Talaaga o le Soifuaga

Auauna ma le Lotoatoa e ui i Tofotofoga

UA FAAMATALAINA E RODOLFO LOZANO

Na ou fanau i Mekisikō, i le aai o Gómez Palacio, i le Setete o Durango, ia Setema 17, 1917. O le taimi lena sa matuā faaatoatoa ai gaoioiga a le Fouvalega a Mekisikō. E ui lava sa faaiʻuina le fouvalega i le 1920, ae sa faaauau pea fevesiaʻiga i le vaipanoa lea sa matou nonofo ai mo le tele o tausaga mulimuli ane, ma sa matuā faigatā ai lava le olaga.

I LE tasi taimi ina ua iloa e Tinā e faapea o le a faia se fetaiaʻiga i le vā o ʻau a tagata tetee ma ʻau a le malo, sa ia taofia i matou ma oʻu uso e toʻatolu ma oʻu tuafāfine e toʻalua i totonu o le fale mo ni nai aso. Sa tau leai ni a matou meaʻai, ma ou te manatua pea lo ma lalafi ma loʻu tuafafine laʻitiiti i lalo o le moega. Ina ua mavae lena mea, na filifili ai Tinā e ave i matou le fanau i le Iunaite Setete, o iinā o le a aufaatasi atu ai lo matou tamā ia i matou i se taimi mulimuli ane.

Na matou taunuu i Kalifonia i le 1926 i sina taimi puupuu lava a o leʻi oo i le Paʻū Maulalo o le Tamaoaiga i le Iunaite Setete. Sa matou fesiitaʻi solo lava i so o se mea na mafai ona maua ai ni galuega i nofoaga e pei o San Joaquin Valley, Santa Clara, Salinas, ma King City. Sa matou aʻoaʻoina ina ia galulue i faatoʻaga ma seleseleina mai so o se ituaiga o fualaau ʻaina ma laau faisua. E ui lava sa avea loʻu olaga talavou ma taimi o le faia o galuega sa sili ona faigatā, ae sa avea o se taimi fiafia i loʻu olaga.

Oo Atu i ai Upu Moni o le Tusi Paia

Ia Mati 1928, na asiasi atu ai ia te i matou se Tagata Aʻoga o le Tusi Paia, e pei ona taʻua ai Molimau a Ieova i na taimi. O ia o se tamā matua, e tautala i le gagana Sepania, o lona igoa o Esteban Rivera. Sa faafiafiaina aʻu i le matua o le tamaʻitusi lea na ia tuua e faapea, “Where Are the Dead?” (O Fea o Iai Ē ua Oti?) atoa ai  ma ona mataupu. E ui lava o aʻu o se talavou, ae sa ou faia se suʻesuʻega faale-Tusi Paia ma auaufaatasi ma Tagata Aʻoga o le Tusi Paia. Mulimuli ane, na avea ai foʻi loʻu tinā ma loʻu tuafafine o Aurora o ni ē vivii ma le maelega ia Ieova.

I le taulotoaʻiga o le 1930, na fausia ai se Maota o le Malo i San Jose mo le faapotopotoga e tautala i le gagana faa-Peretania. Talu ai le toʻatele o tagata mai atunuu e tautala i le gagana Sepania sa galulue i faatoʻaga i lea vaipanoa, na amata ai ona matou talaʻi atu ia i latou ma faia ai le Suʻesuʻega o Le Olomatamata. Sa matou faia lenei mea faatasi ma le fesoasoani mai i Molimau mai atunuu e tautala i le gagana Sepania sa nonofo i San Francisco, e tusa ma le 50 maila [80 kilomita] le mamao. Mulimuli ane, e tusa ma le 60 na auai i sauniga sa faia i le gagana Sepania i le Maota o le Malo i San Jose.

Mulimuli ane, ia Fepuari 28, 1940, na faailogaina ai loʻu tuuina atu ia Ieova i le papatisoga i le vai i se fonotaga na faia i San Jose. I le tausaga na sosoo ai, na tofia ai aʻu e avea ma paeonia, o se faifeʻau faataimi atoa a Molimau a Ieova. Ona oo lea ia Aperila 1943, na valaaulia ai aʻu ou te siitia atu i Stockton, o se aai e tusa ma le 80 maila [130 kilomita] le mamao, ina ia faavaeina se faapotopotoga e tautala i le gagana Sepania. I lena taimi, sa ou auauna ai o se ovasia taʻimua i le faapotopotoga e tautala i le gagana Peretania i San Jose, ma sa ou tausia foʻi Molimau e tautala i le gagana Sepania iinā. Ina ua uma ona faia fuafuaga mo nisi e tausia nei tiute tauave, sa ou siitia atu loa i Stockton.

Tofotofoina le Faamaoni

Na amata i le 1940 ona valaaulia mai pea aʻu i luma o le komiti mo gaoioiga faavaegaʻau, ae i na taimi taʻitasi sa faaaloalogia ai pea loʻu tulaga i le avea o sē tetee i le auai i gaoioiga faavaegaʻau ona o māfuaaga faale-Tusi Paia. E leʻi pine talu ona ulu atu le Iunaite Setete i le Taua Lona Lua a le Lalolagi ia Tesema 1941, na faateteleina ai omiga mai le komiti o gaoioiga faavaegaʻau. O le iʻuga, i le 1944, na tuuina ai aʻu i le falepuipui. A o oʻu faatalitali mo le lauina mai o loʻu iʻuga, na taofia ai aʻu i se potu taofia faatasi ma tagata solitulafono. I le iloaina o aʻu o se tasi o Molimau a Ieova, e toʻatele lava i latou na fesili mai i ni fesili e uiga i le pe faapefea i solitulafono na latou faia ona aafia ai lo latou tulaga i luma o le Atua.

Na totogi e Molimau i San Jose le tupe na mafai ai ona tatala aʻu i tua e faatali ai loʻu faamasinoga. Na talia e se lōia i Los Angeles, o lē na tū e fai ma sui e puipuia aiā tatau a tagata lautele, le faia o loʻu faamasinoga e aunoa ma se totogi. Na faia e le faamasino le faaiʻuga e faasaʻoloto aʻu pe afai ou te lē toe avea ma paeonia, ia fai saʻu galuega totogi, ma ia lipoti atu i masina  taʻitasi i pule o le malo. Ou te leʻi talia lena faaiʻuga, o lea na faasalaina ai aʻu mo le lua tausaga i le falepuipui o McNeil Island i le Setete o Uosigitone. Iinā, sa ou faaaogāina ai loʻu taimi ou te matuā suʻesuʻe loloto ai i le Tusi Paia. Sa ou aʻoaʻoina ai foʻi le lomitusi. E leʻi atoa le lua tausaga, ae tatalaina aʻu ona o le amio lelei. Sa ou faia loa lava ia fuafuaga ina ia faaauau pea i le faiva faapaeonia.

Faalauteleina o le Galuega

I le tau mālūlū o le 1947, na tofia ai aʻu ma te galulue faatasi ma laʻu soa paeonia i tagata e tautala i le gagana Sepania i le Aai o Colorado, i Texas. Ae sa matuā mālūlū lava, o lea na ma ō atu ai i San Antonio ona e māfanafana iinā. Ae peitaʻi, sa matuā tetele lava timuga iinā, o lea na faalavelavea ai la ma faiva mai lea fale i lea fale. Sa leʻi pine ae leai sa ma tupe. E na o le pau lava mea na ma ola ai mo ni nai vaiaso, o sanuisi sa fai i kapisi mata ma le tī o le alfalfa. Na toe foʻi atu loʻu soa i lona aiga, ae sa ou nofo pea. Ina ua iloa e Molimau e tautala i le gagana Peretania e uiga i oʻu manaʻoga faaletino, sa amata loa ona latou fesoasoani mai ia te aʻu.

I le tau e totogo ai mea lea na sosoo ai, na ou toe foʻi atu ai i loʻu tofiga i le Aai o Colorado, ma mulimuli ane, na faavaeina ai se faapotopotoga laʻitiiti e tautala i le gagana Sepania. Ona ou siitia atu lea i Sweetwater, i Texas, o iinā na ou fesoasoani ai e faatūina se isi faapotopotoga e tautala i le gagana Sepania. A o iai i Sweetwater, na ou maua ai se tusi na valaaulia ai aʻu ina ia auai i le vasega lona 15 o le Aʻoga Faale-Tusi Paia a le Olomatamata o Kiliata, mo le toleniina o misionare lea na amata ia Fepuari 22, 1950. Ina ua uma le faauuga i lena tau māfanafana i le tauaofiaga faava-o-atunuu na faia i le Yankee Stadium i le Aai o Niu Ioka, sa ou nofo ai pea i le ofisa ulu o Molimau a Ieova i le lalolagi atoa i Brooklyn mo le tolu masani. O iinā na toleniina ai aʻu mo loʻu tofiga i le ofisa o le lālā i Mekisikō.

Galue i Mekisikō

Na ou taunuu i le Aai o Mekisikō ia Oketopa 20, 1950. Pe tusa ma le lua vaiaso mulimuli ane, na tofia ai aʻu e avea ma ovasia o le lālā, o se tofiga na ou galue ai mo le fā ma le ʻafa tausaga. O le poto masani na ou maua mai i le auaunaga paeonia, i le falepuipui, i Kiliata, ma i Brooklyn, sa mautinoa lava le matuā aogā. I le taunuu atu i Mekisikō, sa vave lava ona ou iloa le manaʻoga o le atiina aʻe lea o le itu faaleagaga o o tatou uso ma tuafāfine i Mekisikō. Sa iai se manaʻoga faapitoa lava o le fesoasoani atu lea ia i latou ina ia tausisia faatulagaga maualuluga tau amio o le Afioga a le Atua.

I atunuu o Amerika Latina, e aofia ai ma Mekisikō, sa avea ma tū a ulugalii iinā le nonofo faatasi e avea o se ulugalii e aunoa ma le faaipoipoina faaletulafono. Sa faatagaina e lotu a Kerisinetoma, aemaise lava le Lotu Katoliko Roma nei tū e lē faale-Tusi Paia e faaauau pea ona fai. (Eperu 13:4) I lea, na oo ai ina avea nisi ma sui o le faapotopotoga o Molimau a Ieova, e ui lava sa leʻi faaipoipoina faaletulafono i latou. O lea la na faia ai se fuafuaga mo na tagata ma tuuina atu ai le ono masina ia te i latou ina ia faasaʻosaʻo ai mea. Auā a lē faia, e lē toe taʻua i latou na o ni Molimau a Ieova.

Mo le toʻatele, sa faigofie lava ona faasaʻosaʻoina o latou olaga. E na o le pau lava le mea na manaʻomia, o le faatulafonoina lea o a latou faiā e ala i le faaipoipoina. O isi sa iai i ni tulaga matuā sili atu ona lavelave. Mo se faaaʻoaʻoga, o nisi ua faaipoipo faalua pe faatolu foʻi, ae leʻi tatalaina faaletulafono isi faaipoipoga. Ina ua ōgatasi le tulaga tau faaipoipoga o tagata o Ieova ma aʻoaʻoga o le Afioga a le Atua, sa maua ai loa e faapotopotoga ia faamanuiaga matagofie faaleagaga.—1 Korinito 6:9-11.

I na aso, sa matuā paʻū maulalo ai lava le tulaga tauaʻoaʻoga lautele i Mekisikō. I le taimi ou te leʻi taunuu atu i le 1950, na amata ai e le ofisa o le lālā ona faamaopoopoina ni vasega e aʻoaʻo ai le faitau ma le tusitusi i faapotopotoga. O lea na toe faamaopoopoina ai nei vasega, ma faia fuafuaga ina ia lesitalaina na vasega i le malo. Talu mai le 1946, ina ua amata ona tausia ia faamaumauga, e sili atu i le 143,000 tagata i Mekisikō na aʻoaʻoina le faitau ma le tusitusi i vasega na faia e Molimau!

I tulafono a Mekisikō sa iai taofiofiga e tusa ai ma mataupu tau lotu. Ae peitaʻi, i nai tausaga  talu ai nei, sa iai ni suiga tāua i lenei itu. I le 1992, na pāsia ai se tulafono fou e faatatau i mataupu tau lotu, o lea, i le 1993, na lesitalaina ai faaletulafono Molimau a Ieova i Mekisikō e avea o se faalapotopotoga faalotu.

O nei suiga e avea o se puna o le olioli tele ia te aʻu, o se mea sa ou manatu i ai muamua e lē mafai ona faia. I le faagasologa o le tele o tausaga, sa ou asiasi pea i ofisa o le malo ma fesagaʻi ai pea ma na uiga lē maufaatuatuaina. Ae peitaʻi, o se mea lelei le vaai atu ua mafai ona taulimaina nei mataupu e ala i le Matagaluega Tau Tulafono o loo i le ofisa o lo matou lālā, o lea ua feololo ai le faalavelave mai i le galuega talaʻi.

Auauna Faatasi ma se Paaga Misionare

Ina ua ou taunuu atu i Mekisikō, sa toʻatele le ʻaufaauu mai isi vasega muamua o Kiliata sa iai i le atunuu. O le tasi o i latou nei, o Esther Vartanian, o se Molimau mai Aminia o lē na amata ona paeonia i Vallejo, i Kalifonia, i le 1942. Na ma faaipoipo ia Iulai 30, 1955, ma faaauau ai pea mulimuli ane i lo ma tofiga i Mekisikō. Sa auauna pea Esther i le galuega faamisionare i le Aai o Mekisikō, ma sa ma nonofo i le lālā i le mea sa faaauau pea ona ou auauna ai.

I le 1947, na taunuu ai Esther i lona uluaʻi tofiga faamisionare i Monterrey, Nuevo León, i Mekisikō. Sa na o le tasi le faapotopotoga e toʻa 40 Molimau na iai i Monterrey, ae i le taimi na siitia atu ai o ia i le Aai o Mekisikō i le 1950, sa iai faapotopotoga e fā. I lo matou lālā e latalata i le Aai o Mekisikō, o loo iai i le taimi nei ni sui talavou se toʻalua o aiga ia na suʻesuʻe ma Esther i le Tusi Paia a o galue o ia i Monterrey.

I tuā i le 1950, o le oganuu sa talaʻia e misionare i le Aai o Mekisikō, sa aofia ai se vaega tele o le aai. Sa latou faasopolia lo latou tofiga e ala i le savavali, ia po o le faimalaga atu foʻi i pasi tuai sa matuā feomaʻi i tagata. Ina ua ou taunuu atu iinā i le faaiʻuga o le 1950, sa iai faapotopotoga e fitu. Nei la, ua faateleina ai na faapotopotoga i le tusa ma le 1,600, ma e sili atu i le 90,000 le ʻautalaʻi o le Malo i le Aai o Mekisikō, ma i le tausaga  ua mavae, e sili atu i le 250,000 tagata na auai i le Faamanatuga o le maliu o Keriso iinā! I le faagasologa o tausaga, na ma maua ai ma Esther le faaeaga e auauna atu ai i le tele o nei faapotopotoga.

Pe a amataina e i maʻua ma Esther se suʻesuʻega faale-Tusi Paia, e ma te taumafai pea lava ina ia fiafia le tamā o le aiga ina ia mafai ai ona faaaofia le aiga atoa. I lea, ua ma vaaia ai le tele o aiga toʻatele ua auauna ia Ieova. Ou te talitonu o le tasi lea māfuaaga o le tupu vave o le tapuaʻiga moni i Mekisikō ona e masani lava o aiga atoa e aufaatasi ma le autasi i le tapuaʻiga moni.

Ua Faamanuia e Ieova le Galuega

Talu mai le 1950, na mātauina ai le agaʻigaʻi i luma o le galuega i Mekisikō, e lē gata i le faateleina o le aofaʻi o tagata, ae o suiga foʻi i le faamaopoopoina. O se fiafiaga moni lava le faia o sina sao itiiti i le faatelega, ma le galulue faatasi ma ni tagata talimalo ma le fiafia.

I ni nai tausaga ua mavae, na asiasi atu ai ia i matou ia Karl Klein, o se sui o le Vaega Pule o Molimau a Ieova ma lona faletua o Margaret, a o ō atu i sa la faiga mālōlōga. Sa fia iloa e le uso o Klein le tulaga o le galuega i la matou oganuu i Mekisikō, o lea na la ō mai ai ma Margaret i le Faapotopotoga a San Juan Tezontla, e latalata i le Aai o Mekisikō lea sa ma iai i lena taimi. Sa laʻitiiti lava lo matou maota, sa na o le 15 futu (4.5 mita) le lautele, ae 18 futu (5.5 mita) le umi. Ina ua matou taunuu atu e tusa ma le toʻa 70 sa iai iinā, ma sa tau leai se avanoa e tutū ai. O tagata matutua sa nonofo i nofoa, o talavou sa nonofo i nofoa uumi, a o tamaiti laiti sa nonofo i luga o piliki po o le fola foʻi o le fale.

Sa matuā faafiafiaina le uso o Klein ona sa nofosauni uma tamaiti laiti ma a latou Tusi Paia, ma sa latou suʻeina faatasi ma le failauga ia mau o le Tusi Paia. Ina ua uma le lauga lautele, ona talanoa loa lea o le uso o Klein i le Mataio 13:19-23 ma na ia faapea mai, i Mekisikō o loo iai le tele o le “eleele lelei” lea na taʻua e Iesu. I le taimi nei, o le toʻafitu o tamaiti o ē sa auai i lena aso, o loo galulue i se polokalame tele lava o le faatetelēina o fale o lo matou lālā e latalata ane i le Aai o Mekisikō. O le tasi talavou, o loo auauna i Peteli, ma o isi o loo avea ma paeonia!

Ina ua ou sau i le Aai o Mekisikō sa na o le toʻa 11 sui i lo matou lālā. I le taimi nei, ua iai le 1,350 o loo galulue ai, e tusa ma le 250 i latou o loo fauina fale fou o le lālā. Pe a faamāeʻaina nei galuega uma, atonu po o le 2002, o le a mafai ai ona ofi le isi 1,200 o tagata i fale o la matou lālā ia ua faatetelēina. Maʻeu le matagofie auā, i le 1950, sa toʻaitiiti ifo i le 7,000 tagata talaʻi o le Malo i le atunuu atoa, ae i le taimi nei, ua iai la matou ʻautalaʻi e sili mamao atu i le 500,000! Ua taumasuasua loʻu loto i le olioli i le vaai atu i le auala ua faamanuiaina ai e Ieova taumafaiga a o matou uso lotomaulalo i Mekisikō o ē o loo matuā galulue mamafa mo lona viiga.

Fesagaʻi ma se Luʻi Telē

O se tasi o luʻi aupito telē na ou fesagaʻia talu ai nei, o maʻi. I le tulaga masani, sa avea lava aʻu o se tagata soifua mālōlōina. Ae ia Novema 1988, na ou maua ai i le maʻi na pē ai le isi itu o loʻu tino ma na matuā aafia tele ai loʻu malosi faaletino. Faafetai ia Ieova, e ala i faamalositino ma isi togafitiga ua toe maua mai ai sina oʻu malosi, ae ua lē mafai ona toe gaoioi isi vaega o loʻu tino e pei ona ou manaʻo ai. O loo faaauau pea oʻu togafitiga ma le vaaiga faafomaʻi ina ia ʻalofia ai le tigā tele o le ulu ma isi faafitauli o loo iai pea.

E ui e lē o toe tele ni mea e mafai ona ou faia e pei ona ou manaʻo ai, ae o loo oʻu maua le lotomalie i le iloa sa mafai ona ou fesoasoani atu i le toʻatele o tagata e aʻoaʻo e uiga i fuafuaga a Ieova ma avea ma ana auauna tuuina atu. Ou te fiafia foʻi e talanoa atu i le toʻatele o uso ma tuafāfine Kerisiano e mafai ona ou talanoa atu i ai pe a latou asiasi mai i lo matou lālā; ou te lagona ua matou fefaalaeiauaʻi o le tasi i le isi.

I le iloa e talisapaia e Ieova la tatou auaunaga ia te ia ma e lē o faalēaogāina mea na tatou faia, ua matuā faamalosia ai aʻu. (1 Korinito 15:58) E ui ina lē tele ni mea e toe mafai ona ou faia faapea ma le maʻi, ou te manatua pea upu i le Kolose 3:23, 24: “O mea uma lava tou te faia, ia faia ma le loto, peiseai ua faia i le Alii [o Ieova], a e le o tagata; auā ua outou iloa, e maua e outou mai le Alii [o Ieova] o le taui, o le tofi lea.” I le tausisi i lenei apoapoaʻiga, ua ou aʻoaʻoina ai le auala e auauna ai ma le lotoatoa ia Ieova e ui i tofotofoga.

[Ata i le itulau 24]

I le 1942 a o oʻu paeonia

[Ata i le itulau 24]

Na amataina e laʻu avā lona tofiga faamisionare i Mekisikō i le 1947

[Ata i le itulau 24]

I maʻua ma Esther i aso nei

[Ata i le itulau 26]

Agavale i luga: Lo matou aiga Peteli i Mekisikō i le 1952, o aʻu lena e i luma

I luga: E sili atu i le 109,000 na tauaofia i lenei malae taalo i le aai o Mekisikō mo se tauaofiaga itumalo i le 1999

Agavale i lalo: O fale fou o le matou lālā ua toeitiiti lava faamāeʻaina