Aiseā e Atiina Aʻe ai le Amio Lelei?

NA MALAGA atu Kunihito o se tamāloa Iapani e faamatuā tagata ma nofo mau i le Iunaite Setete. * I ni nai vaiaso talu ona ia taunuu, na oo totino ai lava o ia i ni tulaga sa ono āfaina ai lana galuega. Ua faamatala mai e Kunihito e faapea: “Ina ua fesili mai loʻu pule ia te aʻu pe faamata e mafai ona ou tauaveina se tasi o tiute tauave patino, sa ou lagona le mautinoa atoatoa e uiga i le taliaina. Peitaʻi, ona sa tausia aʻe aʻu ma se vaaiga i le agamalu o se vala o le amio lelei, na ou tali atu ai: ‘Ou te lē mautinoa pe mafai ona ou faia, ae o le a ou taumafai i le mea silisili ou te mafaia.’ Pe a tuu atu la i le manatu o loʻu pule Amerika, e foliga mai ou te lē agavaa ma ou te lē o mautinoa foʻi i ai. Ina ua ou iloaina lena mea, na ou manatu ai e moomia ona ou faia ni fetuutuunaʻiga.”

O Maria, o lē e aumau i le Aai o Niu Ioka, sa avea o se tagata aʻoga lelei tele, e masani lava ona fiafia e fesoasoani i ana aumea i le aʻoga. O Juan o se aumea aʻoga o lē na te talosagaina i nisi taimi le fesoasoani a Maria. Ae sa ia faaalia foʻi le alofa fetosinaaʻi i le vā o ituaiga ia te ia ma taumafai e faatosina o ia. E ui lava i le faanaunauga o Maria ina ia tumau ona mamā tau amio, ae na lolo atu o ia i faatosinaga a Juan ma aafia ai i amioga lē mamā faaleituaiga.

O le mea moni o se luʻi le faaalia o le amio lelei i aso nei i le lalolagi e eseese ana aganuu ma amioga ua matuā leaga lava. O lea, aiseā e atiina aʻe ai le amio lelei? Talu ai o amioga lelei e faamalieina ai le Atua, ma o le toʻatele o i tatou e faanaunau e maua lona finagalo malie.

Ua apoapoaʻi mai le Afioga a le Atua, le Tusi Paia, i lana ʻaufaitau ina ia atiina aʻe le amio lelei. Mo se faaaʻoaʻoga, na tusi le aposetolo o Paulo e faapea: “Afai foi o se isi amio lelei, po o se tasi mea e viia, ia outou manatunatu i ia lava mea.” (Filipi 4:8) Ma ua augani mai le aposetolo o Peteru ia i tatou ina ia ‘faaopoopoina le amio lelei i lo tatou faatuatua.’ (2 Peteru 1:5) Ae o le ā le amio lelei? Faamata e mafai ona aʻoaʻoina i se potu aʻoga? E mafai faapefea ona tatou atiina aʻe?

[Faamatalaga pito i lalo]