Le Tusi Paia—Se Tusi Taʻiala mo le Olaga

“O LOO ola le afioga a le Atua, o loo matuā galue foi, o loo sili foi lona maai i pelu uma e faatau maai itu . . . o loo faamasino foi i manatu ma filifiliga o le loto.” (Eperu 4:12) O lenei faamatalaina o mea e mafai ona faataulau e le Afioga a le Atua e matuā faamaʻoti mai ai lava o le Tusi Paia ua sili atu na i lo na o se tusi lelei.

Na taʻua faapuupuu mai lava e se tusitala o mataupu faalotu e faapea: “E matuā tāua le feʻau a le Tusi Paia i o tatou olaga e pei ona tāua o la tatou mānava.” Ona ia toe faaopoopo mai lea: “Pe a e manatu i le tulaga o moomooga ma manaʻoga mo ni vaifofō i aso nei ma e faitauina le Tusi Paia a o taulaʻi atu i lena mataupu, e ofoofogia iʻuga e sosoo mai ai.” I le pei o se lamepa e mumū saesae, ua faapena ona faasusulu mai e le Tusi Paia le malamalama i le tele o fesili lavelave ma faafitauli o le olaga i ona po nei.—Salamo 119:105.

Ioe, o le poto ua faamatalaina i le Tusi Paia e iai lona mana e suia ai o tatou mafaufauga, e fesoasoani ia i tatou e foʻia ai faafitauli, e faaleleia atili ai le tulaga o o tatou olaga, ma faaauupegaina ai i tatou i tomai ina ia manumalo mai na tulaga e lē mafai ona tatou suia. O le itu e sili ona tāua, o le Tusi Paia ua mafai ai ona tatou iloa le Atua ma alolofa ia te ia.

Se Tusi ua Aumaia ai se Fuafuaga

O le Tusitala o le Tusi Paia, o Ieova le Atua, ua ‘masani lava i o tatou ala uma.’ E sili atu ona ia silafia lelei o tatou manaʻoga faaletino, tau i faalogona, ma manaʻoga faaleagaga na i lo le iloa e i tatou lava. (Salamo 139:1-3) I lona magafagafa, ua ia folasia ai tapulaa manino mo amioga a tagata. (Mika 6:8) E talafeagai le taumafai ina ia malamalama i na tapulaa ma taʻiala ma faamasani ina ia ola aʻe ai. Amuia le tagata e “naunau o ia i le tulafono a Ieova,” o le faamatalaga lea a le faisalamo. “E manuia foi mea uma na te faia.” (Salamo 1:1-3) O se faamoemoega faapena e mautinoa lava le aogā ona tatou iloiloina.

Sa masani ona talitonu Malesi, o se faiaʻoga ua faamālōlō litaea e faapea, o loo iai i le Tusi Paia ni mea aogā i le talafaasolopito ma tusitusiga. Peitaʻi, sa iai ona masalosaloga pe moni na faagaeeina e le Atua. Ina ua uma ona ia faalogologo atu i se faamalamalamaga o le pogai na tuuina mai ai e le Atua lana Afioga tusitusia i tagata, ona iloiloina ai lea e Malesi valoaga eseese a le Tusi Paia. A o avea o ia ma tauleʻaleʻa talavou, sa ia suʻesuʻeina le talafaasolopito o aso anamua, o mataupu i tusitusiga, le faasaienisi, ma mataupu i le laueleele ma tagata. Ua ia taʻutino  mai sa poto o ia i ona lava mafaufauga ma lē mafai ai ona ia amanaʻia le anoanoaʻi o faaaʻoaʻoga e lagolagoina ai le moni aʻiaʻi o le Tusi Paia. “Sa faasesēina aʻu i le saʻili atu i se olaga faigofie, le tamaoaiga, ma fiafiaga o le olaga. Ae pagā lea, na avea lena ma itu sa ou valea ai lava ma pogisa laʻu vaai i le matagofie ma le moni o le tusi silisili i tusi uma na tusia.”

Ua silia nei ma le 70 tausaga o Malesi, ma i le faasino atu o ana faamatalaga i le taimi lea na faaali atu ai Iesu i le aposetolo o Toma, ona ia faapea mai lea i se agaga faafetai: “Ua taʻitaʻiina loʻu lima i le ‘manuʻa o loo tafetotoi’ lea ua ou matuā mautinoa ai nei o le Tusi Paia o le upu moni lava lea.” (Ioane 20:24-29) E pei ona taʻu mai ma le saʻo e le aposetolo o Paulo, ua faaalialia mai e le Tusi Paia faanaunauga o le loto, ma aumaia ai le uigā i le olaga. O se tusi taʻiala moni lava mo le olaga.

Ua Faamautūina Mai se Olaga Leaga na Iai

Ua aumaia foʻi e le Tusi Paia fautuaga e fesoasoani i tagata ina ia latou lafoaʻia ai masaniga leaga sa iai. Na mafai e Tanielu ona foʻia se masaniga lē mamā na ia faia o le ulaula, faapea foʻi lona taofia o le auai atu i patī malomaloā ma le faaaogāsesēina o le ʻava malosi. (Roma 13:13; 2 Korinito 7:1; Kalatia 5:19-21) O le mea moni lava, ina ia liaʻi ese na masaniga ae ofuina “le tagata fou” e manaʻomia ai ni taumafaiga maumauaʻi. (Efeso 4:22-24) Ua faapea mai Tanielu: “Sa avea o se luʻi, auā tatou te matuā lē lelei atoatoa lava.” Ae ui i lea, na taulau manuia o ia. I le taimi nei, ua faitauina e Tanielu le Afioga a le Atua i aso taʻitasi, ma avea ma itu e matuā vavalalata atu ai o ia ia Ieova.

A o tuputupu aʻe o ia, sa masani lava ona faaaloalo loloto Tanielu i le Tusi Paia—e ui e leʻi faitau muamua lava i ai—ma sa ia tatalo atu i le Atua i pō uma lava. Peitaʻi, e iai se mea na misi. Sa leʻi ia te ia le fiafia. O le tai liliu o lona olaga na oo mai ina ua ia faatoʻā vaai lava i le suafa o le Atua i le Tusi Paia. (Esoto 6:3; Salamo 83:18) Mai lava i lena taimi, sa ia faaaogā ai le suafa o Ieova pe a fai ana tatalo, ma na oo ai ina matuā pei lava o la e talanoa totino atu i le Atua i ana tatalo. “Na oo ina avea Ieova o le peresona e sili ona vavalalata mai ia te aʻu, ma o loo avea pea o ia ma aʻu uō e sili ona ma vavalalata.”

A o ia leʻi aʻoaʻoina le Tusi Paia, sa nenefu lava le vaai a Tanielu i le lumanaʻi. Fai mai a ia: “E lē tau manaʻomia se atamai maoaʻe e iloa ai po o ā mea o loo tutupu i le lalolagi. Sa ou fefe, ona ou taumafai lea e faapisi loʻu olaga ina ia aveese atu ai mai loʻu mafaufau ia mea.” Ona ia aʻoaʻoina lea faapea o le a faatulaga e le Atua se faamasinoga tonu mo tagata uma i luga o se lalolagi ua faamamāina, o iinā e mafai ai e tagata usiusitai ona olioli i le filemu ma le fiafiaga e faavavau. (Salamo 37:10, 11; Tanielu 2:44; Faaaliga 21:3, 4) Ua iai nei se faamoemoe mautinoa o Tanielu. O lenei taaʻiga mautū a le Tusi Paia ua mafai ai ona ia tausisia pea se vaaiga mautinoa i le olaga.

Fesoasoani i le Foʻiaina o Faafitauli Tau Faalogona

E fitu tausaga o Siaosi ae maliu loa lona tinā. Sa fefe o ia e moe i le pō, i lona lē iloa pe teʻi ua moe lava ma moe atu ai. Ae teʻi ua ia faitau i le fetalaiga a Iesu e faatatau i le maliu ma le toetū: “E oo mai le aso e faalogo ai i [le leo o Iesu] o i latou uma ua i tuugamau, ma latou o mai ai.” Na tuia foʻi lona loto i fetalaiga a Iesu: “O aʻu nei o le toe tu ma le ola; o lē faatuatua mai ia te au, e ui lava ina oti, a e ola lava ia.” (Ioane 5:28, 29; 11:25) O na mafaufauga sa foliga mai e talafeagai, e aogā, ma faamāfanafanaloto. Ua faapea mai Siaosi: “O lenei upu moni, e lē gata ina logolelei i le mafaufau ae pāʻia ai foʻi le loto.”

Sa iai foʻi mea na fefe ai Tanielu, lea na taʻua i le amataga. Sa lē mafai e lona tinā ona tausi toʻatasi aʻe o ia, o lea e tele ni aiga e tausi ai tamaiti e ni mātuafai na avatu o ia ma tuu ai. Sa masani ona ia te ia lagona e peiseai se tagata ese ma sa moomoo mo se lagona saogalemu e maua i le mafuta atu i se aiga e alolofa ia te ia. Mulimuli ane, na ia maua le mea sa ia momoo i ai e ala i lona suʻesuʻeina o le Tusi Paia. Na iʻu ina aufaatasi atu Tanielu i le faapotopotoga  Kerisiano o Molimau a Ieova ma avea o ia ma vaega o se aiga faaleagaga, lea sa ia tofo ai i faalogona o le talia ma le alofagia e isi. O le mea moni, e aogā le Tusi Paia i se auala lelei ma le faamalieina ai o faalogona ootia.

Manatua, e silafia mai e Ieova mea o loo i o tatou loto ma na te silafia mea o loo tatou saʻilia. O le Atua “na te fuatia loto,” ma na te foaʻi mai “i tagata taitasi e tusa ma ona ala.”—Faataoto 21:2; Ieremia 17:10.

Fautuaga Aogā i Olaga Faaleaiga

O loo aumaia e le Tusi Paia fautuaga aogā e tusa ai o mataupu tau i faiā faaletagata. Ua faapea mai Siaosi: “O feeseeseaʻiga i vā o tagata po o le lē femalamalamaaʻi, o nisi na o tulaga sili ona tugā i le olaga.” Na faapefea ona ia faafetaiaʻia na tulaga? “Pe a ou iloa e iai se mea e lē o fiafia ai se tasi ia te aʻu, ou te faatatauina le fautuaga tuusaʻo mai le Mataio 5:23, 24: ‘Ia muai faalelei i lou uso.’ O se mea faigofie lava le mafai ona ou talanoa atu e faatatau i le feeseeseaʻiga ma ua maua mai ai ni iʻuga lelei. E mafai ona ou lagonaina le filemu ma le Atua lea e taʻua e le Tusi Paia. E taulau lelei. E matuā aogā lava.”—Filipi 4:6, 7.

Pe a iai se feeseeseaʻiga i le vā o le tane ma le avā, e manaʻomia e i laʻua uma ona “faataalise ona faalogologo, ia faagesegese ona tautala atu, ia faagesegese ona ita.” (Iakopo 1:19) O fautuaga faapena e faaleleia atili ai fesootaʻiga. Ua faapea mai atili Siaosi: “Pe a ou faatatauina le fautuaga ina ia ou alofa ma tausi lelei laʻu avā e pei ona ou faia ia te aʻu lava, e vave lava ona ou vaaia iʻuga lelei. E faigofie ai foʻi ona ia faaaloalo mai ia te aʻu.” (Efeso 5:28-33) Ioe, ua aʻoaʻoina i tatou e le Tusi Paia i le auala e amanaʻia ma taulimaina ai o tatou lava lē lelei atoatoa ma le auala tatou te taulau manuia ai i le foʻiaina o lē lelei atoatoa o isi.

Fautuaga e Tumau Ona Aogā

Na faapea mai le tupu poto o Solomona: “Ia e faatuatua ia Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” (Faataoto 3:5, 6) Maʻeu le faigofie ae moni o na upu!

O le Tusi Paia o se uunaʻiga mo mea lelei. E mafai ai e ē alolofa i le Atua ona faaōgatusa o latou olaga ma lona finagalo ma maua ai le fiafia i le “savavali i le tulafono a Ieova.” (Salamo 119:1) E tusa lava po o ā o tatou tulaga, ae ua iai i le Tusi Paia taʻiala ma fautuaga tatou te manaʻomia. (Isaia 48:17, 18) Ia faitau i ai i aso taʻitasi, mafaufau loloto i mea o loo e faitauina, ma ia faatatauina. O le a tumau ai ona manino i lou mafaufau ma taulaʻi atu ai i mea e mamā ma matagofie. (Filipi 4:8, 9) O le a e aʻoaʻoina ai e lē gata o le auala e ola ma olioli ai i le olaga, ae o le auala foʻi e alofa atu ai i Lē na Foafoaina le ola.

O le mulimuli atu i lena ala, o le a avea ai le Tusi Paia ia te oe—e pei ona iai i le faitau miliona o isi—e sili atu na i lo na o se tusi lelei. O le a faamaonia moni lava le avea o se tusi taʻiala mo le olaga!

[Faamatalaga i le itulau 6]

E mafai e le Tusi Paia ona faamalosia lau filifiliga ina ia foʻia ni masaniga leaga

[Faamatalaga i le itulau 7]

Ua aʻoaʻoina oe e le Tusi Paia i le auala e te vavalalata atu ai i le Atua