Faitauina o le Tusi Paia—E Aogā ma Fiafia Ai

“Ia mafaufau [“faitau,” NW] i ai i le ao atoa ma le po.”—IOSUA 1:8.

1. O ā nisi o aogā o le faitautusi, aemaise lava le faitauina o le Tusi Paia?

O LE faitauina o faamatalaga talafeagai o se gaoioiga aogā. Na tusi mai le faifilosofia Falani i mataupu faapolotiki, o Montesquieu (Charles-Louis de Secondat) e faapea: “Ia te aʻu lava ia, ua avea pea le suʻesuʻe o se vaifofō e foʻiaina tulaga mafatia o le soifuaga. So o se taimi ou te mafatia ai, e tasi lava se itula e fai ai saʻu faitauga tusi, ona toe mou ese foʻi lea o na mafatiaga.” I se tulaga e silisili atu, ua moni ai lenei manatu e tusa o le faitauina o le Tusi Paia. Na faapea mai le faisalamo faagaeeina: “E sao le tulafono a Ieova, e faafoisia mai ai le agaga; e faamaoni poloaiga a Ieova, e faapotoina ai le ua faigofie. E tonu feau a Ieova, e faafiafia ai le loto.”—Salamo 19:7, 8.

2. Aiseā ua faasaoina ai e Ieova le Tusi Paia mai le tele o tausaga, ma o le ā o loo ia faatalitalia e fai e ona tagata i le Tusi Paia?

² Talu ai o Ieova le Atua o ia o le Tusitala o le Tusi Paia, ua ia faasaoina ai lenei tusi mai le tele o senituri o teteega ogaoga mai ona fili, e lē gata i fili faalelotu ae o fili foʻi faalemalo. Talu ai o lona finagalo ina “ia faaolaina o tagata uma lava, ma ia oo ina iloa lelei le upu moni,” o lea na te faamautinoa ai o loo maua e tagata uma lava lana Afioga. (1 Timoteo 2:4) I se fua faatatau e tusa ma le 80 pasene o tagata o loo ʻaināina le lalolagi e mafai ona faafesootaʻia e ala i le faaaogāina o ni gagana se 100. O le Tusi Paia atoa ua mafai ona maua i gagana e 370, ae o nisi vaega o le Tusi Paia e mafai ona faitauina i nisi gagana autū ma vaega o gagana (dialects) e 1,860. E finagalo Ieova ina ia faitau e ona tagata lana Afioga. E faamanuia mai o ia i ana auauna o ē uaʻi atu i lana Afioga, ioe, o ē faitau i ai i aso taʻitasi.—Salamo 1:1, 2.

Faitauga Tusi Paia e Manaʻomia mo Ovasia

3, 4. O le ā na faafinagaloina e Ieova mai tupu o Isaraelu, ma o ā māfuaaga ua faatatau mai ai foʻi lenei manaʻoga i toeaina Kerisiano i aso nei?

³ I lana fetalaiga i le faatalitaliga o le taimi o le a faaaogā ai e le nuu o Isaraelu se tupu faaletagata, na fetalai ai Ieova: “A oo foi ina nofo o ia i le nofoalii o lona malo, na te tusia māna se tusi o lenei tulafono i se tusi ai lena tusi o i luma o le au faitaulaga o sa Levī; ia i ai foi lea ia te ia, na te faitau ai foi i aso uma lava o lona olaga; ina ia aʻoaʻoina ai o ia ia mataʻu ia Ieova lona Atua, ma ia tausi i upu uma lava a lenei tulafono ma nei sauniga, na te faia; ina neʻi faamaualugaina lona loto i ona uso, ina neʻi teʻa ese foi i le poloaiga, i le itu taumatau po o le itu tauagavale.”—Teuteronome 17:18-20.

⁴ Seʻi mātau mai māfuaaga na manaʻomia ai e Ieova tupu uma o le a iai i Isaraelu ina ia latou faitau i le tulafono tauatua i aso taʻitasi: (1) “ina ia aʻoaʻoina ai o ia ia mataʻu ia Ieova lona Atua, ma ia tausi i upu uma lava a lenei tulafono ma nei sauniga, na te faia”; (2) “ina neʻi faamaualugaina lona loto i ona uso”; (3) “ina neʻi teʻa ese foi i le poloaiga, i le itu taumatau po o le itu tauagavale.” Pe lē manaʻomia ea e ovasia Kerisiano i aso nei ona latou matataʻu ia Ieova, ia usitai i ana tulafono, ia taumamao mai le faasilisilia o i latou lava nai o latou uso, ma ʻalofia le solia o poloaʻiga a Ieova? E mautinoa lava o le faitauina o le Tusi Paia i aso taʻitasi e tutusa lelei lava le tāua mo i latou e pei foʻi ona sa tāua i tupu o Isaraelu.

5. O le ā na tusi mai ai le Vaega Pule i sui o Komiti o Lālā talu ai nei e tusa ai o le faitauina o le Tusi Paia, ma aiseā e lelei ai mo toeaina uma Kerisiano ona mulimuli atu i lena fautuaga?

 ⁵ E matuā pisi naʻuā le faasologa a toeaina Kerisiano i aso nei, ma ua avea ai o se luʻi le faitauina o le Tusi Paia i aso taʻitasi. Mo se faaaʻoaʻoga, o sui o le Vaega Pule o Molimau a Ieova ma sui o Komiti o Lālā i le lalolagi aoao o ni tane e matuā pisi lava. Peitaʻi, i se tusi na aauina mai talu ai nei e le Vaega Pule i Komiti o Lālā uma sa faamamafa mai ai le manaʻomia ona faitauina le Tusi Paia i aso taʻitasi, ma ia iai ni masaniga lelei tau suʻesuʻe. Na faamaʻoti mai e le tusi e faapea, o lenei tulaga o le a faateleina ai lo tatou alofa mo Ieova ma le upu moni, ma “o le a fesoasoani ia i tatou ina ia faatumauina ai lo tatou faatuatua, le olioli, ma le maumauaʻi seʻia oo i le iʻuga faamamaluina.” O le manaʻoga lava lena e tasi o loo iai i toeaina uma i faapotopotoga a Molimau a Ieova. O le faitauina o le Tusi Paia i aso taʻitasi o le a fesoasoani ia i latou ina ia “manuia ai [“gaoioi ma le atamai,” NW ].” (Iosua 1:7, 8) O le faitauina o le Tusi Paia, aemaise lava mo i latou, e “aogā mo le aʻoaʻo atu, mo aʻoaʻiga, mo faasaʻoga, ma le toleniina i le amiotonu.”—2 Timoteo 3:16, Revised Standard Version.

Se Mea ua Matuā Talafeagai mo Ē Talavou ma Ē Matutua

6. Aiseā na faitau leotele atu ai e Iosua upu uma o le tulafono a Ieova i luma o ituaiga uma o Isaraelu ua faapotopotoina faapea ma tagata ese?

⁶ I taimi anamua, sa leʻi mafai ona maua ni kopi taʻitasi o le Tusi Paia mo le faaaogāina e le tagata lava ia, o lea sa faitauina ai le Tusi Paia i luma o se vao o tagata e toʻatele sa faapotopoto faatasi. Ina ua uma ona foaʻi atu e Ieova le manumalo ia Iosua i lana taua ma le aai o Ai, ona faapotopoto ai lea e Iosua ituaiga o Isaraelu i luma o le Mauga o Evalu ma le Mauga o Keresema. Ona taʻu mai lea e le tala ia i tatou e faapea: “Ua faitauina e ia upu uma o le tulafono, o le manuia ma le malaia; e pei o mea uma ua tusia i le tusi o le tulafono. Ua leai se upu o upu uma na poloai mai ai Mose, e lei faitaulia e Iosua i luma o le faapotopotoga uma o Isaraelu, ma fafine, ma tama iti, ma tagata ese na feoai ma i latou.” (Iosua 8:34, 35) Sa manaʻomia mo talavou ma ē matutua, o tagatanuu moni ma tagata ese, ona tusia i papa o o latou loto ma mafaufau, e pei o lea faaupuga, po o ā amioga o le a aumaia ai le faamanuia a Ieova ae o ā foʻi amioga e aumaia ai lona toʻasa. O le faitauina e lē aunoa o le Tusi Paia o le a mautinoa le fesoasoani ia i tatou i lenei itu.

7, 8. (a) O ai i aso nei ua faapei “o tagata ese,” ma aiseā latou te manaʻomia ai ona faitauina le Tusi Paia i aso taʻitasi? (e) I ā auala e mafai ai e “tama iti” o loo aofia i tagata o Ieova ona latou mulimuli i le faaaʻoaʻoga a Iesu?

⁷ E faitau miliona auauna a Ieova i aso nei ua faapei o na “tagata ese” i se uiga faaleagaga. I se taimi muamua atu, sa latou ola ai e tusa o tapulaa a le lalolagi, peitaʻi ua latou toe fuataʻiina nei o latou olaga. (Efeso 4:22-24; Kolose 3:7, 8) Latou te manaʻomia pea lava pea le toe faamanatu ia i latou o tapulaa a Ieova i le mea lelei ma le mea leaga. (Amosa 5:14, 15) O le faitauina i aso taʻitasi o le Afioga a le Atua e fesoasoani lea ia i latou i le faia o lenei mea.—Eperu 4:12; Iakopo 1:25.

⁸ E toʻatele foʻi “tama iti” o loo aofia i tagata o Ieova o ē ua aʻoaʻoina i tapulaa a Ieova e o latou mātua, peitaʻi e manaʻomia ona talitonu ma le mautinoa i latou lava i le tonu o lona finagalo. (Roma 12:1, 2) E mafai faapefea ona latou faia lena mea? I Isaraelu, na faatonuina ai ositaulaga ma toeaina e faapea: “Ia e faitau atu ai lenei tulafono i luma o Isaraelu uma lava ia latou faalogo ai. Ia e faapotopotoina le nuu, o tane, ma fafine, ma tama iti, atoa ma le tagata ese e ia te oe i au aai, ina ia latou faalogologo ai, ma ia aʻoaʻoina i latou, ma ia latou matatau ia  Ieova lo outou Atua, ma latou anaana e fai o upu uma lava o lenei tulafono. O a latou fanau foi, e na le iloa, ia latou faalogologo, ma ia aʻoaʻoina i latou ia matatau ia Ieova lo outou Atua.” (Teuteronome 31:11-13) A o ola aʻe Iesu i le Tulafono, a o itiiti lava i le 12 o ona tausaga, sa ia faaalia ai se naunautaʻiga e fia malamalama i tulafono a lona Tamā. (Luka 2:41-49) Mulimuli ane, sa avea ma ana masani le faalogologo atu ma auai i le faitauina o le Tusi Paia i le sunako. (Luka 4:16; Galuega 15:21) Ua faalaeiauina foʻi talavou i aso nei ina ia latou mulimuli i le faaaʻoaʻoga a Iesu, e ala i le faitauina o le Afioga a le Atua i aso taʻitasi, ma e ala i le auai e lē aunoa i sauniga, o iinā o loo faitau ma suʻesuʻeina ai le Tusi Paia.

Faitauga Tusi Paia —Se Mea e Ao Ona Faamuamua

9. (a) Aiseā e manaʻomia ai ona tatou filifili lelei i mea tatou te faitau ai? (e) O le ā na taʻua e le faatonu na faavaeina lenei mekasini e tusa ai o lomiga o loo faaaogā mo le suʻesuʻeina o le Tusi Paia?

⁹ Na tusi mai le tupu poto o Solomona: “Ia aʻoaʻoina oe e i latou; e leai se iuga i tusi o tusi e tele; o le suesue tele foi i upu e vaivai ai le tino.” (Failauga 12:12) E ono toe faapea mai se tasi, o le faitauina o le tele o tusi ua lomia i aso nei e lē gata ina vaivai ai le tino, ae o le mea moni lava, e lamatia ai le mafaufau. E tāua ai la le filifili lelei. E lē gata i le faitauina o a tatou lomiga o loo fai ai suʻesuʻega faale-Tusi Paia, ae manaʻomia foʻi ona tatou faitauina le Tusi Paia lava ia. Na tusi atu le faatonu na faavaeina lenei mekasini i lana ʻaufaitau e faapea: “Aua lava neʻi galo o le Tusi Paia lo tatou Taʻiala ma e tusa lava po o ā fesoasoani ua foaʻiina mai e le Atua ia i tatou, o na mea ua na o ni ‘fesoasoani’ ae lē suia ai le Tusi Paia.” * O lea, e ui e lē tuulafoaʻia ai isi lomiga faale-Tusi Paia, peitaʻi e manaʻomia ona tatou faitauina le Tusi Paia lava ia.

10. Ua faapefea ona faamamafa e “le auauna faamaoni ma le mafaufau” le tāua o le faitauina o le Tusi Paia?

¹⁰ I le nofouta i lenei manaʻoga, ua tele tausaga o faatulaga mai e “le auauna faamaoni ma le mafaufau” se faasologa mo le faitauina o le Tusi Paia e avea ma vaega o le polokalame o le Aʻoga o le  Faiva Faatiokarate i faapotopotoga taʻitasi. (Mataio 24:45) O le polokalame o le faitauga Tusi Paia o iai nei o loo faitauina ai le Tusi Paia atoa i se vaitaimi e tusa ma le fitu tausaga. O lenei faasologa e aogā mo tagata uma aemaise lava mo ē fou latou te leʻi faitauina muamua lava le Tusi Paia atoa. O i latou e auai atu i le Aʻoga Faale-Tusi Paia a le Olomatamata o Kiliata mo misionare ma le Aʻoga mo Toleniga i le Faiva faapea foʻi sui fou o le aiga Peteli, e manaʻomia ona latou faitauina le Tusi Paia atoa i totonu o le tausaga e tasi. Po o le ā lava le faasologa lena e te faaaogāina, e oe lava ia po o le tou aiga atoa, ae o le tausisia o lena faasologa e manaʻomia ai ona avatu le faamuamua i le faitauga Tusi Paia.

O le ā o Faaalia Mai e Au Masaniga Tau Faitautusi?

11. E faapefea ma aiseā e tatau ai ona fafagaina i tatou i afioga a Ieova i aso taʻitasi?

¹¹ Pe afai o faafaigatā ona e pipiimau atu i lau faasologa o le faitauga Tusi Paia, atonu e talafeagai ona e fesiligia oe lava: ‘O le ā se aafiaga o aʻu masaniga tau faitautusi po o le matamata i le televise, e mafai ona aafia ai loʻu tomai e faitau le Afioga a Ieova?’ Manatua le mea na tusi mai ai Mose—sa toe fetalai ai foʻi Iesu—e faapea “e le na o mea e ʻai e ola ai le tagata, a o afioga uma e tulei mai i le fofoga o le Atua.” (Mataio 4:4; Teuteronome 8:3) E pei lava ona tatou manaʻomia ona taumafa se meaʻai po o se isi mea faapena i aso taʻitasi o o tatou olaga ina ia tausia ai o tatou tino faaletino, e faapena foʻi le manaʻomia ona fafagaina i tatou i mafaufauga o Ieova i aso taʻitasi ina ia tausia ai lo tatou itu faaleagaga. E mafai ona tatou mauaina mafaufauga o le Atua i aso taʻitasi e ala i le faitauina o le Tusi Paia.

12, 13. (a) Ua faapefea ona faataʻitaʻia mai e le aposetolo o Peteru le naunau e tatau ona ia i tatou mo le Afioga a le Atua? (e) Ua faapefea ona ese le auala o loo faaaogā ai e Paulo le faataʻitaʻiga i le suāsusu mai le faaaogāina e Peteru?

¹² Pe afai tatou te talisapaia le Tusi Paia, ‘e lē o se upu a tagata, a e peitai o le upu a le Atua, e moni lava,’ o le a faapena ona tatou tosina atu i ai e pei ona faananau atu se pepe i le suāsusu o lona tinā. (1 Tesalonia 2:13) Na faia e le aposetolo o Peteru lena faatusatusaga, i le tusi mai: “Faapei o tama meamea faatoa fanau mai, ia naunau outou i le suāsusu faaleagaga e le suia, ina ia outou tupu ai i le faaolataga, pe afai ua outou iloa e agalelei lava le Alii.” (1 Peteru 2:2, 3, LF) Pe afai o mea ua tatou tofo totino i ai, ua tatou tofo moni ai faapea “e agalelei lava le Alii,” o le a tatou faatupu aʻe ai se naunau mo le faitauina o le Tusi Paia.

¹³ E ao ona mātauina, i lenei fuaitau, ua faaaogā ai e Peteru le faatusatusaga o le suāsusu i se auala e ese mai le faaaogāina e le aposetolo o Paulo. Mo se pepe fou, o le suāsusu lava e faamalieina ai ona manaʻoga uma tau meaʻai. E faaalia i le faataʻitaʻiga a Peteru faapea o loo iai i le Afioga a le Atua mea uma tatou te manaʻomia ina ia “tutupu ai i le faaolataga.” Peitaʻi i le isi itu, e faaaogā e Paulo le manaʻoga mo le suāsusu e faataʻitaʻi mai ai le lē talafeagai o le auala o loo masani ona aai ai nisi o ē faapea mai ua tagata matutua faaleagaga. I lana tusi i Kerisiano Eperu, na faapea atu ai Paulo: “Ana fai outou ma aʻoaʻo po ua tatau ai ina ua leva, a e ao ina toe aʻoaʻoina outou e se tasi i mataupu muamua o le afioga a le Atua; ua avea foi outou ma e o tusa i ai le suāsusu, a e le o mea aano. Auā o i latou uma ua faasusuina i le suāsusu, e le atamamai i latou i le upu o le amiotonu; auā o tama meamea i latou; a o mea aano, mā e matutua ia, o i latou ua masani ona lagona ina ua aʻoaʻosooina e iloa ai le lelei ma le leaga.” (Eperu 5:12-14) O le uaʻi atu i le faitauina o le Tusi Paia e tele ni mea lelei e maua ai mo le atiina aʻe o o tatou tomai faalemafaufau ma faatupulaʻia ai lo tatou mataʻai mo mea faaleagaga.

Le Auala e Faitau ai le Tusi Paia

14, 15. (a) O le ā le faaeaga ua ofoina mai e le Tusitala o le Tusi Paia ia i tatou? (e) E mafai faapefea ona tatou maua aogā mai le poto tauatua? (Aumai faaaʻoaʻoga.)

¹⁴ O se faitauga Tusi Paia e sili ona aogā e lē amata i le sasaʻo loa lava e faitau, ae amata i se tatalo. O le tatalo o se faaeaga e matuā ofoofogia. E peiseai o loo amata lou suʻesuʻeina o se tusi i se mataupu loloto e ala i lou tāpā o se fesoasoani a le tusitala o lea tusi, ina ia e malamalama ai i mea o le a e faitauina. Maʻeu le telē o le aogā o le faia faapea! Ua ofoina mai e le Tusitala o le Tusi Paia, o Ieova, lena faaeaga ia te oe. Na tusi atu se tasi o le vaega pule i le uluaʻi senituri i ona uso e faapea: “Afai ua leai se poto i so outou, ina ole atu ia  i le Atua, o lē foai tele mai i tagata uma ma le le toe taʻutaʻua; ona foaiina mai ai lea ia te ia. A ia ole atu ma le faatuatua, aua lava neʻi masalosalo.” (Iakopo 1:5, 6) O loo timaʻi mai pea lava pea ia i tatou le Vaega Pule i ona po nei, ina ia tatou faitauina le Tusi Paia faatasi ma le tatalo.

¹⁵ O le atamai, o le faatatauga aogā lea o le poto. O lea, a o leʻi susuʻeina lau Tusi Paia, ia ole atu ia Ieova e fesoasoani mai ia te oe ina ia e mātaulia manatu tāua i lau faitautusi e te manaʻo e faatatauina i lou olaga totino. Ia faafesootaʻi atu manatu fou ua e aʻoaʻoina i le poto lea ua uma ona e mauaina. Faaofi loa manatu fou i “matua o upu e ola ai” na ua e silafia. (2 Timoteo 1:13) Mafaufau loloto i tala o olaga o auauna a Ieova i aso ua teʻa, ma fesili ifo ia te oe lava pe faapeʻī sau gaoioiga o le a e gaoioi ai pe a fesagaʻi ma ni tulaga faapena.—Kenese 39:7-9; Tanielu 3:3-6, 16-18; Galuega 4:18-20.

16. O ā fautuaga aogā ua aumai ina ia mafai ai ona tatou faitauina le Tusi Paia i se tulaga e sili atu ona aogā?

¹⁶ Aua le tau ina faitau itulau o loo faatulaga atu. Ia faaalu sou taimi. Ia faasolosolo ou mafaufauga i mea o loo e faitauina. Pe afai e iai se manatu patino e te fia manino atili i ai, ia suʻe i mau faasino o loo i autafa o le fuaiupu pe afai o le ituaiga Tusi Paia lena o loo ia te oe. Afai e lē o manino pea le manatu, fai se faamaumauga ina ia toe faia atili ai ni au saʻiliʻiliga i se taimi mulimuli ane. A o faasolo lau faitau, faailoga mau e te manaʻo faapitoa lava e manatua po o lou toe tusia foʻi i lalo. E te tusia foʻi i autafa o le fuaiupu ni au lava faamaumauga ma nisi mau e tutusa atu i ai. Afai e iai ni mau e te iloa e te ono manaʻomia i se aso i lau galuega talaʻi ma le aʻoaʻo atu, ia faamau le upu autū ona siaki lea i le faasinoupu o upu o le Tusi Paia lena o loo i le pito i tua o lau Tusi Paia. *

Ia Avea le Faitauga Tusi Paia o se Mea e Fiafia Ai

17. Aiseā e tatau ai ona tatou fiafia i le faitauina o le Tusi Paia?

¹⁷ Na taʻua e le faisalamo le tagata fiafia o lē “e naunau o ia i le tulafono a Ieova; e mafaufau foi o ia i lana tulafono i le ao atoa ma le po.” (Salamo 1:2) O la tatou faitauga Tusi Paia i aso taʻitasi e lē tatau ona avea o se tiute e tau ina faataunuu ae ia avea o se mea e fiafia moni ai lava. O se tasi o auala e mafai ai ona avea o se fiafiaga o le matuā mafaufau loloto lea i le tāua o mea ua aʻoaʻoina mai ai. Na tusi mai le tupu poto o Solomona: “Amuia le tagata na te maua le poto . . . O ona ala o ala matagofie; ma ona magāala uma o i ai le manuia. O ia o le laau o le ola i e tago atu ia te ia; amuia foi i latou o e taofi atu ia te ia.” (Faataoto 3:13, 17, 18) O taumafaiga e manaʻomia ina ia maua ai le poto e mautinoa lava le alu aogā, auā o ona ala e matagofie, e filemu, e fiafia, ma i le iʻuga, e iʻu ai i le ola.

18. O le ā e manaʻomia e faaopoopo atu i le faitauga Tusi Paia, ma o le ā o le a tatou talanoaina i le mataupu o sosoo mai?

¹⁸ Ioe, o le faitauga Tusi Paia e lē gata e aogā ae o se fiafiaga foʻi. Ae po ua lava ai iinā? Ua faitau fia senituri o faitau e tagata lotu o Kerisinetoma le Tusi Paia, “ua aʻoaʻoina e le aunoa, a e le āu mafai ona oo ina iloa lelei o le upu moni.” (2 Timoteo 3:7) Ina ia maua iʻuga lelei e tele mai le faitauga Tusi Paia, e ao ona tatou faia ma se fuafuaga e faatatauina le poto e maua mai ai i o tatou lava olaga totino ma faaaogā i la tatou galuega talaʻi ma le aʻoaʻo atu. (Mataio 24:14; 28:19, 20) E manaʻomia i lenei mea taumafaiga ma ni metotia lelei tau suʻesuʻe, lea e mafai foʻi ona olioli ma tauia ai, e pei o lea o le a tatou tilofaʻia i le mataupu o sosoo mai.

[Faamatalaga pito i lalo]

Fesili Autalu

• O ā fautuaga na tuuina atu i tupu o Isaraelu e faatatau mai foʻi i aso nei i ovasia, ma aiseā?

• O ai i aso nei ua faapei “o tagata ese” ma “tama iti,” ma aiseā e manaʻomia ai ona latou faitauina le Tusi Paia i aso taʻitasi?

• O ā auala aogā ua fesoasoani mai ai “le auauna faamaoni ma le mafaufau” ia i tatou ina ia faitau ai e lē aunoa le Tusi Paia?

• E mafai faapefea ona tatou maua aogā moni ma le fiafiaga mai la tatou faitauga Tusi Paia?

[Fesili mo le Suʻesuʻega]

[Faamatalaga i le itulau 9]

E manaʻomia faapitoa lava, mo toeaina, ona faitauina le Tusi Paia i aso taʻitasi

[Faamatalaga i le itulau 10]

Sa avea ma masani a Iesu le auai i le faitauina o le Tusi Paia i le sunako