Fesili Mai le ʻAufaitau

O le ā le tele e manaʻomia ai i se avā Kerisiano faamaoni ona teena se gaoioiga mo se talaga faaipoipoga e tuuina mai e lana paaga?

Ina ua amataina faaipoipoga faaletagata, na fetalai le Atua faapea e ao i le tane ma le avā ona “faatasi” i laʻua. (Kenese 2:18-24) Ua oo ina lē lelei atoatoa tagata, ma ua iʻu ai i faafitauli i le tele o faaipoipoga, ae o le faanaunauga o le Atua ina ia ao ona tumau pea ona faatasi paaga faaipoipo. Na tusi le aposetolo o Paulo e faapea: “Ou te fai atu foi i e ua fai ava ma nofotane, e le o aʻu, a o le Alii, Aua le teʻa ese le ava i lana tane, afai foi e teʻa, ia nofo fua pea ia, pe toe lelei ma lana tane; aua foi le faateʻaeseina e le tane o lana ava.”—1 Korinito 7:10, 11, LF.

Ua faailoa mai e na upu faapea i le vā o tagata lē lelei atoatoa, e filifili ai se paaga i se taimi ina ia alu ese. Mo se faaaʻoaʻoga, na taʻua e Paulo faapea afai e alu ese se tasi o le paaga, e tatau ia i laʻua uma ona “nofo fua pea.” Aiseā? E ui o lea ua alu ese le isi o le paaga, ae o loo faaauau pea ona noanoatia le tasi i le isi i le silafaga a le Atua. Na mafai ona fai mai faapea Paulo auā sa faataatia e Iesu le tapulaa mo faaipoipoga Kerisiano: “Ai se faatea i lana avā, a o lei mulilua [Eleni, por·neiʹa] ia, ma fai avā i se tasi, ua mulilua ia.” (Mataio 19:9) Ioe, pau lava le faavae mo talaga faaipoipoga lea e faamuta ai faale-Tusi Paia se faaipoipoga o le “mulilua,” o lona uiga, o feusuaʻiga lē mamā faaleituaiga. E foliga mai, o le manatu lea na uiga i ai Paulo, i le tulaga e leʻi iai se tasi o le paaga ua amio lē mamā, o lea pe a nofo ese le tane po o le avā, e leʻi muta le faaipoipoga i le silafaga a le Atua.

Ona sosoo ai lea ma le talanoa atu o Paulo i le tulaga e uiga lea i se Kerisiano moni e lē talitonu lana paaga. Seʻi manatu i taʻiala na tuuina mai e Paulo: “Afai e teʻa ese le le talitonu, ia teʻa ese pea ia [“ia faataga e nofo ese o ia,” NW]. E le faapologaina se uso, po o se tuafafine, pe a faapeaina; a ua valaauina i tatou e le Atua i le filemu.” (1 Korinito 7:12-16, LT) O le ā e mafai ona faia e se avā faamaoni pe afai e tuua o ia e lana tane lē talitonu, pe oo lava foʻi i lona tauanauina o ia e faia se talaga faaipoipoga faaletulafono?

Atonu e sili atu ia te ia le tumau pea ona la faatasi. E ono alofa pea i lana tane, o loo ia malamalama i o la manaʻoga tau faalogona ma tau feusuaʻiga, ma ia iloa faapea e manaʻomia e ia ma lana fanau laiti i lena taimi se lagolagosua faaletino. Atonu foʻi e faamoemoe o ia, i se taimi, o le a avea ai lana tane ma sē talitonu ma faasaoina ai. E ui i lea, afai na te faia ni laasaga e faamutaina ai le faaipoipoga (e tusa ai o ni māfuaaga e lē faale-Tusi Paia), e mafai e le avā ona “faataga e nofo ese o ia” e pei ona tusi ai Paulo. E faapena foʻi le tulaga e oo i ai pe afai e lē amanaʻia e se tane talitonu le finagalo o le Atua e tusa ai o le faaipoipoga ma maumauaʻi pea e teteʻa.

O lea, pe a oo i se tulaga faapena, atonu e manaʻomia ai e le avā ona puipuia faaletulafono o ia ma lana fanau. E faapefea ona faia faapea? O le a manaʻo o ia ina ia tumau pea ona maua le aiā e tausia ai lana fanau pele ina ia mafai ai ona ia faaauau pea ona faaali atu i ai le alofa faatinā, tuuina atu ia i latou toleniga tau amio, ma totōina ia i latou le faatuatua e faavae aʻe i aʻoaʻoga lelei o le Tusi Paia. (2 Timoteo 3:15) O le talaga faaipoipoga e ono tuu ai i se tulaga faalētonu ia ana aiā. O lea, na te ono uia ai laasaga ina ia mafai ai ona tauaaoina atu ma le faaeteete e se isi le mataupu i luma o pule faalemalo ina ia mafai ona puipuia ana aiā e alu atu ai e vaai lana fanau ma ia faamautinoa ua avea o se tiute fai o lana tane le lagolagoina o le aiga lea na ia lafoaʻia. I nisi vaipanoa, e mafai e le fafine o loo tetee atu i le talaga faaipoipoga ona sainia ni pepa faaletulafono o loo faataatia mai ai ni tuutuuga mo le vaavaaia o le tamaitiiti ma le lagolagosua tau tupe, e aunoa ma le ioe atu i le talaga faaipoipoga o loo taumafai lana tane e saʻilia. Ae i isi nofoaga, o le auala o loo faaupu ai na pepa e faailoa atu ai lona ioe i le talaga faaipoipoga; o lea, afai sa taʻusalaina lana tane i le mulilua, o le sainia la e le avā o nei pepa o le a uiga ai faapea ua ia teena lana tane.

O le toʻatele lava i le vaipanoa ma i le faapotopotoga, latou te lē o iloa auʻiliʻiliga o le mea o loo tupu, mo se faaaʻoaʻoga, pe faamata sa tatalaina le faaipoipoga e tusa ai o faavae faale-Tusi Paia. O lea a o leʻi oo atu i lena tulaga, e lelei mo le avā ona faailoa atu i le ovasia taʻimua ma se isi toeaina i le faapotopotoga (e sili atu le faia o se tusi) ia faamatalaga moni. I lena auala, o le a mafai ai ona maua na faamatalaga moni pe a tulaʻi mai se fesili—i lena taimi pe mulimuli ane ai.

Seʻi o tatou toe foʻi la i le fetalaiga a Iesu: “Ai se faatea i lana avā, a o lei mulilua ia, ma fai avā i se tasi, ua mulilua ia.” Afai ua taʻusalaina se tane i le faia o se feusuaʻiga lē mamā faaleituaiga ae e manaʻo e tumau pea ona nonofo ma lana avā faaipoipo, o le avā la (lē  o loo taʻumamāina i le faataʻitaʻiga a Iesu) e ao ona ia filifili pe e faamagalo atu i le tane ma faaauau pea ona la faia tū faaleulugalii pe teena o ia. Afai e malie o ia e faamagalo ma faaauau pea ona nonofo ma lana tane faaletulafono, e lē faapea ai ua lē mamā tau amio o ia i le faia faapea.—Hosea 1:1-3; 3:1-3.

Pe a tulaʻi mai ua saʻili le tane na amio lē mamā e faia se talaga faaipoipoga, e mafai lava ona lotomalie le avā e faamagalo atu, i le faamoemoe e toe foʻi mai le tane. E tuu lava i le faitalia a le avā e filifili ai, e fua i lona lotofuatiaifo ma lona tulaga o loo iai, pe faamata e ao ona ia tetee atu i gaoioiga a le tane e tatala le faaipoipoga. I nisi o vaipanoa, o se fafine e tetee atu i se talaga faaipoipoga na te ono mafaia ona sainia pepa o loo faia ai se maliega mo le vaavaaia o le fanau ma le lagolagosua tau tupe e aunoa ma se faaalia mai faapea ua ia malie i le talaga faaipoipoga; o lona sainia o na pepa e lē o faaalia mai ai faapea ua ia teena lana tane. Peitaʻi, i isi vaipanoa, o se avā e faapea mai o loo ia tetee atu i se talaga faaipoipoga e ono talosagaina o ia ina ia sainia ni pepa o loo faailoa atu ai o loo malie o ia e tatala le faaipoipoga; o lona sainia o na pepa o le a faailoa maʻoti atu ai lona teena o lana tane ua taʻusalaina.

Ina ia ʻalofia le tulaga o le lē femalamalamaaʻi, e fautuaina i lenei tulaga mo le avā le tuuina atu i toeaina o le faapotopotoga se tusi o loo faamatala ai po o ā laasaga ua faia ma manatu o loo aofia ai. E mafai ona ia tusia ai faapea ua ia faailoa atu i lana tane lona lotomalie e faamagalo o ia ma avea pea o ia ma ana avā. O le uiga o lena mea ua lē ōgatusa le talaga faaipoipoga lea na saʻilia ma ona manaʻoga; na i lo le teena o lana tane, sa tumau pea ona ia nofosauni e faamagalo. Pe a māeʻa ona ia faamanino atu faapea sa ia lotomalie e faamagalo ma tumau pea ona faaipoipo, o lona sainia o pepa lea o loo tau ina faailoa atu ai le auala e faatulaga ai mataupu tau tupe ma/po le vaavaaia o fanau o le a lē faaalia ai faapea sa ia teena lana tane. *

O le faamautūina o lona lotomalie e faamagalo e tusa lava foʻi po ua uma ona tatalaina le faaipoipoga, o le a lē saʻoloto ai o ia po o lana tane foʻi e toe faaipoipo atu i se tasi. Afai o le avā, lea e mamā ma na teena lana faamagaloga na ofoina atu, ae mulimuli ane filifili o ia e teena lana tane ona o ana amioga lē mamā, e saʻoloto la i laʻua uma. Na faaalia mai e Iesu faapea o le paaga o loo taʻumamāina, e ia te ia le aiā e faia ai se faaiʻuga faapena.—Mataio 5:32; 19:9; Luka 16:18.

[Faamatalaga pito i lalo]