Ia Atiina Aʻe e Alofa

“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.”​—MATAIO 22:27.

1. (a) O ā nisi o mea ua faia e se Kerisiano? (e) O lē fea uiga faa-Kerisiano e sili ona tāua, ma aiseā?

E FAIA e se Kerisiano le tele o mea ina ia avea ai o ia ma faifeʻau uigā. O loo faamatilatila mai e le tusi o Faataoto le tāua o le poto, le malamalama, ma le atamai. (Faataoto 2:1-10) Na talanoaina e le aposetolo o Paulo le manaʻoga mo se faatuatua mausalī ma se faamoemoe malosi. (Roma 1:16, 17; Kolose 1:5; Eperu 10:39) E matuā tāua foʻi le onosai ma le pulea totino. (Galuega 24:25, faatusatusa i le NW; Eperu 10:36) Peitaʻi ane, e iai se uiga se tasi lea pe afai e aunoa ona iai, o le a faaleagaina isi uiga uma ma e mafai lava foʻi ona iʻu ai ina lē aogā na uiga uma. O lena uiga o le alofa lea.​—1 Korinito 13:1-3, 13.

2. Na faapefea ona faaalia e Iesu le tāua o le alofa, ma o ā fesili ua lāgā e lenei mea?

² Na faaalia e Iesu le tāua o le alofa ina ua ia fetalai: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) Talu ai o le alofa o le faailoga lea e mātaulia ai se Kerisiano moni, e manaʻomia la ona tatou fesiligia ni fesili e pei, O le ā le alofa? Aiseā ua matuā manaʻomia ai, lea na fetalai ai Iesu faapea, e silisili atu na i lo se isi lava mea, e mātaulia ai ona soo? E faapefea ona tatou atiina aʻe le alofa? O ai e tatau ona taulaʻi atu i ai lo tatou alofa? Seʻi o tatou talanoaina nei fesili.

O le ā le Alofa?

3. E mafai faapefea ona faamatalaina le alofa, ma aiseā e aofia uma ai le mafaufau ma le loto?

³ O se tasi o faamatalaina o le alofa e faapea o ‘se faalogona o le alofa māfana totino atu po o ni lagona loloto o le alofa, se naunau māfana po o le fiafia i le isi tagata.’ O se uiga e uunaʻia ai tagata ina ia gaoioi mo le lelei o isi, i nisi taimi e ono manaʻomia ai le tele o se faataulagaina o le tagata lava ia. O le alofa, e pei ona faamatalaina i le Tusi Paia, e aofia ai le mafaufau ma le loto. E iai se matafaioi e faatinoina e le mafaufau, po o le tomai e manatunatu ai ma le poto, auā o se tagata e alofa, na te faia lenei mea ma le malamalama lelei, i lona mautinoa faapea, o ia atoa ma isi tagata o loo ia alofa i ai, e iai uma lava o latou vaivaiga faapea foʻi ni uiga e lelei ai. E aafia atili le tomai e manatunatu ai ma le poto talu ai e iai i latou o ē e alofa i ai se Kerisiano i nisi taimi, pe atonu e feteenaʻi ma ona faanaunauga masani​—auā ua ia iloa mai lona faitauina o le Tusi Paia e finagalo le Atua ina ia ona faia faapea. (Mataio 5:44; 1 Korinito 16:14) Peitaʻi, o le mea moni lava o le alofa e puna mai le loto. O le alofa moni e pei ona faaalia i le Tusi Paia e lē taitai faapea ua na o se tomai e manatunatu ai ma le poto. E tuufaatasia ai le faamaoni aʻiaʻi ma le tuutoina atu atoatoa o faalogona.​—1 Peteru 1:22.

4. I le ā le auala ua avea ai le alofa o se fusi malosi?

⁴ O tagata e iai le loto manatu faapito e seāseā lava mafai ona latou maua se faiā e iai le alofa moni talu ai o le tagata e alofa e tatau ona nofosauni e faamuamua manaʻoga o le isi na i lo o ona lava manaʻoga. (Filipi 2:2-4) O fetalaiga a Iesu faapea “e sili le manuia o le na te foai atu, i lo le na te talia mai” ua matuā moni lava pe afai o le foaʻi atu o se gaoioiga o le alofa. (Galuega 20:35) O le alofa o se fusi e malosi. (Kolose 3:14) E masani ona  aofia ai se faauōga, peitaʻi o fusi o le alofa e malolosi atu na i lo fusi o se faauōga. O le faiā o le alofa fetosinaaʻi i le vā o le tane ma lana avā ua faamatalaina i nisi taimi faapea o le alofa; ae peitaʻi, o le alofa lea e faalaeiauina i tatou e le Tusi Paia ina ia ati aʻe e sili atu ona tumau na i lo foliga faatosina mai faaletino. Pe a iai le alofa moni i le vā o se ulugalii, o le a tumau le la mafutaga e tusa lava po ua lē o toe mafai ona faia ni a la feusuaʻiga faaleulugalii ona ua fai ifo le malosi ona o le soifuaga matua po ua iai foʻi se tasi o i laʻua ua lē o toe atoatoa le malosi o le tino.

Alofa​—Se Uiga e Manaʻomia

5. Aiseā ua avea ai le alofa o se uiga e manaʻomia tele mo se Kerisiano?

⁵ Aiseā ua avea ai le alofa o se uiga e manaʻomia tele mo se Kerisiano? Muamua, talu ai na poloaʻia e Iesu ona soo ina ia fealofani pe alofa le tasi i le isi. Na ia fetalai: “O aʻu uo outou, pe afai tou te faia mea uma lava ou te fai atu ai ia te outou. O laʻu poloaiga lenei ia te outou, ia outou fealofani.” (Ioane 15:14, 17) Lona lua, talu ai o Ieova lava ia le faatinoga o le alofa, ma ona o i tatou o ni ana tagata tapuaʻi, ua tatau ai foʻi ona tatou faataʻitaʻi ia te ia. (Efeso 5:1; 1 Ioane 4:16) Ua taʻua e le Tusi Paia faapea o le aveina i fale o le poto e uiga ia Ieova ma Iesu e faalagolago i ai le mauaina o le ola e faavavau. E faapefea ona tatou fai atu ua tatou iloa le Atua pe afai tatou te lē taumafai ia pei o ia? Na faapea mai se manatu o le aposetolo o Ioane: “O se le alofa ua le iloa e ia le Atua; auā o le Atua, o le alofa lava ia.”​—1 Ioane 4:8.

6. E faapefea ona faapaleni e le alofa tafa eseese o o tatou olaga?

⁶ E iai se māfuaaga lona tolu e tāua ai le alofa: E fesoasoani ia i tatou ina ia faapaleni ai tafa eseese o o tatou olaga ma faaopoopo mai ai uunaʻiga lelei i mea tatou te faia. Mo se faaaʻoaʻoga, e matuā tāua ona faaauau pea le aveina i fale o le poto o le Afioga a le Atua. Mo se Kerisiano, o lena poto ua pei o se meataumafa. E aogā mo ia ina ia tuputupu aʻe ai i le taʻumatuaina ma gaoioi e ōgatusa ma le finagalo o le Atua. (Salamo 119:105; Mataio 4:4; 2 Timoteo 3:15, 16) Peitaʻi ane, na lapataʻi mai Paulo: “E faafefete le poto, a o le alofa e faamafanafana lea.” (1 Korinito 8:1) E leai, e leai se mea o sesē ai le poto saʻo. O tatou lea e iai le faafitauli​—e iai o tatou faanaunauga agasala. (Kenese 8:21) Pe afai e lē o iai iinā le taaʻiga a le alofa lea na te faapaleniina mea, e mafai la e le poto ona faafefeteina ai se tagata, ma mafaufau ai e sili atu o ia na i lo isi. O le a lē tupu lena mea pe afai o loo uunaʻia moni o ia e le alofa. “E le mitamita vale le alofa, e le faafefeteina.” (1 Korinito 13:4) O se Kerisiano ua uunaʻia e le alofa e lē faamaualuga, e tusa lava po o le ā le telē o se poto ua ia te ia. O le alofa e tumau ai pea i lona lotomaulalo ma taofia o ia mai le manaʻo e fia faalialia atu o ia.​—Salamo 138:6, Iakopo 4:6.

7, 8. E faapefea ona fesoasoani le alofa ia i tatou ina ia taulaʻi ai i mea e sili atu ona tāua?

⁷ Na tusi atu Paulo i Kerisiano i Filipi: “O le mea lenei ou te tatalo ai e lē aunoa, ina ia faatuputeleina pea lava pea lo outou alofa faatasi ma le poto saʻo ma le faautauta atoatoa; ina ia outou faamautinoa i mea e sili ona tāua.” (Filipi 1:9, 10, NW) O le alofa faa-Kerisiano o le a fesoasoani ia i tatou e utagia ai lenei faalaeiauga ina ia faamautinoa i mea e sili ona tāua. Mo se faaaʻoaʻoga, manatu foʻi i upu a Paulo sa fai atu ia Timoteo: “Afai e naunau se tasi i le faiva o le epikopo, e manao o ia i le galuega lelei.” (1 Timoteo 3:1) A o faagasolo le tausaga faaleauaunaga o le 2000, na faateleina ai le aofaʻi o faapotopotoga i le lalolagi aoao i le 1,502, ma maua ai se aofaʻiga fou e 91,487. O lea la, o loo iai se manaʻoga tele mo nisi toeaina, ma ua tatou ona avatu le faamālō ia i latou o loo aapa atu mo lea faaeaga.

⁸ Ae peitaʻi, o i latou o loo aapa atu mo faaeaga taʻimua o le a latou tausisia pea se paleni lelei pe afai e teu i o latou mafaufau le fuafuaga o lena faaeaga. E lē o se mea tāua le tau ina maua o le pule pe ia taʻutaʻua le igoa. O toeaina o ē faamalieina le finagalo o Ieova ua uunaʻia i latou e le alofa mo ia ma o latou uso. Latou te lē o saʻilia se tulaga taʻutaʻua po o le pule. Ina ua uma ona fautuaina e le aposetolo o Peteru toeaina o le faapotopotoga ina ia tausisia se uiga lelei, ona ia faamamafa lea o le manaʻoga ina ia “loto maulalo.” Na ia fautuaina i latou uma i le faapotopotoga e faapea: “Ia faamaulalo . . . outou i lalo o le aai malosi o le Atua.” (1 Peteru 5:1-6) So o se tasi o loo aapa atu mo faaeaga e lelei pe a manatunatu i le faaaʻoaʻoga a le anoanoaʻi o toeaina i le lalolagi aoao o ē o loo galulue mamafa, ma lotomaulalo, ma faapea ona avea ai i latou o se faamanuiaga i a latou faapotopotoga.​—Eperu 13:7.

 Le Uunaʻiga Lelei e Fesoasoani Mai Ina ia Tatou Tumau Ai

9. Aiseā e teu ai i mafaufau o Kerisiano faamanuiaga ua folafola mai e Ieova?

⁹ E iai foʻi le isi auala ua mātauina ai le tāua o le uunaʻia e le alofa. Ia i latou o ē tuliloaina le tuutoina i le Atua ona o le alofa, ua folafolaina mai i ai e le Tusi Paia le ʻoa o faamanuiaga i le taimi nei, ma le lē mafaatusalia o faamanuiaga ofoofogia i le lumanaʻi. (1 Timoteo 4:8) O se Kerisiano e malosi lona talitonuga i nei folafolaga ma ua ia mautinoa lelei o Ieova “na te tauia mai o e matuā saili ia te ia,” ua ia maua le fesoasoani e tū mausalī ai i le faatuatua. (Eperu 11:6) O loo faananau atu le toʻatele o i tatou i le faataunuuga o folafolaga a le Atua ma toe faaleo atu moomooga o le aposetolo o Ioane e faapea: “Amene. O lea lava, le Alii e Iesu, ia e afio mai!” (Faaaliga 22:20) Ioe, o le mafaufau loloto i faamanuiaga ua teua mo i tatou pe a tatou faamaoni, e faamalosia ai i tatou ina ia tutumau, e pei lava ona teuina i le mafaufau o Iesu “le olioli sa tuu i ona luma,” lea na fesoasoani ia te ia ina ia tumau ai.​—Eperu 12:1, 2.

10, 11. E faapefea i le uunaʻia e le alofa ona fesoasoani ia i tatou ina ia tutumau?

¹⁰ Ae faapefea, pe afai e na o le pau lava le uunaʻiga moni e ala ai ona tatou auauna ia Ieova, ona o lo tatou faanaunau ia ola i le lalolagi fou? E faigofie lava la ona tatou lē onosai pe lē faamalieina pe a oo ina faigatā le tulaga o mea pe lē tutupu foʻi mea i le auala ma le taimi sa tatou faamoemoe e tutupu ai. Tatou te ono oo ai i se lamatiaga matuiā o le tafetafea ese atu. (Eperu 2:1; 3:12) Sa taʻua e Paulo sē na la auaumea faatasi i se taimi ua teʻa, o Tema lona igoa, o lē na toe alu ese mai ia te ia. Aiseā? Talu ai sa ‘manao o ia i lenei olaga.’ (2 Timoteo 4:10) So o se tasi e auauna ona o ni māfauaaga manatu faapito, ua iai o ia i se lamatiaga o le faia o lea lava mea. E ono tosina atu i latou i manuia maua vave na o loo ofo mai i le lalolagi ma oo ai ina lē toe naunau e faia ni faataulagaina i le taimi nei auā ni faamanuiaga o loo fotuaʻi mai.

¹¹ E ui ina talafeagai ma o se uiga masani le faanaunau ia maua ni faamanuiaga i le lumanaʻi ua faamoemoe ia maua se mapusaga mai puapuaga, peitaʻi o le alofa e ati aʻe ai lo tatou agaga talisapaia mo mea e tatau ona tatou faamuamuaina i o tatou olaga. O le finagalo o Ieova, ae lē o so tatou loto, o le mea lena e tāua. (Luka 22:41, 42) Ioe, e atiina aʻe i tatou e le alofa. Tatou te maua ai le lotomalie e faatalitali ma le onosai i lo tatou Atua, e lotomalie ai i so o se faamanuiaga na te foaʻi mai i le mautinoa faapea, i lana taimi atofaina o le a tatou maua ai mea uma ua ia folafola mai​—ma nisi mea se tele. (Salamo 145:16; 2 Korinito 12:8, 9) I le taimi nei, ua fesoasoani le alofa ia i tatou ina ia faaauau ai ona tatou auauna ma le lē manatu faapito auā o le “alofa . . . e le sailia e ia ana lava mea.”​—1 Korinito 13:4, 5.

O Ai e Tatou Ona Alolofa i ai Kerisiano?

12. E tusa ai o fetalaiga a Iesu, o ai e tatau ona tatou alolofa atu i ai?

¹² Na tuuina mai e Iesu se poloaʻiga faalauaʻitele i le po o ai e tatau ona tatou alolofa i ai ina ua ia toe sii mai faamatalaga e lua mai le Tulafono faa-Mose. Na ia fetalai: “E te alofa atu i le Alii lou Atua ma lou  loto atoa, ma lou agaga atoa, ma lou manatu atoa” ma le, “E te alofa atu i lē te tuaoi, ia pei o oe lava ia te oe.”​—Mataio 22:37-39.

13. E faapefea ona tatou aʻoaʻo ina ia alolofa ia Ieova, e ui lava e lē o mafai ona tatou vaaia o ia?

¹³ Mai fetalaiga a Iesu, ua manino ai o le mea muamua lava ma le sili o le tatau lea ona tatou alolofa atu ia Ieova. Ae peitaʻi, tatou te leʻi fananau mai ma se alofa ua uma ona faatupuina atoatoa mo Ieova. O se mea e ao ona tatou atiina aʻe. Ina ua tatou faatoʻā faalogo e uiga ia te ia, sa tatou tosina atu ia te ia ona o mea sa tatou faalogo ai. Ona faasolosolo mālie lava lea ona tatou aʻoaʻoina le auala sa ia sauniunia ai le lalolagi mo tagata. (Kenese 2:5-23) Ua tatou aʻoaʻoina le auala o loo ia feutagaʻi mai ai i tagata, e na te leʻi lafoaʻia i tatou ina ua faatoʻā ulufale mai le agasala i le aiga faaletagata, ae na ia āuāuaʻi mai laasaga ina ia togiolaina ai i tatou. (Kenese 3:1-5, 15) Sa ia feutagaʻi i le agalelei ma i latou o ē na faamaoni, ma mulimuli ane ona ia saunia mai lea o lona Alo pele e toʻatasi mo le faamagaloina o a tatou agasala. (Ioane 3:16, 36) O lenei poto o loo faateleina ua faatupuina ai pea lo tatou talisapaia mo Ieova. (Isaia 25:1) Na taʻua e le tupu o Tavita faapea sa ia alofa ia Ieova ona o Lana tausiga alofa. (Salamo 116:1-9) I aso nei, o loo tausi mai Ieova ia i tatou, na te taʻitaʻia i tatou, na te faamalosiauina i tatou ma faalaeiauina i tatou. O le tele o lo tatou aʻoaʻoina o mea e uiga ia te ia, o le loloto foʻi lena e oo i ai lo tatou alofa.​—Salamo 31:23; Sefanaia 3:17; Roma 8:28.

E Faapefea Ona Tatou Faaalia Atu lo Tatou Alofa?

14. I le ā le auala e mafai ona tatou faaalia ai e moni aʻiaʻi lo tatou alofa i le Atua?

¹⁴ O le mea moni, e toʻatele tagata i itu e fia o le lalolagi ua faapea mai e alolofa i le Atua, ae o le auala latou te gaoioi ai ua tuufaafeagai ma lo latou manatu. E faapefea ona tatou iloa tatou te alolofa moni lava ia Ieova? E mafai ona tatou talanoa atu ia te ia i le tatalo ma taʻua ia te ia o tatou faalogona. Ma e mafai ona tatou gaoioi i se auala e faaalia atu ai lo tatou alofa. Na faapea mai le aposetolo o Ioane: “O lē tausi i afioga [a le Atua], e moni, ua atoatoa le alofa i le Atua i totonu ia te ia. O le mea lea ua tatou iloa ai o i totonu ia te ia i tatou.” (1 Ioane 2:5; 5:3) Faatasi ma le tele o isi faamatalaga, ua taʻu mai e le Afioga a le Atua ia i tatou ina ia auaumea faatasi ma ola i ni olaga mamā, ma amioga tatou. Tatou te ʻalofia le pepelo, ae tautala i le upu moni, ma tausia ia mamā o tatou mafaufauga. (2 Korinito 7:1; Efeso 4:15; 1 Timoteo 1:5; Eperu 10:23-25) Tatou te faaalia le alofa e ala i le foaʻi atu o le fesoasoani faaletino ia i latou o manaʻomia. (1 Ioane 3:17, 18) Ma tatou te lē foʻi i le taʻuina atu i isi o mea e uiga ia Ieova. E aofia ai le faia o se sao i le talaʻiina i le lalolagi aoao o le tala lelei i le Malo. (Mataio 24:14; Roma 10:10) O le usiusitai i le Afioga a le Atua i mea faapena e faamaonia atu ai le moni aʻiaʻi o lo tatou alofa ia Ieova.

15, 16. Na faapefea i le alofa mo Ieova ona aafia ai le tele o ola i le tausaga talu ai?

¹⁵ O le alofa mo Ieova e fesoasoani i tagata ina ia latou faia ai ni faaiʻuga lelei. I le tausaga ua mavae, na uunaʻia ai e lena alofa le toʻa 288,907 tagata ina ia tuuina atu o latou ola ia te ia ma faailogaina lena faaiʻuga e le papatisoga i le vai. (Mataio 28:19, 20) Sa uigā lo latou tuuina atu. Na faailogaina ai se suiga i o latou olaga. Mo se faaaʻoaʻoga, sa avea Gazmend o se tasi o tagata taʻutaʻua i le pasiketipolo i Alapania. Mo ni tausaga, sa la suʻesuʻe ai ma lana avā le Tusi Paia ma e ui lava i toʻatugā ae na mulimuli ane agavaa i laʻua e avea ma tagata talaʻi o le Malo. I le tausaga na teʻa nei, na papatisoina ai Gazmend, o se tasi o le toʻa 366 na papatisoina i Alapania i le tausaga faaleauaunaga o le 2000. Na lomia e se nusipepa se tala e faatatau ia te ia ma  taʻua ai faapea: “Ua iai se fuafuaga o lona olaga, ma ona o lenei fuafuaga, ua olioli ai o ia ma lona aiga i aso sili ona fiafia o lo latou olaga. Ua lē o toe tāua ia te ia le iloa po o le ā se tele o ni mea aogā e mafai ona ia maua mai, ae na i lo lea, po o le ā se tele o ni mea e mafai ona ia foaʻi atu e fesoasoani ai i isi tagata.”

¹⁶ Sa faapena foʻi i se tuafafine faatoʻā papatiso, o lē faigaluega mo se kamupani suāuu i Guam, ona ia fesagaʻi ma se ofo sa tofotofoina ai. Ina ua mavae le tele o tausaga o siisii pea i luga lona tulaga faatasi ai ma se totogi lelei, na iʻu lava ina ofoina ane ia te ia se avanoa e avea ai o se tamaʻitaʻi muamua i le talafaasolopito o le kamupani ua tofia e avea ma o latou sui peresitene. Peitaʻi ane, o le taimi lena ua tuuina atu ai lona ola ia Ieova. Ina ua māeʻa la ona talanoaina mataupu ma lana tane, sa teena loa e le tuafafine fou le ofo ae na i lo lea, sa ia fuafua mo sana galuega faavaitaimi ina ia mafai ai ona ia agaʻigaʻi i luma e avea ma faifeʻau faataimi atoa, o se paeonia. O le alofa mo Ieova na uunaʻia ai o ia e manaʻo ina ia auauna ia te ia o se paeonia na i lo le tulituliloaina o manaʻoga tau tupe o lenei lalolagi. O le mea moni, i le lalolagi aoao, o lena alofa na uunaʻia ai le toʻa 805,205 o tagata ina ia faia so latou sao i vala eseese o le faiva faapaeonia a o faagasolo le tausaga faaleauaunaga o le 2000. Maʻeu se faailoaga o le alofa ma le faatuatua na faia e na paeonia!

Sa Uunaʻia e Alofa ia Iesu

17. O le ā le faaaʻoaʻoga lelei o le alofa ua tatou vaaia ia Iesu?

¹⁷ O Iesu le faaaʻoaʻoga ofoofogia o se tasi na uunaʻia e le alofa. I lona uluaʻi soifuaga a o leʻi avea ma tagata, sa ia alofa atu ai i lona Tamā ma alofa mai i tagata. I lona avea o le faatinoga o le atamai, na ia fetalai ai: “Na ou i ai ma [Ieova], o aʻu o le tufuga; na fai foi aʻu mona fiafia i lea aso ma lea aso; sa ou olioli i ona luma i aso uma lava. Sa ou olioli i mea e mau ai tagata i lona lalolagi; o loʻu fiafia foi, sa i le fanau o tagata lea.” (Faataoto 8:30, 31) O le alofa o Iesu na uunaʻia ai o ia e tuua lona afioʻaga i le lagi ae la fanau mai o se tamameamea. Sa ia feutagaʻi i le onosai ma le agalelei ma ē agamalu ma ē faatauvaa ma sa faapuapuagatia foʻi o ia e fili o Ieova. Ma le mea mulimuli, na maliu o ia mo tagata uma i luga o le laau faaoosala. (Ioane 3:35; 14:30, 31; 15:12, 13; Filipi 2:5-11) Maʻeu se faaaʻoaʻoga lelei o uunaʻiga saʻo!

18. (a) E faapefea ona tatou atiina aʻe le alofa mo Iesu? (e) I le ā auala tatou te faaalia ai tatou te alolofa ia Iesu?

¹⁸ Pe afai e faitau e i latou e saʻo o latou loto tala  i le soifuaga o Iesu lea e i Evagelia ma manatunatu loloto ai i le tele o faamanuiaga ua latou mauaina ona o lona soifuaga faamaoni, ona faapogaia ai lea e lenei mea le tuputupu aʻe i o latou loto o se alofa loloto mo ia. Ua faapei i tatou i aso nei o ē na faasino atu i ai upu a Peteru ina ua ia faapea atu: “Tou te le iloa atu [Iesu], a ua alolofa ia te ia.” (1 Peteru 1:8, LF) E faaalia lo tatou alofa pe a tatou faaalia le faatuatua ia te ia ma faaaʻoaʻo i lona olaga faataulagaina totino. (1 Korinito 11:1; 1 Tesalonia 1:6; 1 Peteru 2:21-25) Ia Aperila 19, 2000, sa faamanatu atu ai i se aofaʻiga e 14,872,086, a tatou māfuaaga e alolofa ai ia Iesu ina ua latou auai atu i le Faamanatuga faaletausaga o lona maliu. Maʻeu sea aofaʻiga tele! Ma e maʻeu le faalaeiauina o le iloa e toʻatele naʻuā i latou o loo naunau i le faaolataga e ala mai i le togiola a Iesu! E moni lava, ua atiina aʻe i tatou e le alofa o Ieova ma Iesu ia i tatou faapea foʻi ma lo tatou alofa mo i laʻua.

19. O ā fesili e uiga i le alofa o le a tatou talanoaina i le mataupu o loo sosoo mai?

¹⁹ Na fetalai Iesu e tatau ona tatou alolofa atu ia Ieova ma o tatou lotoatoa, agaga atoa, mafaufau atoa, ma le malosi atoa. Ae na ia fetalai mai foʻi, e tatou ona tatou alolofa atu i o tatou tuaoi e pei ona tatou alolofa ia i tatou lava. (Mareko 12:29-31) O ai e aofia ai i lenei mea? Ma e faapefea i le alofa i tuaoi ona fesoasoani ia i tatou e tausisia ai se paleni lelei ma se uunaʻiga tatau? O fesili nei o le a talanoaina i le mataupu o loo sosoo mai.

Pe E te Manatua?

• Aiseā ua avea ai le alofa o se uiga e matuā tāua?

• E faapefea ona tatou aʻoaʻo ina ia alolofa ia Ieova?

• E faapefea ona faamaonia atu i a tatou amio e tatou te alolofa ia Ieova?

• E faapefea ona tatou faaalia atu lo tatou alofa mo Iesu?

[Fesili mo le Suʻesuʻega]

[Ata i le itulau ]

E aogā le alofa ia i tatou ina ia faatalitali ai ma le onosai mo se mapusaga

[Ata i le itulau ]

O le taulaga sili a Iesu e uunaʻia ai i tatou e alolofa ia te ia