe vevesi ai le lalolagi atoa. (Isaia 14:7) E oo lava i le faitau miliona o tagata ua maliliu o le a toe faafoʻisia mai i le ola i le lalolagi. O le a maua e tagata uma ia aogā toe fuataʻiina o le taulaga togiola. (Faaaliga 20:12-15; 22:1, 2) O le a lē toe iai ni tagata tauaso, tutuli, po o ni pipili i le lalolagi. “E le fai mai foi se tasi ua mau ai, Ou te maʻi.” (Isaia 33:24) I se taimi puupuu lava pe a uma le Afe Tausaga o le Pulega a Keriso, ona toe tatalaina mai lea o le Tiapolo ma ana temoni mo sina taimi puupuu ma o le a iloa ai le auala ua faataunuuina ai le fuafuaga a le Atua mo le lalolagi e oo atu i lena vaitaimi. I le iʻuga, o le a faaumatia ai i latou na e faavavau.—Faaaliga 20:1-3.

Pe a oo atu le lalolagi i le iʻuga o le afe tausaga o le toe fuataʻiina o mea, o le a vivii atu ia Ieova ia “mea uma lava e mānava,” ma o le a latou faia faapea e oo lava i le faavavau. (Salamo 150:6) Po o le a e iai faatasi ma i latou? E mafai ona e iai.