E Faapefea Ona E Fuaina le Taulau Manuia?

UA FAAMATALAINA e se tasi lomifefiloi le taulau manuia e faapea “o le mauaina o le ʻoa, alofagia, po o le tulaga maualuga.” Po o se faamatalaga atoatoa ea lena? Po o le ʻoa, alofagia, po o le tulaga maualuga e na o le pau na o fua e iloa ai le taulau manuia? Ae e te leʻi tali mai, seʻi manatunatu i le mea lenei: Sa leʻi iai ni ʻoa faitino a Iesu Keriso i lona soifuaga atoa. E leʻi alofagia o ia e le toʻatele o tagata; ma sa leʻi manatu maualuga foʻi i ai ē sa taulamua i ona aso. Peitaʻi, sa taulau manuia lava Iesu. Aiseā?

A o iai i le lalolagi, o Iesu lava ia sa “mauʻoa i le Atua.” (Luka 12:21) Ina ua mavae lona toetū, na tauia o ia e le Atua e ala i le faapaleina o ia “i le mamalu ma le viiga.” Na faamaualugaina e Ieova lona Alo ma “matuā faaeaina ai o ia . . . ma foaiina atu ai ia te ia o le suafa e silisili i suafa uma lava.” (Eperu 2:9; Filipi 2:9) Na matuā faafiafiaina le finagalo o Ieova i le auala o le soifuaga o Iesu. (Faataoto 27:11) Sa taulau manuia lona soifuaga faalelalolagi ona sa faataunuuina ai lana fuafuaga. Na faia e Iesu le finagalo o le Atua ma avatu ai le faamamaluina i Lona suafa. I lea na faamamaluina ai e le Atua Iesu i le ʻoa, alofagia, ma le tulaga maualuga,  lea e lē taitai ona mafai ona ausia e se tagata poto, se faipolotiki, po o se tagata taalo taʻutaʻua. O le mea moni lava, o Iesu o le tagata na sili ona taulau manuia sa i le lalolagi.

Ua iloa e mātua Kerisiano e faapea, afai e mulimuli a latou fanau talavou i tulagaaao o Keriso, i le avea ma ē mauʻoa i le Atua i le uiga lea sa iai ia Iesu, o le a latou selesele mai ai le ʻoa o faamanuiaga i le taimi nei ma olioli ai i taui e lē mafaatusalia i le faiga o mea o loo sau. E leai lava se isi auala e sili atu ona lelei mo se tagata talavou e mulimuli ai i ala o Keriso na i lo o le faia o le galuega na faia e Iesu—e ala i le auai i le faiva faataimi atoa pe afai e mafai.

Ae peitaʻi, i nisi aganuu, e lē masani ona auai tagata talavou i le faiva faataimi atoa. Pe afai e uma aʻoga a se tama talavou, e faatalitalia o ia e saʻili se galuega totogi faataimi atoa, faaipoipo, ma ati aʻe se olaga mautū. I nisi taimi, o tagata talavou mai na ituaiga o olaga, ua latou sesē ai i lo latou faatalatū mai le ulu atu i le faiva faataimi atoa. (Faataoto 3:27) Aiseā? Ona o omiga, ua latou faia ai e tusa ma tulaga o aganuu masani. O le mea lena na tupu ia Ropati. *

Pe a Feteenaʻi le Aganuu ma le Lotofuatiaifo

Na tausia aʻe Ropati o se tasi o Molimau a Ieova. Ina ua sefulu ma ona tupu ona tausaga, sa matuā lē lelei lava lana amio ma le filifilia o ana aumea. Sa amata ona popole lona tinā e uiga ia te ia. O lea, na talosaga ai lona tinā i se paeonia, o se faifeʻau faataimi atoa a Molimau a Ieova, ina ia faamalosiau ia te ia. Ua faamatala mai e Ropati le mea na tupu e sosoo ai.

“Sa ou matuā talisapaia lava le naunau mai na faaalia e le paeonia ia te aʻu. O lana faaaʻoaʻoga lelei na ou manaʻo ai e avea le paeonia ma galuega tumau i le taimi lava e uma ai laʻu aʻoga. Ma o le isi lena mea na toe popole ai Tinā—ae e ese la le māfuaaga. E te iloa, i la matou aganuu, e lelei mo se teine ona paeonia i le taimi lava e uma ai lana aʻoga, ae o se tama, e faatalitalia ina ia avea muamua o se tasi e lelei le tulaga tautupe, ona faatoʻā mafai lea ona ia mafaufau e uiga i le avea ma paeonia.

“Sa maua soʻu tomai i se galuega ma amataina saʻu lava pisinisi. E leʻi pine lava ae matuā aafia aʻu i le pisinisi ma sa avea ma masani le na o le alu lava i sauniga ma alu i le talaʻiga. Sa faatalatala mai lava ia te aʻu loʻu lotofuatiaifo—sa ou iloa e mafai lava ona ou auauna atoatoa ia Ieova i se tulaga e sili atu. Ae peitaʻi, sa avea o se tauiviga moni lava le taumafai ina ia vavae ese mai mea o loo faatalitalia e isi mai ia te aʻu, ae ua ou fiafia ona sa ou faia faapea. O lea ua ou faaipoipo i le taimi nei, ma ua ma auauna ma laʻu avā e avea o ni paeonia mo le lua tausaga ua mavae. E leʻi leva nei talu ona tofia aʻu e avea ma auauna o le faiva i le faapotopotoga. E mafai ona ou faapea atu ma le faamaoni, ua ou lagona nei le faamalieina moni i le auauna atu ia Ieova ma loʻu lotoatoa, i le mea sili ou te mafaia.”

Ua faalaeiauina pea e lenei mekasini ia tagata talavou ina ia aʻoaʻo ni tomai pe ia atiina aʻe ni agavaa aogā—pe afai e mafai a o iai pea i le aʻoga. Mo le ā le fuafuaga? Ina ia mauʻoa? E leai. O le māfuaaga autū lava, ina ia mafai ai ona latou tausia lelei i latou lava i le avea o ni tagata matutua ma auauna atoatoa ai ia Ieova i le mea sili latou te mafaia, aemaise lava le faiva faataimi atoa. O le mea lava lea e masani ona tupu, ua maileia alii ma tamaʻitaʻi talavou i le saʻilia o se galuega totogi ma oo ai ina manatu māmā i le tāua o le faiva. O isi lava e lē o manatu i le faia o le auaunaga faataimi atoa. Aiseā ua lē faia ai faapea?

O faamatalaga a Ropati ua maua ai se malamalamaga i le mataupu. Ina ua uma ona aʻoaʻoina lona tomai e fai ai se galuega, na amataina ai e Ropati se pisinisi. E leʻi pine, ae avea ana  gaoioiga ua peiseai e leai se taunuuga. O lona sini o le avea lea o ia o se tasi e mautū faaletino. Ae po o iai ea se tasi i totonu po o fafo atu o le faapotopotoga Kerisiano e mafai ona maua atoatoa lena sini? E tatau i Kerisiano ona tauivi ina ia mafai ona tausia i latou i tulaga tautupe, i le filigā e tausia a latou matafaioi tautupe; ae e tatau foʻi ona latou iloa e faapea, i nei vaitaimi lē mautinoa, e toʻaitiiti lava ni nai tagata ua ausia se tulaga e latou te manatu ai ia i latou lava e faapea ua mautū lo latou tulaga tautupe. O le pogai lena ua avea ai le folafolaga a Iesu lea o loo faamauina i le Mataio 6:33 o se matuā faamāfanafanaga i Kerisiano.

Ua fiafia lava Ropati ona sa ia filifili e mulimuli i faanaunauga o lona loto na i lo o se uunaʻiga mai lana aganuu. I aso nei, ua olioli ai o ia i se galuega o le auaunaga faataimi atoa. Ioe, o le faiva faataimi atoa o se galuega e faamamaluina. Ua maua e Ropati lava ia le filemu ona o loo ia auauna ia Ieova, e pei ona ia fai mai, ‘i le mea sili na te mafaia.’

Faaaogā Au Taleni i le Auala Sili

E toʻatele tagata talenia o loo iai i Molimau a Ieova. O nisi e matuā maoaʻe lava o latou tomai faalemafaufau; a o isi e talenia i galuega faaletino. O nei meaalofa uma e mai ia Ieova, o lē foaʻi atu “i tagata uma lava le ola, ma le mānava, ma mea uma lava.” (Galuega 17:25) A aunoa ma le ola, o le a lē aogā nei meaalofa uma.

Ua o se mea talafeagai lava la le faaaogāina o o tatou olaga tuuina atu i le auaunaga a Ieova. O le mea lena na filifilia e se tasi tauleʻaleʻa talavou talenia e fai. Sa soifua o ia i le uluaʻi senituri T.A. O se tagata o se aiga lauiloa, sa ola aʻe o se talavou i le aai lauiloa o Taso, i Kilikia. E ui ina fanau mai o se Iutaia, ae na avea o ia ma se tagatanuu Roma mai lona tamā. O lena mea sa mafai ona ia maua ai ni aiā ma ni faaeaga se tele. Ina ua matua o ia, sa ia aʻoaʻoina le Tulafono i le aʻoga a se tasi “polofesa” sili ona poto o ona aso—o Kamalielu. Sa foliga mai o le a lē umi lava se taimi, ae avea loa o ia ma tagata ‘mauʻoa, alofagia, ma maualuga.’—Galuega 21:39; 22:3, 27, 28.

O ai lenei tauleʻaleʻa talavou? O lona igoa o Saulo. Ae na avea Saulo ma se Kerisiano ma na mulimuli ane avea ma le aposetolo o Paulo. Sa ia faataatia ese ona faanaunauga maualuluga sa iai ma tuutoina atu lona olaga atoa i le auaunaga ia Ieova i le avea o se Kerisiano. Sa oo ina lauiloa Paulo, e lē o se loia iloga, ae o se tagata talaʻi maelega o le tala lelei. Ina ua uma ona faaaluina le toetoe lava 30 tausaga i le avea o se misionare, na tusia ai e Paulo se tusi i ni uō i Filipi. I lenei tusi, na ia toe autaluina ai nisi o mea na ia faataunuuina i taimi ua tuanaʻi a o leʻi avea ma Kerisiano, ma na ia faapea mai ai: “Ona o [Iesu Keriso] ua ou faaleaogaina mea uma, ma ou manatu o otaota lava ia mea, ina ia ou maua Keriso.” (Filipi 3:8) E leai, e leʻi faanoanoa Paulo i le auala na ia faaaogāina ai lona olaga!

Ae faapefea le aʻoaʻoga na maua mai e Paulo ia Kamalielu? Pe sa aogā ea ia te ia? Ioe! I nisi o taimi, sa ia saosaolaumea ai i le “puipuia ma le faamautūina faaletulafono o le tala lelei.” Ae o le galuega autū a Paulo, o le avea lea ma tagata talaʻi o le tala lelei—o se mea sa lē taitai mafai ona ia aʻoaʻoina mai i ana aʻoaʻoga muamua.—Filipi 1:7, NW; Galuega 26:24, 25.

E faapena foʻi aso nei, ua mafai ona faaaogā e nisi o latou tomai ma taleni e oo lava i a latou aʻoaʻoga mo le faaauilumaina o manaʻoga o le Malo. Mo se faaaʻoaʻoga o Emi, na ia maua se tikerī mai le iunivesite i mataupu tau i fefaatauaʻiga ma le isi tikerī i mataupu tau tulafono. Sa ia maua se galuega e telē le totogi i se ofisa lōia, ae i aso nei, o loo auauna o ia o se faifeʻau tauofo e leai se totogi i se tasi o ofisa o lālā o le Sosaiete o le Olo Matamata. O le faamatalaga lenei a Emi i lona olaga i le taimi nei: “Ou te talitonu ua ou faia le filifiliga aupito sili ona lelei i le olaga. . . . E leai soʻu faanaunauga e faia ni fesuiaʻiga ma nisi o aʻu uō sa matou aʻoʻoga faatasi i le iunivesite. Ua ou mitamita lava i le auala lea ua ou filifilia. Ua ou maua mea uma lava ia ou te manaʻomia ma manaʻo i ai—o se olaga faamalieina ma le fiafia ma o se galuega e matuā aogā ma maua ai le lotomalie.”

Ua filifilia e Emi se auala e aumaia ai ia te ia le filemu o le mafaufau, le lotomalie, ma le faamanuiaga a Ieova. E mautinoa lava e lē mananaʻo mātua Kerisiano i se mea e itiiti ifo na i lo lena mo a latou fanau!

Taulau Manuia i le Faiva Faa-Kerisiano

O le mea moni, e matuā tāua le iai o se vaaiga saʻo i le taulau manuia i le faiva faa-Kerisiano  lava ia. E lē faigatā ona iai le lagona o le taulau manuia pe afai na tatou faaaluina se taimi fiafia i le faiva i le fanua, tuuina o lomiga faale-Tusi Paia po o le faia o ni talanoaga faale-Tusi Paia uigā ma ē ona fale. Ae afai e seāseā ona tatou maua se tagata e fia faalogo, atonu e faaosoosoina i tatou e faia se faaiʻuga e faapea ua maʻimau lo tatou taimi. Ae ui i lea ia manatua, o se isi faamatalaga e tusa o le uiga o le taulau manuia, ‘o le mauaina lea o le alofagia.’ E alofagia e ai lea e tatou te mananaʻo e maua? O le mea moni, o le alofagia e Ieova. E mafai lava ona tatou maua lenei mea e tusa lava pe faalogo pe lē faalogo tagata i la tatou feʻau. Na aʻoaʻo atu e Iesu se lesona matuā malosi lava i ona soo e tusa ai ma lenei mea.

O le a e manatuaina na auina atu e Iesu le ʻautalaʻi o le Malo e toʻa 70 “i aai uma ma mea uma o le a maliu atu i ai o ia.” (Luka 10:1) Sa tatau ona latou talaʻi i aai ma nuu e na o i latou e aunoa ma Iesu. O se mea fou lenei ia i latou. O lea, na avatu ai e Iesu ia i latou ia faatonuga auʻiliʻili a o leʻi auina atu i latou. Pe a latou feiloaʻi ma se “tagata o le manuia,” e tatau ona latou molimau māeʻaeʻa atu ia te ia e faatatau i le Malo. Ae peitaʻi, afai e teena i latou, sa tatau ona latou ō pea e aunoa ma le popole. Na faamatala atu e Iesu e faapea, o ē lē fia faalogo mai ia i latou sa tusa ua latou teena moni lava Ieova.—Luka 10:4-7, 16.

Ina ua faaiʻuina e le toʻa 70 lo latou tofiga e talaʻi, sa latou toe foʻi atu ia Iesu “ma le olioli, ua faapea atu: ‘Le Alii e, ua usiusitai mai temoni ia te i matou, ona o lou suafa.’” (Luka 10:17) Atonu o se mea fiafia mo na tagata lē lelei atoatoa le tutulia ese o agaga leaga malolosi! Ae peitaʻi, na lapataʻi atu Iesu i ona aposetolo ua faatumulia i le fiafia: “Aua tou te olioli i lenei mea, ina ua usiusitai agaga ia te outou; a ia olioli ona ua tusia o outou igoa i le lagi.” (Luka 10:20, LF ) Atonu sa lē maua pea e le toʻa 70 le mana e tutuli ai temoni, pe latou te leʻi maua pea foʻi ni iʻuga lelei mai la latou faiva. Ae afai na tumau lo latou faamaoni, o le a mafai pea ona latou maua le finagalo malie o Ieova.

Pe E te Talisapaia Auauna Galulue Faataimi Atoa?

Na taʻu atu e se tasi tauleʻaleʻa talavou i se toeaina Kerisiano e faapea: “Pe a ou faauʻu mai le aʻoga maualuga, o le a ou taumafai lava e saʻili saʻu galuega. Afai e lē maua saʻu galuega, o le a ou mafaufau loa ou te ulu atu i le auaunaga faataimi atoa.” Ae peitaʻi, e lē faapena manatu o le toʻatele o tagata ua ulu atu i le faiva faapaeonia. Ina ia mafai ona paeonia, na teena ai e nisi le avanoa e saʻilia ai ni galuega e tetelē totogi. O isi na latou teena ia ni avanoa matagofie tau aʻoaʻoga. I le pei o le aposetolo o Paulo, na latou faia ni faataulaga, ae i le pei o Paulo, Ropati ma Emi, latou te lē faanoanoa ona o filifiliga na latou faia. E latou te talisapaia o latou faaeaga i le faaaogāina o a latou meaalofa e vivii ai ia Ieova, o lē ua tatau i ai le mea aupito sili e mafai ona latou ofoina atu.

E eseese lava māfuaaga ua lē mafai ai e le toʻatele o Molimau a Ieova faamaoni ona paeonia. Atonu o loo iai ni tiute tauave e tatau ona vaaia e tusa ai ma le Tusi Paia. Ae afai o latou auauna i le Atua ma o latou ‘loto atoa, agaga atoa, ma le manatu atoa,’ e fiafia lava Ieova ia i latou. (Mataio 22:37) E ui lava e lē mafai ona avea i latou ma paeonia, ae ua latou iloa e faapea, o i latou o loo paeonia ua filifilia se galuega sili ona lelei.

Na tusi mai le aposetolo o Paulo e faapea: “Aua foi tou te amio faatasi ma lenei lalolagi.” (Roma 12:2) I le ōgatasi ma le fautuaga a Paulo, e lē tatau ona tatou faatagaina ia aganuu po o faatulagaga faalelalolagi o lenei faiga o mea e faaaafia o tatou manatu. E tusa lava pe mafai ona e paeonia pe leai, ia avea le auaunaga a Ieova ma taulaʻiga o lou olaga. O le a e taulau manuia pe afai o loo e maua le faamaoniga a Ieova.

[Faamatalaga pito i lalo]

[Faamatalaga i le itulau 19]

Aua neʻi taofia oe e ni gaoioiga e leai se taunuuga