Pe Iai ea se Aogā o le Tatalo?

I NISI taimi, e toetoe lava o tagata taʻitoʻatasi latou te lagona se manaʻoga e tatalo ai. O le mea moni, e toetoe lava o tagata mai faatuatuaga uma faalelotu latou te matuā pulunaunau e tatalo. Mo se faataʻitaʻiga, e faitau afe taimi o le aso, e ono tautū ai pea se tagata lotu Puta i le tatalo lava lenei “Ou te faatuatua ia Amida Buddha.”

Pe a fua atu i faafitauli o loo tulaʻi mai pea i le lalolagi aoao, ua talafeagai ai ona tatou fesili ifo: O le ā se mea o faatalitalia e tagata latou te mauaina e ala i le tatalo? Po o iai ea se aogā o nei tatalo?

Aiseā e Tatalo ai Tagata?

E tatalo atu le toʻatele o tagata mai i Sasaʻe i o latou augatamā ma i atua o Sinitō po o Tao. Latou te faia faapea i ni faamoemoega ina ia pasi a latou suʻega i le aʻoga, ia selesele mai ni fua lelei o faatoʻaga, pe ina ia puipuia mai faamaʻi. E faamoemoe tagata lotu Puta faapea, atonu e avea a latou taumafaiga ma itu e maua ai le manuia e saʻoloto ai mai puapuaga uma. E matuā pulunaunau ona tatalo atu tagata Hinitū i o latou atua tane ma atua fafine e fiafia i ai, mo le mauaina mai o le poto, le tamaoaiga, ma le puipuiga.

E faamoemoe nisi tagata Katoliko mo se manuia o tagata e ala i le tuutoina o o latou ola e avea o ni monike po o taupousa i nofoaga faasāsā e pei o monaseri po o fale o taupousa, e tatalo ai iinā e lē aunoa. E faitau miliona tagata Katoliko e saʻili atu i ni manuia mai ia Maria e ala i le aʻo faatauloto o tatalo, atonu e faaaogā ai lopa o rosalio. I atunuu i Sasaʻe, e toʻatele tagata latou te faaaogāina uili o loo faamauina ai tatalo. E fai foʻi e tagata  Porotesano upu o le Tatalo a le Alii, e ui atonu e mafai ona latou faaleo atu foʻi o latou lava lagona i le Atua. E toʻatele tagata Siū e faimalaga mamao atu ina ia tatalo ai i le Pā i Sisifo (Western Wall) i Ierusalema, i lo latou faamoemoe e toe fausia lena malumalu ma ia toe iai se isi olaga fou o le sologa lelei faaletino ma le filemu.

E ui e faitau miliona tagata o loo finafinau e tatalo, ae o loo faateleina pea ona pagatia le sosaiete faaletagata i faafitauli o le mativa, le pulea e vailaau faasāina, o aiga malepelepe, o soligatulafono, ma taua. Faamata e lē o le pogai ona e lē o saʻo le auala o tatalo atu ai nei tagata uma? Ona o lena la tulaga, pe o iai ea se tasi o faafofoga moni mai i tatalo?

Pe o Iai ea se Tasi o Faafofoga Mai i Tatalo?

E leai lava se aogā moni o tatalo pe afai e lē o faafofogaina mai. Pe a tatalo se tagata, e manino mai lona talitonu o loo iai se tasi i le nofoaga agaga lē vaaia o loo lagonaina mai ana tatalo. Peitaʻi, e lē o ui atu tatalo i ni alaleo. E toʻatele tagata ua talitonu faapea o loo iai se tasi e mafai ona malamalama i mafaufauga o le tagata lea o loo tatalo. Atonu la o ai ia lena?

O loo matuā avea pea o se mea e lē malamalama i ai tagata suʻesuʻe pe faapefea ona puna aʻe mafaufauga i le faitau piliona o neroni ia e faia aʻe ai le vaega e pito i luga o lo tatou faiʻai (cerebral cortex). Ae ua o se mea e talafeagai ona e mafai e Lē na Fuafuaina le faiʻai ona malamalama i na mafaufauga. O ia lena, ua leai lava se isi na i lo Lē na Foafoaina i tatou, o Ieova le Atua. (Salamo 83:18; Faaaliga 4:11) E ao ona taulaʻi atu tatalo ia te ia. Ae pe uaʻi mai ea Ieova i na tatalo uma?

Pe Faafofogaina Tatalo Uma?

O le tupu o Isaraelu anamua, o Tavita, o se tagata sa mafuta tele i le tatalo. I le avea o ia o se faisalamo na faagaeeina e le Atua, na ia pese ai e faapea: “Le faafofoga tatalo e, e o atu ia te oe tagata uma lava.” (Salamo 65:2) E mafai ona malamalama Ieova i tatalo o loo fai atu i so o se gagana mai le faitau fia afe o gagana o loo tautatala ai tagata. O le mea moni faapea, e leai se mafaufau faaletagata e mafai ona ia manatuaina uma faamatalaga, e lē faapea ai o le a lē mafaia e le Atua ona uaʻi mai ia i latou uma o loo tatalo atu ia te ia i se auala na te taliaina mai.

Peitaʻi, o Iesu Keriso—o se tagata foʻi sa mafuta i le tatalo—na ia faaalia mai faapea e lē o tatalo uma e fiafia i ai le Atua. Seʻi mātau le mea na fetalai i ai Iesu e faatatau i faiga sa taatele i lena vaitaimi o le tautū i tatalo na aʻo faatauloto. E tusa ai o se faamatalaga a le Jerusalem Bible a le Katoliko, na ia fetalai e faapea: “A outou tatalo, aua neʻi faifai soo upu masani e pei ona faia e tagata faapaupau, auā fa te i latou o le tele o upu e faaaogā o le a lagonaina mai ai i latou.” (Mataio 6:7) E lē mafai ona tatou faatalitalia le faafofoga mai o Ieova i ni tatalo e lē o faaalia atu ai o tatou lagona moni.

I le faaali mai o le māfuaaga e lē fiafia ai le Atua i nisi tatalo, ua faapea mai se faataoto o le Tusi Paia: “O le ua liliu ese ona taliga a e le faalogologo i le tulafono, e inosia lana lava tatalo.” (Faataoto 28:9) Ua faapea mai le isi faataoto: “E mamao Ieova i e amio leaga; a e faafofoga mai o ia i le tatalo a e amiotonu.” (Faataoto 15:29) I le taimi na agasala mamafa ai taʻitaʻi o Iuta anamua, na folafola ai e Ieova e faapea: “A outou faaloaloa mai o outou lima, e ʻalo ese oʻu mata ia te outou; e ui lava ina outou faateleina tatalo, ou te le faalogo ai lava; ua tutumu o outou lima i le toto.”—Isaia 1:1, 15.

Na taʻua e le aposetolo o Peteru se isi mea e mafai ona lē taliaina ai e le Atua tatalo. Na tusi mai Peteru e faapea: “Ia faapea outou tane, ia nonofo faatasi ma [a outou avā] ma le poto, ia ava i le avā, auā o le ipu ia ua sili ona vaivai ia te oe, mona ua tofia faatasi i le ola e foaifuaina mai, neʻi faalavelaveina a outou tatalo.” (1 Peteru 3:7, LT) O tatalo a se tane e na te lē amanaʻia lena fautuaga e ono gata mai lava i le fāʻalo o lona fale!

E manino lava, e iai mea e manaʻomia e tatau ona ausia pe afai tatou te mananaʻo ia faafofogaina a tatou tatalo. Ae peitaʻi, o le toʻatele o i latou o loo tatalo e itiiti lava so latou manatu mamafa i le faia o mea o loo faafinagaloina e le Atua mai ia i tatou. O le pogai lea e ui ina matuā naunautaʻi le avatuina o tatalo, ae lē o faaleleia ai lava le lalolagi.

O le ā la e manaʻomia mai e le Atua ina ia faafofogaina ai a tatou tatalo? E maua le tali i le māfuaaga tonu lava tatou te tatalo ai. O le mea moni, afai tatou te mananaʻo e iloa pe iai se aogā o tatalo, e tatau la ona tatou malamalama i fuafuaga o nei tatalo. Aiseā ua saunia ai e Ieova se auala ina ia mafai ona tatou talanoa atu ia te ia?

[Faamatalaga i Ata i le itulau 3]

G.P.O., Ierusalema