Auauna i le Atua ma se Agaga Lotomalie

NA TUSI le aposetolo o Paulo e faapea: “Ou te matuā fiafia lava e faauma aʻu mea, ia faaumatia foi aʻu ona o outou agaga.” (2 Korinito 12:15) O le ā ua faailoa atu e nei upu ia te oe e uiga i manatu ma lagona e tatau i auauna a Ieova ona taumafai e atiina aʻe? E tusa ai ma le manatu o se tasi alii atamai i mataupu faale-Tusi Paia e faapea, ina ua tusi atu e Paulo na upu i Kerisiano i Korinito, sa ia faapea atu ai: “Ua ou lotomalie e faaaogā loʻu malosi, loʻu taimi, loʻu ola, ma mea uma o ia te aʻu mo lo outou lelei, e pei ona faia ma le lotofiafia e se tamā mo lana fanau.” Sa nofosauni Paulo e “faaumatia foʻi,” pe ia “matuā vaivai lava ma matuā leai ni ana mea,” pe afai o le mea lena e manaʻomia ina ia faataunuuina ai lana faiva faa-Kerisiano.

E lē gata i lea, na faia e Paulo nei mea uma “ma le matuā fiafia lava.” E tusa ma le faamatalaga a le Jerusalem Bible, sa “lotomalie atoatoa” o ia e faia faapea. Ae faapefea oe? Po o e lotomalie e faaalu lou taimi, malosi, ou tomai, ma alamanuia e auauna ai ia Ieova le Atua ma mo le lelei o isi, e tusa lava po o le faia faapea e oo ai ina “matuā leai ni au mea ma matuā vaivai” i nisi taimi? Ma po o le a e faia lenei mea ma le “matuā fiafia lava”?

Ua Latou Matuā Mumusu Lava e Auauna

O le toʻatele o tagata ua lē na ona faatalatū e auauna i le Atua ae ua matuā mumusu lava. Ua ia i latou le agaga o le lē lotofaafetai, fia tutoʻatasi ma le manatu faapito, pe oo lava ina fouvale. Na faatosina e Satani ia Atamu ma Eva i se ituaiga o mafaufauga faapena. Na ia fai atu le tala sesē e faapea o le a avea i laʻua “e pei [“o le Atua,” NW] o loo iloa le lelei ma le leaga”—o le a mafai e i laʻua lava ona filifilia le mea e saʻo ma le mea e sesē. (Kenese 3:1-5) O i latou o iai lea lava agaga i aso nei ua manatu faapea e tatau ona latou maua le saʻolotoga atoatoa e faia ai le mea tonu lava lea e latou te faanaunau i ai e aunoa ma se tiutefai agaʻi i le Atua pe aiā mai fua o ia. (Salamo 81:11, 12) Ua latou mananaʻo e faaaogā mea uma ua latou maua e faamalieina ai o latou lava tuʻinanauga totino.—Faataoto 18:1.

Atonu e lē o ia te oe lena ituaiga o manatu matuā faamaualuga. Ae e foliga mai e te matuā talisapaia moni le meaalofa o le ola lea o loo e olioli ai nei, ma le faamoemoega e sili atu ona ofoofogia o le ola e faavavau i se lalolagi parataiso. (Salamo 37:10, 11; Faaaliga 21:1-4) Atonu o le a e matuā lotofaafetai ia Ieova ona o lona agalelei ia te oe. Ae e manaʻomia e i tatou uma ona mataala i lamatiaga e mafai e Satani ona mimilosesē ai o tatou mafaufau i se auala e ono lē talia ai e le Atua la tatou auaunaga. (2 Korinito 11:3) E ono mafai faapefea ona tupu o lenei mea?

E Manaʻomia Ona Auauna ma le Lotomalie

E manaʻo Ieova i le auaunaga e faia ma le lotomalie, ma le lotoatoa. E lē taitai ona ia faamalosia i tatou e faia lona finagalo. O Satani lava o le a ia faia so o se mea ina ia avatu ai omiga pe faatosina mai tagata ina ia fai amioga o loo ia loto i ai. Ua taʻua e le Tusi Paia matafaioi, poloaʻiga, mea manaʻomia, ma isi lava mea e fesootai atu ma le auaunaga i le Atua. (Failauga 12:13; Luka 1:6) Peitaʻi, o lo tatou faanaunauga sili e auauna ai i le  Atua, ona o lo tatou alofa ia te ia.—Esoto 35:21; Teuteronome 11:1.

E tusa lava po o le ā le tele na faaaogāina ai e Paulo o ia lava i le auaunaga a le Atua, sa ia iloa o le a lē aogā nei mea uma ‘pe afai e leai sona alofa.’ (1 Korinito 13:1-3) Pe a taʻua e tusitala o le Tusi Paia Kerisiano e faapea o ni pologa a le Atua, e latou te lē o faasino atu i se tulaga matuā nofo pologa ona o le pulea faamalosi. (Roma 12:11; Kolose 3:24, faatusatusa i le NW.) O le uiga moni, o le gauaʻi atu ma le lotomalie, e faavae i le alofa loloto ma moni mo le Atua ma lona Alo o Iesu Keriso.—Mataio 22:37; 2 Korinito 5:14; 1 Ioane 4:10, 11.

E tatau foʻi ona atagia atu i la tatou auaunaga i le Atua se alofa loloto mo tagata. Na tusi atu Paulo i le faapotopotoga i Tesalonia e faapea: “A ua matou agamalu ina ua matou i ai ia te outou na, faapei o se failele na te tausi lelei i ana lava tama.” (1 Tesalonia 2:7) I le tele o atunuu i aso nei, ua iai i tinā se tiute tauave faaletulafono i le tausia o a latou fanau. Ae e mautinoa lava o le toʻatele o tinā latou te lē o faia lenei mea e tau ina usiusitai ai i le tulafono, a ea? E leai. E latou te faia lenei mea ona e latou te alolofa faapelepele i a latou fanau! Ioe, e faia ma le loto i ai e se tinā failele le tele o faataulaga mo lana fanau. Ona sa ia Paulo lena “maelega i le alofa” mo i latou na ia auauna atu i ai, sa “manao” (“lotomalie” King James Version; “matuā fiafia,” New International Version) o ia e faaaogā lona lava ola e fesoasoani ai ia i latou. (1 Tesalonia 2:8) O le alofa ua uunaʻia ai i tatou e mulimuli i le faaaʻoaʻoga a Paulo.—Mataio 22:39.

E Faapefea le Auaunaga e Fai ma le Faatalatū?

O le mea moni, e lē tatau ona avea le alofa ia i tatou lava ma auala e punitia ai lo tatou alofa i le Atua ma tagata. Auā, o loo iai le lamatiaga moni lava atonu o le a tatou faia ai na o se auaunaga faaʻafaʻafa ma le faatalatū. E ono oo lava ina tatou faatupuina ni lagona lē fiafia, lagona ita ona o le lē mafai ona tatou ola i se olaga saʻoloto e tusa ai ma o tatou lava tuʻinanauga. O le mea lenei na tupu i nisi o tagata Isaraelu o ē na leiloa lo latou alofa mo le Atua ae o loo faia pea sina auaunaga ia te ia ona o le lagona e faapea o se tiute tauave. O le ā na iʻu i ai? Na oo ai ina avea le auauna atu i le Atua “o le mea tiga naua” ia i latou.—Malaki 1:13.

E so o se taulaga lava e ofoina atu i le Atua e tatau ona “mamā,” ia lē ponā, o le “faapolopolo” o mea ua maua. (Levitiko 22:17-20; Esoto 23:19) Ae peitaʻi, na i lo o le avatua ia Ieova o a latou manu aupito sili ona lelei, na ofo atu ai e tagata i aso o Malaki manu sa latou leʻi mananaʻo ai. O le ā le tali a Ieova? Na ia taʻu atu i faitaulaga: “A o outou aumaia le manu tauaso e fai ma taulaga, [ua outou fai ane]: ‘E lē se mea leaga.’ A o outou aumaia le manu pipili ma le manu e maʻi; E lē leaga lea.’ Faamolemole, seʻi avatu ia i le alii e pule ia te oe. Pe fiafia mai ea o ia ia te oe? pe talia ma le agalelei mai oe e ia? . . . Ua outou aumaia foʻi le mea ua fāoa, ma le mea pipili, ma le mea e maʻi; ioe, ua outou aumai ai ma meaalofa. Pe mafai ona ou talia ea lea mea mai o outou lima?”—Malaki 1:8, 13, NW.

E mafai faapefea ona tupu o lenei mea i se tasi o i tatou? E ono avea a tatou taulaga ma “mea e tiga naua” ia i tatou pe afai e tatou te lē maua le lotomalie ma le lotonaunau moni. (Esoto 35:5, 21, 22; Levitiko 1:3; Salamo 54:6; Eperu 13:15, 16) Mo se faaaʻoaʻoga, po o avatu ia Ieova mea ua totoe mai o tatou taimi?

Pe e mafai ona manatu moni se tasi e faapea o le a talia e le Atua pe afai e faamalosia o ia e se tagata o lona aiga e iai le uunaʻiga lelei, po o se sā Levī maelega foʻi se tagata Isaraelu e lē o lotomalie, ina ia filifili atu sana manu aupito sili ona lelei mo le taulaga ae na te leʻi manaʻo moni lava e avatu? (Isaia 29:13; Mataio 15:7, 8) Sa teena e Ieova na taulaga ma mulimuli ane teena ma tagata na latou ofoina atu.—Hosea 4:6; Mataio 21:43.

Fiafia e Fai le Finagalo o le Atua

Ina ia ofoina atu i le Atua o le auaunaga o le a ia talia mai, e tatau ona tatou mulimuli i le faaaʻoaʻoga a Iesu Keriso. Na fetalai o ia: “Ou te le usiusitai i loʻu lava loto, a o le finagalo o le na auina mai aʻu.” (Ioane 5:30, LF) Na matuā sili ona fiafia Iesu e auauna ma le lotomalie i le Atua. Na faataunuuina e Iesu upu faavaloaga a Tavita: “Loʻu Atua e, ou te fiafia e fai lou finagalo.”—Salamo 40:8.

E ui lava sa fiafia Iesu e fai le finagalo o Ieova, ae sa lē faigofie pea lenei mea. Seʻi manatu i le mea  na tupu a o toe itiiti lava puʻeina o ia, faamasinoina, ma faasalaina. A o i ai i le faatoʻaga o Ketesemane, na “matuā tiga” ma “ua puapuagatia” Iesu. Na matuā malosi lava ona faalogona ma a o ia tatalo, “o lona afu foi ua pei o ʻaluʻalu toto ua paū ifo i le eleele.”—Mataio 26:38; Luka 22:44.

Aiseā na oo ai Iesu i na tigā? O le mea moni, e lē o lona manatu ia te ia lava pe na iai i se tulaga e faatalatū e fai le finagalo o le Atua. Sa nofosauni o ia e maliu e oo lava foʻi i le tali malosi atu i upu a Peteru e faapea: “Le Alii e, ia mamao ia te oe lea mea; e le oo lena mea ia te oe.” (Mataio 16:21-23) Sa popole Iesu i le pe faapefea i lona maliu e pei o se tagata solitulafono inosia ona aafia ai Ieova ma Lona suafa paia. Sa silafia e Iesu le matuā tigā tele o le a oo i lona Tamā i le silasila mai i lona Alo pele o faia i se auala matuā leaga lava.

Sa malamalama foʻi Iesu ua tulata atu o ia i le vaitaimi sili ona tāua o le galueaʻiina ma le faataunuuina o fuafuaga a Ieova. O le pipii faamaoni atu i tulafono a le Atua o le a matuā faamaonia ai sa ono mafaia lava e Atamu ona faia lea filifiliga. O le faamaoni o Iesu o le a faaalialia atoatoa ai le sesē o le taʻutinoga a Satani e faapea, e leai se tagata e lotomalie ma manaʻo e auauna faamaoni i le Atua pe afai e tuu i ai ni tofotofoga. E ala ia Iesu, o le a iʻu ai ina tuʻimomomoina e Ieova Satani ma aveesea āuga uma o lana fouvalega.—Kenese 3:15.

Pagā se avega tauave mamafa ua tuu atu ia Iesu! O le suafa o lona Tamā, le filemu i le lalolagi aoao, ma le faaolataga o le aiga faaletagata e faalagolago uma lava i le faamaoni o Iesu. I le silafia o lenei mea, na ia tatalo ai: “Loʻu Tamā e, afai e mafai, ia ave ese lenei ipu ia te au; a e aua le faia loʻu loto, a o lou finagalo.” (Mataio 26:39) E oo lava i omiga matuitui, e leʻi faalotolotolua ai Iesu i lona lotomalie e gauaʻi atu i le finagalo o lona Tamā.

“Ua Manaʻo i ai le Loto, a o le Tino ua Vaivai”

E pei lava ona matuā tigā faalogona ootia o Iesu a o ia auauna ia Ieova, e tatou te faatalitalia foʻi la Satani e uunaʻia malosi mai omiga ia i tatou o auauna a le Atua. (Ioane 15:20; 1 Peteru 5:8) E lē gata i lea, o i tatou e lē lelei atoatoa. O lea e tusa lava pe tatou te auauna ma le lotomalie i le Atua, o le a lē faigofie mo i tatou ona faia faapea. Sa silafia e Iesu le tauivi o ona aposetolo ina ia faia mea uma na ia poloaʻi atu ai ia i latou e fai. O le pogai lena na ia fetalai ai e faapea: “Ua manao i ai le loto, a o le tino ua vaivai.” (Mataio 26:41) Sa leai se lagona vaivai na tuufaasolo mai i lona tino lelei atoatoa faaletagata. Ae peitaʻi, sa ia amanaʻia lagona vaivai i tino o ona soo, le tulaga lē lelei atoatoa na tuufaasolo mai ia i latou e Atamu le tagata lē lelei atoatoa. Sa silafia e Iesu faapea, ona o le tulaga lē lelei atoatoa ua tuufaasolo mai ma tapulaa faaletagata ua iʻu i ai, o le a latou tauivi ai e faia mea uma latou te mananaʻo e faia i le auaunaga a Ieova.

O lea la, atonu e oo ia i tatou le lagona na oo i le aposetolo o Paulo, o lē sa matuā puapuagatia ina ua aafia i le lē lelei atoatoa lona tomai e auauna atoatoa ai i le Atua. Na tusia e Paulo e faapea: “Ua ia te au le loto atu, a ou te lei iloa ona fai o le mea lelei.” (Roma 7:18) Ua tatou iloa foʻi e lē mafai ona tatou faia ma le atoatoa mea lelei uma tatou te mananaʻo e fai. (Roma 7:19) E le faapea ona o so tatou faatalatū. Ae ona o vaivaiga lava o le tino ua faalavelavea ai e oo lava i a tatou taumafaiga aupito sili ona lelei.

Seʻi aua neʻi o tatou lotovaivai. Afai e tatou te nofosauni ma o tatou loto e faia mea uma tatou te mafaia, o le mea moni o le a talia e le Atua la tatou auaunaga. (2 Korinito 8:12) Seʻi o tatou “faia le mea aupito sili” e faaaʻoaʻo ai i le agaga o Keriso e gauaʻi atoatoa i le finagalo o le Atua. (2 Timoteo 2:15, NW; Filipi 2:5-7; 1 Peteru 4:1, 2) O le a tauia ma lagolagoina e Ieova lea agaga lotomalie. O le a ia tuuina mai ia i tatou “le matuā tele o le mana” e faafetaiaʻia ai o tatou vaivaiga. (2 Korinito 4:7-10) I le fesoasoani a Ieova, ua pei ai i tatou o Paulo, o le a ‘matuā fiafia lava e faauma ana mea, ia faaumatia foi ia’ i Lana auaunaga tāua.

[Faamatalaga i le itulau 21]

Sa auauna ma le lotomalie Paulo i le Atua i le mea aupito sili ona lelei na mafaia e lona tomai

[Faamatalaga i le itulau 23]

E oo lava i lalo o omiga matuitui, na faia lava e Iesu le finagalo o lona Tamā