Ua Toeitiiti—Se Lalolagi e Aunoa ma le Atuatuvale

UA FAASOLO lava ina faatuputupulaʻia le faigatā o le olaga, ma e anoanoaʻi māfuaaga e atuatuvale ai. I taimi e lotovaivai ai, e ono lē faigofie ai ona pulea o tatou faalogona. O le mea moni, e oo lava i tagata o ē e naunau i le ola e mafai ona oo i se tulaga matuā lē fiafia lava! Manatu mai i ni nai faaaʻoaʻoga nei.

I aso anamua, sa matuā lotovaivai ai lava le perofeta o Mose ma ia faapea atu ai loa i le Atua: “Afai ua alofagia aʻu e oe, ia e fasioti lava ia te au, a e aua ou te iloa loʻu puapuaga.” (Numera 11:15) A o sola ese mai i ona fili, na alaga le perofeta o Elia e faapea: “Ieova e, soia; ia e ave ese loʻu ola.” (1 Tupu 19:4) Ae na faapea mai le perofeta o Iona: “Ieova e, ou te aioi atu ia te oe, ia e ave ese loʻu ola; auā e lelei ona ou oti, a e leaga ona ou ola.” (Iona 4:3) Peitaʻi e aunoa ma se tasi o Mose, Elia, po o Iona na pule i lona ola. Sa latou iloa uma lava le tulafono a le Atua: “Aua e te fasioti tagata.” (Esoto 20:13) Ona sa ia i latou se faatuatua malosi i le Atua, sa latou malamalama lelei po o ā lava mea e tutupu, e iai auala e taulimaina ai ma o le ola o se meaalofa mai le Atua.

Ae faapefea faafitauli o loo tatou fesagaʻia i le taimi nei? E faaopoopo atu i puapuaga tau i faalogona  po o faafitauli faaletino, atonu i nisi taimi e manaʻomia ona tatou tauivi ma faiga leaga mai tagata o o tatou aiga, o tuaoi, po o aumea i galuega. O loo tautala le Tusi Paia i tagata o ē ua faatumulia “i amio leaga uma lava, o le faitaaga, o le amio ulavale, o le manumanu, o le loto leaga; o loo tumu saisai i le mataua, o le fasioti tagata, o le misa, o le ʻoleʻolega, ma le faatāutala; o tuaupua i latou, o e fai tala leaga, o e ʻinoʻino i le Atua, o e faasiasia, o e faasaua, o e faafiasilisili, o e fia fai togafiti i mea leaga, o e le anaana i mātua, o e valelea, o e tuumavaega, o e le lotoaiga, o e le faamolemoleina, ma ē faalealolofa.” (Roma 1:28-31) O le siʻomia ai e ituaiga tagata faapena mai lea aso i lea aso e ono foliga mai ai le olaga ua pei o se avega. E faapefea ona tatou fesoasoani ia i latou o loo manaʻomia faamāfanafanaga ma se mapusaga?

Naunau e Faalogo Atu

O mafatiaga ma puapuaga e mafai ona faapogaia ai se tagata e leiloa lona paleni faalemafaufau. Na faapea mai le tagata poto: “O le saua e faavalea ai lava le tagata poto.” (Failauga 7:7) O lea la, o se tagata e talanoa e faatatau i le pule i le ola e ao lava ona manatu mamafa i ai. O faafitauli o loo ia te ia, pe e tau i faalogona, faaletino, faalemafaufau, po o le faaleagaga, atonu e manaʻomia le uaʻi vave atu i ai. E mautinoa lava e eseese ituaiga tausiga ma togafitiga faapitoa e mafai ona fai, ma e ao ona filifili le tagata lava ia i le ituaiga togafitiga e fai.—Kalatia 6:5.

Po o le ā lava le māfuaaga o le iai o faalogona fia pule i le ola, o le iai o se tagata o lē e faautauta, e tigā alofa, ma onosai e talanoa atu i ai e ono mafai ona oo ai i ni suiga lelei. O tagata o aiga ma uō o ē e naunau e faalogo atu e ono mafai ona fesoasoani. E faaopoopo atu i faalogona faaleuō ma le agalelei, o manatu e ati aʻe ai mai le Afioga a le Atua e mafai ona matuā fesoasoani lava ia i latou ua mou atu lo latou faamoemoe.

Fesoasoani Faaleagaga mo Lē ua Puapuagatia

E ono faateʻia oe i lou iloaina e mafai ona faalaeiauina ai i le faitauina o le Tusi Paia. E ui lava e lē o se tusi e mafai ona faalelei ai faafitauli tau le mafaufau, ae mafai ona fesoasoani mai le Tusi Paia ia i tatou ina ia faatāuaina le ola. Na faapea mai le tupu o Solomona: “Ua ou iloa e leai se mea lelei ia te i latou, na ona ia olioli le tagata, ma ia fai mea lelei i lona olaga nei. I le ma lea, ia taitasi le tagata ma ʻai, ma inu, ma fiafia i mea lelei i ana galuega uma; o le mea foaiina mai lea e le Atua.” (Failauga 3:12, 13) E ese mai i galuega e faamalieina ai lea e aumai ai le uigā i le olaga, o mea masani—e pei o le ea mamā, susulu a le lā, fugalaau, laau, ma manu felelei—o ni meaalofa mai le Atua e mafai ona tatou olioli ai.

E sili atu foʻi ona faagaeetia ai i le faamautinoaga a le Tusi Paia e faapea o Ieova le Atua ma lona Alo, o Iesu Keriso, e manatu mamafa mai ia i tatou. (Ioane 3:16; 1 Peteru 5:6, 7) Ma le talafeagai lava, na faapea mai le faisalamo: “Ia faafetaia le Alii [Ieova] i lea aso ma lea aso; ua faaee avega ia te i tatou, o le Atua o lo tatou olataga ia.” (Salamo 68:19) E ui lava tatou te lagona lo tatou faatauvaa ma le lē aogā, ua valaaulia i tatou e le Atua e tatalo atu ia te ia. Ua faamautinoa mai e faapea e leai se tasi e ole atu ma le lotomaulalo mo lana fesoasoani e na te talitualimaina.

E leai se tasi e na te faatalitalia ma le saʻo le iai o se olaga e aunoa ma ni faafitauli i aso nei. (Iopu 14:1) Peitaʻi, o le upu moni mai le Afioga a le Atua ua faaalia i le tele o tagata e faapea o le pule i le ola e lē o le auala saʻo lea e foʻia ai o latou faafitauli. Seʻi tau ina manatunatu i le auala na fesoasoani ai le aposetolo o Paulo i le leoleo o le falepuipui na lē mautonu o lē na, “ala . . . na moe, ua na iloa faitotoa o le fale ua avanoa, ona seʻi lea e ia o le pelu, a fasi o ia e ia, fa te ia ua sosola e na noanoatia.” I le na o sina taimi puupuu lava, na manatu ai le leoleo o le falepuipui e sili atu le pule i le ola na i lo le oti maasiasi ma atonu foʻi e faaumiumi ona faataugā seʻia oo ina oti ona o lona lē taulau. Na alaga atu le aposetolo o Paulo: “Aua neʻi faia e oe se mea e leaga ai oe; auā o iinei i matou uma lava!” E lē na o le faamatalaga lena le mea a Paulo na fai. O le mea moni, sa la faamāfanafana atu ma Sila i le leoleo o le falepuipui ma tali atu i lana fesili: “Alii e, se a le mea e tatau ona ou faia ina ia faaolaina ai o aʻu?” Na la tali atu: “Ina faatuatua ia i le Alii o Iesu Keriso, e faaolaina ai oe atoa ma lou aiga.” Ona la tautatala atu lea i afioga a Ieova ia te ia ma lona aiga, ma o le iʻuga “ona papatisoina loa lea o ia ma lona aiga uma.” Sa tele se fiafia na iai i lena leoleo o le falepuipui ma lona aiga ma sa latou maua se uiga fou i le olaga.—Galuega 16:27-35.

I aso nei, maʻeu lo tatou fiafia e iloa e lē o le Atua ua māfua ai le amioleaga! Ua faailoa mai e lana Afioga se agaga leaga, o le “ua igoa i le Tiapolo, i le  ma Satani,” o ia lea o loo “faasese i le lalolagi uma.” Peitaʻi ua saasaa lona taimi o totoe. (Faaaliga 12:9, 12) Ua lē o toe umi ona faaumaina loa lea o puapuaga uma ia o loo aumaia e Satani ma ana temoni i ē uma o i le lalolagi e ala mai i se faalaa ane tauatua. Ona aumaia loa lea e le lalolagi fou amiotonu na folafola mai e le Atua ia se iʻuga tumau i māfuaaga o le lē mautonu ma le pule i le ola.—2 Peteru 3:13.

Faamāfanafanaga mo i Latou o Loo Alalaga Mai mo se Fesoasoani

E oo lava i le taimi nei, o i latou e matuā lotovaivai lava e mafai ona latou maua faamāfanafanaga mai le Tusi Paia. (Roma 15:4) Na pese le faisalamo o Tavita e faapea: “Le Atua e, e te le inosia le loto momomo ma le nutimomoia.” (Salamo 51:17) E moni, e lē maʻalofia lo tatou fetaiaʻi ma nisi o tofotofoga ma faalogoina aafiaga o le lē lelei atoatoa. Peitaʻi o le aveina i fale o le poto saʻo o lo tatou Tamā faalelagi agalelei, alofa, ma e fetuutuunaʻi, o le a faamautinoa maia ia i tatou e tāua i tatou i ona fofoga. E mafai ona avea le Atua ma a tatou Uō ma Aʻoaʻo sili. Afai tatou te ati aʻe se faiā vavalalata ma Ieova le Atua, o le a lē mafai ona ia tuulafoaʻiina i tatou. Na fetalai mai Lē na Foafoaina i tatou: “O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai.”—Isaia 48:17.

Ua aogā i le toʻatele le faalagolago atu ia Ieova. Ina ia faataʻitaʻia: Sa matuā vaivai lava Mara ona o le lotomafatia faaumiumi ina ua maliu si ana tama tama e toʻatasi i se faalavelave tau taavale. * Sa oo ia te ia le lē toʻa ma taumafai ai loa e pule i lona lava ola. Peitaʻi, i aso nei, ua ala pō lava i aso uma e fai ana galuega i le fale. Ua fiafia foʻi e faalogologo i musika ma fesoasoani atu i isi. O le faamoemoe e faapea “o le a toe tutu mai e ua amiotonu atoa ma e ua amioletonu” ua aveeseina ai nisi o tigā ona o le oti faafuaseʻi o si ana tama faapelepele ma ua faamalosia ai lona faatuatua i le Atua. (Galuega 24:15) Ona e leʻi ia Mara lava se faanaunauga ina ia avea e pei o se agelu i le lagi, o lea na matuā pāʻia ai lava lona loto i upu o le Salamo 37:11: “O e agamalu, e fai mo latou le nuu; e faafiafia foi i latou ia te i latou ona o le manuia e tele.”

O se tasi fafine Pasili, e suafa ia Sara, e galue mamafa tele ina ia avea ma tinā lelei i lana fanau e toʻatolu. Na ia taʻutino mai e faapea: “Sa ou matuā pisi tele ma ina ua faafuaseʻi ona oti loʻu tamā ma, i le taimi lava e tasi, na ou iloa ai o loo feoaʻi laʻu tane  ma se isi fafine, sa ou leʻi mafaufau lava e tatalo i le Atua mo se fesoasoani.” I lona lē mautonu na taumafai ai Sara e fasioti ia lava. O le ā na fesoasoani ia te ia e foʻia lona lē mautonu? O lona talisapaia o mea faaleagaga. “I po uma lava a o oʻu leʻi moe, ou te faitauina ai le Tusi Paia, ona ou taumafai lea e faafetaui atu aʻu i le tulaga o tagata o loo oʻu faitauina. Ou te faitauina foʻi mekasini o Le Olomatamata ma le Ala Mai!, ma e faapitoa lava ona ou fiafia i tala i olaga o tagata auā e fesoasoani ia te aʻu ia ou maua le lotomalie i aʻu mea fai i le olaga.” O le iloaina e faapea o Ieova o lana uō sili lea, ua ia faamasani foʻi ina ia faapatino mea e taʻua i ana tatalo.

Se Lumanaʻi e Aunoa ma le Atuatuvale

Maʻeu le faamāfanafanaina ai i le iloa e faapea o puapuaga o loo feagai ma tagata e lē tumau! I le pulega a le Malo o le Atua, o tamaiti ma tagata matutua ia o loo aafia i le taimi nei i solitulafono, le lē faamasinotonu, ia po o le faailoga tagata foʻi o le a maua le olioli. E pei ona valoia mai i le salamo faavaloaga e faapea, o Iesu Keriso, le Tupu tofia a Ieova, “e laveai e ia o lē mativa i lona alaga mai; atoa ma le ua puapuagatia, ma le ua leai sona fesoasoani.” E lē gata i lena, “e alofa atu ia i le ua vaivai ma le ua mativa; e faaola lava e ia e ua matitiva.” E mautinoa lava, “e laveai o ia ia i latou ai le saua ma le faamalo; e silisili foi o latou toto i lona manatu.”—Salamo 72:12-14.

Ua toe o se aga le taimi o le a faataunuuina ai na upu faavaloaga. Pe e logolelei ea ia te oe le manatu o le olioli i le ola e faavavau i ia tulaga i luga o le lalolagi? Afai o le tulaga lena, o loo ia te oe māfuaaga e olioli ai ma faapelepele i le ola o se meaalofa mai le Atua. Ma afai e te tufa atu i isi nei folafolaga faamāfanafana loto mai le Tusi Paia, e te ono aumaia ai le fiafia tele i olaga o i latou o loo alalaga mai mo se fesoasoani i lenei lalolagi e aunoa ma ni faalogona agaʻi i isi, atoa ma le lē alofa.

[Faamatalaga pito i lalo]

[Ata i le itulau 6]

E anoanoaʻi mea tutupu e maua ai le fiafia i aso nei

[Ata i le itulau 7]

Pe e te tepa taulaʻi i le lumanaʻi i se lalolagi e aunoa ma le atuatuvale?