Ua Oo Atu le Tala Lelei o le Filemu i Laufanua Maualuluga o Chiapas

“I le fasiotiga tagata aupito sili ona leaga e mafai ona manatua e so o se tasi i le setete o Chiapas, e toʻa 45 tagata lautele sa leai se puipuiga, e aofia ai ma pepe e toʻa 13, na tagatavaleina e se vaega o tagata . . . na faaauupegaina.” O le lipoti lena mai le nusipepa o le “El Universal” i le mea na tupu i le nuu o Acteal, i le setete o Chiapas, ia Tesema 22, 1997.

O CHIAPAS, o le setete o Mekisikō e tū e mātele atu i le itu i saute, e tuaoi ma Guatemala. I le talafaasolopito umi o le mativa ma le lē tagolima, na faatūina ai e se vaega o tagatanuu e taʻua o Maya Indian, se fouvalega e faaauupegaina ia Ianuari 1994, i lalo o le igoa o Ejército Zapatista de Liberación Nacional (EZLN, National Liberation Zapatista Army). Sa faatuatuai lava ona faia ni feutagaʻiga mo se vaifofō filemu. O feteenaʻiga ma osofaʻiga i le vā o vaegaʻau a le itu tetee ma le itu a le malo, na iʻu ai i le toto masaa ma le oti. O tulaga fesouaʻiina na pogai ai ona sosola le toʻatele o tagata lautele i lena vaipanoa mo lo latou saogalemu.

I le lotolotoi o na tulaga lē mautinoa, o loo iai se vaega e tasi o ē alolofa i le filemu o loo tumau pea ona solitū e tusa ai ma feteenaʻiga faapolotiki. O loo latou maelega i le tataʻiina atu o manatu o tagata i le Malo o le Atua ua na o lea le faamoemoe mo le foʻiaina o faafitauli o loo fesagaʻi ma tagata, e lē gata i lea vaipanoa, ae i le lalolagi aoao. (Tanielu 2:44) O ai i latou? O Molimau a Ieova. I le usiusitai atu i le poloaʻiga a Iesu, o loo latou taumafai ai e faaoo atu le tala lelei o le Malo o le Atua i vaega aupito mamao o laufanua maualuluga o Chiapas. (Mataio 24:14) Na faapeʻī le talaʻiga i lalo o na tulaga, ma o ā ni iʻuga?

“O Aʻu o se Tasi o Molimau a Ieova”

O Adolfo, o se alii talavou e leʻi leva ona avea ma tagata talaʻi o le Malo, sa galue i se tasi aso i le faleuaealesi faasalalau i Ocosingo. Sa faafuaseʻi lava ona faalogoina se tuʻituʻi leotele mai i le faitotoʻa. Na osofaʻi malosi atu se vaega o tagata e tafusi o latou ulu ma mata ma tuu atu gutu o a latou fana i lona ulu. Na latou nanati atu i le potu o faasalalauga, ma pulea faamalosi le masini ma faasalalau atu i le leitiō e faapea ua latou mananaʻo e fai se taua ma le malo.

Na liliu atu nei tagata na faaauupegaina ia Adolfo ma poloaʻiina o ia ina ia aufaatasi atu i la latou taumafaiga. Na tali atu ia Adolfo e faapea: “O aʻu o se tasi o Molimau a Ieova,” e ui lava e leʻi papatisoina o ia. Sa ia faamatala atu e na o le pau lava le faamoemoe mo le filemu, o le Malo o le Atua, ma sa maumauaʻi lava o ia e teena le togiga ma le fana na latou ofoina atu ia te ia. I le vaai atu i lona tū maumauaʻi, na latou tuua ai lea o ia e alu. I le toe tomanatu i le mea na tupu, ua taʻua ai e Adolfo e faapea: “O lena mea na tupu na matuā faamalosia ai loʻu faatuatua.”

Mulimuli ane, sa toʻafilemu lea tulaga, ae sa tumau pea ona pulea e le vaegaʻau lea vaipanoa. E ui lava i lena tulaga, ae sa talia fiafia e Adolfo le valaaulia mai toeaina o la latou faapotopotoga ina ia galulue ma se vaega o Kerisiano i vaipanoa  maotua. I nofoaga e siaki ai tagata fegasoloaʻi, sa faaalia e fitafita le faaaloalo ia te ia ina ua ia faailoa atu ia i latou o ia o se tasi o Molimau a Ieova. Na mulimuli ane papatisoina o ia ma na ia maua le lotomalie i le fesoasoani atu i lena vaega maotua e avea ma faapotopotoga a Molimau a Ieova. Na faailoa mai e Adolfo e faapea: “O lea ua uma ona ou papatiso, ua mafai nei la ona ou faapea atu ma le mautinoa atoatoa, o aʻu o se tasi o Molimau a Ieova!”

“Na Faamalosia i Maʻua e Ieova”

I se taimi puupuu lava talu ona faasalalau atu e le EZLN i le leitiō se taua faasaga i le malo, na sosola uma ai lava tagata o le aai. Na faamatala mai e Francisco, o se faifeʻau faataimi atoa po o se paeonia, le auala na faamalosia ai i laʻua ma lana avā e Ieova mai mea na oo ia i laʻua.

“Na ma filifili e maua se lafitaga i se vaipanoa e tusa le mamao ma le tolu itula pe a savavali. Sa iai se faapotopotoga iinā, ma o le a ma faatasi atu ai i le ʻauuso. E leʻi pine lava ae oo mai le taimi o la matou fonotaga matagaluega na faia i Palenque. Ma te leʻi mananaʻo ma laʻu avā e misia le fono faapitoa a paeonia, ae na ma iloa ua poloka atoa le auala i le fonotaga e le EZLN. Na ma filifili ai e ma te ui i le togavao, lea na ma faaalu ai le iva itula. Na ma taunuu tonu atu lava i le taimi o le  fono a paeonia, lea na matuā faafiafiaina ai i maʻua, faapea le polokalame atoa o le fonotaga.

“I lo ma toe foʻi atu, na ma iloa ai ua susunu i lalo lo ma fale ma na gaoia a ma manu. E na o le pau lava le mea na totoe e na o se tamaʻi taga lavalava. Sa ma lagona le faanoanoa tele ona o a ma mea ua leiloloa, ae na ave ma le agalelei i maʻua e uso i Ocosingo i o latou fale. Na latou faailoa mai foʻi ia i maʻua le auala e galueaʻiina ai mea ia sa leʻi faia muamua lava e i maʻua o ni faifaatoʻaga. Na aʻoaʻoina aʻu e se tasi uso i le auala e puʻeina ai ata, o le tasi o le faafouina o seevae. O le auala lena na mafai ai e i maʻua ma laʻu avā ona maua mea na tausia ai i maʻua lava e oo mai i le taimi nei, e aunoa ma le tuua o le auaunaga faapaeonia. I le manatunatu i le mea na tupu, na mafai ai ona ma iloa e faapea, a o leʻi faigofie ona ma tumau, na faamalosia i maʻua e Ieova.”

Fua o le Galuega Talaʻi

Sa leʻi faatagaina e Molimau i le setete o Chiapas ia mea faigatā ma lamatiaga e taofia ai i latou mai le faia o se sao i se tauiviga faapitoa na faia ina ia faaoo atu le tala lelei i tagata i lena vaipanoa. Mo se faaaʻoaʻoga, i tuā ia Aperila ma Me 1995, na latou aufaatasi atu ai ma o latou uso Kerisiano i le lalolagi aoao i se tauiviga o le tufatufaina atu lea o le Tala o le Malo Nu. 34, o lona matua e matuā talafeagai e faapea Aiseā ua Tumu ai le Olaga i Faafitauli?

I le faagasologa o le tauiviga—i se faatoʻaga tele e igoa ia Pueblo Nuevo—na maua ai e se paeonia sauatoa o Ciro se aiga o ē na faaalia le naunau fiafia. I lona toe foʻi atu i le tolu aso mulimuli ane, na mafai ai ona ia amataina se suʻesuʻega faale-Tusi Paia ma i latou. Ae ina ua toe foʻi atu ia Ciro ma lana paga e faaauau le suʻesuʻega ma le aiga, sa lē iai le tamā o le aiga i le fale. Na i lo o lea, sa iai ia se vaega o ni tagata e tafusi ulu ma mata sa faatalitali mai ai e fai se mea leaga ia te ia. Sa latou fesili atu ia Ciro ma lana paga po o le ā le mea o loo la saʻilia ma sa faamataʻu atu o le a fasiotia i laʻua. Ina ua uma ona tatalo lē leoa atu ia Ieova, na faamatala atu loa ma le lototetele e nei Kerisiano e toʻalua e faapea, na la ō atu e aʻoaʻo le aiga i le Tusi Paia. I lena mea, na faataga ai i laʻua e tagata leaga e ō. Atonu sa iai se māfuaaga, sa leʻi alu ane ai le tamāloa o le aiga i lena aso.

I se tasi aso, i le toetoe lava tolu tausaga mulimuli ane, na faateʻia ai Ciro ina ua alu atu le tamāloa i lona fale. Maʻeu le fiafia o Ciro ina ua ia iloa e faapea ua uma ona papatisoina le aiga atoa ma ua latou auaufaatasi atu nei ma se faapotopotoga i Guatemala! O se tasi o ona afafine sa oo foʻi ina auauna e avea ma paeonia sauatoa.

Talisapaia o Meaʻai Faaleagaga

E ui i le faaauau pea o tulaga faigatā i Chiapas, ae ua lipotia mai e se ovasia itumalo e faapea, e matuā lagolagoina lava e  Molimau i lea vaipanoa le tāua o le faapotopoto faatasi. (Eperu 10:24, 25) Ua ia faamatala mai le mea na tupu talu ai nei i se aso faapitoa o fonotaga, lea sa faatulagaina e vave amata i le taeao ina ia mafai ona toe foʻi atu ma le saogalemu i latou na auai i o latou aiga a o malamalama. E ui lava o le toʻatele o i latou sa savavali mo le sili atu i le tolu itula i le togavao ina ia oo atu ai i le mea e fai ai le fonotaga, sa nofoi tagata uma lava i o latou nofoa i le 7:00 i le taeao. I le aofia, na iai sui e toʻaono o le vaega a le EZLN, na faalogologo ma patipati ai, e foliga mai na latou olioli i le polokalame. Na savavali foʻi i latou mo le tolu itula ina ia auai i le fonotaga. E toʻaluasefulu foʻi nisi o i latou na ō mai i le Faamanatuga o le maliu o Keriso, na faia i se Maota o le Malo i lena lava nuu.

O se tasi alii talavou e auai i gaoioiga a fitafita lalafi solo, na tofia e tagata maualuluga o lana vaega ina ia alu e leoleo se isi vaega o le togavao. I lona taunuu atu i lena nuu, na ia iloa ai ua sosola uma lava tagata o le nuu, o le toʻatele lava o Molimau a Ieova. O lea sa ia nofo ai loa i se tasi o fale sa lē o iai se tasi. I le leai o ni mea e fai, sa ia tago ai i ni tusi sa taatitia solo ai i le fale ma amata ona faitau i ai. O nei tusi o ni lomiga a le Olo Matamata na tuua e Molimau. I le tuua na o ia, na maua ai e le alii talavou se taimi e mafaufau loloto ai i mea na ia faitauina. Na ia filifili loa e tatau ona suia lona olaga ma lafoaʻi ana auupega. I le taimi lava na mafai ai ona ia faia lea suiga, na ia saʻilia loa Molimau ma amataina se suʻesuʻega faale-Tusi Paia. E leʻi atoa le ono masina, ae ua ia taʻu atu i isi le tala lelei. Ua avea nei o ia ma isi tagata e toʻatolu o lona aiga o ē sa faifaimea faatasi ma le vaega a fitafita lalafi solo ma Kerisiano papatisoina.

Vaai i le Itu Mautinoa

E ui lava o lenei mea e oo mai ai le tele o tulaga faigatā, ae o le feteenaʻiga na oo moni ai lava se aafiaga mautinoa i uiga faaalia o tagata i le galuega talaʻi. Ua faamatala mai e se toeaina i lena lava aai lea na amata ai le feteenaʻiga e faapea: “Pe tusa ma le lima aso talu ona tupu le fetauaʻiga, na matou faamaopoopoina ai le galuega talaʻi i totonu ma fafo o le aai. Sa naunau tagata e faalogo ia i matou. E tele ni lomiga faale-Tusi Paia na matou tuua ma na amataina foʻi ni suʻesuʻega faale-Tusi Paia. I se tasi vaipanoa, e toʻatele na tetee i le upu moni, ae ona o le feteenaʻiga lea e faia, ua oo ai ina latou faalogo i le taimi nei, suʻesuʻe le Tusi Paia ma auai i sauniga ma fonotaga.”

Ua fiafia lava le ʻauuso ona ua mafai ona faaauau pea la latou galuega faatiokarate e ui lava i tulaga matuā fesouaʻiina. I le iloaina o le malo ma le EZLN, e faaauau ai pea ona faia a latou fonotaga, lea na faamalosia ai i latou i le itu faaleagaga. O asiasiga a ovasia femalagaaʻi ua uunaʻia malosi ai foʻi i latou e faaauau pea i le galuega talaʻi. O le mea e fiafia ai, o faalaeiauga e sau lava mai ia i latou o loo auai i le feteenaʻiga, o ē e masani ona latou uunaʻia Molimau ina ia faaauau pea i la latou galuega talaʻi.

E ui lava ua tau faaitiitia ia tofotofoga ma tulaga faigatā na onosaia e tagata i Chiapas a o faagasologa taimi, ae e leʻi faaiʻuina ai lava. E ui i lea, e tasi lava le mea ua mautinoa—o loo maumauaʻi pea Molimau a Ieova e faaauau ma le lē mapu i a latou taumafaiga e avatu le tala lelei o le filemu mai le Afioga a le Atua, le Tusi Paia i tagata. (Galuega 10:34-36; Efeso 6:15) Ua latou iloa lava e pei ona taʻua e le perofeta o Ieremia e faapea, “e le o i le tagata lona ala, e le o i le tagata e savali ona faatonuina le mea e ui ai o ia.” (Ieremia 10:23) E na o le Malo o le Atua i aao o lona Alo, o Iesu Keriso, e mafai ona aumaia le vaifofō i le lē faamasinotonu ma le mativa i le lalolagi.—Mataio 6:10.

[Faafanua i le itulau 9]

(Tagaʻi i le lomiga mo le ata atoa)

CHIAPAS

GUATEMALA

Fagaloa o Mekisikō

Vasa Pasefika

[Ē Ana le Ata]

Mountain High Maps® Copyright © 1997 Digital Wisdom, Inc.

[Faamatalaga i le itulau 9]

O Molimau o loo ō atu i le faiva i laufanua maualuluga o Chiapas