Aiseā e Tatau ai Ona E Tatalo?

“UA OUTOU ole atu, a e lei maua, auā ua ole atu ma le faaletatau . . . Ia outou faalatalata atu i le Atua, ona faalatalata mai lea o ia ia te outou.” (Iakopo 4:3, 8) O na upu a Iakopo le soo o Iesu, atonu e matuā uunaʻia ai i tatou e mafaufau i māfuaaga tatou te tatalo ai.

O le tatalo ua lē na o se auala e taʻu atu ai i le Atua o tatou manaʻoga. I lana Lauga taʻutaʻua i luga o le Mauga, na fetalai ai Iesu: “Ua silafia e lo outou Tamā mea ua outou matitiva ai, a o lei ole atu outou ia te ia.” Ae na fetalai foʻi Iesu: “Ia outou ole atu, ona foaiina mai ai lea ia te outou.” (Mataio 6:8; 7:7) O lona uiga la, e finagalo Ieova ina ia tatou taʻu atu ia te ia o tatou faalogona i mea tatou te manaʻomia. Ae tele foʻi ma isi mea e aofia ai i tatalo.

O ni uō moni e lē faatoʻā talanoa pe a manaʻomia se mea. E naunau le tasi mo le lelei o le isi, ma e tuputupu pea le māfana o le la faigauō pe a fefaaaliaʻi o la faalogona. E faapena foʻi ona iai i le tatalo se fuafuaga e sili atu na i lo le tau ina ole atu mo mea e manaʻomia. E maua ai se avanoa e faamalosia ai la tatou faiā ma Ieova e ala i le faaali atu o lo tatou tuutoina mai le loto ia te ia.

Ioe, ua foaʻi mai e le Atua ia i tatou le faaeaga o le tatalo ina ia mafai ai ona tatou vavalalata atu ia te ia. E faatoʻā mafai ona tupu le mea lenei pe afai tatou te faaleo atu o tatou lava faalogona i le Atua na i lo le toe taʻua o ni tatalo ua aʻo faatauloto. Maʻeu se fiafia i le talanoa atu ia Ieova i le tatalo! E lē gata i lea, ua faapea mai se faataoto o le Tusi Paia: “O le tatalo a e amio saʻo o lona lea fiafia.”—Faataoto 15:8.

 Na pese le faisalamo o Asafo e faapea: “O aʻu nei, ou te faalatalata atu i le Atua ou te lelei ai.” (Salamo 73:28) Ae ina ia faalatalata atu i le Atua, e tatau ona iai ma nisi mea tatou te faia na i lo le tatalo. Seʻi mātau mai foʻi le auala o loo faaalia ai lenei mea i le tala o loo sosoo mai:

“Ona fai mai lea ia [Iesu] o le tasi o lona au soo, ‘Le Alii e, ia e aʻoaʻo mai ia te i matou i tatalo.’” Ona tali atu lea i ai o Iesu: “Pe a outou tatalo, ia outou fai atu: Le Tamā e, Ia paia lou suafa. Ia oo mai lou malo.” (Luka 11:1, 2, LF) Pe mafai ea ona tatou tatalo atu ma le uigā i lenei auala e aunoa ma lo tatou muaʻi aʻoaʻoina po o ai le suafa o le Atua ma po o le a faapefea foʻi ona faapaiaina? Ma pe mafai ea ona ōgatasi a tatou tatalo ma nei fetalaiga a Iesu pe afai tatou te leʻi malamalama po o le ā le Malo o le Atua? E mafai ona maua se malamalamaga i nei mataupu pe afai tatou te iloiloina māeʻaeʻa le Tusi Paia. O le poto e maua mai ai o le a fesoasoani ia i tatou e iloa le Atua ma malamalama i ona ala. E lē gata i lea, o le oo ina masani ia Ieova le Atua o le a atili ai ona tatou vavalalata ma tuutoina atu ia te ia. O le iʻuga, o le a fesoasoani lenei ia i tatou e saʻoloto ai e talanoa atu ia te ia i le tatalo.

E Mafai e Tatalo Ona Foʻia Faafitauli

O le atiina aʻe o se faiā māfana ma Ieova o le a fesoasoani ia i tatou e foʻia ai faafitauli. Seʻi mātau mai le moni o lena manatu i tulaga taʻitasi nei. O loo faataʻitaʻia ai faapea, o i latou sa tatalo na mafai ona faamalosia la latou faiā ma Ieova.

I Pasili na tatalo ai i le Atua se fafine e igoa ia Maria mo se fesoasoani. Sa manaʻo o ia e tetee atu i tapulaa ua faatulaga mo amioga, o se tasi o ana māfuaaga ona o le pepelo o mea sa ia vaaia o loo fai e tagata lautele. Na oo lava ina tuua e Maria lana tane, lana fanau, ae alu ese mai le aiga. Sa amata foʻi ona ia faaaogā vailaau faasāina. Ae ina ua lē taulau ona ia maua le fiafia, ona sasaa atu lea o ona lagona i le Atua ma tatalo atu mo se fesoasoani.

E leʻi umi, ae asiasi ane ni uso Molimau a Ieova se toʻalua ma la tuua ia Maria se lomiga o Le Olomatamata lea o loo iai se mataupu i le tāua o le talia o taʻiala tauatua. Na pāʻia ai lona loto, ma amata ai lava i le aso lena ona ia suʻesuʻeina le Tusi Paia ma Molimau. O lenei suʻesuʻega na iʻu ai ina toe faatasia lona aiga. A o ia aʻoaʻoina mea e uiga ia Ieova, sa ia manaʻo e faaali atu lona alofa mo ia. Na faapea mai Maria: “Sa ou faia ni faaleleiga i laʻu amio. I le taimi muamua, sa tetee mai laʻu tane ma loʻu aiga i loʻu suʻesuʻeina o le Tusi Paia. Peitaʻi a o latou vaaia suiga na ou faia, na amata loa ona latou faalaeiau atili mai aʻu e suʻesuʻe.” Mulimuli ane, sa tuuina atu e Maria lona ola i Lē Faafofoga tatalo ina ia mafai ona ia auauna atu ia te ia.

E ui i le lalelei o le avā a Iose ma le ola o lana pisinisi sa fai i Polivia, ae sa leʻi fiafia o ia. O ni amioga lē mamā ma se isi fafine i fafo atu o lana faaipoipoga na māfua ai ona tuua o ia e lana avā. Sa matuā malosi lana inu ʻava malosi ma ia lagona ai e peiseai e leai sona aogā. Ua faapea mai Iose: “Sa amata ona ou tatalo atu ma loʻu lotofaamaoni, ma talosaga atu po o le ā se mea e tatau ona ou fai ina ia fiafia mai ai le Atua. E leʻi umi ae asiasi mai Molimau a Ieova i le nofoaga o laʻu pisinisi ma ofoina mai le faia o ni suʻesuʻega faale-Tusi Paia i loʻu aiga e aunoa ma se totogi, peitaʻi sa ou teena i latou. E faatolu lava ona tupu le mea lenei. O taimi uma lava ou te tatalo ai mo se fesoasoani, e emo ane lava o Molimau foʻi e ō mai. Na iʻu lava ina fai laʻu filifiliga, e tatau ona ou faalogo atu i ai i le isi taimi e toe asiasi mai ai. Ua uma ona ou faitauina atoa le Tusi Paia ma sa tele ni aʻu fesili, ae o a latou tali i taimi uma sa faamalieina ai lava aʻu. O le aʻoaʻo e uiga ia Ieova na aumaia ai ia te aʻu se fuafuaga fou i le olaga, ma o aʻu uō na fai ma Molimau sa avea lava o ni faaaʻoaʻoga e sili ona faalaeiauina ai! Sa ou tuua laʻu uō teine ma aʻu aumea sa matou inu faatasi. E leʻi umi, ae ou toe foʻi atu i laʻu avā ma laʻu fanau. I le amataga lava o le 1999 na ou papatiso ai loa.”

I Italia, na fesagaʻi ai Tamara ma faafitauli i lana faaipoipoga, o lea na ia tatalo ai mo le poto. Sa ia te ia se uiga faamaaa, talu ai na fasi ma tuli ese o ia mai lona aiga i le 14 o ona tausaga. Fai mai Tamara: “Na ou mauaina se Tusi Paia ma amata loa ona faitau. I se tasi afiafi, na ou faitauina ai e faapea, ‘o le saʻilia o le poto e pei o le saʻilia o ni ʻoa lilo.’ Sa ou tatalo atu mo lena poto. (Faataoto 2:1-6) I le taeao na sosoo ai, na asiasi mai ai ni Molimau a Ieova ia te aʻu. Sa amata ona matou suʻesuʻeina le Tusi Paia ma i latou, ae na fai sina umi o oʻu taumafai e faatino mea sa ou aʻoaʻoina. I le iʻuga, na ou filifili loa e uia le ala faa-Kerisiano o le  olaga ma ou papatiso ai. I le taimi nei, ua ma auai faatasi ma laʻu tane, i le fesoasoani atu i isi ina ia latou maua aogā mai le poto faale-Atua.”

Sa avea Peturisa o se tasi o tagata taualoa i Caracas, i Venesuela. Peitaʻi, sa tatala lana faaipoipoga ma fesagaʻi ma mafatiaga. Ona o le matuā fememeaʻi, e iai se tasi aso sa ia faaaluina ai ni itula se tele e tatalo ai. I le taeao na sosoo ai, na tatagi ai le logo o le faitotoʻa. Sa autilo atu ma le ita tele i le tamaʻi pū o le faitotoʻa ma vaaia ai ni tagata se toʻalua ma ni a la ato taʻitaʻi. Sa lafi o ia e peiseai e lē o iai i le fale, peitaʻi a o leʻi toe foʻi le ulugalii, na la faamaulu se tamaʻi pepa valaaulia i lalo o le faitotoʻa. Ua tusia ai upu nei, “Ia Iloa Lau Tusi Paia.” Faamata e fesootaʻi le la asiasiga ma ana tatalo i le pō na muamua atu? Na ia valaau atu ia i laʻua e toe foʻi ane. E leʻi umi ae ona suʻesuʻeina loa le Tusi Paia, ma mulimuli ane ai papatisoina o ia. O se mea e fiafia ai, ua aʻoaʻo atu nei e Peturisa isi i le auala e maua ai le fiafia.

Sa tatalo Karameli e faatatau i lona mafatiaga o le mativa. E toʻasefulu lana fanau sa tausi faatasi ai ma lana tane onā soo o Lafaele. Na faapea mai Karameli: “Sa ou taumafai e suʻe se tupe e ala i loʻu galue e fai tagamea a tagata.” Peitaʻi na faateteleina le inu ʻava a Lafaele. “Sa faifai pea seʻia oo ina amata ona ma suʻesuʻeina le Tusi Paia ma Molimau a Ieova, o iinā loa na faia ai e laʻu tane ni suiga. Sa ma aʻoaʻoina le folafolaga a le Malo—ua lē pine ona tafiesea lea e Ieova mai le lalolagi, le mativa ma mafatiaga. O lenei ua faatoʻā taliina aʻu tatalo i le Atua!” O le aʻoaʻoina o ala o Ieova sa fesoasoani ia Lafaele e taofi ai lana inu ʻava, ma suia ai o ia i le “tagata fou.” (Efeso 4:24) Sa mafai e ia ma lona aiga ona faaleleia lo latou tulaga faaletino. Ua faapea mai Lafaele: “E ui matou te lē o mauʻoa, ma e lē o iai foʻi so matou lava fale moni, peitaʻi ua matou maua mea e manaʻomia moni o le olaga, ma o loo matou fiafia ai.”

Pe a Oo Ina Taliina Mai Tatalo Uma

Pe na iai ea se aogā o tatalo i nei tagata? O le mea mautinoa lena! Ma pe sa e mātau mai i le tele lava o tulaga, sa taliina mai a latou tatalo ina ua asiasi atu i ai se tasi mai le faapotopotoga Kerisiano, ma fesoasoani i ai ina ia latou faalatalata atu ia Ieova le Atua e ala i le suʻesuʻeina o le Tusi Paia?—Galuega 9:11.

O lea la, ua ia i tatou māfuaaga lelei e tatalo ai. Ua toe nei o se aga, ona taliina lea o le tatalo mo le oo mai o le Malo o le Atua ma ia faia lona finagalo i le lalolagi. (Mataio 6:10) Pe a uma ona faamamāina e le Atua lo tatou lalolagi aoao mai ia i latou o loo teena o ia, ona “tumu [ai lea o] le lalolagi i le malamalama o Ieova.” (Isaia 11:9) Ona olioli ai lea o i latou uma o ē alolofa ia Ieova “i le saolotoga o le fanau a le Atua e manuia ai”—ma e mautinoa lava o le a taliina ai a latou tatalo.—Roma 8:18-21.

[Faamatalaga i le itulau 7]

Po o e iloa le pogai e tatau ai ona tatou tatalo?