Le Auala e Mafai Ona E Faalatalata Atu ai i le Atua

Ua faapea mai le Iakopo 4:8: “Ia outou faalatalata atu i le Atua, ona faalatalata mai lea o ia ia te outou.” I le faaalia o le telē o le finagalo o Ieova le Atua mo tagata ina ia iai sa latou faiā vavalalata ma ia, ua ia auina mai ai lona Alo mo i tatou.

I LE tali atu i lena alofa na uluaʻi faaalia mai, na tusi ai le aposetolo o Ioane e faapea: “O i tatou, ua tatou alolofa [i le Atua], auā na ia muai alofa mai ia te i tatou.” (1 Ioane 4:19) Ae mo i tatou lava ia, ina ia faalatalata atu i le Atua, e ao ona tatou uia ni laasaga patino. E talitutusa atu lava nei laasaga i auala e fā e mafai ona tatou faalatalata atu ai i uso a tagata, e pei ona taʻua i le mataupu muamua. Seʻi o tatou talanoaina na manatu.

Ia Mātauina Uiga Matagofie o le Atua

E anoanoaʻi uiga matagofie o le Atua, o nisi o ona uiga e sili ona matilatila e aofia ai le alofa, atamai, faamasinotonu, ma le malosi. O lona atamai ma le malosi ua matuā faaalia lea i le vateatea maualuga ma le lalolagi o loo siʻomia ai i tatou, mai aniva tetele i atoma matuā ninii lava. Na tusi le faisalamo e faapea: “Ua tala mai e le lagi le mamalu o le Atua; ua faaalia foi e le va nimonimo le galuega a ona aao.”—Salamo 19:1; Roma 1:20.

E atagia mai foʻi le alofa o le Atua i galuega o le foafoaga. Mo se faaaʻoaʻoga, o le auala o loo faia ai i tatou, e faaalia ai e finagalo le Atua ina ia tatou olioli i le olaga. Ua ia aumaia ia i tatou le tomai e iloa ai lanu, ina ia tofo ma sogisogi, ia talisapaia musika, ia ata, ia olioli i le matagofie o mea, ma ua ia aumaia foʻi ia i tatou le tele lava o isi tomai ma uiga lea e faalētāua naʻuā i le olaga. Ioe, e moni lava e aao foaʻi le Atua, e agalelei, ma agaalofa—o uiga na e aunoa ma se masalosalo le saosaolaumea atu i le avea o ia ma “Atua manuia [“fiafia,” NW].”—1 Timoteo 1:11; Galuega 20:35.

E matuā olioli Ieova i le mea moni faapea o le faatinoina o lana pule silisili ese faapea ma le lagolagoina e ana meafaiola atamamai o loo autū ona faavae aʻe i le alofa. (1 Ioane 4:8) E moni o Ieova o le Pule Silisili Ese Aoao, ae e feagai o ia ma tagata, aemaise lava ana auauna faamaoni, e pei ona feagai se tamā alofa ma sana fanau. (Mataio 5:45) Na te lē tuuna se mea e lelei mo i latou. (Roma 8:38, 39) E pei ona taʻua, na oo lava foʻi ina ia tuuina atu le soifua o lona Alo pele e toʻatasi e sui ai i tatou. Ioe, o le alofa o le Atua o le pogai lea ua ala ai ona tatou iai, faatasi ai ma le faamoemoe o le ola e faavavau.—Ioane 3:16.

Na aumaia e Iesu ia i tatou le malamalamaga loloto e faatatau i uiga o le Atua auā na ia faataʻitaʻi atoatoa atu i lona Tamā. (Ioane 14:9-11) Sa matuā lē manatu faapito, ae manatu i isi, ma e magafagafa o ia. I se tasi o mea na tupu, na faasino atu ai Iesu i se tamāloa e logonoa ma e gūgū. E mafai ona e faapea atonu na lagona e le tamāloa sina matamuli i le iai faatasi ma le motu o tagata. O le mea e mataʻina ai, ona na avatu e Iesu lenei tamāloa i se nofoaga tau o i laʻua ma faamālōlōina ai o ia iinā. (Mareko 7:32-35) Pe e te talisapaia i latou e faaalia le magafagafa i ou faalogona ma o ē faaaloalogia lou lava tulaga mamalu? Afai o lea le tulaga, o le mea moni la o le a e vavalalata atili atu ia Ieova ma Iesu a o e aʻoaʻoina le tele o mea e uiga ia i laʻua.

Mafaufau Faatatau i Uiga o le Atua

E mafai ona iai i se tasi ni uiga e matagofie, ae e manaʻomia ona tatou mafaufau e faatatau i lena tagata ina ia tatou faalatalata atu ai. E faapena foʻi le tulaga e uiga ia Ieova. O le manatunatu loloto i ona uiga o se laasaga tāua lona lua lea i le faalatalata atu ia te ia. Na taʻua e le tupu o Tavita, o se tane sa alofa moni ia Ieova ma sa ‘tusa ma le loto o Ieova’ e faapea: “Ou te manatu i aso anamua; ou te manatunatu i mea uma na e faia; ou te mafaufau  i galuega a ou aao.”—Galuega 13:22; Salamo 143:5.

Pe a e mātauina le ofoofogia o le foafoaga pe faitau foʻi i le Afioga a le Atua, le Tusi Paia, pe e te pei o Tavita, i le manatunatu loloto i mea o loo e vaai ma faitau i ai? Seʻi manatu i se atalii ua faatoʻā maua mai lava sana tusi mai lona tamā o lē e ese ma le alofa loloto i ai? O le a faapefea ona ia vaai i lena tusi? E mautinoa o le a lē na ona ia faatopelau ona lau i mea o iai ma togi i totonu o se pusatoso. Na i lo lea, o le a ia suʻesuʻe i ai, iloiloina faamatalaga auʻiliʻili o loo iai faapea ma ni eseesega e faigatā ona manino mai. I se tulaga talitutusa, e ao ona tautele le Afioga a le Atua ia i tatou, e pei lava ona iai i le faisalamo o lē na pese: “Ua tele lava loʻu naunau i lau tulafono; ou te mafaufau i ai i le aso atoa.”—Salamo 119:97.

Faatumauina Fesootaʻiga Lelei

O fesootaʻiga lelei o le malosiaga lea o so o se faiā. E aofia ai le tautala ma le faalogologo—e lē tau o le mafaufau ae faapena foʻi ma le loto. E tatou te tautatala atu i Lē na Foafoaina Mea e ala i le tatalo, o se auala faaletapuaʻiga lea e talanoa atu ai i le Atua. E fiafia Ieova i tatalo a i latou e alolofa ma auauna ia te ia ma latou te amanaʻiaina Iesu Keriso o Lana sui sili.—Salamo 65:2; Ioane 14:6, 14.

I taimi ua tuanaʻi, na fetalai atu ai le Atua i tagata i auala eseese, e aofia ai vaaiga, o miti, ma e ala mai i agelu. Peitaʻi i aso nei, ua faia ai faapea e ala mai i lana Afioga tusia, le Tusi Paia. (2 Timoteo 3:16) E tele ni aogā o le Afioga tusia. E mafai ona tilofaʻia i so o se taimi lava. I le pei o se tusi, e mafai ona toe faitau ma saga faitau pea i ai. Ma e lē o iai ni faamatalaga sesē e masani ona iai pe a faamatala ma toe faamatala ia ni tala tuugutu. O lea ia manatu i le Tusi Paia o se tuufaatasiga tele o ni tusi mai lou Tamā faalelagi agaalofa, ma e ala mai i nei tusi ua e faataga ai o ia e fetalai mai ia te oe i aso taʻitasi.—Mataio 4:4.

Mo se faaaʻoaʻoga, o loo faataatia mai i le Tusi Paia le silafaga a Ieova i le saʻo ma le sesē. O loo faamatala mai ai lana fuafuaga mo le fanau a tagata ma le lalolagi. Ma o loo faaalia ai ana feutagaʻiga ma ituaiga eseese o tagata ma atunuu, mai tagata tapuaʻi faamaoni e oʻo lava i fili faatigā. O le faamaumauina o ana feutagaʻiga ma le fanau a tagata i lenei auala, ua faapea ai ona matuā faamatala auʻiliʻili mai e Ieova ona uiga. Ua ia faaalia lona alofa, olioli, faanoanoa, lē fiafia, toʻasa, agaalofa, manatu mamafa—ioe, ituaiga eseese o ona manatu ma ona faalogona, ma o le māfuaaga autū o nei uiga—i se auala ina ia mafai e tagata ona matuā malamalama uma i ai.—Salamo 78:3-7.

Pe a māeʻa ona e faitauina se vaega o le Afioga a le Atua, e faapefea ona e maua aogā mai mea ua e faitauina? Ma, aemaise lava, e faapefea ona e faalatalata atu i le Atua? Muamua, mafaufau i mea ua uma ona e faitauina ma aʻoaʻoina e uiga i le Atua o se peresona, i le faatagaina o na manatu e pāʻia ai lou loto. Ona taʻu atu lea ia Ieova i le tatalo ou manatu ma ou faalogona loloto e faatatau i le mataupu sa e tilofaʻia ma i le auala o le a e taumafai e maua mai ai aogā. O le mea lena e taʻu o fesootaʻiga. O le mea moni, afai o loo iai nisi mea o loo i lou mafaufau, e mafai ona faaaofia foʻi na mea i lau tatalo.

Ia Faia Faatasi Mea ma le Atua

O loo taʻua i le Tusi Paia nisi o tane faamaoni anamua o ē sa latou savavali faatasi, pe i luma foʻi, o le Atua moni. (Kenese 6:9; 1 Tupu 8:25) O le ā le uiga o lena mea? O le mea moni sa latou ola i aso taʻitasi e pei o loo iai iinā le Atua faatasi ma i latou. E moni o i latou o ni tagata agasala. Peitaʻi sa latou naunau i tulafono ma mataupu silisili a le Atua, ma na latou ola e ōgatusa ma fuafuaga a le Atua.  Ua tosina atu Ieova ia i latou na, ma e manatu mai o ia ia i latou, e pei ona faaalia i le Salamo 32:8: “Ou te aʻoaʻo ia te oe, ma faasino ia te oe i lea lava ala e te savali ai; ou te faatonu ia te oe, ma ou vaai ia te oe.”

E mafai foʻi ona e avea Ieova ma au uō māfana—o lē lua te savavali faatasi, e manatu mamafa mo oe, ma na te avatu ia te oe fautuaga faatamā. Na faamatalaina e le perofeta o Isaia ia Ieova o lē na te “aʻoaʻo ia te oe i mea e aoga, o loo taʻitaʻiina oe i le ala e te ui ai.” (Isaia 48:17) A o tatou olioli i nei aogā, tatou te iloa ai le iai o Ieova “i [lo tatou] itu taumatau,” e pei o lea faaupuga, e pei foʻi ona oʻo ia Tavita.—Salamo 16:8.

Le Suafa o le Atua—E Taulaʻi i ai Ona Uiga

E tele lotu faapea ma se fuainumera o loo faateleina pea o faaliliuga o le Tusi Paia ua latou lē taulau i le faaaogāina ma le faalauiloaina o le suafa totino o le Atua. (Salamo 83:18) Peitaʻi, i le uluaʻi tusitusiga Eperu, o lena suafa—o Ieova—o loo aliali mai pe tusa ma le 7,000 taimi! (I se tulaga femoumouaʻi, e ui ina aveesea le suafa tauatua, ae o loo tuu ai pea e le toʻatele o le ʻaufaaliliu o le Tusi  Paia ia igoa o le tele o atua sesē o loo taʻua i uluaʻi tusitusiga, e pei o Paala, Pele, Merota, ma e oo lava foʻi ia Satani!)

Ua manatu nisi tagata faapea o le aveesea o le suafa o le Atua ua na o sina mataupu faatauvaa. Ae seʻi manatu: Pe e faigatā pe faigofie ona ati aʻe se faiā vavalalata ma fiafia ma se tagata e leai sona igoa? O taʻu e pei o le Atua, ma le Alii (lea foʻi o loo faaaogā mo atua sesē) e mafai ona uaʻi atu ai i le malosi, pule, po o le tulaga o Ieova, ae e na o lona suafa totino lava e matuā mātaulia ai o ia. (Esoto 3:15; 1 Korinito 8:5, 6) O le suafa totino o le Atua moni o loo taaofaʻi ai ona uiga ma mea e iloga ai o ia. Na taʻua ma le saʻo e le tagata atamai i mataupu faalelotu o Walter Lowrie e faapea: “O se tagata na te lē iloa le Atua i lona suafa na te lē iloa foʻi o ia i le avea ai o se peresona.”

Seʻi manatu i le faataʻitaʻiga a Maria, o se Katoliko faamaoni e nofo i Ausetalia. I le taimi muamua lava na feiloaʻi atu ai Molimau a Ieova ia te ia, na faataga ai e Maria ia Molimau ina ia faaali atu ia te ia le suafa o le Atua mai le Tusi Paia. Na faapefea ona ia tali mai? “Ina ua faatoʻā ou vaai lava i le suafa o le Atua i le Tusi Paia, na ou tagi. Sa matuā faagaeetia lava aʻu e le poto faapea e mafai moni lava ona ou iloa ma faaaogā le suafa totino o le Atua.” Na faaauau ona suʻesuʻe e Maria le Tusi Paia, ma mo le taimi muamua lea i lona olaga, na ia iloa ai Ieova o se peresona ma na mafai ona ia ati aʻe se faiā tumau ma ia.

Ioe, e mafai ona tatou “faalatalata atu i le Atua,” e ui lava ina lē mafai ona tatou vaai ia te ia i o tatou mata faaletino. E mafai ona tatou “vaai” i ona uiga e maʻeu le matagofie i o tatou mafaufau ma loto ma o tatou faatupu atili ai lo tatou alofa mo ia. O se alofa faapena “o le fusi lea e atoatoa ona lelei ai.”—Kolose 3:14.

[Pusa i le itulau 6]

E Tali Mai Ieova i Lou Alofa mo Ia

O FAIĀ e aofia ai fetufaaʻiga i le vā o ni tagata se toʻalua. A o tatou faalatalata atu i le Atua, e tali mai o ia e ala i le faalatalata mai ia i tatou. Seʻi manatu i ona faalogona mo Simeona ma Ana ua matutua, o i laʻua uma o loo taʻua faapitoa i le Tusi Paia. O loo taʻu mai e le tusitala o Evagelia o Luka ia i tatou faapea sa ‘amiotonu ma mataʻu’ Simeona, a o faatalitali atu i le Mesia. Na mātauina e Ieova nei uiga lelei sa ia Simeona ma faaali atu i ai le alofa i lenei toeaina matua e ala i le faailoa atu ia te ia faapea “e le oo ia te ia le oti seia muai iloa atu le Keriso.” Na tausisi Ieova i lana folafolaga ma taʻitaʻia atu ai Simeona i le pepe meamea o Iesu, lea na avatua e Ona mātua i le malumalu i Ierusalema. Ona o le faagaeetia ma le matuā talisapaia, na opoopo ai e Simeona le pepe meamea ma tatalo: “Le Alii e, e te tuuina atu nei lau auauna ia alu ma le manuia, pei o lau afioga; auā ua iloa e oʻu mata le faaolataga mai ia te oe.”​—Luka 2:25-35.

“O lea lava itu aso,” na faaalia ai foʻi e Ieova lona alofa mo Ana ua 84 tausaga o lona soifua e ala i le taʻitaʻiina atu foʻi o ia ia Iesu. Ua taʻu mai e le Tusi Paia ia i tatou faapea, o lenei tinā pele ua oti lana tane, e masani lava ona iai o ia i le malumalu e “auauna” ia Ieova. Ona o le faatumulia i le talisapaia, i le pei o Simeona, na ia faafetai atu ai ia Ieova mo lona agalelei lē mafaatuāoia, ma ina ua māeʻa ona ia tautala atu lea e faatatau i le tama “i tagata uma lava e na faatali atu i le togiola i Ierusalema.”​—Luka 2:36-38.

Ioe, na mātauina e Ieova le maʻeu o le loloto o le alolofa ma le matataʻu o Simeona ma Ana ia te ia ma maʻeu lo la manatu mamafa i le faataunuuina o lana fuafuaga. Pe e lē tosina ea oe e na tala faale-Tusi Paia e te faalatalata atu ia Ieova?

I le pei o lona Tamā, e mātaulia foʻi e Iesu le tagata moni i totonu. A o ia aʻoaʻo atu i le malumalu, na ia mātauina ai se “fafine mativa” o loo ia foaʻi atu na o “tupe iti e lua.” Sa lē tāua lana foaʻi i le manatu o isi na vaavaai ane ae sa lē faapena le tulaga na iai i le silasila a Iesu. Na ia viia lenei fafine ona sa ia avatua mea uma na ia te ia. (Luka 21:1-4) O lea, e mafai ona tatou mautinoa e talisapaia e Ieova ma Iesu i tatou pe afai tatou te ofoina atu le mea silisili tatou te mafaia, tusa lava pe tele pe itiiti sa tatou meaalofa.

E ui lava ina olioli le Atua ia i latou e alolofa ia te ia, ae na te lagona le tigā pe a liliu ese tagata mai ia te ia ma mulimuli atu i se ala sesē. O loo taʻu mai e le Kenese 6:6 ia i tatou faapea na “tiga [le] finagalo” o Ieova ona o amioga leaga a tagata a o leʻi oo mai le Lolo o aso o Noa. Mulimuli ane, na taʻua ai e le Salamo 78:41 e faapea na faifai pea ona “tofotofo lava i le Atua; ma latou faaonoono i le Paia o Isaraelu,” ia tagata Isaraelu lē usiusitai. Ioe, o le Atua o lē na “Māfua ai Mea Uma” e ano mai ma e iai ona faalogona. O ia moni o se peresona, o lē o ona faalogona e lē faapea o le a lē paleni pe faanenefuina ona o ni lē lelei atoatoa, e pei o i tatou.

[Faamatalaga i le itulau 7]

O le tomanatu i foafoaga a Ieova o se tasi lea o auala e faalatalata atu ai ia te ia