Ua Saunia e Ieova mo Ona Tagata se Nofoaga e Mālōlō Ai
Lipoti a Ē Faalauiloa le Malo
Ua Saunia e Ieova mo Ona Tagata se Nofoaga e Mālōlō Ai
O SE nofoaga paolo e mālōlō ai i se ala i luga o se mauga, ua avea o se vaaiga e sili ona faafiafiaina ai se tagata faimalaga ua vaivai. I Nepale, o na nofoaga e mālōlō ai, ua taʻua o chautara. O se chautara masani, atonu e tū e sosoo ma se laau o le āoa tauluuluola, o se nofoaga paolo e nofonofo ai ma mālōlō ai. O le saunia o se chautara ua avea o se gaoioiga agalelei, ma e lē o iloa lava le toʻatele o tagata agalelei na saunia na nofoaga.
Ua faaalia i mea tutupu i Nepale le auala ua avea ai Ieova le Atua ma Puna o le olioli ma le faafouina ai faaleagaga mo le toʻatele o “tagata faimalaga” ua vaivai i lenei faiga o mea.—Salamo 23:2.
• O Lil Kumari, e nofo i le aai manaia o Pokhara, e iai se vaaiga matagofie atu i atumauga o le Himalaya e ufitia atoa i le kiona. Ae ona o le popole i le tulaga tau tupe i le aiga, na lagona ai e Lil Kumari le leai o se faamoemoe. Ina ua asiasi atu se tasi o Molimau a Ieova ia te ia, sa faagaeetia o ia ona o le faamoemoe pupula i le Tusi Paia ma na ia talosaga ai loa mo se suʻesuʻega faale-Tusi Paia i le aiga.
E ui sa fiafia Lil Kumari i le suʻesuʻega, ae sa lē faigofie ona faaauau ona o le malosi o teteega mai lona aiga. Ae sa leʻi faavaivai ai o ia. Sa auai e lē aunoa o ia i sauniga faa-Kerisiano ma faatatauina mea na ia aʻoaʻoina, aemaise lava i le mataupu e faatatau i le gauaʻi o le avā. O le iʻuga, na oo ai ina iloa e lana tane ma lona tinā e faapea, o le suʻesuʻega faale-Tusi Paia a Lil Kumari na maua ai e le aiga atoa ni aogā.
O loo suʻesuʻeina nei e lana tane ma le toʻatele o le aiga le Afioga a le Atua. I se fonotaga na faia talu ai nei i Pokhara, na olioli faatasi ai Lil Kumari ma nisi e toʻa 15 o lona aiga i le polokalame. Fai mai a ia: “Ua avea loʻu aiga ma nofoaga e mālōlō ai ona ua autasi uma nei loʻu aiga i le tapuaʻiga moni, ma ua ou maua ai le filemu o le mafaufau.”
• E ui lava o le faailogaina o tagata ona o le tulaga na fananau mai ai e lē o se faiga faaletulafono i Nepale, ae o loo tumau pea ona taaʻina malosi ai auala o olaga o tagata. I lea, e toʻatele o loo fiafia i le mea o loo fai mai ai le Tusi Paia e uiga i le tulaga tutusa ma le lē faailoga tagata. I le iloa “e le faailogaina tagata e le Atua” na matuā suia ai le olaga o Surya Maya ma lona aiga.—Galuega 10:34.
Na puapuagatia lava ia Surya Maya ona o le lē faamasinotonu o le faailogaina o tagata ona o le tulaga na fananau mai ai, faapea le mamafa o tū ma uputuu ua mauaa. Ona o se fafine tuutoina i le lotu mo le tele o tausaga, na talosaga atu ai Surya Maya i ona atua o faatusa mo se fesoasoani. Ae sa leʻi taliina lava ana tatalo. I se tasi aso a o ia tagi atu i ona atua mo se fesoasoani, na faalatalata atu ai ia te ia Babita le tama a lana tama teine e na o le ono tausaga ma fesili atu: “Aiseā ua e tagi atu ai mo se fesoasoani i ni tupua e lē mafai ona faia o se mea?”
Na iloa ai iinā, sa suʻesuʻeina e le tinā o Babita le Tusi Paia ma se tasi o Molimau a Ieova. Sa valaaulia ma le matuā naunau e Babita le tinā o lona tinā i se sauniga faa-Kerisiano. Ina ua auai Surya Maya, sa matuā maofa o ia e vaai i tagata mai tulaga eseese o fesagisagiaʻi i a latou aufaatasiga e aunoa ma le faailoga tagata. Sa ia talosaga loa mo se suʻesuʻega faale-Tusi Paia i le aiga. E ui lava na iʻu ai i le faasiʻugutua o ia e ona tuaoi, sa leʻi lotovaivai ai o ia; e ui sa faalēlelei lana faitau ma le tusitusi, sa leʻi taofia ai o ia mai lona agaʻigaʻi i luma faaleagaga.
Ina ua mavae le valu tausaga, e toʻaono tagata o lona aiga e aofia ai lana tane ma lana fanau e toʻatolu, ua avea ma Molimau a Ieova. Ua avea nei ia Surya Maya ma faifeʻau faataimi atoa, o se paeonia sauatoa, o loo fesoasoani atu ma le fiafia i isi i le faamāmāina o a latou avega mamafa i le nofoaga moni e mālōlō ai e na o Ieova e mafai ona ia saunia.