Fiafiaga e Faavavau—I le Lagi pe i Luga o le Lalolagi?

PE FAALAGOLAGO lou fiafiaga i le mea e te ola ai? O le toʻatele o tagata o le a vave ona latou faailoa mai faapea o le fiafiaga e faalagolago tele atu i vala e pei o le soifua mālōlōina lelei, se fuafuaga i le olaga, ma ni faiā lelei ma isi. Ua faaupu e se faataoto i le Tusi Paia faapea: “E sili ona lelei o le faaalumaga o laau ʻaina, a o i ai le alofa, i le povi ai le fale povi, a o i ai le ʻinoʻino.”—Faataoto 15:17.

Peitaʻi o le mea e faanoanoa ai, e umī lava se talafaasolopito o le feʻainaʻi, sauā, ma isi lava ituaiga o amioga leaga i lo tatou aiga i le lalolagi. Ae faapefea le lagi, po o le nofoaga agaga, lea e faamoemoe le toʻatele o tagata e ō i ai pe a mavae ona oti? Pe e masani lava ona avea ma nofoaga fiafia ma filemu ma e toʻamālie, e aunoa ma so o se ituaiga o mea e faalavelave atu i ai, e pei ona manatu i ai le toʻatele?

O loo aʻoaʻo le Tusi Paia faapea o loo afio le Atua i le lagi faatasi ma le faitau miliona o foafoaga agaga e taʻua o agelu. (Mataio 18:10; Faaaliga 5:11) Ua faamatalaina i latou nei o ‘atalii agaga o le Atua.’ (Iopu 38:4, 7) I le pei lava o tagata, e iai foʻi filifiliga saʻoloto a agelu; e lē o i latou o ni masini ua uma ona faapolokalameina. Ona o lea, e mafai foʻi la e i latou ona filifili e fai le mea saʻo po le mea sesē. Pe o le a filifili ea agelu e faia le mea sesē? Atonu e faateʻia ai nisi i le iloaina faapea i le faitau afe tausaga ua mavae, na faia ai faapea e ni agelu se toʻatele, o le mea moni na latou agasala i le Atua—na latou fouvale ia te ia!—Iuta 6.

ʻAufouvale i le Lagi

Na aliaʻe le agasala i le nofoaga agaga ona o le fouvale o se tasi agelu, lea na mulimuli ane taʻua o Satani (Lē Tetee) ma le Tiapolo (Lē Taufaaleaga). O lenei agelu sa usiusitai muamua, na filifili e faia le mea sesē e tusa ai ma lana filifiliga saʻoloto. Talu mai lena taimi ua avea ai o ia ma taaʻiga leaga i isi foafoaga agaga, o lea e oo mai i le vaitaimi o Noa, a o lumanaʻi le Lolo, ua iai se fuainumera tele o i latou ua aufaatasi atu ia Satani i le fouvalega i le Atua.—Kenese 6:2, faaopoopoga i le pito i lalo, NW; 2 Peteru 2:4.

Sa leʻi tuliesea loa i lena lava taimi mai le lagi nei agelu ua agasala. Na i lo lea, sa faatagaina pea i latou e ulu atu i le lagi—faatasi ai ma nisi o faasāsāga—mo le faitau afe o tausaga. * Peitaʻi, ina ua muta le faapalepale o Ieova i nei agelu amioleaga, na “lafo” ese mai ai i latou mai le lagi, o le iʻuga ina ia faaumatiaina. Ona faapea mai lea o se siʻufofoga mai le lagi: “O le mea lea ia outou olioli ai, le lagi e atoa ma e ua nonofo ai.” (Faaaliga 12:7-12) E manino mai, na matuā olioli agelu faamaoni ona na mulimuli ane aveesea mai le lagi na ʻaufaatupu faalavelave sili ona amioleaga!

O le tilofaʻia o nei faamatalaga e leʻi iloaina e le lautele, e iloa mai ai e lē mafai ona iai se filemu moni i so o se taimi e lē amanaʻia ai e foafoaga atamamai tulafono ma mataupu silisili a le Atua. (Isaia 57:20, 21; Ieremia 14:19, 20) I le isi itu, pe a gauaʻi i latou uma i tulafono a le Atua, ona manumalo loa lea o le filemu ma le toʻamālie. (Salamo 119:165; Isaia 48:17, 18) O lea afai e alolofa ma usiusitai uma tagata i le Atua ma alofa le tasi i le tasi,  pe o le a lē avea ea le lalolagi ma nofoaga moni e faamalieina, ma fiafia ai? Ua tali mai le Tusi Paia, ioe!

Ae faapefea i latou e mumusu ma le manatu faapito e suia o latou ala leaga? Pe o le a faavavau ai lava ona latou saveʻuina le filemu o i latou e mananaʻo moni e faia le finagalo o le Atua? E leai, na feagai le Atua ma agelu amioleaga i le lagi, e faapena foʻi ona ia sagaʻi atu e feagai ma tagata amioleaga iinei i le lalolagi.

Se Lalolagi ua Faamamāina

Na fetalai le Atua faapea: “O le lagi o loʻu nofoa lea, o le lalolagi o le mea e tu ai oʻu vae lea.” (Isaia 66:1) I le avea ma lē pito sili ona paia, o le a lē faatagaina ai e le Atua ona ‘tulaga aao’ e faaumiumi ona faaeleelea e le amioleaga. (Isaia 6:1-3; Faaaliga 4:8) E pei lava ona ia tafiesea agaga leaga mai le lagi, e faapena foʻi ona ia aveesea mai le lalolagi tagata amioleaga uma lava, e pei ona faailoa mai e fuaiupu o le Tusi Paia o loo mulimuli mai:

“E faaumatia o e fai amio leaga; a o e faatalitali ia Ieova, o i latou lava ia e fai mo latou le nuu.”—Salamo 37:9.

“O e amio saʻo, latou te mau i le nuu; ma e ua sao a latou amio, e faatotoeina ai i latou; a e vavaeeseina o e amio leaga ai le laueleele, e liaiina ai foi o e amio pepelo.”—Faataoto 2:21, 22.

“Ua tonu i le Atua e taui atu le puapuaga i e ua faapuapuagaina ai outou; e ia te outou foi, o e puapuagaina, o le mapusaga faatasi ma i matou, pe a faaalia le Alii o Iesu mai le lagi, faatasi ma agelu o lona malosi, i le afi mumu, na te taui ma sui i e ua le iloa le Atua, ma ua le anaana i le tala lelei a lo tatou Alii o Iesu. E faasalaina i latou lava i le fanoga faavavau lava, ia teʻa ma le Alii ma le mamalu o lona malosi.”—2 Tesalonia 1:6-9.

“E mavae atu foi le lalolagi [o tagata amioleaga], atoa ma lona tuʻinanau, a o lē fai le finagalo o le Atua, e tumau lea e faavavau.”—1 Ioane 2:17, LF.

Pe o le a Tumau Ona Filemu le Lalolagi?

E ui o loo faaalia mai ma le manino i le Tusi Paia faapea e iai le mea e gata mai ai le onosaia e le Atua o le amioleaga, e faapefea ona tatou mautinoa faapea o le taimi lava e tafiesea ai le amioleaga, ona lē toe iai lava lea? Auā foʻi, i le vaitaimi ina ua mavae le Lolo o aso o Noa, na toe iai foʻi le amioleaga seʻia oo i le tulaga ua ao ai i le Atua ona taofia faufauga leaga a tagata e ala i le faafenumiaʻia a la latou gagana.—Kenese 11:1-8.

O la tatou māfuaaga autū e mautinoa ai o le a lē toe aliaʻe le amioleaga ona o le a lē toe pulea le lalolagi e tagata e pei ona iai ina ua faatoʻā mavae lava le Lolo. Na i lo lea, o le a pulea e le Malo o le Atua. I le pulea mai le lagi, o le na o lenei le Malo o le a avea ma faiga malo i le lalolagi. (Tanielu 2:44; 7:13, 14) O le a vave lava ona gaoioi lenei Malo i so o se tasi e taumafai e toe aumaia le amioleaga. (Isaia 65:20) O le mea moni, o le a ia faaumatiaina lē na tupuga mai ai le amioleaga—Satani le Tiapolo—faatasi ma ana temoni, agelu leaga ia na mulimuli atu ia te ia.—Roma 16:20.

E faaopoopo atu i ai, o le a leai se pogai e ala ai ona toe popole le fanau a tagata i meaʻai, lavalava, fale ma galuega—o le leai o na mea i aso nei ua ala ai ona oo atu nisi i se olaga solitulafono. Ioe, o le a toe faafoʻisia le lalolagi atoa i se parataiso fua tele mai e fau ma soloi mo tagata uma.—Isaia 65:21-23; Luka 23:43.

E sili atu ona tāua, o le a aʻoaʻo e le Malo ona tagatanuu i se auala filemu o le olaga ae i le taimi e tasi o loo tausia aʻe i latou i se tulaga sili ona lelei atoatoa faaletagata. (Ioane 17:3; Roma 8:21) Mai lena taimi, o le a lē toe tauivi ai le fanau a tagata ma vaivaiga ma tuʻinanauga lē lelei atoatoa, ma ona o lea, o le usiusitai ma le lelei atoatoa i le Atua o se tulaga e mafai ona fai ma e olioli foʻi, e pei lava ona sa iai i le tagata lelei atoatoa o Iesu. (Isaia 11:3) E mautinoa, sa tumau Iesu i le faamaoni i le Atua e ui lava ina fesagaʻi ma faaosoosoga  sili ona malolosi ma le faataugā—mea na ua taʻua o le a lē iai i le olaga i le Parataiso.—Eperu 7:26.

Le Māfuaaga e Ō Atu ai Nisi i le Lagi

E toʻatele le ʻaufaitau o le Tusi Paia, ua latou masani ma fetalaiga a Iesu e faapea: “E tele mea e nonofo ai i le maota o loʻu Tamā. . . . ou te alu e sauni se mea e nonofo ai outou.” (Ioane 14:2, 3) Pe e lē feteenaʻi ea lena mea ma le manatu e uiga i le faamoemoe o le olaga e faavavau i luga o se lalolagi parataiso?

E lē feteenaʻi nei aʻoaʻoga. O le mea moni, e lagolago e le tasi le isi. Muamua, o loo taʻua i le Tusi Paia e faapea na o se fuainumera faatapulaa o Kerisiano faamaoni—lea e 144,000 i latou—e faatūina aʻe o ni foafoaga agaga ina ia ola i le lagi. Aiseā ua tuuina atu ai ia i latou lenei taui matagofie? Ona o i latou ia o loo faia aʻe ai le vaega lea na iloa e Ioane i se vaaiga o ē “ua latou ola foi, ma ua fai ma tupu faatasi ma Keriso i tausaga e afe.” (Faaaliga 14:1, 3; 20:4-6) Faatusatusa atu la i le faitau piliona o loo iai i le lalolagi, o le 144,000 moni lava la o se “lafu mamoe itiiti.” (Luka 12: 32) E sili atu i lena, o le oo totino i faafitauli ua masani i ai le fanau a tagata, i le pei o Iesu, o le a mafai ai ona latou “tiga alofa faatasi ma i tatou i o tatou vaivai” a o latou vaavaaia le toe faafoʻisia i le lelei o le fanau a tagata ma le lalolagi.—Eperu 4:15.

Lalolagi—Le Aiga e Faavavau o le Fanau a Tagata

E ala mai le taulaga togiola a Iesu Keriso, ua amata ai e le Atua ona aoao le 144,000 i le toeitiiti 2,000 tausaga ua mavae, ma ua iai faailoga e iloa ai ua atoa nei lena vaega. (Galuega 2:1-4; Kalatia 4:4-7) Peitaʻi, o le taulaga a Iesu sa lē mo na o agasala a le 144,000, “a e atoa foi ma agasala a le lalolagi uma lava.” (1 Ioane 2:2) O lea, o i latou uma e faaalia le faatuatua ia Iesu ua ia i latou le faamoemoe o le ola e faavavau. (Ioane 3:16) O i latou o loo momoe i tuugamau o loo manatua pea i le finagalo o le Atua o le a toetutū mai, e lē i le lagi, ae i le olaga i se lalolagi ua faamamāina. (Failauga 9:5; Ioane 11:11-13, 25; Galuega 24:15) O le ā o loo faatalia maia i latou?

Ua tali mai le Faaaliga 21:1-4 (LF ), i le faapea mai: “Faauta, ua i ai le afioaga o le Atua faatasi ma tagata . . . E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.” Seʻi manatu—o le a faasaʻoloto tagata mai le oti, ma o le auē ma puapuaga o le a mou atu e faavavau! O le iʻuga, o le a oo atu le uluaʻi fuafuaga a Ieova mo le lalolagi ma le fanau a tagata i lona faataunuuga faamamaluina.—Kenese 1:27, 28.

La Tatou Filifiliga—Ola po o le Oti

Sa leʻi tuuina atu ia Atamu ma Eva se avanoa e filifili ai e ō i le lagi. O le filifiliga sa tuuina atu a lē o le usiusitai i le Atua ma ola e faavavau i luga o le lalolagi parataiso ia po o le lē usiusitai ia te ia ma oo ai i le oti. E faanoanoa ai, na filifili e lē usiusitai ma o lea la na toe foʻi atu ai i le “efuefu” o le eleele. (Kenese 2:16, 17; 3:2-5, 19) Sa leʻi iai lava i le fuafuaga a le Atua mo le lautele o le aiga faaletagata ina ia oti ma ui atu i le tuugamau ma ola ai i le lagi. Na foafoaina e le Atua le mano ni mano o agelu e ola i le lagi; o na foafoaga agaga e lē o ni tagata na maliliu ma toe faatutūina aʻe i le olaga i le lagi.—Salamo 104:1, 4; Tanielu 7:10.

O le ā e ao ona tatou faia ina maua ai le faamanuiaga o le ola e faavavau i le Parataiso i le lalolagi? O se laasaga muamua o le suʻesuʻe lea o le Afioga a le Atua, le Tusi Paia. Na taʻua e Iesu i lana tatalo e faapea: “O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.”—Ioane 17:3.

O le faagaoioia o lena poto o se isi lea laasaga e oo atu ai i le fiafiaga e faavavau i le Parataiso. (Iakopo 1:22-24) O i latou e ola e ōgatusa ma le Afioga a le Atua ua ia i latou le faamoemoe latou te vaaia i o latou lava mata le faataunuuina o valoaga faagaeetia e pei o lea e faamauina i le Isaia 11:9, o loo faapea mai: “Latou [fanau a tagata] te le faia se mea leaga, latou te le faaumatia foi se mea i loʻu mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.”

[Faamatalaga pito i lalo]

 [Faamatalaga i le itulau 7]

“E fai lava le nuu mo tagata amiotonu, e nonofo ai pea i latou.”—Salamo 37:29