Pe E te Manatua?

Pe na e talisapaia le faitauina o lomiga talu ai nei o Le Olomatamata? Ia seʻi vaai la pe mafai ona e taliina fesili o loo mulimuli mai:

• O le ā le faavae e foʻia ai se feeseeseaʻiga ma se tasi?

E ao muamua lava ona tatou iloaina faapea e iai uma lava o tatou manatu sesē ma uiga lē saʻo. Ona o tatou matuā tilofaʻia lea ma le faaeteete pe faamata o i tatou le māfuaaga o le faafitauli na i lo le isi tagata.—8/15, itulau 23.

• O afea le “tausaga e toe fuatai ai mea uma lava,” o loo taʻua i le Galuega 3:21?

O le toe fuataʻiina e tupu i ni vaitaimi eseese se lua. Muamua, o loo iai se toe fuataʻiina i se parataiso faaleagaga o loo faagasolo nei talu mai le 1919. Ma le isi toe fuataʻiina o le a oo mai pe a toe faafoʻisia lo tatou lalolagi e avea ma parataiso faaletino.—9/1, itulau 17, 18.

• E faapefea ona leai se taʻitaʻi o le loi, e pei ona faamauina i le Faataoto 6:6-8, ae o lea na te saunia maia se faaaʻoaʻoga lelei mo i tatou?

I le mea o loo iai se vaega o loi, o loo iai le loi fanau, ma ua pei o ia o se masiofo i le uiga faapea e tautuufua ma o ia o le tinā o lena vaega o loi. E galulue maelega loi, ma e tatau foʻi ona tatou faia faapea, i le taumafai e faaleleia la tatou galuega, e tusa lava pe lē o vaavaaia mai i tatou.—9/15, itulau 26.

• Pe na saʻo valoaga a Ulata, e pei ona taʻua i le 2 Tupu 22:20, faapea o le a maliu “filemu” Iosia, talu ai sa matuā manuʻa tigāina lava o ia i le taua?

Ioe, na ia maliu filemu i le uiga faapea na maliu o ia a o leʻi oo mai le mala i le 609-607 T.L.M. ina ua siʻomia e Papelonia Ierusalema ma faaumatia.—9/15, itulau 30.

• E faapefea ona avea o se faamālō a Solomona lona faamatalaina o se avā e pei “o le aila pele o ia ma le ʻoti vao e matagofie”? (Faataoto 5:18, 19)

O le ʻoti fafine, po o le ʻoti vao, e iai ona uiga toʻafilemu ma amio tausaafia. E ui i lea, e mafai lava ona ola o ia ma fanau ai i vaipanoa e papa ma faigatā ona uia lea e seāseā maua ai ni meaʻai.—10/1, itulau 30, 31.

• O ai Henry Grew ma George Storrs?

Sa soifua nei tamāloloa i le vaitaimi o le 1800 i le 1899 ma o ni tagata aʻoga maelega o le Tusi Paia. Na aʻoaʻoina e Grew faapea o le Tasitolu, faapei o aʻoaʻoga i le solu e lē mafai ona oti ma le afi i seoli e lē faavaea faale-Tusi Paia. Na iloaina e Storrs faapea e iai nisi o le a mauaina le ola e lē gata mai i luga o le lalolagi. O i laʻua uma na muamua atu ia Charles Taze Russell, o lē na amataina le lomiaina o lenei mekasini i le 1879.—10/15, itulau 26-30.

• E faapefea ona vaai Molimau a Ieova i faatulagaga faafomaʻi e toe faaaogā ai le toto o se tasi mo ia lava?

I le faavae ai o o latou talitonuga i le Tusi Paia, latou te lē teuina ai o latou lava toto ma mulimuli ane taliaina e faia ai se tuiga toto mo i latou lava. E filifilia e Kerisiano taʻitoʻatasi mo i latou lava pe faapefea ona faaaogāina lona toto pe a feagai ai ma se faiga o se taotoga, suʻesuʻega faafomaʻi, po o se togafitiga o loo faia i le taimi nei. E tatau ona ia tilofaʻia le mea o loo fai mai ai le Tusi Paia e faatatau i le toto ma ia manatua ua tuuina atu atoatoa o ia i le Atua.—10/15, itulau 30, 31.

• O se saʻiliʻiliga na faia i le amataga o lenei tausaga na faaalia ai le ā le manaʻoga tāua o loo iai i Molimau a Ieova i le lalolagi aoao?

O loo iai se manaʻoga mo nisi Maota o le Malo se 11,000 i atunuu tau ati aʻe, lea e itiiti ai le tamaoaiga. O foaʻi tauofo mai Kerisiano i le tele o atunuu ua faapea ona tuuina atu ina ia fesoasoani i le fausiaina o ni nofoaga talafeagai mo sauniga.—11/1, itulau 30.

• O ā nisi o upu mai le uluaʻi gagana o loo faaaogāina i le Tusi Paia e fesootaʻi ma le tapuaʻiga?

O le tasi o le lei·tour·giʹa, lea ua faaliliuina o le “auaunaga i le lautele.” O le isi o le la·treiʹa, lea ua faaliliuina o le “auaunaga paia.” (Eperu 10:11; Luka 2:36, 37)—11/15, itulau 11, 12.

• O le ā se lesona faavae e mafai ona tatou aʻoaʻoina mai le tala o loo i le Tusi Paia e faatatau ia Atamu ma Eva?

So o se gaoioiga lava e faafoliga e fia tutoʻatasi mai ia Ieova le Atua e matuā iʻu leaga lava.—11/15, itulau 24-27.

• O le ā le faamaoniga faale-Tusi Paia o loo iai faapea e faamalosia e le Atua ana auauna?

Na saunia e Tavita, Sapakuka, ma le aposetolo o Paulo ni faamaoniga totino i le mea moni faapea na faamalosia i latou e Ieova le Atua. (Salamo 60:12; Sapakuka 3:19; Filipi 4:13) O lea, e mafai ona tatou mautinoa faapea e lotomalie le Atua e faamalosia i tatou ma na te mafaia ona faia faapea.—12/1, itulau 10, 11.