Pe Mafai Ona E Faalatalata Atu i se Atua e Lē Vaaia?
Pe Mafai Ona E Faalatalata Atu i se Atua e Lē Vaaia?
Atonu e te fesili mai faapea: ‘E faapefea ona ou ati aʻe se faiā vavalalata ma se tasi e lē mafai ona ou vaai i ai?’ E ono foliga mai o se fesili tāua lena. Ae seʻi manatu i le mea lenei:
O LE ā le tāua o le mafai ona vaai i le atiina aʻe o se faiā agaalofa ma tumau? Pe e lē tutusa ea, pe sili atu foʻi, le tāua o vala e lē o vaaia? O le mea moni lena! Ona o lena māfuaaga ua ati aʻe ai e nisi tagata se faiā vavalalata ma isi e ala i le fetusiaʻi pea lava pea—o a latou tusi e taʻua moni ai lava mea e fiafia i ai, o mea e lē fiafia i ai, sini, taʻiala, o uiga mālie, ma isi lava ituaiga o uiga ma fiafiaga totino.
Ua faailoa mai foʻi e tagata tauaso faapea o le mafai ona vaai e lē tāua i le atiina aʻe o se faiā vavalalata ma se isi tagata. Seʻi manatu i le faaaʻoaʻoga a Eteuati ma Kueni, o se ulugalii faaipoipo ma e tauaso uma i laʻua. * Na fetaui Eteuati ia Kueni i se aʻoga mo tagata tauaso, lea sa avea ai i laʻua uma o ni tagata aʻoʻoga matutua i le aʻoga. Na ia amanaʻia uiga o Kueni, aemaise lava lona faamaoni i ana upu ma lana amio, ma lona uiga sili ona lelei agaʻi i galuega. I le isi itu, na tosina atu Kueni i a Eteuati ona e pei ona ia taʻua, “sa ia faaalia uiga uma lava lea na tausia aʻe ai aʻu ma se talitonuga o ni uiga e tāua.” Na amataina se faigauō, ma i le tolu tausaga mulimuli ane na la faaipoipo ai.
Na faapea mai Eteuati: “Pe a tuufaatasia oulua, e leai lava ma se eseesega e mafai e le tauaso ona faia i le atiina aʻe o se faiā ma se isi tagata. Atonu e lē mafai ona iloa atu e le tasi le isi, ae e lē tauaso lagona.” I le taimi lenei, i le 57 tausaga mulimuli ane ai, o loo tumau pea le alofa loloto o le tasi i le isi. Na la faamatala mai faapea o le auala na la maua ai se faiā matagofie e aofia ai ni vala se fā: (1) mātauina o uiga o le isi tagata, (2) mafaufau i ai ma tosina atu ona o na uiga, (3) faatumauina o fesootaʻiga lelei, ma (4) faifai mea faatasi.
O nei manatu e fā e tāua i so o se faiā lelei, pe i le vā o ni uō, paaga faaipoipo po o le, mea e sili ona tāua, i le vā o tagata ma le Atua. I le mataupu o loo sosoo mai, o le a tatou vaai ai pe faapefea e le faatatauina o nei manatu ona mafai ona fesoasoani ia i tatou e ati aʻe ai se faiā vavalalata ma le Atua, e ui lava ina lē mafai ona tatou vaai ia te ia. *
[Faamatalaga pito i lalo]
^ pala. 4 Ua suia igoa.
^ pala. 6 I le lē pei o se faiā i le vā o tagata, o se faiā ma le Atua e faavae aʻe i le faatuatua o loo soifua o ia. (Eperu 11:6) Mo se talanoaga auʻiliʻili e uiga i le atiina aʻe o se faatuatua malosi i le Atua, faamolemole tagaʻi i le Is There a Creator Who Cares About You?, lomia e le Watchtower Bible and Tract Society of New York, Inc.