Filemu mo le Meleniuma Fou?

O LE Tausaga Faava-o-malo mo se Aganuu o le Filemu, na amataina i ni faaaloaloga na faia i Pale ma le Aai o Niu Ioka ia Setema 14, 1999. Na faalauiloaina mai lenei mea e le Fono Sili a Malo Aufaatasi mo le tausaga e 2000. Na faia ai e le faatonu sili muamua o le UNESCO o Federico Mayor se talosaga uigā “ina ia faia se gaoioiga i le lalolagi aoao e aʻoaʻoina ai se aganuu masani mo le filemu ma le leai o ni faiga sauā.”

E iai le faaupuga a le UNESCO e faapea, “talu ai o taua na amataina i mafaufau o tagata, o mafaufau foʻi la o tagata e tatau ona faavaeina ai puipuiga o le filemu.” I le ōgatasi ai ma lenei mea, ua fuafuaina ai e le faalapotopotoga ina ia faavaeina se aganuu o le filemu e ala i “aʻoaʻoga, e fefaaaliaʻi ai manatu ma lagona atoa ma le felagolagomaʻi.” Na taʻua e le susuga a Mayor e faapea, e lē lava le tau ina “filemu, e lē lava foʻi le tetee atu i taua, ae ia avea o ni ē e faatupuina le filemu.”

O se mea e faanoanoa ai ona sa matuā mamao lava le tausaga e 2000 mai le iai o se filemu. I le talafaasolopito o aso nei—e aofia ai ma mea tutupu i le tausaga e 2000—ua faamatilatila mai ai le leai o se tomai o le tagata e taofia ai taua ma faiga sauā e ui lava i taumafaiga faamaoni e taofia ai na mea.

Ae peitaʻi, e lelei ona mātauina e faapea, e fesootaʻi lelei lava le filemu ma le aʻoaʻoina. I le 2,700 tausaga ua mavae, na valoia ai e le perofeta o Isaia e faapea: “E aʻoaʻoina lau fanau uma lava e Ieova; e tele foi le manuia [filemu] o lau fanau.” (Isaia 54:13) Na muaʻi iloa foʻi e le perofeta lava lea se taimi o le a gasolo ane ai tagata mai atunuu uma i le tapuaʻiga mamā a Ieova le Atua ina ia aʻoaʻoina e uiga i Ona ala. O le ā le iʻuga? “Ona latou tuʻi ai lea i a latou pelu e fai ma uamea o suotosina, o latou tao foi e fai ma polo e teu aʻi vine; e le sii atu le pelu e le tasi nuu i le tasi nuu, latou te le toe aʻoaʻo foi i taua.” (Isaia 2:2-4) I le ōgatasi ai ma lena valoaga, ua auai nei Molimau a Ieova i se galuega tau aʻoaʻoga i le lalolagi aoao, lea ua mafai ona fesoasoani i le faitau miliona i le foʻiaina o le feitagaʻi ona o le eseese o lanu ma atunuu lea ua fai ma pogai o le tele o taua.

I le iʻuga o le a lē toe iai ni taua i le pulega a le Malo o le Atua, lea o le a aumaia le filemu tumau ma le saogalemu i le lalolagi. (Salamo 72:7; Tanielu 2:44) Ona faataunuuina ai loa lea o upu a le faisalamo e faapea: “Ina vaavaai ia i galuega a Ieova, o le ua faia faatafunaga i le lalolagi. Ua faaiua e ia o taua e oo lava i tuluʻiga o le lalolagi.”—Salamo 46:8, 9.