Galueaʻiina o le “Fanua”—A o Lumanaʻi le Seleselega

SA LĒ mautonu soo o le Aʻoaʻo Sili. O lea faatoʻā uma lava ona faamatala mai e Iesu se tala puupuu i le saito ma le titania. O se tasi lena o faataoto mai le tele o faataoto na ia fetalaia i lena aso. Ina ua māeʻa, ona agaʻi ese atu lea o le toʻatele o lana aofia na iai. Peitaʻi sa iloa e ona soo e tatau ona iai se uiga patino o ana faataoto—aemaise le faataoto i le saito ma le titania. Na latou iloa o Iesu sa lē na o sē faifagogo mālie.

Ua lipotia mai e Mataio le fesili na latou fesili atu ai: “Ia e faamatala mai ia te i matou le faataoto i le titania i le fanua.” I le tali, na faamatala ai e Iesu le uiga o le faataoto, i le valoia o se faaaposetasi tele o le a tupu aʻe i totonu o i latou o faapea mai o ona soo. (Mataio 13:24-30, 36-38, 43) Na tupu lena mea, ma na vave salalau atu le faaaposetasi ina ua mavae le maliu o le aposetolo o Ioane. (Galuega 20:29, 30; 2 Tesalonia 2:6-12) O ona āuga sa matuā salalau atu ma foliga ai ua matuā talafeagai le fesili na faatū atu  e Iesu, e pei ona faamauina i le Luka 18:8 (LF): “A sau le Atalii o le tagata, pe maua ea e ia le faatuatua i le lalolagi?”

O le taunuu mai o Iesu o le a faailogaina ai le amataga o “le seleselega” o Kerisiano e pei o ni saito. O le a avea lena ma faailoga o le ‘gataaga o le lalolagi,’ lea na amata mai i le 1914. E lē tatau ai la ona faateʻia i tatou i le iloa, sa iai nisi na amata ona naunau fiafia i upu moni a le Tusi Paia i le vaitaimi lea na taʻitaʻia atu i le amataga o le seleselega.—Mataio 13:39.

O se iloiloga o faamaumauga o talafaasolopito ua manino mai ai faapea, aemaise lava mai le senituri lona 15 ma faasolo mai ai, sa amata ona naunau tagata, e oo lava i tagata i Kerisinetoma o ē sa pei o ni “titania,” po o Kerisiano faatagafai. A o amata ona mauagofie le Tusi Paia ma ua sauniunia foʻi faasinotusi o le Tusi Paia, na amata ai e tagata lotofaamaoni ona latou saʻiliʻili atu ma le faaeteete i le Tusi Paia.

Ua Susulu Mai le Malamalama

O se tasi o na tane na iai i le amataga o le senituri lona 19, o Henry Grew (1781-1862), mai Birmingham, i Egelani. I le 13 o ona tausaga, na folau atu ai o ia ma lona aiga e āsā le vasa Atalani e agaʻi atu i le Iunaite Setete, ma taunuu ai ia Iulai 8, 1795. Na latou faamautū i Providence, i Rhode Island. Sa faamausalīina e ona mātua i lona loto le naunau mo le Tusi Paia. O le tausaga e 1807, ina ua 25 ona tausaga, na valaaulia ai Grew e galue o se faifeʻau mo le Lotu Papatiso i Hartford, i Connecticut.

Sa matuā uaʻi atu o ia i ona tiute tau aʻoaʻo atu ma taumafai ina ia fesoasoani i tagata sa i lalo o lana tausiga, ina ia ola e ōgatusa ma le Tusi Paia. Peitaʻi, sa ia talitonu e tatau ona tausia le mamā o le faapotopotoga mai so o se tagata o lē faia ma le loto i ai le agasala. I nisi taimi, sa latou auaufaatasi ai ma isi tane faamoemoeina o le lotu, ina ia faatulaʻi ese (faateʻaina) i latou o ē na faia le faitaaga pe sa auai i isi amioga lē mamā.

Sa iai isi faafitauli i le lotu na avea ma atugaluga ia te ia. Sa iai ni tane e lē o ni sui o le lotu, ae sa latou taulimaina mataupu faapisinisi a le lotu ma taʻitaʻia pese i taimi o sauniga lotu. Sa mafai foʻi ona palota nei tane i mataupu e patino i le faapotopotoga ma faapea ai ona iai sa latou  pule i mataupufai a le lotu. E faavae aʻe i le mataupu silisili o le vavae ese mai le lalolagi, na malosi ai lava le talitonuga o Grew e faapea e na o tane faamaoni e tatau ona latou faatinoina nei gaoioiga. (2 Korinito 6:14-18; Iakopo 1:27) I lona manatu, o se lē faaaloalo i le Atua le faaaogā o ni tagata lē talitonu latou te usuina viiga i le Atua. Ona o lenei tulaga, na teena ai e le lotu Henry Grew i le tausaga e 1811. E iai isi tagata sa faapena foʻi o latou manatu ma sa vavae ese ai mai le lotu i lena lava taimi.

Vavae Ese Mai Kerisinetoma

Sa amataina e lenei vaega, e aofia ai Henry Grew, sa latou suʻesuʻega i le Tusi Paia ma le ʻauga ina ia ōgatusa o latou olaga ma gaoioiga ma fautuaga o loo aumaia ai. O a latou suʻesuʻega na vave lava ona matuā faateleina ai lo latou malamalamaga i upu moni o le Tusi Paia ma mafai ai ona latou faalialia atu measesē a Kerisinetoma. Mo se faaaʻoaʻoga, i le 1824, na tusia ai e Grew se faamatalaga na lava saunia lelei ia faamaoniga e faaali atu ai le sesē o le aʻoaʻoga o le Tasitolu. Seʻi mātau mai foʻi le talafeagai o le sologa lelei o manatu o lenei fuaitau i ana tusitusiga: “ʻE tusa ai o lena aso, ma lena ituaso, e lē iloa e se tagata, e lē iloa e agelu o i le lagi, e lē iloa foʻi e le Atalii, ae ua na o le TAMĀ.’ [Mareko 13:32] Seʻi mātau mai iinei le eseesega o tulaga o peresona. Le tagata, Agelu, Atalii, Tamā. . . . Ua aʻoaʻoina i tatou e lo tatou Alii e faapea e na o le Tamā na te silafia lena aso. Ae ua lē saʻo lena manatu, pe afai, e tusa ai o manatu o nisi, o le Tamā, le Upu, ma le Agaga Paia o ni peresona se tolu i totonu o le Atua e toʻatasi; auā, e tusa ai o lenei [aʻoaʻoga, le talitonuga i le Tasitolu,] e . . . tutusa lelei lava le silafia e le Atalii o lena mea ma le silafia e le Tamā.”

Sa faaalialia e Grew le pepelo o taʻitaʻi lotu ma taʻitaʻiʻau o ē na faafoliga o loo latou faia se auaunaga ia Keriso. I le 1828 na ia faalauiloa mai ai e faapea: “Pe mafai ea ona tatou iloaina se isi pepelo e sili atu na i lo le pepelo o se Kerisiano lea faatoʻā uma ona tatalo i totonu o lona afeafe mo ona fili, ae ulufafo mai ma avatu le poloaʻiga i ana ʻautau ina ia matuā faaaogā auupega mataʻutia e sunuʻi ai fatu o na lava fili? I le tasi itu, na te faaatagia mai ai lona Matai o loo puapuagatia; ae o ai la lea na te faaatagia mai i le isi itu? Sa tatalo Iesu mo tagata na fasiotia o ia. Ae o Kerisiano latou te tatalo mo tagata o loo latou fasiotia.”

Na atili malosi le tusi atu a Grew e faapea: “O āfea ea o le a tatou talitonu ai i Lē Ona le Malosi Uma Lava o lē ua ia faamautinoa mai ia i tatou faapea e ‘lē ulagia’ o ia? O āfea ea o le a tatou malamalama ai i le uiga moni, le agaga moni, o lena lotu paia lea e tāpā mai ai lo tatou taumamao ese e oo lava i le ‘foliga o se mea leaga?’ . . . Po ua lē o se taufaaleaga ea i le Alo o lē paia, le faatagā faapea e manaʻomia mai lana lotu le tatau i le tagata ona gaoioi e pei se agelu i se tasi taimi, ae toe faataga foʻi i le isi taimi e gaoioi pei se temoni?”

E Lē Tuufaasolo Maia le Ola e Faavavau

I le gasologa o na tausaga a o leʻi iai ni leitiō ma ni televise, o le auala taatele na faaali atu ai manatu o se tasi o le tusia lea o ni tamaʻi tusi ma tufatufa atu. Pe tusa o le tausaga e 1835, na tusia ai e Grew se tamaʻi tusi tāua lea na faaalialia ai le lē faale-Tusi Paia o aʻoaʻoga o le lē mafai ona oti o le solu ma le afi i hele. Sa iai lona lagona o nei talitonuga o se upuvale i le Atua.

Sa matuā telē se ooooga o aafiaga o lenei tamaʻi tusi. I le tausaga e 1837, na maua ai e George Storrs, e 40 ona tausaga, se kopi o le tamaʻi tusi i totonu o se nofoaafi. O Storrs o se tagata mai Lepanona, i New Hampshire, ae o loo nofo i lena taimi i le aai o Utica, i Niu Ioka.

O ia o se failotu sa sili ona faaaloalogia i le Lotu Methodist-Episcopal. Ina ua ia faitauina le tamaʻi tusi, sa maofa o ia i le mafai ona faia o sea finauga malosi i nei aʻoaʻoga faavae a Kerisinetoma, lea na te leʻi fesiligia muamua. Na te leʻi iloa po o ai le tusitala o le tamaʻi tusi, ae na faatoʻā iloa lava i ni tausaga mulimuli ane, pe tusa o le 1844, ina ua ia feiloaʻi atu ia Henry Grew a o la taufai nonofo faatasi i Philadelphia, i Pennsylvania. Peitaʻi, e tolu tausaga o suʻesuʻe toʻatasi lava e Storrs le mataupu, vaganā ai isi faifeʻau sa ia talanoa atu i ai e faatatau i le mataupu.

O le iʻuga, talu ai e leai se tasi e mafai ona faamaonia e sesē mea na ia aʻoaʻoina, o lea na filifili ai Storrs e lē mafai ona ia faamaoni atu i le Atua pe afai e nofo ai pea i le Lotu Metotisi. I le 1840 na faamavae ai loa o ia mai le lotu ma agaʻi atu e nofo i Albany, i Niu Ioka.

I le amatamataga o le tau e totogo ai mea i le  1842, na fofoga atu ai e Storrs se faasologa o lauga e ono i totonu o le ono vaiaso, i le mataupu “O se Iloiloga—Pe Lē Mafai Ona Oti o Ē Amioleaga?” Sa matuā telē le naunau na faaalia o lea na ia toe teuteuina ai nei lauga i le lolomiina o se lomiga, ma i le isi 40 tausaga na sosoo ai, na oo atu i le 200,000 lomiga na tufatufaina i le Iunaite Setete ma Peretania Tele. Sa galulue faatasi Storrs ma Grew e tali atu i finauga na tetee mai i le aʻoaʻoga o le lē mafai ona oti o le solu. Sa faaauau pea ona talaʻi ma le maelega Grew seʻia oo ina maliu ia Aokuso 8, 1862, i Philadelphia.

E leʻi leva talu ona mavae ona faasolo atu e Storrs lauga e ono ia na seʻi faatoʻā taʻua, ae amata loa ona fiafia o ia i le talaʻiga a William Miller, o lē sa ia faatalitalia le toe afio vaaia mai o Keriso i le 1843. E tusa ma le lua tausaga o auai ma le maelega Storrs i le talaʻia o lenei feʻau i le itu atoa i sasaʻe i mātū o le Iunaite Setete. Ina ua mavae le 1844, sa ia leʻi toe faamaʻotiina loa se aso patino mo le toe afio mai o Keriso, peitaʻi sa ia leʻi teena lava isi o ē na mananaʻo e saʻiliʻili pea i le fuafuaina o taimi. Sa iai le talitonuga o Storrs faapea ua latalata le toe afio mai o Keriso ma sa tāua mo Kerisiano ona latou mataala pea ma mataalia faaleagaga, ia nofosauni mo le aso e asiasia ai i latou. Peitaʻi sa ia vavae ese mai le vaega a Miller talu ai sa latou talia aʻoaʻoga e lē faale-Tusi Paia, e pei o le lē mafai ona oti o le solu, le susunuina o le lalolagi, ma le aunoa o se faamoemoe i le ola e faavavau mo i latou ua maliliu a o pogisa pea.

I le ā o le a Taʻitaʻia Atu i ai le Alofa i le Atua?

Sa fulitua Storrs i le manatu o le Asofitu faapea e na o le pau lava le māfuaaga e toe faatutū aʻe ai e le Atua tagata amioleaga, ina ia toe faaoo atu lea o le oti ia i latou. Sa ia iloa le leai o se faamaoniga faale-Tusi Paia mo sea gaoioiga e leai se uiga ma le tauimasui mai le Atua. Peitaʻi na matuā mamao ese foʻi le itulagi ua oo i ai le talitonuga o Storrs ma ana aumea, i lo latou faapea mai e matuā lē toe iai lava se toetū mo tagata amioleaga. E ui sa faafaigatā ona latou faamalamalama maia nisi o mau sa faasino atu i le toetutū mai o ē amiolētonu, ae foliga mai ia i latou lava ia, o la latou faaiʻuga sa tele ina ōgatasi ma le alofa o le Atua. E leʻi pine ae iai loa se isi laasaga atili i le faamalamalamaina o le fuafuaga a le Atua.

I le 1870, na matuā tigāina le gasegase o Storrs ma lē mafai ai ona toe galue mo ni masina. I lena taimi, sa mafai ai ona ia toe iloiloina mea uma sa ia aʻoaʻoina mai le faagasologa o le 74 o ona tausaga. Na iʻu ai ina ia iloa lona misia o se vaega matuā tāua o le fuafuaga a le Atua mo le fanau a tagata, e pei ona faaalia i le feagaiga faa-Aperaamo—e faapea ‘o le a manuia aiga uma o le lalolagi auā sa usiusitai Aperaamo i le upu a le Atua.’—Kenese 22:18; Galuega 3:25.

O iinā na oo ifo ai se manatu fou i lona mafaufau. Pe afai e faamanuiaina “aiga uma,” pe lē tatau ea la ona faalogo atu tagata uma i le tala  lelei? O le a faapefea ona latou faalogo i ai? Pe lē ua maliliu ea le faitau miliona ma miliona o tagata? I se saʻiliʻiliga atili i mau o le Tusi Paia, na faia ai sana faaiʻuga faapea, e lua vasega o tagata “amioleaga” ua maliliu: o i latou sa matuā tetee aʻiaʻi i le alofa o le Atua ma i latou na maliliu a o pogisa pea.

Sa manatu Storrs, o le a tatau ona toe faatutū aʻe nai le oti i latou sa maliliu a o pogisa pea, ina ia latou maua se avanoa e manuia ai mai le taulaga togiola a Keriso Iesu. O i latou e talia o le a ola e faavavau i luga o le lalolagi. O i latou e teena o le a faaumatia. Ioe, sa talitonu Storrs e leai lava se tasi o le a faatūina mai e le Atua e aunoa ma le tuuina atu i ai o se faamoemoe mo se lumanaʻi lelei. Mulimuli ane, e leai se tasi o le a oti ona o le agasala a Atamu seʻi vaganā ai Atamu! Ae faapefea i latou o ē ola pea i le taimi e toe afio mai ai le Alii o Iesu Keriso? Na iʻu ina mafai ona malamalama Storrs e tatau ona faagasolo le tauiviga o se talaʻiga i le lalolagi aoao ina ia oo atu ai ia i latou na. Sa matuā augapiu ma sona iloa i le auala e mafai ona fai ai lena mea, peitaʻi i lona faatuatua na ia tusi mai ai: “E toʻatele tagata, pe afai latou te lē iloa le auala e fai ai se mea, ona tetee lea i ai, e peiseai ua lē mafai e le Atua ona faia lena mea, ae talu ai ona e lē o mafai ona latou iloa atu le faagasologa o lea mea.”

Na maliu George Storrs ia Tesema 1879, i lona aiga i Brooklyn, i Niu Ioka, e na o ni nai poloka e vā aʻi mai le nofoaga na avea mulimuli ane ma faauluuluga o le tauiviga o le talaʻiga i le lalolagi aoao lea sa ia naunautaʻi e nofo tatali atu i ai.

Manaʻomia se Malamalamaga Atili

Pe na malamalama lelei ea na tane e pei o Henry Grew ma George Storrs i le upu moni e pei o le malamalamaga lea ua tatou maua i aso nei? E leai. Sa la iloa lava le tulaga tautagotago sa la iai, e pei ona taʻua e Storrs i le 1847 e faapea: “E lelei ona tatou manatua o lea faatoʻā tatou tau aliali aʻe nai le pouliuli faaleagaga sa tatou iai i lotu; ma o le a lē o se mea la e matuā faateʻia ai pe afai e iai lava ni nai ‘ofu faa-Papelonia’ o loo tatou oofu ai pea e avea ma upu moni.” Mo se faaaʻoaʻoga, sa talisapaia e Grew le togiola na saunia mai e Iesu, peitaʻi sa ia leʻi malamalama faapea o se “togiola talafeagai,” o lona uiga, o le soifua faaletagata lelei atoatoa o Iesu na tuuina mai e fai ma sui o le ola faaletagata lelei atoatoa lea na melea e Atamu. (1 Timoteo 2:6, NW ) Sa sesē foʻi le talitonuga o Henry Grew faapea o le a vaaia e mata le toe afio mai o Iesu i le lalolagi e faatino lana pulega. Ae peitaʻi, sa manatu mamafa Grew i le faapaiaina o le suafa o Ieova, o se mataupu sa toʻaitiiti ni tagata na naunau i ai talu mai le senituri lona lua T.A.

Sa faapena foʻi ona leai se malamalamaga saʻo o George Storrs i nisi o manatu tāua. Sa mafai ona ia iloa le sesē o talitonuga na faaauilumaina e taʻitaʻi lotu, peitaʻi i nisi taimi na soona mamao ese ai foʻi le itu na agaʻi o ia i ai. Mo se faaaʻoaʻoga, e foliga mai o lona soona inainā i le auala na manatu ai taʻitaʻi lotu o lotu autū e faatatau ia Satani, na māfua ai ona teena e Storrs le manatu faapea o le Tiapolo o se peresona moni. Sa ia teena le Tasitolu; peitaʻi, sa ia lē mautinoa pe o se peresona le agaga paia, ae na ia toe malamalama  i ai a o toeitiiti lava oo i lona maliu. A o faatalitalia e George Storrs faapea o le toe afio mai o Keriso o le a muaʻi lē vaaia e mata, ae na ia manatu, e mulimuli ane ona vaaia lea e mata o tagata. E ui lava i lea, e foliga mai sa lotofaamaoni uma nei tane ma moni lo la naunau, ma na sili atu ona lalata o la talitonuga i le upu moni na i lo le toʻatele o isi.

O le “fanua” lea na faamatala e Iesu i le faataoto i le saito ma le titania sa leʻi oo lelei i le taimi e selesele ai. (Mataio 13:38) Sa galulue Grew, Storrs, ma isi i le “fanua” e sauniuni ai mo le seleselega.

O Charles Taze Russell, o lē na amata lolomiina lenei mekasini i le 1879, na ia tusi mai e faatatau i ona uluaʻi tausaga e faapea: “E tele fesoasoani na foaʻi mai e le Alii ia i matou i le suʻesuʻeina o Lana afioga, ma na aofia ai ia i latou o ē na sili ona taulamua, o si o matou uso pele ua loa lona soifua, o George Storrs, o lē sa ia fesoasoani mai ia i matou e lē gata i ana tusitusiga ae i ana upu; peitaʻi sa lē taitai ona matou mananaʻo e avea i matou o ni soo o tagata, e tusa lava po o le ā so latou lelei ma se atamai, ae ia fai ma ‘Soo o le Atua i le avea ma fanau pele.’” Ioe, sa mafai e tagata aʻoga faamaoni o le Tusi Paia ona latou maua aogā mai taumafaiga a tane e pei o Grew ma Storrs, peitaʻi sa tumau pea le matuā tāua o le iloiloina o le Afioga a le Atua, le Tusi Paia, e fai ma puna moni o le upu moni.—Ioane 17:17.

[Pusa i le itulau 26]

Manatu sa Talitonu ai Henry Grew

Ua faalumaina le suafa o Ieova, ma e manaʻomia ona faapaia.

O le Tasitolu, le lē mafai ona oti o le solu, ma le afi i hele o ni aʻoaʻoga taufaasesē.

E ao ona vavae ese le faapotopotoga Kerisiano mai le lalolagi.

E lē tatau ona iai se vaega a Kerisiano i taua a atunuu.

E lē tausisia e Kerisiano le tulafono o le Sapati i le Aso Toonai po o le Aso Sa.

E lē tatau ona iai se vaega a Kerisiano i sosaiete faalilolilo, e pei o le faalapotopotoga e taʻua o le Freemasons.

E lē tatau ona faia e Kerisiano ni faaeseesega i le vā o taʻitaʻi lotu ma le ʻaulotu.

O taʻu faalagilagi faalotu e mai le anetikeriso.

E tatau i faapotopotoga uma ona iai se ʻautoeaina.

E ao i toeaina ona paia i a latou amio uma, ia lē mataʻuleagaina.

E ao i Kerisiano uma ona latou talaʻia le tala lelei.

O le a iai tagata e ola e faavavau i le Parataiso i le lalolagi.

E tatau i pese faa-Kerisiano ona viiviia ai Ieova ma Keriso.

[Faamatalaga i Ata i le itulau 26]

Ata: Collection of The New-York Historical Society/69288

[Pusa i le itulau 28]

Manatu sa Talitonu ai George Storrs

Na foaʻi e Iesu lona soifua e totogi ai le tau faatogiola mo le fanau a tagata.

E leʻi oo i le taimi e faatino ai le galuega talaʻi (i le 1871).

Ona o lena tulaga, sa leʻi lalata mai la le iʻuga i lena taimi (i le 1871). E tatau ona iai se vaitaimi i le lumanaʻi o le a faatinoina ai le galuega talaʻi.

O le a iai tagata e fai mo latou tofi le ola e faavavau i le lalolagi.

O le a iai se toetū mo i latou uma o ē na maliliu a o pogisa pea. O i latou e taliaina le taulaga togiola a Keriso o le a maua le ola e faavavau i le lalolagi. O i latou e teena o le a faaumatia.

O le lē mafai ona oti o le solu ma le afi i hele o ni aʻoaʻoga sesē e lē faamamaluina ai le Atua.

O le Talisuaga Afiafi a le Alii o se faamanatuga faaletausaga e faia ia Nisani 14.

[Faamatalaga i Ata i le itulau 28]

Ata: SIX SERMONS, by George Storrs (1855)

[Faamatalaga i le itulau 29]

I le 1909, na see atu ai C. T. Russell, le faatonu o le “Zion’s Watch Tower,” i Brooklyn, i Niu Ioka, i le Iunaite Setete o Amerika