Ia Faaaogā Tatau le Taimi e Faitau ma Su‘esu‘e Ai
Ia Faaaogā Tatau le Taimi e Faitau ma Suʻesuʻe Ai
“Ia outou faaaogā tatau le taimi, auā o aso ua leaga.” —Efeso 5:16, NW.
1. Aiseā e atamai ai le faasoasoa lelei o o tatou taimi, ma o le ā e faaalia mai e uiga ia i tatou lava, e le auala tatou te faaaogā ai o tatou taimi?
E IAI se faaupuga e faapea “o le filifilia o le taimi o lona uiga ia faasao mai le taimi.” O le tagata na te faasoasoa lelei se aofaʻiga patino o se taimi e fai ai mea e manaʻomia ona fai, e masani lava ona tele atu mea e mafai ona ia maua mai lena taimi. Na tusi mai le tupu poto o Solomona: “O le mea ma lona tausaga i mea uma, ma ona lava po i mea uma lava i lalo o le lagi.” (Failauga 3:1) E tutusa uma lava le tele o le taimi o loo tatou maua e faaaogā; e faitalia lava i tatou i le auala e faaaogā ai lena taimi. O le auala tatou te faatulaga ai mea e ao ona faamuamua ma faasoasoa ai o tatou taimi, e faaalia ai i se tulaga tele le mea o loo sili ona tāua i o tatou loto.—Mataio 6:21.
2. (a) I lana Lauga i luga o le Mauga, o le ā na fetalai ai Iesu e faatatau i o tatou manaʻoga faaleagaga? (e) O le ā se iloiloga totino e tatau ona faia e le tagata ia te ia lava?
2 O se mea tatau lo tatou faaalu o se taimi e taumafa ma tofa ai auā o manaʻoga nei o le tino. Ae faapefea o tatou manaʻoga faaleagaga? Ua tatou iloa e tatau foʻi ona faamalie na manaʻoga. I lana Lauga i luga o le Mauga, na folafola ai e Iesu faapea: “Amuia i latou e mataala i o latou manaʻoga faaleagaga.” (Mataio 5:3, NW) O le māfuaaga lena e faamanatu mai ai pea ia i tatou e “le auauna faamaoni ma le mafaufau” le tāua o le tuutoina atu o se taimi i le faitauina ma le suʻesuʻeina o le Tusi Paia. (Mataio 24:45) Atonu o e silafia le tāua o lenei mea, peitaʻi e ono ia te oe se lagona faapea ua leai se taimi e te suʻesuʻe pe faitau ai le Tusi Paia. Afai o le tulaga lena, seʻi o tatou iloiloina la auala ma ni taumafaiga e ono tele ai se avanoa i o tatou olaga mo le faitauina o le Afioga a le Atua, mo suʻesuʻega totino, ma le mafaufau loloto i ai.
Mauaina o se Taimi e Faitau ma Suʻesuʻe ai le Tusi Paia
3, 4. (a) O le ā le fautuaga na tuuina mai e le aposetolo o Paulo e faatatau i le faaaogāina o o tatou taimi, ma o le ā e aofia ai? (e) O le ā sa uiga i ai Paulo ina ua ia fautuaina i tatou e ‘faaaogā tatau le taimi mo i tatou lava’?
3 Pe a fua atu i le taimi ua tatou ola ai nei, e manaʻomia ai mo i tatou uma lava ona utagia upu a le aposetolo o Paulo: “Ia faaeteete outou ina ia outou savavali ma le faautauta, aua neʻi faapei o e valelea, a ia faapei o e popoto; [“ia outou faaaogā tatau le taimi, auā o aso ua leaga,” NW ]. O lenei, aua neʻi faavalea outou, a ia outou iloa le finagalo o le Alii.” (Efeso 5:15-17) O le mea moni lava, o lenei fautuaga e aofia ai vala uma o o tatou olaga o ni Kerisiano tuuina atu, e aofia ai le mauaina o se taimi e tatalo ai, o suʻesuʻega, o sauniga, ma le faia o se sao atoatoa e tusa ma le mea e mafaia i le talaʻia o le “tala lelei o le malo.”—Mataio 24:14; 28:19, 20.
4 E toʻatele auauna a Ieova i aso nei e foliga mai o loo faafaigatā ona latou faaofi i o latou olaga le faitauina ma le suʻesuʻeina loloto o le Tusi Paia. Ua manino mai, e lē mafai ona tatou faaopoopo atu se isi itula i lo tatou aso, atonu la sa faauiga atu le fautuaga a Paulo i se isi mea e ese mai. I le gagana Eleni, o le fuaitau “faaaogā tatau le taimi” e faauiga i le faatau mai o se mea e ala i le faaaogā o se isi mea. I lana tusi Expository Dictionary, ua taʻua ai e W. E. Vine le uiga o le faaupuga, “ia faia mea e sili ona lelei i avanoa uma, ia matuā faaaogā lelei avanoa taʻitasi, auā e leai se tasi e mafai ona ia toe maua mai se avanoa pe a mamulu ese atu.” Mai le ā, ma o fea e mafai ona tatou maua mai ai se taimi avanoa mo le faitau ma le suʻesuʻeina o le Tusi Paia?
Ia Tatou Faatulaga Mea e Ao Ona Faamuamua
5. Aiseā ma e tatau faapefea ona tatou “faamautinoa i mea e sili ona tāua”?
5 E lē gata i a tatou avega tauave masani o le olaga, ae tele foʻi isi mea faaleagaga e ao ona tatou faia. I le avea o ni auauna tuuina atu a Ieova, ua tatou ‘faamalolosi ai i le galuega a le Alii.’ (1 Korinito 15:58) Ona o lenei māfuaaga, na faatonuina ai e Paulo Kerisiano i Filipi ina ia latou “faamautinoa i mea e sili ona tāua.” (Filipi 1:10, NW ) O lona uiga, e tatau ona faatulaga mea e ao ona faamuamua. E tatau lava ona muaʻi iloiloina mea faaleagaga na i lo mea faaletino. (Mataio 6:31-33) Peitaʻi, e manaʻomia foʻi ona paleni i le faataunuuina o a tatou avega tauave. Po o faapefea ona tatou faasoasoaina o tatou taimi i le vā o vala eseese o lo tatou olaga faa-Kerisiano? Ua lipotia mai e ovasia femalagaaʻi e faapea, i “mea e sili ona tāua” ia e tatau ona tausia lelei e se Kerisiano, e foliga mai ua mātele ina lafoaʻia le suʻesuʻeina ma le faitauina o le Tusi Paia.
6. O le ā e mafai ona aofia ai i le faaaogā tatau o le taimi pe a oo mai i le tulaga o galuega totogi po o galuegafai i le fale?
6 E pei ona tatou mātauina, o le faaaogā tatau o le taimi e aofia ai le ‘faia o mea e sili ona lelei i avanoa uma’ ma “ia matuā faaaogā lelei avanoa taʻitasi.” Afai la e lē lelei le auala o loo masani ona tatou faitau ma suʻesuʻeina ai le Tusi Paia, e lelei pe a faia e le tagata lava ia sana iloiloga totoʻa ma vaai po o faapefea ona faaaogā o tatou taimi. Pe afai ua soona tagisā mai a tatou galuega totogi, ua alu uma ai le tele o lo tatou taimi ma le malosi, e tatau ona tatou tatalo atu ia Ieova mo lena mataupu. (Salamo 55:22) Atonu e mafai ona tatou faia ni fetuutuunaʻiga e ono tatou maua ai se isi taimi tele mo mea tāua lea e fesootaʻi atu i le tapuaʻiga ia Ieova, e aofia ai le suʻesuʻeina ma le faitauina o le Tusi Paia. Ua saʻo lava le faaupuga e faapea, e lē taitai uma galuega a se fafine. E tatau la i tuafāfine Kerisiano ona latou faatulaga mea e ao ona faamuamua ma faasaoina ai ni taimi maʻoti mo se faitauga ma se suʻesuʻega māeʻaeʻa o le Tusi Paia.
7, 8. (a) O ā gaoioiga e masani ona faaaogā tatau mai ai le taimi mo le faitau ma suʻesuʻe? (e) O le ā le fuafuaga o tafaoga ma faiga mālōlōga, ma e faapefea e le manatuaina o lenei mea ona fesoasoani mai ina ia tatou faatulaga ai mea e ao ona faamuamua?
7 O le tulaga masani lava, o le toʻatele o i tatou e mafai ona tatou faaaogā tatau se taimi mo suʻesuʻega e ala i le faamatuu ese atu o nisi gaoioiga e lē manaʻomia tele. Tatou te ono fesiligia i tatou lava, ‘O le ā le tele o se taimi o loo oʻu faaaluina e faitau ai mekasini po o nusipepa o le olaga nei, e matamata ai i polokalame o le televise, e faalogologo ai i musika, pe taalo ai i taaloga o vitiō? Po o tele atu ea loʻu taimi e faaalu i le komepiuta na i lo le taimi ou te faaaluina e faitau ai le Tusi Paia?’ Ua faapea mai Paulo: “Aua neʻi faavalea outou, a ia outou iloa le finagalo o le Alii.” Efeso 5:17) E foliga mai o le lē magafagafa o le faaaogāina o le televise ua avea ma māfuaaga autū ua lē lava lelei ai se taimi e tuuina atu e le toʻatele o Molimau i a latou suʻesuʻega totino ma le faitauina o le Tusi Paia.—Salamo 101:3; 119:37, 47, 48.
(8 E ono faapea mai nisi e lē mafai ona latou suʻesuʻe i taimi uma, latou te manaʻomia ni faafiafiaga ma faiga mālōlōga. E ui e moni lenei mea, ae lelei pe a mafaufau i le aofaʻiga o le taimi o tatou faaaluina e mālōlō ai ona faatusatusa lea i le taimi o loo faaalu moni lava e suʻesuʻe pe faitau ai le Tusi Paia. Atonu e ono faateʻia i le iʻuga e iloa ai. O faafiafiaga ma faiga mālōlōga, e ui ina talafeagai, ae tatau ona tausia i o latou tulaga talafeagai. O lo latou fuafuaga ina ia faafouina ai i tatou mo ni gaoioiga fou faaleagaga. E tele polokalame o le televise ma taaloga e faia i vitiō e matuā faavaivaia ai lava se tagata, peitaʻi o le faitauina ma le suʻesuʻeina o le Afioga a le Atua e faafouina ma faamalosia ai.—Salamo 19:7, 8.
Le Auala ua Faaavanoa ai e Nisi se Taimi e Suʻesuʻe Ai
9. O ā aogā o le mulimuli atu i le fautuaga na aumaia i le tamaʻitusi Iloiloina le Tusi Paia i Aso Taitasi—1999?
9 I le faatomuaga i le lomiga o le tamaʻitusi Iloiloina le Tusi Paia i Aso Taitasi i le 1999 o loo taʻua ai faapea: “O le a sili ona aogā le iloiloina o le mau o aso taitasi ma lona faaopoopoga mai lenei tamaitusi i le taeao. O le a e lagona ai e peiseai, na fafagu oe i luga e Ieova, le Aʻoaʻo Sili, ina ia e maua ana faatonuga. O loo fetalai faavaloaga e faatatau ia Iesu Keriso i aogā o loo ia maua mai faatonuga a Ieova i taeao taitasi: ‘Na te [Ieova] fagua aʻu i lea taeao ma lea taeao; na te fagua oʻu taliga, ina ia ou faalogologo e pei o e ua aʻoaʻoina.’ O na faatonuga na avatu ai ia Iesu ‘le laulaufaiva o e ua aʻoaʻoina’ ina ia ona ‘iloa [ai] ona faamafanafana i se upu le ua tigaina.’ (Isa. 30:20; 50:4; Mata. 11:28-30) O le alafai mai i ni fautuaga talafeagai mai le Afioga a le Atua i taeao taitasi o le a lē gata e fesoasoani ia te oe e fesagaia ou lava faafitauli ae faaauupegaina ai foi oe i ‘le laulaufaiva o e ua aʻoaʻoina’ ina ia e fesoasoani atu i isi.” *
10. Ua faapefea ona faaavanoa e nisi se taimi mo le faitauina ma le suʻesuʻeina o le Tusi Paia, faatasi ai ma ā aogā?
10 Ua utagia e le toʻatele o Kerisiano lenei fautuaga e ala i le faitauina o le mau o aso taʻitasi ma *
le faaopoopoga atoa ma le faitauina o le Tusi Paia pe suʻesuʻeina i le taeaopō. E iai se tuafafine paeonia faamaoni i Falani, e alapō lava i taeao uma ma faaalu atoatoa le 30 minute na te faitauina ai le Tusi Paia. O le ā ua mafai ai ona ia faia lenei mea mo le tele o tausaga? Ua ia faapea mai: “Ua matuā faagaeetia ai lava aʻu, ma ou te pipiimau lava i laʻu faasologa o le faitautusi e tusa lava po o le ā se mea e tulaʻi mai!” Po o le ā lava le taimi o le aso tatou te filifilia, o le mea tāua ia tatou pipiimau i la tatou faasologa. Ua faapea mai le uso o René Mica, o lē ua silia ma le 40 tausaga o auauna o se paeonia i Europa ma Aferika i Mātū: “Talu mai lava le 1950, o loo avea pea ma oʻu sini le faitauina o le Tusi Paia atoa i tausaga taʻitasi, o se mea o lenei ua 49 taimi o oʻu faia pea. E iai loʻu lagona o se mea lenei e matuā tāua mo le faatumauina o se ma faiā vavalalata ma Lē na Faia aʻu. O le mafaufau loloto i le Afioga a le Atua ua fesoasoani ia te aʻu ina ia ou malamalama lelei ai i le faamasinogatonu a Ieova ma isi ona uiga, ma ua avea foʻi o se puna o le malosi uigaese.”‘Avatu Mea e ʻAi i Ona Itu Aso’
11, 12. (a) O ā “mea e ʻai” faaleagaga ua saunia mai e le ‘auauna pule faamaoni’? (e) Ua faapefea ona saunia mai “mea e ʻai” i ona itu aso?
11 E pei lava ona maua le soifua mālōlōina lelei pe a masani ona taumafa e lē aunoa, e faapena foʻi i se faasologa mo le suʻesuʻeina ma le faitauina e lē aunoa o le Tusi Paia ona maua ai se soifua mālōlōina lelei faaleagaga. I le Evagelia a Luka, tatou te faitau ai i fetalaiga a Iesu faapea: “O ai foi le auauna e pule, ua faamaoni ma le mafaufau, ua tofia e lona alii e pule i ana auauna, ia avatu mea e ʻai ia te i latou i ona itu aso?” (Luka 12:42) Ua silia nei ma le 120 tausaga, o saunia mai pea e Le Olomatamata ‘mea e ʻai i ona itu aso’ faapea foʻi i isi tusi ma lomiga faale-Tusi Paia.
12 Seʻi mātau le faaupuga “i ona itu aso.” I le taimi tonu, ua taʻitaʻia ai e lo tatou “Aʻoaʻo Sili,” o Ieova, e ala mai i lona Alo ma le vasega o le auauna, ona tagata i mataupu tau talitonuga ma amioga. E peiseai o loo tatou faalogo faatasi atu i se leo o faapea mai ia i tatou: “Pe a outou afe ane i le itu taumatau pe afe ane i le itu tauagavale, e faapea mai, O le ala lava lenei, ia outou savavali ai.” (Isaia 30:20, 21) E lē gata i lea, pe a matuā uaʻi atu tagata taʻitoʻatasi i le faitauina o le Tusi Paia ma lomiga uma faale-Tusi Paia, e masani lava ona latou lagona ai faapea, o mafaufauga ua faaalia mai i na lomiga o loo tuusaʻo mai lava ia i latou. Ioe, o le a aumaia mo i tatou i ona po e tatau ai, fautuaga ma taʻiala faaleatua, ma mafai ai ona tatou tetee atu i tofotofoga po o le faia o se filifiliga atamai.
Ia Ati Aʻe ni Auala Lelei o Masani Ona Taumafa Ai
13. O ā nisi auala leaga o masani ona taumamafa ai faaleagaga?
13 Ina ia maua atoatoa aogā mai na “mea e ʻai” ua saunia i ona itu aso, e manaʻomia ona iai ni 1 Timoteo 1:19; 4:15, 16.
auala lelei o loo masani ona tatou aai ai. E manaʻomia tele le iai o se faasologa faifai pea mo le faitauina o le Tusi Paia ma suʻesuʻega totino ma ia pipiimau i ai. Po o iai ea ni au auala lelei o masani ona e taumafa ai ma ni taimi faifai pea o faia ai ni au suʻesuʻega loloto totino? Po o le mea, e na ona e faatopelau lava i le mataupu ua māeʻa ona sauniunia lelei mai mo i tatou, e te ʻaitamoʻe lava e pei o lea faaupuga, pe oo lava foʻi ina e matuā musu lava e toe taumafa i nisi taimi? O le leaga o ni auala o masani ona taumamafa ai faaleagaga o le pogai lea ua faavaivaia ai nisi i le faatuatua—ua oo lava ina paʻūʻū ese atu ai.—14. Aiseā e aogā ai le iloiloina ma le faaeteete o se mataupu atonu e foliga mai ua masani ai?
14 E ono oo i nisi le lagona faapea, ua uma lava ona latou silafia aʻoaʻoga autū ma e lē o mataupu uma o aumaia ai ni mea e matuā fou atoatoa. O lea la, ua lē talafeagai ai le faifai pea o ni suʻesuʻega ma le auai i sauniga. Peitaʻi ane, ua faaalia mai i le Tusi Paia faapea e manaʻomia ona faamanatu mai ia i tatou mea ua uma ona tatou aʻoaʻoina. (Salamo 119:95, 99; 2 Peteru 3:1; Iuta 5) E pei lava ona sauniunia e se tagata kuka lelei mea autū masani i le tele o ni auala e tofo lelei ai se kuka, ua faapena foʻi ona sauniunia mai e le vasega o le auauna meaʻai faaleagaga i le anoanoaʻi o auala eseese. E tusa lava po o ni mataupu o aofia ai ni manatu sa faamatala soo mai muamua, ae o loo iai pea manatu e sili atu ona lelei o le a tatou lē fia misia. O le mea moni o aogā e mafai ona maua mai mea o tatou faitauina, e tele lava ina faalagolago atu i le aofaʻiga o le taimi ma taumafaiga o tatou faaalu e suʻesuʻeina ai lena mataupu.
Aogā Faaleagaga Mai le Faitau ma Suʻesuʻe
15. E faapefea i le faitau ma le suʻesuʻeina o le Tusi Paia ona fesoasoani mai ina ia avea ai i tatou o ni faifeʻau e sili atu ona lelei o le Afioga a le Atua?
15 E anoanoaʻi aogā tatou te maua mai le faitau ma le suʻesuʻeina o le Tusi Paia. Tatou te maua aogā pe a taumafai ia ola e tusa ai o se tasi o o tatou tiute tauave autū faa-Kerisiano, e faapea, ia tatou taʻitoʻatasi ma avea o sē “faigaluega e leai se mea e mā ai, na te talaʻitonuina le upu moni.” (2 Timoteo 2:15, LF) O le tele lava tatou te faitau ma suʻesuʻe ai le Tusi Paia, o le tele foʻi lena o le a faatumulia ai o tatou mafaufau i mafaufauga o le Atua. Ona tatou pei ai lea o Paulo, o le a mafai ona tatou ‘felafolafoai ma tagata i Tusi, e ala i le faamatala ma faasino atu’ upu moni ofoofogia e faatatau i fuafuaga a Ieova. (Galuega 17:2, 3) O le a faalauteleina lo tatou tomai e aʻoaʻo atu, ma o le a atili foʻi ona avea a tatou talanoaga, o lauga, ma fautuaga, e ati aʻe ai faaleagaga.—Faataoto 1:5.
16. O ā ni itu o le a aogā totino ai ia i tatou le faitauina ma le suʻesuʻeina o le Afioga a le Atua?
16 E lē gata i lea, o le taimi ua tuu atu mo le iloiloina o le Afioga a le Atua o le a mafai ai ona matuā faafetaui atu o tatou olaga i ala o Ieova. (Salamo 25:4; 119:9, 10; Faataoto 6:20-23) O le a faaleleia atili ai o tatou uiga faaleagaga, e pei o le lotomaulalo, le faamaoni, ma le fiafia. (Teuteronome 17:19, 20; Faaaliga 1:3) Pe a tatou faatatauina le poto ua tatou maua mai le faitau ma suʻesuʻeina o le Tusi Paia, e tatou te lagonaina le galue mai e lē aunoa o le agaga o le Atua i o tatou olaga, ma iʻu ai i le faateleina o fua o le agaga i mea uma tatou te faia.—Kalatia 5:22, 23.
17. E faapefea i le tele ma le uigā tatou te faitau ma suʻesuʻeina ai totino le Tusi Paia ona aafia ai la tatou faiā ma Ieova?
17 O le mea e sili ona tāua, o le taimi ua faaaogā tatau mai isi gaoioiga ina ia faitau ma suʻesuʻeina ai le Afioga a le Atua, o le a aumaia ai le ʻoa o faamanuiaga e tusa o la tatou faiā ma le Atua. Na tatalo Paulo mo ona uso Kerisiano “ina ia atoatoa ona [latou] iloa lelei o [le finagalo o le Atua] Kolose 1:9, 10) E faapena i tatou, ina ia “savavali e tusa ma Ieova,” e tatau ona ‘atoatoa lo tatou iloa lelei o lona finagalo i le poto uma atoa ma le mafaufau faaleagaga.’ E manino lava, o lo tatou mauaina o le faamanuia ma le finagalo malie o Ieova e faalagolago tele atu i le tele ma le uigā tatou te faitau ma suʻesuʻeina ai totino le Tusi Paia.
i le poto uma atoa ma le mafaufau faaleagaga; ia [latou] savavali e tusa ma [“Ieova,” NW], ina ia fiafia mai o ia ia te [i latou] i mea uma.” (18. O ā ni faamanuiaga e mafai ona tatou maua pe afai tatou te mulimuli i fetalaiga a Iesu o loo faamauina i le Ioane 17:3?
18 “O le uiga lenei o le ola e faavavau, ia latou maua pea le poto e uiga ia te oe, le Atua moni e toʻatasi, ma lē ua e auina mai, o Iesu Keriso lea.” (Ioane 17:3, NW ) O se tasi lena o mau e sili ona faaaogā soo e Molimau a Ieova e fesoasoani ai i isi ina ia latou talisapaia le tāua o le suʻesuʻeina o le Afioga a le Atua. E mautinoa le tatau foʻi ona tāua faapena ia i tatou taʻitoʻatasi le faia o lea mea e le tagata lava ia. O lo tatou lava faamoemoe o le ola e faavavau e faalagolago i lo tatou tutupu aʻe i le poto e uiga ia Ieova ma lona Alo, o Iesu Keriso. Ma seʻi tau lava ina manatu i le uiga o lena mea. O le a lē taitai ona muta lo tatou aʻoaʻoina atili o mea e uiga ia Ieova—ma o le a faavavau ona aʻoaʻoina mea e uiga ia te ia!—Failauga 3:11; Roma 11:33.
[Faamatalaga pito i lalo]
^ pala. 9 Ua lomia e le Watchtower Bible and Tract Society of New York, Inc.
^ pala. 10 Tagaʻi i le mataupu “Le Taimi Latou te Faitauina ai ma Aogā Latou te Maua Mai Ai,” ua lomia i le lomiga o Le Olomatamata o Me 1, 1995, itulau 20-21.
Fesili Autalu
• O le ā ua faaalia mai i le auala o tatou faaaogā ai o tatou taimi?
• O ā gaoioiga e mafai ona tatou faaaogā tatau mai ai le taimi mo le faitau ma le suʻesuʻeina o le Tusi Paia?
• Aiseā e tatau ai ona tatou mataala i auala o loo masani ona tatou aai ai faaleagaga?
• O ā aogā e maua mai le faitau ma le suʻesuʻeina o le Tusi Paia?
[Fesili mo le Suʻesuʻega]
[Faamatalaga i le itulau 21]
O le faitau ma le suʻesuʻeina e lē aunoa o le Tusi Paia o le a mafai ai ona tatou “talaʻitonuina le upu moni”
[Faamatalaga i le itulau 23]
O le faapaleni lelei o isi gaoioiga i o tatou olaga pisi faatasi ai ma le tuliloaina o manaʻoga faaleagaga e aumaia ai le ʻoa o faamanuiaga