O i Tatou o Ni Ē Faatuatua

Talaʻiina o le Malo i le Altiplano i Peru

O LE vā o le itu i sasaʻe ma sisifo o atumauga o le Andes—i le mea e fesootaʻi ai Polivia ma Peru—e iai le Altiplano. O le uiga o lona igoa “o le fanua laugatasi maualuga,” po o le “mauga mafolafola.” O le taatia a lenei mauga e mātele atu i Polivia.

O le Altiplano e 60 maila [100 kilomita] le lautele ma e sili atu i le 600 maila [1,000 kilomita] le umi, ma o lona maualuga pe tusa ma le 12,000 futu [3,700 mita] i luga aʻe o le fogatai. Pe a e malaga ese atu i se vaalele e lele mai Lima le laumua e tū i le talafatai o Peru, e te ui atu ai i luga aʻe o le mauga mū o El Misti e ufitia atoa e le kiona e oo atu lona tumutumu i se maualuga e tusa ma le 19,101 futu [5,822 mita]. I ona tua atu e faamalumalu ifo ai mauga maotua o Nevado Ampato ma Nevado Coropuna, e sili atu ma le 20,000 futu [6,000 mita] lona maualuga lea e ufitia atoa i le kiona. E faafuaseʻi lava ona iloa atu ai se mauga mafolafola matuā telē— o le Altiplano lea i le itu i saute o Peru.

O le laumua o le Altiplano i Peru, o Puno, e tū i le itu i mātū i sisifo o le vaituloto o Titicaca, o le vaituloto aupito sili ona maualuga i le lalolagi mo femalagaaʻiga. Talu ai o lea vaega e sili atu i le lua maila [3 kilomita] le maualuga, e umi ai lava se taimi o tau faamasani tagata maimoa atu ona o le lē lava o le okesene e mānavaina iinā. E nonofo latalata ane i le vaituloto o Titicaca ia ituaiga o tagata e taʻua o Quechua ma le Aymara Indian. E oofu i ofu felanulanuaʻi lanumeamata, lanumūmū, po o le lanumoana, ma e mafai ona vaaia i latou o galulue i a latou faatoʻaga laiti po o chacras. E ui lava o le gagana autū i Peru o le faa-Sepania, ae e tautatala foʻi tagata o le Altiplano i le gagana Quechua ma le Aymara.

Taʻimuaina o le Galuega Talaʻi

E toʻatele tagata galulue mamafa ma lotomaulalo e tautatala i le gagana Quechua ma le Aymara e leʻi leva tele atu ona aʻoaʻoina le poto saʻo o upu moni o le Tusi Paia. Ua māfua lenei mea ona o le ʻoa o faamanuiaga a Ieova i taumafaiga maelega a ē faalauiloa faataimi atoa le Malo, o loo auauna e avea o ni paeonia faapito.

Mo se faataʻitaʻiga, o paeonia faapito o Iose ma Silivia na tofia e galulue i le aai o Putina, e tusa ma le 30 maila [50 kilomita] le mamao mai le vaituloto o Titicaca. E leʻi atoa se lua masina ae faia e Silivia ni suʻesuʻega faale-Tusi Paia e 16, a o Iose e 14. I le na o le ono masina talu ona amata, ae iai loa se faatelega o tagata talaʻi o le faapotopotoga mai le 23 i le 41. I le taimi lava e tasi, ua oso aʻe ai le aofaʻi o i latou e auai i sauniga mai le 48 i se tumutumuga e 132.

Fai mai Iose: “Pe a amataina sauniga a le faapotopotoga i nei nuu tū mamao ese, ua matou iloa le aogā o le amataina i le Sauniga i le Lautele ma le Suʻesuʻega Tautusi a le Faapotopotoga. O lenei auala ua faafaigofie ai i tagata fou fiafia ona amata auai atu i sauniga.”

O se ʻauuso teine e toʻalua—o le tasi o se paeonia—na muaʻi avatua le tala lelei i le nuu tū mamao ese o Muñani, e tusa ma le 13 maila [20 kilomita] mai Putina. Na la amataina ai se suʻesuʻega faale-Tusi Paia ma se tamāloa tauaso iinā e igoa ia Lucio. * Sa valaaulia e le tamāloa tauaso lona uso o Mikaele, o se tagata e galue faamisionare i le Katoliko ma o se taʻitaʻi o le nuu i se vaipanoa e latalata ane. Pe a fesili atu se uō ia Mikaele i le pogai na ia alu soo ai i Muñani i vaiaso uma, na tali atu o ia, ina ia aʻoaʻoina e uiga ia Ieova le Atua ma lana Afioga. Ona mapuna aʻe ai lea o se fesili: “Aiseā tatou te lē suʻesuʻeina ai le Tusi Paia iinei?” Ona o le fiafia na faaalia e tagata o le nuu o Mikaele, sa leʻi pine ae fuafuaina loa e Molimau e faia ai sauniga iinā.

Na amata loa ona tufa atu e Mikaele i isi mea na ia aʻoaʻoina. Ae faapefea lona tulaga o sē e galue faamisionare i le lotu Katoliko ma o se sui kovana i le nuu? I se fonotaga na faia i se fale tele o le nuu, na ia faasilasila atu ai lona faamavae mai le avea o se misionare Katoliko. Po o le a toe tofia la se tasi? Na faapea atu se tasi mai le aofia: “Aiseā tatou te toe manaʻomia ai se isi misionare ae o lea ua tatou aʻoaʻoina le upu moni?” O le mea moni, e faasino atu lenei faamatalaga i mea o loo  aʻoaʻoina ai e Molimau a Ieova. Na faaopoopo atu se tasi tagata: “E matou te lē malilie i lou faamavae na o oe. Aiseā tatou te lē faamavae uma ai?” Sa alalaga uma atu ma le autasi i latou na auai: “Ua tatou faamavae uma lava!”

E leʻi pine lava mulimuli ane i se fono a le nuu, ae talanoaina ai loa se mataupu e faatatau i faatusa ma koluse. Na talosaga atu se tasi tamāloa ina ia faitau e tagata uma le Teuteronome 7:25, lea o loo faapea mai: “O tupua ua ta o latou atua ia e susunu i le afi; aua e te manao i le ario ma le auro o i ai, aua foi e te ave mā oe, neʻi maileia ai oe; auā o le mea e inosia lea e Ieova lou Atua.”

Ona fai atu lea o le tamāloa lea e sii i luga lima o i latou uma e mananaʻo e susunu uma ia faatusa. Na tau fai sii uma aʻe loa i luga lima o tagata nei. (Galuega 19:19, 20) I le taimi nei, e toʻa 23 mai le toʻa 25 aiga o le nuu o loo suʻesuʻeina le Afioga a le Atua. E toʻalua o loo auauna o ni tagata talaʻi e leʻi papatisoina, ma le toʻalima o ulugalii ua fuafua ina ia lesitalaina faaletulafono a latou faaipoipoga ina ia maua ai se tulaga mamā i luma o Ieova.—Tito 3:1; Eperu 13:4.

Aʻoaʻo Atu e Faaaogā ai Kaseti ua Uma Ona Puʻeina

Talu ai o le toʻatele o i latou i le Altiplano e lē iloa faitau ma tusitusi, ua avea ai ma fesoasoani sili ia vitiō ma kaseti a le Olo Matamata ua uma ona puʻeina i gagana a le atunuu lava ia—e oo lava i le faia ai o suʻesuʻega faale-Tusi Paia i aiga. I le fesoasoani a se kaseti ua uma ona puʻeina, ua faia ai e se paeonia faapito e igoa ia Dora ni suʻesuʻega i le polosiua O le ā e Manaomia e le Atua Mai ia i Tatou? Pe a uma ona tāina se palakalafa e tasi, ona ia faia lea o le fesili i le tagata suʻesuʻe o le Tusi Paia e uiga i le vaega lea na ia faalogologo i ai.

E masani pea ona faasalalau mai e se faleuaealesi faasalalau i le nuu ia faasologa o mataupu o le polosiua o le Manaomia i le gagana Quechua. E faia foʻi faapena e lea lava faleuaealesi faasalalau i ni vaega o le mekasini o le Ala Mai! i le gagana Sepania. I lea faiga, ua toʻatele ai tagata e masani ma le feʻau o le Malo ma mananaʻo ai e fia iloa atili pe a asiasi atu Molimau a Ieova i o latou aiga.

E lē iloa e le toʻatele o tagata o le lalolagi le Altiplano ae lē faapena i le silafaga a le Atua. Ona o le alofa o Ieova mo le fanau a tagata, ua mafai ai e le toʻatele o loo nonofo i mauga maualuluga o le Andean Altiplano ona avea ma vaega o le anoanoaʻi o tagata o loo faamamaluina lona maota malualii o le tapuaʻiga moni.—Hakai 2:7.

[Faamatalaga pito i lalo]