Suʻesuʻe—E Tauia ma Olioli Ai

“Afai e te sailiili ia te ia . . . , e [te] maua ai le poto i le Atua.”—FAATAOTO 2:4, 5.

1. E mafai faapefea e se faitauga tusi faasamasamanoa ona aumaia ai se fiafiaga tele?

E TOʻATELE tagata e faitautusi mo le na ona faafiafiaina ai. Pe afai o se mataupu e aogā, e mafai ona avea lena faitautusi ma puna o se mālōlōga aogā. E ese mai la latou polokalame faifai pea o le faitauga Tusi Paia, ua maua e nisi Kerisiano le fiafiaga moni i le na ona faitau faasamasamanoa lava i Salamo, Faataoto, ma tala a Evagelia, po o isi vaega o le Tusi Paia. O le matuā matagofie o le gagana ma mafaufauga o iai e latou te maua ai se fiafiaga tele. Mo a latou faitauga faasamasamanoa, ua filifilia ai e isi le Yearbook of Jehovah’s Witnesses, le mekasini o le Ala Mai!, o tala i soifuaga o tagata o loo lomia i lenei mekasini, po o tusitusiga e faatatau i suʻesuʻega o talafaasolopito, le siʻosiʻomaga, ma mea o le natura.

2, 3. (a) I le ā le itu e mafai ai ona faatusatusa atu faamatalaga faaleagaga i meaʻai aano? (e) O le ā e aofia ai i le suʻesuʻe?

² A o avea le faitautusi faasamasamanoa o se mea e mālōlō i ai, ae o le suʻesuʻe e manaʻomia ai taumafaiga faalemafaufau. Na tusi mai le alii faifilosofia Egelani o Francis Bacon: “O nisi tusi e mo le tofo i ai, o isi tusi e na ona folo lava, ae iai nisi tusi e tatau ona lamu muamua ma faamalū.” E mautinoa o le Tusi Paia e aofia i le vaega mulimuli o lena faamatalaga. Na tusi mai le aposetolo o Paulo: “Ua ia i matou upu e tele i lenei mataupu [e faatatau ia Keriso, e pei ona muaʻi faaata mai e le Tupu Ositaulaga o Mekisateko], e faigata foi ona faamatalaina, ina ua avea outou ma tagata aʻoaʻogata. . . . O mea aano, mā e matutua ia, o i latou ua masani ona lagona ina ua aʻoaʻosooina e iloa ai le lelei ma le leaga.” (Eperu 5:11, 14, LF ) E tatau lava ona lamu malū meaʻai aano a o leʻi foloina ma faaaogāina e le tino. O faamatalaga loloto faaleagaga e manaʻomia ona iloiloina lelei a o leʻi faagoto ifo i le loto ma faatumau ai.

³ E faamatalaina e se lomifefiloi le “suʻesuʻe” e faapea, o “se gaoioiga po o se faagasologa o le faaaogāina o le mafaufau ina ia maua ai le poto po o le malamalama, e ala i le faitau, iloilo māeʻaeʻa, ma isi mea faapena.” E taʻua atili faapea, e tele atu isi mea e aofia ai na i lo le tau ina faitau faatopelau, atonu pe na ona vasevase lava o ni upu a o faasolo le faitau. O le suʻesuʻe e tusa lava o se galuega, o ni taumafaiga faalemafaufau, ma le faaaogāina o tomai e manatunatu ai. Peitaʻi, e ui ina manaʻomia e le suʻesuʻe ni taumafaiga, ae lē faapea ai o le a lē mafai ona fiafia ai.

Ia Avea le Suʻesuʻe o se Fiafiaga

4. E tusa ai o le faisalamo, e faapefea ona avea le suʻesuʻeina o le Afioga a le Atua o se mea e faafouina ma tauia ai?

⁴ O le faitau ma le suʻesuʻeina o le Afioga a le Atua e mafai ona faafouina ma faamalosia ai. Na  faalauiloa mai e le faisalamo: “E sao le tulafono a Ieova, e faafoisia mai ai le agaga; e faamaoni poloaiga a Ieova, e faapotoina ai le ua faigofie. E tonu feau a Ieova, e faafiafia ai le loto; e mamā poloaiga a Ieova, e malamalama ai mata.” (Salamo 19:7, 8) O tulafono ma faamanatuga a Ieova e toe faafou ai o tatou agaga, e faateleina ai lo tatou lelei faaleagaga, e olioli ai o tatou loto, tatou te matuā fiafia ai a o atili manino atu la tatou vaai i fuafuaga ofoofogia a Ieova. Maʻeu le matagofie!

5. O ā auala e mafai e le suʻesuʻe ona aumaia ai ia i tatou se fiafiaga tele?

⁵ Pe afai e mafai ona tatou vaai atu i iʻuga lelei mai a tatou galuega, e tele ai lava ina tatou fiafia e fai na galuega. O lea, ina ia avea le suʻesuʻe o se mea e fiafia ai, e tatau ona tatou vave faaaogā le poto lea faatoʻā maua. Na tusi mai Iakopo: “O lē matuā matamata i le tulafono o le saʻolotoga ua atoatoa ona lelei, ma ua tumau i ai o ia, e le se faalogologo ma le faagalogalo lena tagata, a o le anaana i le galuega, e manuia o ia i lona lava anaana.” (Iakopo 1:25) O le vave ona faatatauina totino o manatu autū ua aʻoaʻoina e aumaia ai se faamaliega tele. O le faia o saʻiliʻiliga mo se fuafuaga maʻoti ina ia taliina se fesili ua fesiligia ai i tatou i la tatou galuega talaʻi po o le aʻoaʻo atu, o le a aumaia ai foʻi ia i tatou se fiafiaga tele.

Faatupuina o se Naunau Fiafia i le Afioga a le Atua

6. Na faapefea ona faaleo mai e le tusitala o le Salamo 119 lona naunau fiafia i afioga a Ieova?

⁶ O lē na fatuina le Salamo 119, atonu o Esekia a o avea o se aloalii talavou, sa ia faaleo mai lona naunau fiafia i afioga a Ieova. I se gagana faafatusolo, na ia faapea mai ai: “Ou te fiafia lava aʻu i au tulafono; e le galo ia te au o lau afioga. O au tulafono o loʻu lava fiafia ia . . . Ou te fiafia lava aʻu i au poloaiga, ua ou naunau i ai. Ia oo mai ia te au ou alofa mutimuti vale, ia ou ola ai; auā o lau tulafono, o loʻu fiafia lea. Ieova e, ou te naunau i lau faaolataga; o lau tulafono foi, o loʻu lea fiafia.”—Salamo 119:16, 24, 47, 77, 174.

7, 8. (a) I le faamatalaga a se tasi tusitusiga, o le ā le uiga o le “fiafia lava” i le Afioga a le Atua? (e) E mafai faapefea ona tatou faaalia lo tatou alofa mo le Afioga a Ieova? (i) Na faapefea ona saunia e Esera ia lava a o ia leʻi faitauina le Tulafono a Ieova?

⁷ I le faamalamalamaina o le upu ua faaliliu i le “fiafia lava” i le Salamo 119, ua taʻua ai e se tasi lomifefiloi mo Tusitusiga Eperu e faapea: “O le faaaogāina i le f. 16 e tutusa atu i [veape] mo le olioli . . . ma le mafaufau loloto . . . O le faagasologa lenei: olioli, mafaufau loloto, fiafia i ai . . . O lenei tuufaatasiga e ono faaalia ai faapea, o le feliuliuaʻi o le mafaufau mo se fuafuaga aogā o le auala lena e ono fiafia ai se tasi i afioga a Iauē. . . . O le uiga o lena manatu e aofia ai se vaega o faalogona faaalia.” *

⁸ Ioe, o lo tatou alofa mo le Afioga a Ieova e ao ona puna mai o tatou loto, le nofoaga o faalogona. E tatau ona tatou fiafia e faasolosolo mālie o tatou mafaufauga i nisi o fuaitau faatoʻā uma ona tatou faitauina. E tatau ona tatou fefulifulisaʻi i manatunatuga ʻanoa faaleagaga, ia faagoto ifo i le loto, ma mafaufau loloto i ai. E manaʻomia ai i lenei itu mafaufauga lē leoa ma le tatalo. I le pei o Esera, e manaʻomia ona tatou sauniunia o tatou loto mo le faitauina ma le suʻesuʻeina o le Afioga a le Atua. E faapenei se faamatalaga na tusia e uiga ia te ia: “Na saunia e Esera lona loto e saili i le tulafono a Ieova ma fai ai, ma aʻoaʻo atu i Isaraelu i le tulafono, ma faamasinoga.” (Esera 7:10) Mātau mai le fuafuaga valatolu na saunia ai e Esera lona loto: ia saʻili pe suʻesuʻe i ai, ia fai pe faatino  e ia lava, ma ia aʻoaʻo atu ai. E tatau ona tatou faataʻitaʻi i lana faaaʻoaʻoga.

Avea le Suʻesuʻe o se Vaega o le Tapuaʻiga

9, 10. (a) O ā auala sa manatu mamafa ai le faisalamo i le Afioga a Ieova? (e) O le ā e faauiga atu i ai le veape Eperu ua faaliliuina i le “mafaufau [o se tasi]”? (i) Aiseā e tāua ai mo i tatou ona manatu i le suʻesuʻeina o le Tusi Paia o “se gaoioiga tau tapuaʻiga”?

⁹ Ua taʻua e le faisalamo lona manatu mamafa i tulafono, o poloaʻiga, ma faamanatuga a Ieova. Ua ia pese e faapea: “Ou te mafaufau lava i au feau, ma ou manatua lava ou ala. Ou te sii foi i luga oʻu lima i au poloaiga ua ou naunau i ai; ou te mafaufau lava i au tulafono. Ua tele lava loʻu naunau i lau tulafono; ou te mafaufau i ai i le aso atoa. Ua sili ona atamai o aʻu i e aʻoaʻo mai ia te au uma lava; auā o au tulafono ou te mafaufau i ai.” (Salamo 119:15, 48, 97, 99) O le ā ua faaalia e le ‘mafaufau o se tasi’ i le Afioga a Ieova?

¹⁰ O le veape Eperu ua faaliliuina i le “mafaufau [o se tasi]” e faauiga atu foʻi i le “mafaufau loloto, fefulifulisaʻi,” “faasolo mafaufauga o se tasi i se mataupu.” “E faaaogā i ni feliuliuaʻiga lē leoa o le mafaufau i galuega a le Atua . . . ma le afioga a le Atua.” (Theological Wordbook of the Old Testament) O le nauna o le “mafaufau” e faasino atu i “mafaufauga loloto o le faisalamo,” “lona suʻesuʻeina ma le alofa” i tulafono a le Atua, e faapea o “se gaoioiga tau tapuaʻiga.” O le manatu i le suʻesuʻeina o le Afioga a le Atua faapea, o se vaega o la tatou tapuaʻiga, e atili ai ona uigā lena mataupu. E tatau ai la ona faia ma le faaeteete faatasi ai ma le fesoasoani a le tatalo. O le suʻesuʻe o se vaega o la tatou tapuaʻiga ma ua faia ina ia faaleleia ai la tatou tapuaʻiga.

Ia Matuā Eli i le Afioga a le Atua

11. E faapefea ona faaalia mai e Ieova mafaufauga loloto faaleagaga i ona tagata?

¹¹ I se viiviiga faaaloalo, na alaga ai le faisalamo: “Ieova e, e matuā sili lava mea ua e faia; e loloto lava ou manatu.” (Salamo 92:5) Sa tautala foʻi le aposetolo o Paulo i le “uiga loloto o le Atua,” o mafaufauga loloto e faaalia mai e Ieova i ona tagata e ala mai “lona Agaga” lea o loo faagaoioia le vasega o le auauna faamaoni ma le mafaufau. (1 Korinito 2:10, LF; Mataio 24:45) O loo maelega le vasega o le auauna e saunia mai taumafa faaleagaga mo tagata uma—le “suāsusu” mo ē fou ae o “mea aano” mo “e matutua.”—Eperu 5:11-14.

12. Taʻu mai se faaaʻoaʻoga o “uiga loloto i le Atua” ua faamalamalamaina e ala mai i le vasega o le auauna.

¹² Ina ia malamalama i na “uiga loloto o le Atua,” e talafeagai ai ona suʻesuʻe faatasi ma le tatalo ma ia toe manatunatu i lana Afioga. Mo se faaaʻoaʻoga, ua lomia ni mataupu matagofie o loo faaalia ai pe faapefea ona faaalia faatasi mai e Ieova lona faimea tonu ma le alofa mutimutivale. O lona faaalia o le alofa mutimutivale e lē faalēaogāina ai lona faamasinotonu; na i lo lea, o le alofa mutimutivale tauatua o se faailoaga o le faamasinotonu o le Atua atoa ai ma lona alofa. Pe a faamasinoina se tagata agasala, e muamua lava faamautinoa e Ieova pe iai se tulaga e ono talafeagai ai le faaalia o le alofa mutimutivale e faavae i le taulaga togiola a lona Alo. Pe afai e lē salamō pe fouvale le tagata agasala, e faataga e le Atua le faatinoina o le faamasinoga tonu e aunoa ma se alofa mutimutivale e faaalia i ai. Po o le ā lava le tulaga, ae faamaoni lava o ia i ana mataupu silisili maualuluga. * (Roma 3:21-26) ‘Aue! le loloto o le poto o le Atua!’—Roma 11:33.

13. E tatau faapefea ona tatou faaalia le talisapaia mo le “faitau aofai” o upu moni faaleagaga ua faaalia mai?

¹³ I le pei o le faisalamo, tatou te fiafia e iloa le mea moni faapea, e faasoa mai e Ieova le tele o ona manatunatuga ia i tatou. Na tusi mai Tavita: “Le Atua e, ua matuā sili ou manatunatu ona aoga ia te au, ua sili lava ona tele o lo latou faitau aofai. Afai ou te faitaulia, ua sili ia ona tele i le oneone.” (Salamo 139:17, 18) E ui o le iloa o loo ia i tatou i aso nei ua na o sina vaega itiiti lena o manatunatuga lē mafaitaulia o le a faaalia mai e Ieova e oo atu i le faavavau, ae tatou te matuā talisapaia le “faitau aofai” o upu moni tautele faaleagaga ua faaalia mai ma matuā eli loloto ai i le faitau aofaʻi, po o mea aano, o le Afioga a le Atua.—Salamo 119:160, faaopoopoga i le pito i lalo, NW.

 Taumafaiga ma Meafaigaluega Uigā e Manaʻomia

14. Ua faapefea ona faamamafa mai e le Faataoto 2:1-6 le manaʻomia o taumafaiga i le suʻesuʻeina o le Afioga a le Atua?

¹⁴ O se suʻesuʻega loloto faale-Tusi Paia e manaʻomia ai taumafaiga. E faaalia manino mai lenei mea moni pe a faitau māeʻaeʻa i le Faataoto 2:1-6. Seʻi mātau veape e faamatalaina ai gaoioiga na faaaogā e le tupu poto o Solomona e faamamafa ai le manaʻomia o taumafaiga ina ia maua le poto tauatua, le atamai, ma le faautauta. Na ia tusi mai: “Loʻu atalii e, afai e te talia aʻu upu, ma e teu i lou loto aʻu poloaiga, e uai atu ai ou taliga i le poto, e faasaga atu ai lou loto i le faautauta; afai lava e te valaau atu i le atamai, ma e leo tele atu i le faautauta; afai e te sailiili ia te ia, e pei ona sailiili i le ario; afai e te suesue i ai, pei ona suesue i le oloa lilo; ona e lagona ai lea o le mataʻu ia Ieova, ma e maua ai le poto i le Atua. Auā o Ieova na te foai mai le poto; mai lona fofoga le poto ma le faautauta.” Ioe, o se suʻesuʻega e tauia e manaʻomia ai le saʻiliʻili, ia eli, e peiseai o loo saʻili i se oloa lilo.

15. O le ā le faataʻitaʻiga faale-Tusi Paia o loo faamatilatila mai ai le manaʻomia o ni metotia lelei mo suʻesuʻega?

¹⁵ O se suʻesuʻega faaʻoaina faaleagaga e manaʻomia ai foʻi ni metotia lelei mo suʻesuʻega. Na tusi mai Solomona: “Afai e matatupa le uamea, a le faamaaia foi e ia lona mata, ona faatele lea i ai o lona malosi.” (Failauga 10:10) Pe afai e faaaogā e se tagata faigaluega se meafaigaluega mo le tipiina o mea ae lē o maai pe e lē o lelei foʻi ona ia faaaogā, o le a na ona ia faamaʻimau ai o lona malosi ma o le a lē lelei ai foʻi le faatinoga o le galuega. I se tulaga faapena, o aogā e maua mai i taimi e faaaogā e suʻesuʻe ai e mafai ona matuā tele lava, e fuafua i a tatou metotia mo suʻesuʻega. E mafai ona maua ni fautuaga sili ona aogā mo le faaleleia o le auala tatou te suʻesuʻe ai, i le Suʻesuʻega 7 o le tusi Theocratic Ministry School Guidebook. *

16. O ā fautuaga aogā ua aumai e fesoasoani ia i tatou ina ia faia ai se suʻesuʻega loloto?

¹⁶ A o sauni se tufuga mo lana galuega, e muamua lava faataatitia ana meafaigaluega o le a ia manaʻomia. E faapena foʻi, pe afai o le a amata la tatou suʻesuʻega, e tatau ona tatou filifilia mai i la tatou lava faaputuga tusi ni meafaigaluega mo suʻesuʻega o le a tatou manaʻomia. O le manatuaina faapea o le suʻesuʻe o se galuega ma e manaʻomia ai ona faagaoioi le mafaufau, e lelei foʻi la pe afai o talafeagai le tulaga o loo e suʻesuʻe ai. Afai tatou te mananaʻo ia ala lelei o tatou mafaufau, o le nofo la i se nofoa ma faaaogā se laulau po o se kesi e mafai ai ona sili atu le uigā na i lo le taoto i le moega ma suʻesuʻe pe nofo foʻi i se nofoa malūlū e matuā lalago lelei ai le taatitia o lima. Afai ua fai sina umi o uaʻi atoatoa lou mafaufau i lau suʻesuʻega, e aogā pe a fai ma tau fālōlō ou lima ma vae pe savalivali foʻi i fafo mo le mānavaina o se ea fou.

17, 18. Taʻu mai ni faaaʻoaʻoga o le auala e faaaogā ai meafaigaluega lelei mo suʻesuʻega o loo avanoa mai ia te oe.

¹⁷ E tele meafaigaluega lē mafaatusalia mo suʻesuʻega o loo avanoa mai mo i tatou. Ae e silisili lava i nei meafaigaluega, o le Tusi Paia o le New World Translation, lea ua maua nei i le tusi atoa pe i ni vaega i gagana e 37. O le lomiga autū o le New World Translation ua iai ma se faasinoupu ma se lisi o tusi o le Tusi Paia (Table of the Books of the Bible) lea e taʻu mai ai le igoa o lē na tusia lena tusi, le nofoaga na tusia ai, ma le vaitaimi sa faaaluina ai. E iai foʻi se faasinoupu o upu faale-Tusi Paia, o se faaopoopoga, ma faafanua. I nisi gagana, ua lomia ai lenei Tusi Paia i se tusi e mataʻitusi lapopoʻa, ua taʻua o le Reference Bible. O loo iai uma i lena tusi mea ua taʻua i luga ma le tele o isi vala, e aofia ai faaopoopoga auʻiliʻili i le pito i lalo, lea foʻi ua tusia i le faasinoupu. Po o e faaaogā atoatoa ea mea o e maua i lau gagana ina ia mafai ai ona e matuā eli loloto i le Afioga a le Atua?

¹⁸ O le isi meafaigaluega sili ona tāua mo suʻesuʻega o le lomifefiloi a le Tusi Paia, lea e lua ona lomiga, le Insight on the Scriptures. Pe afai o e mauaina lenei lomiga i se gagana e te malamalama ai, e tatau ona avea ma au paaga e te tapa pea i ai a o fai au suʻesuʻega. O le a e maua mai  ai faamatalaga tau i talaaga mo le tele o mataupu faale-Tusi Paia. O se meafaigaluega e tali faapena foʻi lona aogā, o le tusi “All Scripture Is Inspired of God and Beneficial.” Pe a amata ona faitau i se tusi fou o le Tusi Paia, e lelei pe a iloilo le mataupu o loo talanoaina ai i le tusi o le “All Scripture” ina ia malamalama ai i le tulaga tau siʻosiʻomaga ma le talaaga faasolopito o lena tusi, faatasi ai ma se autaluga o mataupu o loo iai i lena tusi o le Tusi Paia aemaise lona tāua ia i tatou. O se isi faaopoopoga lata mai nei i le tele o meafaigaluega ua lomia mo suʻesuʻega, o le Watchtower Library lea ua tuuina i le komepiuta, ma o loo maua nei i gagana e iva.

19. (a) Aiseā ua saunia mai ai e Ieova mo i tatou meafaigaluega lelei mo le suʻesuʻeina o le Tusi Paia? (e) O le ā e manaʻomia mo le faitauina talafeagai ma le suʻesuʻeina o le Tusi Paia?

¹⁹ Ua saunia e Ieova nei meafaigaluega uma e ala mai “le auauna faamaoni ma le mafaufau” ina ia mafai ai e ana auauna o i le lalolagi ona ‘sailiili ma maua le poto i le Atua.’ (Faataoto 2:4, 5) O le lelei o le auala o loo masani ona tatou suʻesuʻe ai e mafai ona atili faateleina ai lo tatou poto e uiga ia Ieova ma maua ai se faiā e sili atu ona māfana ma ia. (Salamo 63:1-8) Ioe, o le suʻesuʻe e tusa lava o se galuega, peitaʻi o se galuega e olioli ma tauia ai. Peitaʻi, e alu ai se taimi, ma atonu o loo e mafaufau, ‘O fea ou te maua ai se taimi e uaʻi lelei atu ai i laʻu faitauga Tusi Paia ma aʻu suʻesuʻega totino?’ O le a talanoaina lenei vala i le mataupu mulimuli o lenei faasologa.

[Faamatalaga pito i lalo]

Fesili Autalu

• E faapefea ona tatou faia la tatou suʻesuʻega totino o se mea e faafouina ma tauia ai?

• I le pei o le faisalamo, e mafai faapefea ona tatou faaalia le “naunau” ma le “mafaufau” i le Afioga a Ieova?

• E faapefea ona faaalia mai e le Faataoto 2:1-6 le manaʻomia o ni taumafaiga mo le suʻesuʻeina o le Afioga a le Atua?

• O ā meafaigaluega lelei mo suʻesuʻega ua saunia mai e Ieova?

[Fesili mo le Suʻesuʻega]

[Faamatalaga i le itulau 14]

O le tomanatu mālie faatasi ai ma le tatalo e fesoasoani ia i tatou i le faatupuina o le alofa mo le Afioga a le Atua

[Faamatalaga i le itulau 17]

Po o e faaaogāina atoatoa ea meafaigaluega o loo maua mo suʻesuʻega ina ia e eli loloto ai i le Afioga a le Atua?