Ua Faagaeeina e Auauna

O LE ā se mea o le a faagaeetia ai ni ulugalii e 24 o loo malaulau o latou olaga, ina ia tuua o latou aiga, uō, ma siʻomaga e masani ai, ae galulue i le galuega faamisionare i atunuu ese? Aiseā o le a latou fiafia ai e ō atu i nofoaga e pei o Papua Niu Kini ma Taiwan, faapea foʻi atunuu o Aferika ma Amerika Latina? Pe o le naunau ea e fia tofo i ni mea fou? E leai. Na i lo lea, ua faagaeetia i latou e le alofa moni i le Atua ma tuaoi.—Mataio 22:37-39.

O ai nei tagata? O i latou o le ʻaufaauu o le vasega lona 109 a le Aʻoga Faale-Tusi Paia a le Olomatamata o Kiliata. I le Aso Toonaʻi, Setema 9, 2000, na faapotopoto ai se aofia e 5,198 i le Nofoaga Tau Aʻoaʻoga a le Olomatamata—lea e i Patterson, i Niu Ioka—faapea nofoaga sa latalata ane ina ia mafai ona faalogologo atu ai i fautuaga alofa sa mafai ona fesoasoani i le ʻaufaauu ina ia avea ai o ni misionare e taulau manuia.

O le taʻitaʻifono o le polokalame o le uso o Stephen Lett, o se sui o le Komiti Tau Aʻoaʻoga a le Vaega Pule o Molimau a Ieova. Na ia fafau aʻe ana upu amata i le Mataio 5:13, “O outou, o le masima o le lalolagi outou.” Na faamatala mai e le uso o Lett e faapea, o fetalaiga a Iesu e faatatau tonu atu lava ia i latou na faauu. Mo se faataʻitaʻiga, e iai i le masima se mea e ono faaoso ai le naunau e fia tofo i se meaʻai. E faapena foʻi e ala i la latou galuega talaʻi uigā, o le a pei ai misionare o ni masima i se uiga faafaatusa.

O Faalaeiauga Faamavae

Ona faailoa mai lea e le uso o Lett nisi o auauna ua loa ona latou auauna ia Ieova, o ē na latou faia ni lauga faale-Tusi Paia, sa faapupuu ae na matuā uigā. O lē na muamua o John Wischuk, o loo auauna i le Matagaluega o Tusitusiga. O lana matua, “Le Salamo Pito Sili Ona Puupuu ua Uunaʻia le Agaga Faa-Misionare,” sa faavae aʻe i le Salamo 117. I aso nei, o loo iai se manaʻoga i le lalolagi aoao mo le tuuina atu o le molimau i “nuu ese” ma “tagata uma” e faatatau ia Ieova ma lona Malo. Na faalaeiauina le ʻaufaauu ina ia faataunuu le mea o loo fai mai ai le Salamo 117 e ala i le uunaʻia o isi e “vivii atu ia Ioa.”

Na sosoo ai ma le faailoa mai e le taʻitaʻifono o le uso o Guy Pierce o le Vaega Pule. Sa ia talanoa i le mataupu “Ia Fefulifulisaʻi, Peitaʻi ia Maumauaʻi.” E mausalī le Afioga a le Atua. Ua taʻua Ieova le Atua o le Papa i le Teuteronome 32:4, peitaʻi e fefulifulisaʻi lana Afioga e ala i le tusia i se tulaga e aogā mo vaega uma o tagata mai gagana ma aganuu eseese—ioe, mo tagata uma lava. Na timaʻia le ʻaufaauu ina ia talaʻi atu le Afioga a le Atua, ia faataga lana feʻau e pāʻiaina agaga ma lotofuatiaifo o tagata. (2 Korinito 4:2) Na timaʻi mai le uso o Pierce: “Ia maumauaʻi i mataupu silisili tonu, ae ia fefulifulisaʻi. Aua neʻi manatu faatauvaa i tagata o loo i lou tofiga ona faapea e ese la latou aganuu.”

O Karl Adams, o se tasi o faiaʻoga o Kiliata, ma ua latalata i le 53 tausaga o auauna i le ofisaulu aoao, sa ia talanoa i le matua faatupu manatu e faapea “O Fea o le a Outou Agaʻi Atu Nei i Ai?” E moni e tusa ma le 20 atunuu eseese i le lalolagi aoao o le a ō atu i ai ulugalii e toʻa 24 mo o latou tofiga faamisionare,  peitaʻi na lāgā le fesili, O le taimi lava tou te taunuu ai i na tofiga ma tou vaai tino i ai, o le ā loa la sa outou gaoioiga o le a fai? O loo tatou ola i se lalolagi o loo iai le uiga o le lē mautū o le mafaufau i se mea e tasi. E mananaʻo tagata e ō atu i nofoaga fou ma faia ni mea fou ona o le fia faafiafiaina o i latou lava. Ae i le isi itu, ua tofia atu e Ieova le ʻauaʻoʻoga i se nofoaga o loo finagalo ina ia latou iai, ina ia latou tausia ai ma le lē manatu faapito ana “mamoe.” E lē tatau ona pei i latou o tagata i Isaraelu anamua o ē na avea lo latou manatu faapito ma itu latou te misia ai le avanoa e faaaogā ai i latou e Ieova mo se manuia o le fanau uma a tagata. Na i lo lea, e tatau ona latou faataʻitaʻi atu ia Iesu Keriso, o Lē sa ia faia ma le lē manatu faapito i taimi uma le finagalo o lona Tamā, ma sa usiusitai i tulaga uma lava sa fetaiaʻi ma ia.—Ioane 8:29; 10:16.

“Ia Teu Faapelepele Mataupu Loloto a le Atua,” o le matua lena a Wallace Liverance, o ia o le lesitala o le Aʻoga o Kiliata. E masani lava i mau o le Tusi Paia ona taʻua ai le Afioga a le Atua i taʻu e pei o le ʻoa, o maatāua, o maa tautele, ma mea e taugatā ma matuā naunau tagata e saʻili. Ua faaalia i le Faataoto 2:1-5 e faapea, ina ia maua “le poto i le Atua,” e tatau ona tatou suʻesuʻe i ai e pei ona suʻesuʻe i le “oloa lilo.” Sa faalaeiauina e le failauga le ʻauaʻoʻoga ina ia faaauau pea ona eli i mea loloto a le Atua a o latou auauna ai i o latou tofiga fou. Na faailoa mai e le uso o Liverance nisi o māfuaaga  e faapea: “E aogā tele lenei mea, auā e atiina aʻe ai le faatuatua ma le mautinoa ia Ieova ma o le a faamalosia ai lau filifiliga ina ia e pipii mau i lou tofiga. O le a fesoasoani ia te oe ina ia e tautala atu ai ma se talitonuga mautinoa ma atili ai ona avea oe ma se faiaʻoga uigā a o e faamatalaina fuafuaga a le Atua i isi.”

I le faaaogāina o le potu aʻoga e fai ma faaaʻoaʻoga, na autalu ai e le isi faiaʻoga o le Aʻoga o Kiliata le auala na faamanuiaina ai e Ieova le auaunaga i le fanua a le ʻauaʻoʻoga i le lima masina ua tuanaʻi atu. Na faasino manatu o le uso o Lawrence Bowen i upu a le aposetolo o Paulo o loo taʻua i le Galuega 20:20 e faatatau i lana faiva i le lautele i Efeso, o loo faamatilatila ai le faaaogāina tatau e Paulo o avanoa uma e molimau atu ai. O mea na tutupu i le ʻauaʻoʻoga sa faataʻitaʻia mai ai e faapea, i le pei o le aposetolo o Paulo, o i latou ua faagaeeina e le alofa mo Ieova ma tuaoi i o tatou taimi nei e lē taitai ona solomuli mai le tautala atu i le upu moni ma faataga le mana o le Afioga a le Atua e galue i isi. O lenei mea ua iʻu ai i le ʻoa o faamanuiaga a Ieova.

Ua Faamatala Mai Tala a i Latou ua Iai le Tomai

A o faagasolo le vaitaimi o la latou aʻoga, sa maua faapitoa ai lava e le ʻauaʻoʻoga i lenei vasega a Kiliata aogā mai le mafai ona latou faifaimea faatasi ma sui o Komiti o Lālā mai atunuu e 23, o ē na iai foʻi iinā i le Nofoaga Tau Aʻoaʻoga i Patterson mo ni a latou toleniga faapitoa. Na faatautaia e Leon Weaver ma Merton Campbell o le Matagaluega o le Auaunaga ni faatalanoaga ma sui eseese o Komiti o Lālā, o nisi o i latou nei sa faauu mai foʻi i Kiliata. Sa avea o se faalaeiau mo le ʻauaʻoʻoga ma o latou aiga ma uō le faalogologo atu i nei misionare ua matuā saunia lelei ona o mea na tutupu ai.

O le fautuaga mo le vasega faauu e fesoasoani ai ia i latou ina ia fetuutuunaʻi atu o latou tulaga e tusa ai o o latou tofiga i atunuu ese, sa aofia ai faamatalaga e pei o nei: “Ia saʻo le vaai. Pe afai lua te fetaiaʻi ma se mea e matuā fou ia te oe po o se mea e te lē malamalama ai, aua neʻi faavaivai. Ia faalagolago atu ia Ieova”; “faamasani e fiafia i so o se mea lava e maua, ma ia faatuatua o le a foaʻi mai pea e Ieova ia te oe mea e manaʻomia i le olaga.” Sa taulaʻi atu isi manatu i le fesoasoani i le ʻauaʻoʻoga ina ia tausisia le olioli i lo latou tofiga. O nisi o na manatu e faapea: “Aua e te faatusatusaina lou tofiga i le nofoaga na e sau ai”; “ia aʻoaʻo le gagana a le atunuu ua e iai ma tautala lelei ai ina ia mafai ona tou fetalanoaaʻi ma tagata”; “ia aʻoaʻo le aganuu ma agaifanua a tagata, auā o le mea lena o le a fesoasoani ia te oe ina ia e pipii mau ai i lou tofiga.” Sa matuā faalaeiau nei faamatalaga i misionare fou.

Ina ua māeʻa faatalanoaga, ona fafau aʻe ai lea e le uso o David Splane, o lē sa avea muamua ma misionare ma na faauu mai le vasega lona 42 a Kiliata ae o loo auauna nei o se sui o le Vaega Pule o Molimau a Ieova, le lauga autū i le matua faaoso naunau e faapea “Le ʻAuaʻoʻoga po o le ʻAufaauu—O Lē Fea?” Sa ia fesili mai i le vasega faauu: “O le ā le vaaiga o le a tou vaai ai ia te outou a o tou ō atu i tou tofiga faamisionare? Pe o se ʻaufaauu ea o ē ua iloa mea uma e faatatau i le galuega faamisionare pe o ni tagata aʻoga o loo tele pea nisi mea e ao ona aʻoaʻoina?” Na faailoa mai e le uso o Splane e faapea, o le tagata faauu e atamai, o ia lea na te manatu ia te ia lava o se tagata aʻoga. E tatau i misionare ona ia i latou le vaaiga e faapea, o tagata uma lava latou te fetaiaʻi i o latou tofiga faamisionare o loo iai se avanoa mo le aʻoaʻoina atu o ni mea i na tagata. (Filipi 2:3) Sa faalaeiauina le ʻauaʻoʻoga ina ia felagolagomaʻi ma isi o latou uso misionare, o le ofisa o le lālā, ma le faapotopotoga o le a latou auai atu i ai. Na ʻaiʻoi mai le uso o Splane e faapea: “Ua tou pasi mai a outou suʻega faaiʻu, ae leʻi muta ai le avea o outou o ni tagata aʻoga. Ia faailoa manino atu i tagata uma lava faapea o loo tou ō atu iinā e aʻoaʻoina nisi mea.”

Ina ua māeʻa lenei lauga, ona tufatufa mai loa lea i le ʻauaʻoʻoga o latou tusipasi, ma sa faasilasila mai foʻi o latou tofiga i le aofia. Sa avea o se taimi ootia mo le ʻaufaauu ina ua sosoo ai ma le faitauina mai e se tasi na fai ma sui o le vasega, sa latou faaiʻuga na faailoa mai ai le filifiliga maumauaʻi a le ʻaufaauu ina ia avea mea ua latou aʻoaʻoina mai le Afioga a le Atua e uunaʻia ai i latou e faia nisi galuega e sili atu mo le auaunaga paia.

E mautinoa sa taufai ioe i latou uma sa iai i le aofia e faapea, o fautuaga na tauaaoina mai sa faamalosia atili ai le faaiʻuga a le ʻaufaauu ina ia latou faaalia atu le alofa i le Atua ma tuaoi. Na atili ai foʻi ona latou maumauaʻi e fesoasoani atu i tagata i le itu faaleagaga, i o latou tofiga faamisionare.

[Pusa i le itulau 25]

FAAMAUMAUGA O LE VASEGA

Aofaʻi o atunuu o loo iai o latou sui: 10

Aofaʻi o atunuu ua tofia i ai: 20

Aofaʻi o tagata aʻoga: 48

Faatatauga o tausaga: 33.7

Faatatauga o tausaga i le upu moni: 16.2

Faatatauga o tausaga i le faiva faataimi atoa: 12.5

[Ata i le itulau 26]

Vasega Faauu Lona 109 o le Aʻoga Faale-Tusi Paia a le Olomatamata o Kiliata

I le lisi i lalo, o laina e amata mai luma agaʻi i tua, ma o igoa e lisi mai le itu agavale i le itu taumatau i laina taʻitasi.

 (1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.