E Mafai Ona E Tumau i le Amio Mamā
E Mafai Ona E Tumau i le Amio Mamā
“O lenei lava le alofa i le Atua, ia tatou tausi i ana poloaiga.”—1 IOANE 5:3.
1. O le ā le eseesega o amio ua vaaia i tagata i aso nei?
I ASO ua leva, na faagaeeina ai le perofeta o Malaki na te vavalo maia le taimi o le a matuā matilatila ai le tū ese o amio a tagata o le Atua mai amio a tagata o ē lē auauna i le Atua. Na tusi mai le perofeta e faapea: “Ona outou toe iloa lea e eseese lē amiotonu ma lē amio leaga; e ese le ua auauna i le Atua, ma le ua le auauna ia te ia.” (Malaki 3:18) Ua faataunuuina lena valoaga i aso nei. O le tausia o poloaʻiga a le Atua, e aofia ai poloaʻiga o loo manaʻomia ai le mamā tau amio, o le ala atamai ma le talafeagai lea i le olaga. Peitaʻi, e lē faigofie i taimi uma lena ala. O se māfuaaga lelei la, na fetalai ai Iesu faapea, e tatau i Kerisiano ona latou finafinau ina ia maua le faaolataga.—Luka 13:23, 24.
2. O ā omiga e ese mai omiga a le tagata lava ia ua faigatā ai i nisi ona tumau i le amio mamā?
2 Aiseā ua faigatā ai ona tumau i le amio mamā? O se tasi o māfuaaga talu ai e iai omiga e ese mai omiga a le tagata lava ia. Ua faaata mai e le lalolagi o faafiafiaga le tulaga o feusuaʻiga lē mamā e faapea o se mea e manaia tele, e faafiafiaina ai, ma o se amioga faatagata matua, ae i le taimi e tasi ua matuā faagalogalo lava ona āuga leaga e iʻu i ai. (Efeso 4:17-19) O le tele lava o faiā matuā vavalalata ua faaata mai ai, o loo faia e ni tagata se toʻalua e lē o ni ulugalii faaipoipo. E masani lava i ata faapena i tifaga ma televise ona faaali mai ai faiā tau feusuaʻiga i se tulaga e pei e fai faataaloga, e lē o ni faiā ua matuā uaʻi atoatoa atu i ai. E masani lava o loo faia e aunoa ma ni lagona māfana ma se faaaloalo o le tasi mo le isi. E toʻatele na latou aʻoaʻoina na manatu mai lava a o laiti. E lē gata i lea, e iai se omiga malosi mai aumea ina ia faataʻitaʻi atu i le olaga tuufau tau amio o aso nei, ma o i latou e lē ʻau atu i ai e iai nisi taimi e tauemua ai pe oo lava foʻi ina lafo i ai ni upu malolosi.—1 Peteru 4:4.
3. O ā nisi o māfuaaga ua aafia ai le toʻatele o tagata i le lalolagi i amioga lē mamā?
3 O omiga e puna aʻe i le tagata lava ia e faigatā ai foʻi ona tumau i le amio mamā. Na foafoaina e Ieova tagata faatasi ai ma ni o latou faanaunauga faaleituaiga, ma o na faanaunauga e ono oo ina malolosi. E telē se sootaga o faanaunauga ma mea tatou te mafaufau i ai, ma o amioga lē mamā ua fesootaʻi atu i mafaufauga na e lē ōgatusa ma mafaufauga o Ieova. (Iakopo 1:14, 15) Mo se faaaʻoaʻoga, ua taʻua i se suʻesuʻega talu ai nei na faasalalauina i le British Medical Journal e faapea, o le toʻatele o tagata na latou faia mo le uluaʻi taimi feusuaʻiga, na māfua lava i le na o le fia iloa pe faapeʻī na mea o feusuaʻiga. O nisi sa talitonu o le toʻatele o tagata latou te tupulaga faatasi o loo faia faiga faaleituaiga, o lea na latou mananaʻo ai foʻi e faamaamulu atu lo latou tulaga mamā sa iai. Ae iai lava foʻi nisi na faapea mai sa matuā lē mafai ona latou pulea o latou faalogona i lea taimi, pe na “fai lava sina tele o le onā i lena taimi.” Pe afai tatou te mananaʻo e faafiafia le Atua, e tatau la ona ese mai so tatou manatu. O ā ituaiga o mafaufauga o le a fesoasoani mai i lo tatou tausisia o le mamā tau amio?
Faatupu Aʻe ni Talitonuga Malolosi
4. Ina ia tumau i le amio mamā, o le ā e tatau ona tatou fai?
4 Ina ia tumau i le amio mamā, e tatau ona tatou ioe, o le ola i sea ituaiga o olaga e matuā aogā lava. Ua ōgatusa lenei ma le manatu na tusi atu ai le aposetolo o Paulo i Kerisiano i Roma: “Ia outou suesue pe se a le finagalo o le Atua, o mea ua lelei, ma le mālie, ma le atoatoa.” (Roma 12:2) O le ioeina faapea e matuā aogā taumafaiga uma i le amio mamā e aofia ai nisi mea e sili atu na i lo le tau ina iloa faapea o loo faasāina i le Afioga a le Atua amioga lē mamā. E aofia ai le malamalama i māfuaaga ua taʻusalaina ai amioga lē mamā ma le auala e aogā ai ia i tatou pe a teena. O nisi o nei māfuaaga sa talanoaina i le mataupu na muamua atu.
5. O le ā le māfuaaga autū e ao ai ona mananaʻo Kerisiano e tumau i le amio mamā?
5 Peitaʻi o le mea moni lava, o māfuaaga e sili ona malolosi e māfua ai ona ʻalofia e Kerisiano amioga lē mamā faaleituaiga, e puna mai lea i la tatou faiā ma le Atua. Ua tatou aʻoaʻoina, e na te silafia le mea e sili ona lelei mo i tatou. O lo tatou alofa mo ia o le a mafai ai ona tatou ʻinoʻino i mea leaga. (Salamo 97:10) O le Atua o Lē Foaʻiina “mea lelei uma e foaifuaina mai, atoa ma mea alofa uma e atoatoa ona lelei.” (Iakopo 1:17) E alofa o ia ia i tatou. E ala i lo tatou usiusitai ia te ia, tatou te faaali atu ai lo tatou alofa ia te ia ma talisapaia mea uma ua ia faia mo i tatou. (1 Ioane 5:3) Aua lava neʻi o tatou mananaʻo e oo ia Ieova le faanoanoa ma le tigā e ala i le solia o ana poloaʻiga amiotonu. (Salamo 78:41) Tatou te lē faanaunau e fai ni gaoioiga i se auala e ono upuleagaina ai lona ala o le tapuaʻiga e paia ma amiotonu. (Tito 2:5; 2 Peteru 2:2) E ala i le tumau i le amio mamā, tatou te faafiafiaina ai Lē Silisili Ona Maualuga.—Faataoto 27:11.
6. O le ā se aogā o lo tatou faailoa atu i isi o a tatou tapulaa tau amio?
6 O le taimi lava tatou te filifili ai e tumau i le amio mamā, o se isi puipuiga atili o le faailoa atu lea i isi o lena talitonuga maumaututū. Ia faailoa i tagata o oe o se auauna a Ieova le Atua ma ua e filifili maumauaʻi e tausisia ana tapulaa maualuluga. O lou ola, o lou tino, o lau filifiliga lea. O le ā le mea lea o loo i se tulaga lamatia? O le lua faiā tautele ma lou Tamā faalelagi. O lea la, ia e faamanino atu e lē mafai ona lualuagia lou faamaoni i lau amio. Ia e mitamita e fai oe ma sui o le Atua e ala i lou sapasapaia o ana mataupu silisili. (Salamo 64:10) Aua lava neʻi e matamuli e talanoa atu i isi e uiga i ou talitonuga maumauaʻi tau amio. O lou faailoa atu ma le lototele e mafai ona faamalosia ai oe, e puipuia ai oe, ma faalaeiauina ai isi ia mulimuli i lau faaaʻoaʻoga.—1 Timoteo 4:12.
7. E mafai faapefea ona tatou tausisia la tatou filifiliga maumauaʻi ina ia tumau i le amio mamā?
7 E lē gata i lea, afai ua e maumauaʻi e tausisia se tapulaa maualuga tau amio ma ua faailoa atu lo tatou tulaga, e tatau la ona tatou faia ni gaoioiga ina ia pipii atu i la tatou filifiliga maumauaʻi. O se tasi o auala e faia ai lenei mea o le faaeteete lea pe a filifilia ni uō. Ua faapea mai le Tusi Paia: “O lē latou te feoai ma tagata popoto, e poto lava ia.” Ia auaumea ma i latou o ē tutusa tulaga o amioga o loo tou faatāuaina; o le a latou faalaeiauina oe. Ua faapea mai foʻi le mau lava lenei: “A o le uo a e valelea, e leaga ai lava ia.” (Faataoto 13:20) Taumafai i se tele e te mafaia, ina ia e ʻaloese mai tagata o ē latou te ono faavaivaia lau filifiliga.—1 Korinito 15:33.
8. (a) Aiseā e tatau ai ona tatou fafagaina o tatou mafaufau i mea e mamā? (e) O le ā e ao ona tatou ʻalofia?
8 E lē gata i lea, e manaʻomia ona tatou fafagaina o tatou mafaufau i mea e moni, e taʻuleleia, e tonu, e mamā, e matagofie, e logoleleia, e lelei, ma e viia. (Filipi 4:8) Tatou te faia lenei mea e ala i le filifili lelei o mea tatou te matamata ma faitau ai ma musika tatou te faalogologo ai. O le faapea mai e leai ni taaʻiga leaga i tusi o faaalia ai amioga lē mamā, ua talitutusa lena ma le faapea mai e leai ni taaʻiga lelei i tusi o faaalia ai amioga mamā. Ia manatua, e faigofie lava ona paʻūʻū atu tagata lē lelei atoatoa i amioga lē mamā. O lea la, o tusi, mekasini, tifaga, ma musika o loo uunaʻia atili ai faalogona faaleituaiga o le a taʻitaʻia atu ai i faanaunauga sesē, ma o nei mea e ono iʻu atu ai lava i le faia o le agasala. Ina ia tausisia le mamā tau amio, e tatau ona tatou faatumuina o tatou mafaufau i le atamai faale-Atua.—Iakopo 3:17.
Laasaga e Taʻitaʻia Atu ai i Amioga Lē Mamā
9-11. E pei ona faamatalatalaina e Solomona, o ā laasaga na faasolosolo lava ona taʻitaʻia atu ai se tama talavou i amioga lē mamā?
9 O le tulaga masani lava, e iai laasaga mātauliagofie e taʻitaʻia atu ai i amioga lē mamā. O le laasia o laasaga taʻitasi e faapena ai foʻi ona faasolosolo atu ai lava ina faigatā ona toe liliu ese mai ai. Seʻi mātau mai le auala ua faamatalaina ai lenei mea i le Faataoto 7:6-23. O loo mātauina e Solomona se “tama [talavou], ua leai sona mafaufau,” pe e leai sona faanaunauga lelei. O loo “ui ane [le tama talavou] i le ala e lata ane i le fetaulaigāala e nofo ai le fafine [talitane]; na ia alu ane i le ala i lona fale, i le segisegi, i le afiafi.” O lona sesē muamua lava lena. I le pogipogi o le tauafiafi, ae ua tataʻi o ia e lona “loto,” e lē i so o se auala, ae i le auala na te iloa e masani ona maua i ai le fafine talitane.
10 E sosoo ai la tatou faitau: “Faauta foi, na fetaiai ma ia le fafine ua ofu i le ofu o le fafine talitane, ua ia te ia foi le loto pepelo.” Ua ia iloa atu nei le fafine! E mafai lava ona ia toe liliu ese ma foʻi i lona aiga, ae o lea ua sili atu nei ona faigatā na i lo le taimi muamua, aemaise lava e vaivai lona tulaga tau amio. Ua puʻe o ia e le fafine ma sogi atu ia te ia. Ona o lea ua ia talia le sogi, ua ia faalogologo atu nei i le susua o le faatauanau faatosina a le fafine. Ua fai mai i ai le fafine: “Ua ia te au taulaga faafetai; o le aso nei, ua ou avatu ai mea na ou tauto ai.” O taulaga faafetai sa aofia ai le aano o manufasi, le falaoamata, le suāuu, ma le uaina. (Levitiko 19:5, 6; 22:21; Numera 15:8-10) O le taʻua o na mea, atonu sa tau faaataata mai ai e le fafine se manatu faapea o ia o sē e manatu i mea faaleagaga, ma i le taimi lava e tasi, atonu o loo ia taʻu atu i le tama faapea e anoanoaʻi mea lelei e ʻai ma inu ai i lona fale. Ua ia augani ane i le tama: “Sau ia, ina ta faamalilie i le alofa, seia oo i le taeao, ia ta fiafia lava i le fealofani.”
11 E lē faigatā ona mateʻia le iʻuga o le a oo i ai. “Na ia tosina [le tama] i ona laugutu faaoleole.” Sa mulimuli atu le tama ia te ia i lona fale “e pei o le povi ua alu a fasia” ma “e pei ona faavave atu le manu i le mailei.” Ua faaiʻu mai le faamatalaga a Solomona i ni upu e manatu mamafa i ai: “Na te le iloa ua saunia lea e [“fasiotia ai lona lava solu,” NW ].” Ua aofia ai lona solu, po o lona ola, talu ai o le a “faamasinoina e le Atua o e faitaaga ma e mulilulua.” (Eperu 13:4) Maʻeu se lesona malosi mo tane uma ma fafine! E ao ona tatou ʻalofia le uia o uluaʻi laasaga na o le a taʻitaʻia atu ai i le leai o se finagalo malie mai o le Atua.
12. (a) O le ā le uiga o le faaupuga e “leai sona mafaufau”? (e) E faapefea ona tatou faatupu aʻe se malosi tau amio mamā?
12 Mātau mai foʻi, o le tama talavou lea e taʻua i le tala sa “leai sona mafaufau.” O lenei faaupuga e taʻu mai ai ia i tatou e faapea o ona mafaufauga, faanaunauga, lagona alofa, lagona ootia, ma sini i le olaga sa lē ōgatusa ma le mea e finagalo malie i ai le Atua. O lona vaivai i le itu tau amio na taʻitaʻia ai i āuga mataʻutia. I nei “aso e gata ai” e faigatā, o se matuā taumafaiga malosi le tau faatupu aʻe o se malosi tau amio. (2 Timoteo 3:1) Ua faia e le Atua se sauniuniga e fesoasoani ai ia i tatou. Ua ia saunia mai sauniga a le faapotopotoga Kerisiano e faalaeiauina ai i tatou ina ia ui i le ala tonu ma mafai ai ona tatou fesootaʻi atu i isi o loo tutusa o tatou sini. (Eperu 10:24, 25) O loo iai toeaina o faapotopotoga latou te leoleoina i tatou ma aʻoaʻo i tatou i ala o le amiotonu. (Efeso 4:11, 12) Ua ia i tatou le Afioga a le Atua, le Tusi Paia, e faasino mai ma taʻitaʻia i tatou. (2 Timoteo 3:16) Ma i taimi uma lava, o loo tatou maua ai le avanoa e tatalo ai mo le agaga o le Atua ina ia fesoasoani mai ia i tatou.—Mataio 26:41.
Aʻoaʻoina se Lesona Mai Agasala a Tavita
13, 14. Na faapefea ona oo ina aafia le tupu o Tavita i se agasala matuiā?
13 E ui i lea, o le itu e faanoanoa ai, e oo lava i auauna iloga a le Atua ua aafia i amioga lē mamā faaleituaiga. O se tasi o na tagata o le tupu lea o Tavita, o lē na faitau fia sefulu tausaga o auauna faamaoni ia Ieova. E leai se masalomia sa matuā alofa o ia i le Atua. Peitaʻi, sa matuā paʻū atu lava o ia i le agasala. E pei lava o le tama talavou lea na faamatala mai e Solomona, sa iai foʻi ni laasaga na taʻitaʻia atu i le agasala a Tavita ma faateteleina ai.
14 O le taimi lena ua faamatuā tagata lava Tavita pe atonu ua 50 ma ona tupu ona tausaga. Sa ia iloa mai luga i le falealuga o lona maota, le fafine lalelei o Patesepa o loo tāʻele. Sa ia fesili e fia malamalama ma iloa ai po o ai le fafine. Na ia iloa ai o Uria, le tane a le fafine, o loo auai atu i le ʻautau lea e siʻoina le aai o Rapa, o se aai o sā Amonī. Na alu atu le faatonuga a Tavita ina ia avaʻe le fafine i lona maota ma la faia ai se feusuaʻiga. Mulimuli ane, na oo ina lavelave le tulaga o mea—na iloa e le fafine ua maʻitō o ia mai ia Tavita. Ona faatonu lea e Tavita ina ia toe faafoʻi ifo Uria mai le taua, i lona faamoemoe faapea o le a faia ai e Uria ma lana avā ni feusuaʻiga. I lena tulaga, o le a foliga atu ai o Uria le tamā o le pepe a Patesepa. Peitaʻi sa leʻi alu atu Uria i lona fale. Na lē manofo Tavita i le tau pupunia o lana agasala, o lea na ia toe aauina atu ai Uria i Rapa faatasi ai ma se tusi na avatu i le taʻitaʻi o le ʻautau, e taʻu atu ai ina ia tuu Uria i se tulaga o le a ono fasiotia ai. O iinā na maliu ai Uria, ma faaipoipo atu ai loa Tavita i le avā a Uria a o leʻi iloa e le lautele e faapea ua maʻitō le fafine.—2 Samuelu 11:1-27.
15. (a) Na faapefea ona faaalia le agasala a Tavita? (e) Sa faapefea ona tali atu Tavita i le aʻoaʻiga na faia ma le atamai e Natano?
15 E foliga mai, sa taulau le faufauga a Tavita ina ia lilo lana agasala. Na mavae atu masina. Sa fanau mai le pepe—o se tama. Pe afai sa mafaufau Tavita i lenei mea na tupu i le taimi na ia fatuina ai le Salamo e 32, e manino lava la sa matuā faataugāina o ia e lona lotofuatiaifo. (Salamo 32:3-5) Ae peitaʻi, sa leʻi lilo le agasala mai le silafaga a le Atua. Ua faapea mai le Tusi Paia: “A ua leaga ia Ieova le mea ua faia e Tavita.” (2 Samuelu 11:27) Na aauina atu e Ieova le perofeta o Natano, o lē na ia faailoa atu i se auala atamai ia Tavita le mea na ia faia. O le taimi lava lea na taʻutino ai e Tavita lana agasala ma ʻaiʻoi atu mo le faamagaloga a Ieova. O le moni o lona salamō na toe maua ai se la leleiga ma le Atua. (2 Samuelu 12:1-13) Sa leʻi tetee Tavita i le aʻoaʻiga. Na i lo lea, sa ia faaalia le uiga o loo faamatalaina i le Salamo 141:5: “Ia fasia mai aʻu e le tagata amiotonu, o le alofa lava lea; ia aoai mai foi o ia ia te au, o le suāuu i loʻu ulu lea, e le ʻalo ai loʻu ulu.”
16. O le ā le lapataʻiga ma le fautuaga na tuuina mai e Solomona e faatatau i solitulafono?
16 Atonu sa toe tomanatu Solomona, le atalii lona lua o Tavita ma Patesepa, i lenei vaega pogisa o le olaga o lona tamā. Mulimuli ane na ia tusi mai ai: “O le ua ufiufi lona solitulafono, e le manuia o ia; a o le ua faaali ma lafoaiina, e alofagia o ia.” (Faataoto 28:13) Pe afai tatou te paʻūʻū atu i se agasala matuiā, e ao ona tatou utagia lenei fautuaga faagaeeina, lea ua avea o se lapataʻiga ma o se fautuaga foʻi. E ao ona tatou taʻutino ia Ieova a tatou agasala ma talanoa atu i toeaina o le faapotopotoga mo se fesoasoani. O se tiute tauave tāua o toeaina o le fesoasoani lea e toe faasaʻoina i latou ua paʻūʻū atu i le faia o measesē.—Iakopo 5:14, 15.
Onosaia Āuga o le Agasala
17. E ui ina faamagaloina agasala e Ieova, ae o ā mea na te lē taofia le oo mai ia i tatou?
17 Na faamagaloina Tavita e Ieova. Aiseā? Talu ai sa avea Tavita o se tagata faamaoni, talu ai sa alofa mutimutivale o ia i isi, ma talu ai sa moni lona salamō. E ui i lea, sa leʻi taofia ai le oo ia Tavita o āuga mataʻutia na mulimuli mai ai. (2 Samuelu 12:9-14) O le tulaga moni foʻi lena i aso nei. E ui e lē faaoo maia e Ieova se mea leaga i ē ua salamō, ae na te lē faasaoina i latou mai āuga masani o a latou gaoioiga sesē. (Kalatia 6:7) O nisi o iʻuga o amioga lē mamā faaleituaiga atonu o se talaga faaipoipoga, se maʻitō e lē o manaʻomia, o faamaʻi pipisi ona o feusuaʻiga, ma le lē toe iai o se faatuatuaina ma se faaaloalogia.
18. (a) O le ā le auala na taʻu atu e Paulo i le faapotopotoga i Korinito e feagai ai ma se tulaga o se amioga faaleituaiga sa matuā matagā? (e) E faapefea ona faaalia e Ieova le alofa ma lagona mutimutivale i tagata agasala?
18 Pe afai ua oo totino ia i tatou se sesē matuiā faapena, e faigofie lava ona lotovaivai a o mafatia i āuga o measesē ua tatou faia. Ae ui i lea, e lē tatau ona tatou faatagaina se mea e taofia i tatou mai le salamō ma toe faia se leleiga ma le Atua. I le uluaʻi senituri, na tusi atu ai Paulo i uso i Korinito ina ia tatau ona latou faateʻaese mai le faapotopotoga se tagata o lē na faia le faitaaga i se tulaga mataifale. (1 Korinito 5:1, 13) Ina ua toe salamō moni le tamāloa, sa faatonuina ai e Paulo le faapotopotoga: “Ia outou faamagalo atu ma faamafanafana atu i lena tagata [ma] ia faamauina lo outou alofa ia te ia.” (2 Korinito 2:5-8) I lenei fautuaga faagaeeina, tatou te mātauina ai le alofa ma lagona mutimutivale o Ieova i tagata sa agasala ae ua salamō. E olioli agelu i le lagi pe a salamō le tagata agasala.—Luka 15:10.
19. O le faanoanoa talafeagai i se ala sesē e ono taʻitaʻia atu ai i ā aogā?
19 E ui ina faanoanoa i se ala sesē, ae mafai ona avea le salamō lea ua tatou lagonaina e fesoasoani ia i tatou e faaeteete ai ‘ina neʻi [toe] loto atu i le amio leaga.’ (Iopu 36:21) O le mea moni lava, o āuga tigā o le agasala e ao ona taofia ai i tatou mai le toe faia o lena sesē. E lē gata i lea, sa faaaogā e Tavita le tulaga faanoanoa na ia oo i ai ona o lana amioga agasala e avea o se fautuaga i isi. Na ia faapea mai: “Ou te aʻoaʻo atu ai ou ala i e ua solitulafono; ona faaliliuina atu ai lea ia te oe o e ua agasala.”—Salamo 51:13.
Fiafiaga e Maua Mai le Auauna Atu ia Ieova
20. O ā aogā e iʻu i ai pe a usiusitai i manaʻoga amiotonu a le Atua?
20 Na fetalai Iesu: “E sili ona manuia [“fiafia,” NW ] o e faalogo i le afioga a le Atua, ma tausi i ai.” (Luka 11:28) O le usitai i manaʻoga amiotonu a le Atua e aumaia ai le fiafiaga i le taimi nei ma i le lumanaʻi e lē gata mai. Pe afai o loo tatou tumau pea i le amio mamā, tau ina ia tatou faaauau ai pea i lena ala, i le faaaogā lelei lea o sauniuniga uma ua faia e Ieova ina ia fesoasoani ai ia i tatou. Pe afai ua tatou paʻūʻū atu i amioga lē mamā, ia faalaeiauina i tatou i le iloa o loo nofosauni Ieova e faamagalo i latou o ē salamō moni, ma seʻi tau ina tatou filifili maumauaʻi e lē toe faia lava le agasala.—Isaia 55:7.
21. O le faatatauina o le ā le timaʻiga mai le aposetolo o Peteru e mafai ai ona fesoasoani ia i tatou e tumau i le mamā tau amio?
21 Ua toe o se aga ona mavae atu lea o lenei lalolagi amiolētonu, faatasi ai ma ona uiga uma ma gaoioiga lē mamā tau amio. O le tausisia o le amio mamā, o le a tatou manuia ai i le taimi nei e oo atu i le faavavau. Na tusi mai le aposetolo o Peteru: “Le au pele e, ua outou faatalitali i ia mea, o lea ia outou finafinau ai lava ina ia maua outou e ia ma le manuia, ua le ponā, ma le le mataʻuleagaina. . . . Ia outou faaeteete ia te outou, auā ua muai iloa e outou, neʻi taʻitaʻieseina outou i le sese o e faaletaupulea, tou te pauu ai i le mea sa outou tumau ai.”—2 Peteru 3:14, 17.
Pe Mafai Ona E Faamatala?
• Aiseā e ono faigatā ai le tumau i le amio mamā?
• O ā nisi o auala e lagolagoina ai la tatou filifiliga maumauaʻi ina ia usitaia tapulaa maualuluga o amioga?
• O ā lesona e mafai ona tatou aʻoaʻoina mai agasala a le tama talavou lea na taʻua e Solomona?
• O le ā ua tatou aʻoaʻoina mai le faaaʻoaʻoga a Tavita e faatatau i le salamō?
[Fesili mo le Suʻesuʻega]
[Faamatalaga i le itulau 13]
O se puipuiga le faailoa atu i isi o lou tulaga e tusa ai o mataupu tau i amioga
[Faamatalaga i le itulau 17]
Talu ai sa salamō moni Tavita, na faamagalo ai o ia e Ieova