Aiseā e Ao ai Ona Faataulagaina Totino?

O Pili o se tamā tausiaiga ua 50 ma ona tupu ona tausaga e galue o se faiaʻoga i le mataupu tau i le fausiaina o fale. I le tausaga atoa, na te faaaluina ai le tele o vaiaso e fesoasoani ai i le fuafuaina ma le fausiaina o Maota o le Malo mo faapotopotoga a Molimau a Ieova. O Ema o se tuafafine nofofua e 22 tausaga le matua, na lelei ana aʻoga ma e agavaa foʻi. Na i lo le tuliloaina o ni sini totino ma le saʻilia o le faamalieina o ia lava, na ia faaaluina le silia ma le 70 itula i masina taʻitasi o se faifeʻau, i le fesoasoani atu i tagata ina ia malamalama i le Tusi Paia. O Malesi ma Peti ua faamālōlō litaea mai a la galuega. Na i lo le ola i se olaga faifai mālie i le taimi lenei, ua la siitia atu i se isi atunuu ina ia fesoasoani i tagata iinā e aʻoaʻoina le fuafuaga a le Atua mo le lalolagi.

O I LATOU uma nei na taʻua, latou te lē o vaai ia i latou o ni ē faapitoa pe e ese mai isi. O i latou o tagata pei lava o isi o loo latou faia le mea ua latou iloa e ono ma tatau ona fai. Aiseā ua latou faaalu ai o latou taimi, malosi, tomai, ma mea latou te maua mo manaʻoga o isi? O le mea ua uunaʻia ai i latou o se alofa loloto mo le Atua ma o latou tuaoi. O lenei alofa ua faatupuina ai i totonu ia i latou taʻitoʻatasi se agaga faataulagaina totino moni.

O le ā le uiga o le faaupuga agaga faataulagaina totino? Ina ia faataulagaina totino e lē tau manaʻomia ai le ola i se ituaiga o olaga e matuā faafitia ai e le tagata ona faanaunauga totino ma lē faamalieina ona manaʻoga. E lē manaʻomia le matuā teena e le tagata o ona faanaunauga lea e aveesea ai mai ia i tatou le olioli po o le faamalieina. E pei ona taʻua e le Shorter Oxford English Dictionary, o le uiga o le faataulagaina totino “o le lafoaʻia lea e se tasi o ona faanaunauga, mausa, ma tuʻinanauga, mo le lelei po o le manuia o isi.”

Iesu Keriso—Le Faaaʻoaʻoga Sili

O Iesu Keriso, le Alo pele e toʻatasi o le Atua, o le faaaʻoaʻoga sili lea o se tasi e iai se agaga faataulagaina totino. I lona soifuaga a o leʻi avea ma se tagata, sa ao ona matuā sili atu ona faagaeetia ma faamalieina lona olaga sa iai. Sa iai se la faiā vavalalata ma māfana ma lona Tamā ma faatasi ma foafoaga agaga. E sili atu i lena, sa faaaogā e le Alo o le Atua ona tomai i le faia o galuega ofoofogia o se “tufuga.” (Faataoto 8:30, 31) E mautinoa sa soifua o ia i se siʻomaga e matuā silisili atu i so o se mea lava e mafai ona maua ma olioli ai se tagata e sili ona mauoloa i le lalolagi. I le sosoo atu ia Ieova le Atua, sa ia te ia se tulaga faaeaeaina i le lagi.

 E ui i lea, na “faamaulalo [le Alo o le Atua] ia te ia, ua uiga o ia faatasi ma le pologa, ina ua faia o ia faapei o se tagata.” (Filipi 2:7, LT) Sa ia lafoaʻia ma le lotomalie avanoa uma na semanū na te maua ae avea ma tagata ma ofoina atu lona ola e avea o se togiola ina ia mafai ai ona tafiesea puapuaga na faapogaia e Satani. (Kenese 3:1-7; Mareko 10:45) O le uiga o lea mea o le sau lea e soifua faatasi ma tagata agasala i se lalolagi o loo toʻilalo i le pule a Satani le Tiapolo. (1 Ioane 5:19) E uiga atu foʻi i le onosaia lea o ni puapuaga ma ni faafitauli e oo totino i ai. Peitaʻi, po o le ā lava le tulaga e oo ia te ia, ae sa maumauaʻi pea Iesu Keriso ina ia faia le finagalo o lona Tamā. (Mataio 26:39; Ioane 5:30; 6:38) Na matuā tofotofoina i lenei tulaga le mea e gata mai ai le alofa ma le faamaoni o Iesu. O le ā le tele sa lotomalie e faataulagaina? Na faapea mai le aposetolo o Paulo: “Ua faamaulalo o ia e ia lava, ua na anaana ua oo ina maliu, o le maliu lava lea i le satauro.”—Filipi 2:8.

“Ia ia te Outou Foi Lenei Manatu”

Ua faalaeiauina i tatou ina ia mulimuli i le faaaʻoaʻoga a Iesu. Na timaʻi mai Paulo e faapea: “Ia ia te outou foi lenei manatu o ia Keriso Iesu.” (Filipi 2:5, LF ) E faapefea ona tatou faia lenei mea? O se tasi o auala o le “aua neʻi taitasi ma vaavaai i ana lava mea, a ia taitasi ma vaavaai i mea a isi.” (Filipi 2:4) O le alofa moni “e le sailia e ia ana lava mea.”—1 Korinito 13:5.

O i latou e manatu mamafa i isi e masani ona latou faaalia le tuutoina atu ma le lē manatu faapito i le auaunaga mo isi. Peitaʻi i aso nei, e toʻatele tagata ua lolo atu i le manatu faapito. Ua iai i le lalolagi le uiga o le fia matamuamua. E manaʻomia la ona tatou leoleo faasaga i le agaga o le lalolagi auā a oo ina manumalo i le taaʻina ai o le tatou vaaiga ma a tatou amio, e foliga mai la o le a tatou matuā faatāuaina o tatou lava tuʻinanauga. Ona avea loa lea o mea uma tatou te faia—mea e faaalu ai o tatou taimi, lo tatou malosi, a tatou alamanuia—ma mea e pulea e le manatu faapito. O lea la e manaʻomia ai ona tatou tau malosi faasaga i lenei taaʻiga.

E oo lava foʻi i ni fautuaga e faia i ni uunaʻiga lelei e mafai i nisi taimi ona faavaivaia ai lo tatou agaga o le faataulagaina totino. O le mātauina o le mea o le a oo i ai le agaga faataulagaina totino o Iesu, na faapea atu ai le aposetolo o Peteru: “Le Alii e, ia mamao ia te oe lea mea.” (Mataio 16:22) O le mea moni sa faafaigatā mo ia ona taliaina le naunautaiga o Iesu ina ia faia pea pe oo ai lava i le oti ona o manaʻoga mo le silisili ese o lona Tamā ma le faaolataga o le fanau a tagata. O lea na ia taumafai ai e taofia Iesu mai le tuliloaina o lea ala.

‘Ia Faafitia Oe Lava’

Na faapefea ona gaoioi Iesu? Na faapea mai le tala: “A o ia ua fāliu, ma silasila ane i ona soo, ona vavao atu lea o ia ia Peteru, ua faapea atu, ‘Ina alu ia i oʻu tua Satani e! Auā e te le loto i mea a le Atua, a o mea a tagata.’” Ona valaau atu lea o Iesu i le motu o tagata atoa ma ona soo ma faapea atu ia i latou: “Ai se fia mulimuli mai ia te au, ia faafiti o ia ia te ia, ma ave e ia lona satauro, i le mulimuli mai ai ia te au.”—Mareko 8:33, 34.

I le tusa ma le 30 tausaga talu ona mavae le tuuina atu e Peteru o lenei fautuaga ia Iesu, na ia faaalia ai ua ia malamalama i lena taimi i le uiga o le faataulagaina totino. Na te leʻi faalaeiauina ona uso talitonu ina ia faifai malie a latou taumafaiga ma fia lelei atu ia i latou. Na i lo lea, na apoapoaʻi atu Peteru ia i latou ina ia sauniunia o latou mafaufau mo galuega ma taofia le amioaʻi e tusa ma o latou tuʻinanauga sa iai muamua a o iai i le lalolagi. E ui i faigatā, ae sa ao ona latou faatulaga muamua le faia o le finagalo o le Atua i o latou olaga.—1 Peteru 1:6, 13, 14; 4:1, 2.

O le auala e sili ona tauia e mafai e so o se tasi o i tatou ona tuliloaina, o le tuuina atu lea ia Ieova o so o se mea o loo ia i tatou na te puleaina, o le mulimuli atu ma le faamaoni ia Iesu Keriso ma ia faatagaina Ieova na te taʻitaʻia a tatou gaoioiga. Na faataatia e Paulo se faaaʻoaʻoga i lenei itu. O lona uiga o le faanatinati  ma lona lotofaafetai ia Ieova na uunaʻia ai o ia e lafoaʻia faanaunauga po o faamoemoega faalelalolagi lea e mafai ona faatosina ese ai o ia mai le faia o le finagalo o le Atua. Na ia faapea mai: “Ou te matuā fiafia lava e faauma aʻu mea, ia faaumatia foi aʻu” i le auauna mo manaʻoga o isi. (2 Korinito 12:15) Sa faaaogā e Paulo ona tomai e faalautele ai manaʻoga tauatua, ae lē o ona manaʻoga.—Galuega 20:24; Filipi 3:8.

E faapefea ona tatou tilofaʻia i tatou lava pe faamata o ia i tatou se vaaiga e pei ona sa iai i le aposetolo o Paulo? Atonu e mafai ona tatou fesili ifo i fesili nei: O faapefea ona faaaogā loʻu taimi, loʻu malosi, o oʻu tomai, ma aʻu alagaʻoa? Pe o oʻu faaaogāina nei mea faatasi ai ma isi meaalofa tāua e tau lava ina ia faamalie ai oʻu manaʻoga totino, pe o oʻu faaaogāina e fesoasoani ai i isi? Pe o oʻu manatunatu ea i le faia o se sao atoatoa i le galuega faasaoola o le faalauiloaina o le tala lelei, atonu i le avea ma sē faalauiloaina le Malo faataimi atoa? Pe e mafai ona ou aafia atoatoa i galuega e pei o le fausia po o le faaleleia o Maota o le Malo? Pe o oʻu saʻilia avanoa e fesoasoani ai i ē o manaʻomia? Pe o oʻu ofoina atu ea le mea silisili ou te mafaia ia Ieova?—Faataoto 3:9.

‘E Sili le Manuia o le Foai Atu’

E ui i lea, pe e atamai moni ea le faataulagaina totino? Ioe e mautinoa! Na iloa e Paulo mai mea na oo totino ia te ia faapea o se agaga faapena e matuā tauia. Na avatu ai ia te ia le fiafiaga tele ma le matuā faamalieina totino. Na ia faamatala atu lena mea i toeaina mai Efeso ina ua latou feiloaʻi i Meleto. Na faapea atu Paulo: “Ua ou faaali atu ia te outou mea uma lava, ia faapea ona outou galulue [i se auala faataulagaina totino] ia fesoasoani i e ua vaivai e tatau ai, ma ia outou manatu i le afioga a le Alii o Iesu, na fetalai mai e ia, E sili le manuia o le na te foai atu, i lo le na te talia mai.” (Galuega 20:35, LF) E faitau miliona tagata ua latou iloaina o le faaalia o lenei ituaiga o agaga e aumaia ai le fiafiaga tele i le taimi lenei. O le a aumaia ai foʻi le olioli i le lumanaʻi pe a tauia e Ieova i latou e faamuamua ona manaʻoga ma manaʻoga o isi na i lo o o latou manaʻoga totino.—1 Timoteo 4:8-10.

Ina ua fesiligia pe aiseā na ia faamalosia ai o ia lava e fesoasoani atu i isi i le fausiaina o Maota o le Malo, na tali Pili e faapea: “O le fesoasoani i faapotopotoga e masani ona vaai i ai e laiti i lenei auala e aumaia ai ia te aʻu le matuā faamalieina totino. Ou te fiafia tele i le faaaogāina o se tomai ma le poto masani o loo ia te aʻu mo le lelei o isi.” Aiseā na filifili ai Ema e tuutoina atu lona malosi  ma ona tomai e fesoasoani ai i isi ina ia aʻoaʻoina upu moni o le Tusi Paia? “Ou te leʻi mafaufauina le faia o se isi lava mea. A o talavou pea ma mafai ona faia o se mea, ua ou manaʻo ai ina ia faia so o se mea ou te mafaia e faafiafiaina ai Ieova ma fesoasoani ai i isi. O le faataulagaina o nai meafaitino o loo oʻu maua e lē o se avega tauave telē. O loo oʻu faia le mea e tatau ona ou faia pe a fua atu i mea ua faia e Ieova mo aʻu.”

Sa leʻi salamō Malesi ma Peti ona o le leʻi mauaina o se olaga faamalieina, ina ua uma ona la galulue mamafa i le tausia aʻe ma le saunia o mea mo lo la aiga. I le taimi nei ua la mālōlō litaea, o loo la mananaʻo e faaauau pea ona faia se mea aogā ma uigā i o la olaga. Ua la faapea mai: “Ma te lē o mananaʻo e nofonofo ma ola i se olaga filemu. O le fesoasoani atu i isi i se atunuu ese ina ia aʻoaʻoina e uiga ia Ieova e aumaia ai ia i maʻua le avanoa e faaauau ai pea ona faia se mea e aogā.”

Pe o e maumauaʻi e faataulagaina totino? O le a lē faigofie lenei mea. O loo faaauau pea se taua i le va o o tatou tuʻinanauga lē lelei atoatoa ma lo tatou faanaunauga tāua ina ia faamalieina le Atua. (Roma 7:21-23) Ae o se taua e mafai ona manumalo ai pe afai tatou te faatagaina Ieova na te taʻitaʻiina o tatou olaga. (Kalatia 5:16, 17) E mautinoa o le a ia manatua la tatou galuega faataulagaina totino i lana auaunaga ma o le a ia matuā faamanuiaina i tatou. O le mea moni, o le a ‘toina e Ieova le Atua pupuni o le lagi mo i tatou ma sasaa mai le manuia seʻia silisili ona tele.’—Malaki 3:10; Eperu 6:10.

[Ata i le itulau 23]

Sa ia Iesu le agaga faataulagaina totino. Ae faapefea oe?

[Ata i le itulau 24]

Sa taulaʻi atu taumafaiga a Paulo i le galuega o le talaʻia o le Malo