Le Silafaga a le Atua i le Mamā Tau Amio

“O aʻu o Ieova, o lou Atua, o loo aʻoaʻo ia te oe i mea e aoga, o loo taʻitaʻiina oe i le ala e te ui ai.”—ISAIA 48:17.

1, 2. (a) O le ā le manatu o tagata lautele i amioga tatau faaleituaiga? (e) O le ā le manatu o loo iai i Kerisiano e faatatau i amioga tatau faaleituaiga?

I ASO nei, i le tele o vaipanoa o le lalolagi, ua oo ina manatu i tulaga tau amio e faapea o se mataupu e fitoitonu i le tagata lava ia. E manatu tagata i feusuaʻiga faapea o se fefaaaliaʻiga masani o lagona alofa e ao ona faamalieina i so o se taimi lava latou te mananaʻo ai, ae lē o se mea e ao ona faatapulaa i totonu o le liʻo o le faaipoipoga. Ua ia i latou le lagona faapea, afai e leai se tasi o āfaina ai, e leai foʻi la se mea e sesē ai le filifili o se tasi i le auala na te amioaʻi ai. I lo latou manatu, e lē tatau ona faamasinoina fua tagata i mataupu o amioga tatau, aemaise lava pe a oo mai i le itu o faiga faaleituaiga.

² E ese mai la le manatu o i latou ua oo ina iloa Ieova. Latou te fiafia e usitaia taʻiala faale-Tusi Paia talu ai latou te alolofa ia Ieova ma mananaʻo e faafiafia o ia. Ua latou iloa e alofa Ieova ia i latou ma foaʻi mai taʻiala mo lo latou lelei, o taʻiala o le a latou manuia moni ai ma latou maua ai le fiafia. (Isaia 48:17) Talu ai o le Atua o le Puna o le ola, ua talafeagai la le tatau ona latou saʻili atu ia te ia mo taʻiala i le auala e faaaogā ai o latou tino, aemaise lava i lenei mataupu e fesootaʻi vavalalata atu i le tuufaasoloina o le ola.

Se Meaalofa Mai Lē e Alofa na Foafoaina Mea

3. O le ā ua aʻoaʻoina ai le toʻatele o tagata i Kerisinetoma e faatatau i feusuaʻiga faaleituaiga, ma e faapefea ona faatusatusa lena tulaga ma mea ua aʻoaʻoina e le Tusi Paia?

³ I le ese mai le lalolagi o loo iai i aso nei, ua aʻoaʻo atu e nisi o loo i Kerisinetoma faapea o feusuaʻiga o ni mea e masiasi ai, o se agasala, ma o le “uluaʻi  agasala” i le faatoʻaga i Etena o le faatosinaga faaleituaiga a Eva lea na fai ia Atamu. O se manatu faapena e feteenaʻi ma le mea o loo fai mai ai le Tusi Paia faagaeeina. O loo taʻua e le tala a le Tusi Paia le uluaʻi ulugalii faaletagata e faapea “o Atamu [“le tamāloa,” NW] ma lana avā.” (Kenese 2:25) Na taʻu atu e le Atua ia i laʻua ina ia fai sa la fanau, i lona fetalai atu: “Ia fanafanau ia, ma ia uluola, ma ia tumu ai le lalolagi.” (Kenese 1:28) O se mea e lē talafeagai mo le Atua lona poloaʻiina o Atamu ma Eva e fai sa la fanau ona ia toe faasala lea o i laʻua pe a la faatinoina na faatonuga.—Salamo 19:8.

4. Aiseā ua foaʻi mai ai e le Atua i tagata le malosi tau feusuaʻiga?

⁴ I lena poloaʻiga na tuu atu i o tatou uluaʻi mātua, lea foʻi na toe taʻu atu ia Noa ma ona atalii, ua tatou mātauina ai le fuafuaga autū mo feusuaʻiga: ina ia maua ai se fanau. (Kenese 9:1) Peitaʻi ane, o loo faaalia e le Afioga a le Atua e faapea ua lē o faatalitalia ana auauna faaipoipo ina ia faatapulaa mai lo latou faia o feusuaʻiga mo le tau lava ina ia maua ai se fanau. O faiā faapena e mafai ma le talafeagai ona faamalie ai manaʻoga tau faalogona ma manaʻoga faaletino ma avea foʻi o se puna o fiafiaga i se ulugalii faaipoipo. O se auala lea mo i laʻua e fefaaaliaʻi ai le alofa loloto o le tasi mo le isi.—Kenese 26:8, 9; Faataoto 5:18, 19; 1 Korinito 7:3-5.

Taofiofiga Tauatua

5. O ā faasāsāga ua faataatia e le Atua i amioga faaleituaiga a tagata?

⁵ E ui o feusuaʻiga o se meaalofa mai le Atua, ae lē tatau ona faatinoina e aunoa ma se taofiofiga. E faatatau atu foʻi lenei mataupu silisili i le faatulagaga o le faaipoipoga. (Efeso 5:28-30; 1 Peteru 3:1, 7) Ua faasāina feusuaʻiga e faia i fafo atu o le liʻo o le faaipoipoga. O loo matuā maʻoti mai lava le Tusi Paia i lenei mataupu. I le Tulafono lea na tuuina atu e le Atua i le nuu o Isaraelu, na taʻua ai e faapea: “Aua e te mulilua.” (Esoto 20:14) Mulimuli ane, na faaaofia e Iesu le “faitaaga” ma le “mulilua” i “manatu leaga” ia e tupuga mai le loto ma faaleagaina ai se tagata. (Mareko 7:21, 22) Na faagaeeina le aposetolo o Paulo e timaʻi atu i Kerisiano i Korinito e faapea: “Ina sosola ese ia outou i le faitaaga.” (1 Korinito 6:18) Ma i lana tusi atu i Kerisiano Eperu, na tusi ai Paulo e faapea: “Ia faamamaluina le faaipoipoga e tagata uma, o le moega foi o le ulugalii ia leai sona leaga; auā e faamasinoina e le Atua o e faitaaga ma e mulilulua.”—Eperu 13:4, LF.

6. I le Tusi Paia, o le ā ua aofia ai i le upu “faitaaga”?

⁶ O le ā e faauiga i ai le upu “faitaaga”? E sau mai le upu Eleni por·neiʹa, lea e faaaogā i nisi taimi e faasino atu i feusuaʻiga e faia e ni tagata e leʻi faaipoipo. (1 Korinito 6:9) I isi mau, e pei o le Mataio 5:32 ma le Mataio 19:9, ua lautele atili ai le faauigaina o le upu ma faasino atu foʻi i le mulilua, mataifale, ma feusuaʻiga e faia ma manu. O isi amioga faaleituaiga e faia e ni tagata e lē o faaipoipo, e pei o faiga faaleituaiga e faaaogā ai le gutu ma le alāfeʻau (seʻi tulou) ma le taalo i totogasā o le isi tagata, e mafai foʻi ona faauiga i ai le por·neiʹa. O na faiga uma e taʻusalaina—i se tulaga matilatila pe i le uiga foʻi o upu—i le Afioga a le Atua.—Levitiko 20:10, 13, 15, 16; Roma 1:24, 26, 27, 32. *

Mauaina Aogā Mai Tulafono a le Atua Tau i Amioga

7. E faapefea ona tatou maua aogā e ala i le tausia o le mamā tau amio?

⁷ E mafai ona avea o se luʻi mo tagata lē lelei atoatoa le usiusitai atu i taʻiala a Ieova e faatatau i amioga faaleituaiga. Na tusi mai le faifilosofia Iutaia sa taʻutaʻua i le lona 12 senituri, o Maimonides e faapea: “E leai se faasāsāga o i le Tora [Tulafono Faa-Mose] e sili atu ona faigatā lona tausia na i lo le faasāsāga i amioga lē tatau faaleituaiga ma feusuaʻiga e lē tusa ai o le tulafono.” Peitaʻi, afai tatou te usitai i le taʻiala a le Atua, o le a telē se aogā mo i tatou. (Isaia 48:18) Mo se faaaʻoaʻoga, o le usitai i lenei mataupu e fesoasoani e puipuia ai i tatou mai faamaʻi pipisi ona o feusuaʻiga, o nisi o na faamaʻi ua leai so latou togafiti ma e mafai ona oti ai se tagata. * Ua puipuia i tatou mai le oo i ni maʻitaga a o leʻi faaipoipo. O le faatatauina o le atamai faaleatua e maua ai foʻi se lotofuatiaifo mamā. O le faia faapea e uunaʻia atili ai le faaaloalogia e le tagata o ia lava ma faaaloalogia mai ai e isi, e aofia ai o tatou tauaiga, a tatou uō, a tatou fanau, ma o tatou uso ma tuafāfine Kerisiano. E faapena foʻi ona atili maua ai e i tatou se vaaiga mamā ma lelei e faatatau i faiga faaleituaiga na o le a maua ai le fiafiaga i le faaipoipoga. Na tusi mai se tasi fafine Kerisiano e faapea: “O le upu moni o le Afioga a le Atua o le puipuiga sili ona lelei lea. O loo oʻu faatalitali e faaipoipo, ma pe a oo ina ou faaipoipo,  o le a ou mitamita e taʻu atu i le alii Kerisiano o le a ma faaipoipo e faapea, o loo tumau pea loʻu tulaga mamā.”

8. I ā auala e ono uunaʻia atili ai e a tatou amio mamā le tapuaʻiga lē ponā?

⁸ O le tausisia o la tatou amio mamā, e mafai ai foʻi ona tele so tatou sao i le faalēaogāina o faamatalaga sesē o loo faia e faatatau i le tapuaʻiga moni ma tosina mai ai tagata i le Atua o loo tatou tapuaʻia. Na tusi mai le aposetolo o Peteru: “Ia lelei a outou amio i luma o nuu ese, o le mea latou te fai upu leaga ai ia te outou, peiseai o tagata amio leaga outou, latou te vaavaai ai i a outou amio lelei, ona latou vivii atu ai lea i le Atua i le aso e asiasi mai ai.” (1 Peteru 2:12) E tusa lava pe lē amanaʻia pe lē fiafia mai tagata o ē lē tapuaʻi ia Ieova i a tatou amio mamā, e mafai lava ona tatou mautinoa o loo silasila mai lo tatou Tamā faalelagi, o loo faamalieina lona finagalo, ma olioli foʻi i a tatou taumafaiga e mulimuli atu i ana taʻiala.—Faataoto 27:11; Eperu 4:13.

9. Aiseā e tatau ai ona ia i tatou le mautinoa i taʻiala a le Atua, e ui lava atonu tatou te lē malamalama atoatoa i ana māfuaaga? Faataʻitaʻi mai.

⁹ O le faatuatua i le Atua e aofia ai le mautinoa e na te silafia le mea e sili ona lelei mo i tatou, e tusa lava pe tatou te lē malamalama atoatoa i māfuaaga uma ua ia taʻitaʻia ai i tatou. Seʻi manatu i se faaaʻoaʻoga mai le Tulafono Faa-Mose. O se tasi o tulafono e faatatau i taimi e tolauapi ai o se ʻau sa manaʻomia ona tanu lelei i tua atu o le togalauapi ni otaotavale. (Teuteronome 23:13, 14) Atonu sa taumānatu tagata Isaraelu po o le ā le māfuaaga mo lena taʻiala; atonu sa iai nisi na manatu e lē manaʻomia lena mea. Peitaʻi, talu mai lava lena taimi, ua ioeina e le faasaienisi faafomaʻi e faapea, na fesoasoani lenei tulafono i le puipuia o le suāvai mai le faaleagaina ma saunia ai se puipuiga mai le tele o faamaʻi sa feaveaʻi e iniseti. I se tulaga talitutusa, e iai māfuaaga faaleagaga, tau i le vafealoaʻi, i faalogona, faaletino ma faalemafaufau ua māfua ai ona faatapulaa e le Atua le faia o feusuaʻiga i le na o le liʻo lava o le faaipoipoga. Seʻi o tatou talanoaina nei ni nai faaaʻoaʻoga faale-Tusi Paia o i latou o ē na tausisia le amio mamā.

Iosefa—Na Faamanuiaina i Lana Amio Mamā

10. O ai na taumafai e faatosina Iosefa, ae na faapefea ona ia tali atu i ai?

¹⁰ Atonu ua e masani i le faaaʻoaʻoga faale-Tusi Paia a Iosefa, le atalii o Iakopo. I le 17 o ona tausaga, na oo ai ina avea o ia ma pologa a Potifara, le alii e pule i ʻau faafeao a Farao o Aikupito. Na faamanuia Ieova ia Iosefa, ma mulimuli ane sa tofia o ia e pulea mea uma i le aiga o Potifara. E oo ane ina ua 20 ma ona tupu ona tausaga, “sa aulelei le tino o Iosefa, ma ona mata e lalelei ia.” Na tosina ane ia te ia le avā a Potifara, o lē sa taumafai e faatosina o ia. Sa faamanino lelei i ai e Iosefa lona tulaga, i le faamatala atu e faapea, o lona loto atu i le mea lea e manaʻo ai o le a lē gata o se faalata lea i lona matai, ae o se ‘agasala foʻi i le Atua.’ Aiseā na mafaufau ai faapena Iosefa?—Kenese 39:1-9.

11, 12. E ui sa leʻi iai se tulafono tusitusia tauatua na saunia mai e faasā ai le faitaaga ma le mulilua, ae aiseā atonu na mafaufau ai faapea Iosefa e tusa o le auala na ia faia?

 ¹¹ E foliga mai, sa leʻi faavae aʻe le filifiliga a Iosefa i le fefe neʻi maua o ia e tagata. Sa mamao ese le aiga o Iosefa, ma o lea foʻi na manatu lona tamā ua oti o ia. Pe ana faia e Iosefa se feusuaʻiga lē mamā, semanū e lē taitai lava iloa e lona aiga. Na semanū foʻi e mafai lava ona lilo lena ituaiga o agasala mai ia Potifara ma ana auauna tane, auā sa iai taimi na lē iai i latou i totonu o le maota. (Kenese 39:11) Peitaʻi, sa iloa e Iosefa e lē taitai ona lilo se ituaiga amioga faapena mai le silafaga a le Atua.

¹² Atonu sa manatunatu Iosefa i mea na ia iloa e faatatau ia Ieova. E mautinoa lava, sa ia iloa mea na folafola mai e Ieova i le faatoʻaga o Etena: “O le mea lea e tuua ai e le tane lona tamā ma lona tinā, a e faatasi ma lana avā; ona avea ai lea o i laua ma tino e tasi.” (Kenese 2:24) E lē gata i lea, e foliga mai sa iloa e Iosefa le mea na taʻu atu e Ieova i le tupu Filisitia o lē na maumauaʻi e faatosina le tinā o le tamā o le tamā o Iosefa o Sara. Na fetalai atu Ieova i lena tupu: “Faauta, o le a e oti ona o le fafine ua e au mai, auā o le nofo tane lava ia. . . . Ua ou taofia foi oe neʻi e agasala mai ia te au; o le mea lea ua ou le tuuina atu ai ia te oe e tago atu ia te ia.” (Kenese 20:3, 6) E ui la sa leʻi saunia i lena taimi e Ieova se tulafono tusitusia, ae sa manino mai lava ona faalogona e faatatau i le faaipoipoga. O lagona o Iosefa e faatatau i amioga, faatasi ai ma lona faanaunauga e faafiafia Ieova, na māfua ai ona ia teena le faia o amioga lē mamā.

13. E foliga mai aiseā na lē mafai ai e Iosefa ona ia ʻalofia le avā a Potifara?

¹³ Peitaʻi, sa faatauanau atu pea le avā a Potifara, ma augani atu ia te ia “i lea aso ma lea aso” ina ia la momoe ma ia. Aiseā na lē tau ai lava ina ʻalofia o ia e Iosefa? Manatua, ona o Iosefa o se auauna, e iai ona tiute sa tatau ona faatino ma sa lē mafai ai ona ia suia lona tulaga na iai. O faamaoniga i mea na maua mai suʻesuʻega i le eleele ua faaalia ai faapea, o fausaga o fale o Aikupito sa tatau ai ona savali e ui atu i totonu o le potu tele o le fale pe a fia agaʻi atu i potu sa teu uma ai mea. O lea la, atonu sa faigatā ai lava ia Iosefa ona ia ʻalofia le avā a Potifara.—Kenese 39:10.

14. (a) O le ā na tupu ia Iosefa ina ua sola ese mai le avā a Potifara? (e) Na faapefea ona faamanuia Ieova ia Iosefa ona o lona faamaoni?

¹⁴ Ona oo lea i se aso ua na o i laʻua ai le fale. Na aapa atu le avā a Potifara e puʻe mai Iosefa ma ʻaiʻoi atu: “Ta te momoe.” Sa sola ese Iosefa. I le tigā o le fafine i le teena o ia e le tama, na ia tuuaʻia ai Iosefa faapea sa taumafai e faamalosi o ia. O ā iʻuga na iai? Pe na tauia mai ea o ia e Ieova i lena lava taimi e tusa ai o lona ala faamaoni? E leai. Na lafoina Iosefa i le falepuipui ma saisaia ai. (Kenese 39:12-20; Salamo 105:18) Sa silasila mai Ieova i faiga lē tonu na fai ma mulimuli ane ona faaeaina Iosefa mai le falepuipui ae siitia atu e nofo i le maota o le tupu. Na avea o ia ma tagata lona lua e sili ona tāua i totonu o Aikupito ma sa faamanuiaina i le maua o sana avā ma se fanau. (Kenese 41:14, 15, 39-45, 50-52) E lē gata i lea, ua silia ma le 3,500 tausaga ua mavae talu ona tusia le tala i le faamaoni o Iosefa mo le vaʻiliʻiliina e auauna a le Atua talu mai lena taimi. Maʻeu ni faamanuiaga matagofie ona o le pipii atu i tulafono amiotonu a le Atua! E faapena foʻi i aso nei, atonu e lē o taimi uma tatou te iloa ai ni aogā vave o le tausisia o le faamaoni tau amio, ae e mafai ona tatou mautinoa o loo silasila mai Ieova ma o le a ia faamanuiaina i tatou i lana lava taimi tatau.—2 Nofoaiga a Tupu 16:9.

Le ‘Feagaiga a Iopu ma Ona Mata’

15. O le ā le ‘feagaiga na faia e Iopu ma ona mata’?

¹⁵ O Iopu o le isi tagata sa tausia le faamaoni. A  o fesagaʻi ma puapuaga na faapogaia e le Tiapolo, sa toe tomanatu ai Iopu i lona olaga ma ia faailoa mai ai lona lotomalie e talia se faasalaga mamafa pe afai ua ia solia se tulafono a Ieova, faapea le tulafono e faatatau i amioga faaleituaiga. Na faapea mai Iopu: “Ua ou osia le feagaiga ma oʻu mata, se a foi le mea ou te manatu ai i se taupou?” (Iopu 31:1) I lenei faamatalaga, sa uiga ai Iopu e faapea i lana filifiliga maumauaʻi ina ia tausia lona faamaoni i le Atua, sa ia filifili ai e ʻaloese e oo lava i le faataupupula manaʻonaʻo atu i se fafine. O le mea moni, sa ia vaai i fafine i aso uma o le olaga ma e foliga mai foʻi sa fesoasoani atu ia i latou pe a latou manaʻomia se fesoasoani. Peitaʻi o le mea sa ia leʻi faatagaina, o le uaʻi atu lea o lana pupula ma se faalogona i ni amioga faaleituaiga. A o leʻi amata ona puapuaga, sa avea o ia o se tagata na tele sona tamaoaiga, “sa sili foi lenei tagata i tagata uma lava i sasae.” (Iopu 1:3) Peitaʻi, na te leʻi faaaogāina le tele o lona tamaoaiga e faatosina ane ai ni fafine se toʻatele ia te ia. E manino mai, sa lē taitai ona ia faia ni amioga faatafai i se fuafuaga e faamalie ai ona tuʻinanauga i ni feusuaʻiga lē mamā ma tamaʻitaʻi talavou.

16. (a) Aiseā ua avea ai Iopu ma faaaʻoaʻoga lelei mo Kerisiano faaipoipo? (e) Na faapefea ona matuā ese amioga a tane i aso o Malaki mai le amio a Iopu, ae faapefea i aso nei?

¹⁶ A o fesagaʻi la Iopu ma taimi o le taugalemu faapea foʻi taimi o faigatā, sa ia faaalia pea lona faamaoni tau amio. Sa mātau mai e Ieova lenei faamaoni ma na ia matuā faamanuia mai ai ia te ia. (Iopu 1:10; 42:12) Maʻeu le avea o Iopu ma faaaʻoaʻoga lelei mo Kerisiano faaipoipo, o tane faapea foʻi fafine! E lētioa lava alofa Ieova ia te ia! E ese mai ai amioga a le toʻatele o tagata i aso nei, lea ua matuā atagia mai ai le mea na tupu i aso o Malaki. Na matuā taʻusalaina e lena perofeta le auala na tuulafoaʻia ai e le toʻatele o tane a latou paaga, lea sa masani lava ona māfua talu ai le toe fia faaipoipo atu i ni fafine e laiti ifo. Sa faatumulia le fata faitaulaga a Ieova i loimata o nai avā na tuulafoaʻia, ma na taʻusalaina e le Atua i latou sa “faaʻoleʻole” i a latou paaga.—Malaki 2:13-16.

Se Tamaʻitaʻi Talavou Amio Mamā

17. Na faapefea ona faatusaina le teine Sulami i “le faatoaga ua puipuia”?

¹⁷ O le tagata lona tolu sa tausia le faamaoni o se teine Sulami. Ona o lona talavou ma lona lalelei, na māfua ai ona tosina ane ia te ia le alofa e lē gata o se tama leoleo mamoe ae faapea foʻi le tupu mauʻoa o Isaraelu, o Solomona. I le tala matagofie lea e faamatalaina i le Pese a Solomona, o loo taʻua ai le tumau o le teine Sulami i lana amio mamā, lea na faaaloalogia ai o ia e tagata sa latou iloa o ia. Na faagaeeina Solomona na te tusia le tala e uiga i lenei teine, e ui lava sa teena o ia e le teine. E oo foʻi i le leoleo mamoe lea sa alofa i ai le teine, sa ia faaaloalogia foʻi le amio mamā a le tamaʻitaʻi. I se tasi taimi, na mafaufau ifo ai le tama leoleo mamoe e faapea, na pei le teine Sulami o “le faatoaga ua puipuia.” (Pese a Solomona 4:12) I Isaraelu anamua, sa ola i togalaau matagofie le anoanoaʻi o fualaau faasua, o fugalaau manogi, ma laau tetelē matagofie. O togalaau faapena sa masani lava ona siʻomia e se pā o laau totō po o se aupā ma e lē mafai ona ulu atu i ai seʻi vaganā ua ui atu i le faitotoʻa lea e fai sona loka. (Isaia 5:5) Sa faatusa la e le leoleo mamoe le mamā ma le matagofie o le amio a le teine Sulami, i se togalaau faapena e tulaga ese lava lona matagofie.  Sa atoatoa lana amio mamā. O lona alofa māfana o le a faatoʻā faaali lava i lē o le a avea mana tane.

18. O le ā ua faamanatu mai ia i tatou e tala ia Iosefa, Iopu, ma le teine Sulami?

¹⁸ Ua faataatia e le teine Sulami se faaaʻoaʻoga sili ona lelei mo tamaʻitaʻi Kerisiano i aso nei, i le faamaoni tau amio. Na silasila mai ma talisapaia e Ieova le amio lelei a le teine Sulami ma ia faamanuia mai i ai e pei lava ona sa ia faamanuia ia Iosefa ma Iopu. Mo so tatou taʻiala, ua faamaumauina ai a latou gaoioiga o le faamaoni i le Afioga a le Atua. E ui ina lē o tusia i le Tusi Paia a tatou taumafaiga i aso nei mo le tausia o le faamaoni, ae ua iai ia Ieova se “tusi e faamanatu” mo i latou o loo saʻili e faia lona finagalo. Seʻi aua lava neʻi o tatou faagaloina o loo “faafofoga mai” Ieova ma fiafia lona finagalo a o tatou taumafai ma le faamaoni e tausia le mamā tau amio.—Malaki 3:16.

19. (a) E tatau faapefea ona tatou manatu i le mamā tau amio? (e) O le ā o le a talanoaina i le mataupu o sosoo mai?

¹⁹ E ui atonu e faatauemu mai i latou o ē lē faatuatua, ae tatou te fiafia ona o loo tatou usiusitai atu i Lē e alofa na Foafoaina i tatou. Ua ia i tatou se tulaga maualuga tau i amioga, o amioga faale-Atua. O se mea e ao ona mitamita ai, o se mea e ao ona faapelepele i ai. O le tausisia o se tulaga mamā tau amio, e mafai ai ona tatou fiafia i faamanuiaga a le Atua ma tausisia ai se faamoemoe pupula i faamanuiaga e lē gata mai i le lumanaʻi. Peitaʻi, i se uiga e mafai ona faatino aogā, o le ā e mafai ona tatou fai ina ia tumau ai pea i le amio mamā? O le a talanoaina e le mataupu o sosoo mai lenei fesili tāua.

[Faamatalaga pito i lalo]

Pe Mafai Ona E Faamatala?

• O le ā o aʻoaʻoina e le Tusi Paia e faatatau i feusuaʻiga faaleituaiga?

• O le ā ua aofia ai i le upu “faitaaga” i le Tusi Paia?

• E faapefea ona tatou maua aogā pe a tumau i le amio mamā?

• Aiseā ua avea ai Iosefa, Iopu, ma le teine Sulami o ni faaaʻoaʻoga lelei mo Kerisiano i aso nei?

[Fesili mo le Suʻesuʻega]

[Faamatalaga i le itulau 9]

Na sola ese Iosefa mai amioga lē mamā

[Faamatalaga i le itulau 10]

Sa avea le teine Sulami e pei o “le faatoaga ua puipuia”

[Faamatalaga i le itulau 11]

Na faia e Iopu ‘se feagaiga ma ona mata’