Ia Ō Faatasi Pea ma le Faalapotopotoga a Ieova
Ia Ō Faatasi Pea ma le Faalapotopotoga a Ieova
“O le Atua e ona le manuia [“filemu,” NW]. . . ia faaatoatoaina outou e ia i galuega lelei uma lava, ina ia outou faia lona finagalo.”—EPERU 13:20, 21.
1. O le ā le faitau aofaʻi o tagata o le lalolagi, ma e toʻafia ua faitauina o ni sui o nisi lotu?
I LE tausaga e 1999, na ausia ai e le faitau aofaʻi o tagata o le lalolagi le ono piliona! Ua taʻua e le tusi The World Almanac e faapea, mai lenei aofaʻiga, e tusa ma le 1,165,000,000 tagata Musalimi; e 1,030,000,000 Katoliko Roma; e 762,000,000 tagata Hinitū; e 354,000,000 tagata lotu Puta; e 316,000,000 Porotesano; ma le 214,000,000 o tagata o le lotu Orthodox.
2. O le ā e mafai ona fai atu ai e faatatau i le tulaga o loo iai lotu i aso nei?
2 Pe a fua atu i fevaevaeaʻiga ma fenuminumiaʻiga faalotu o loo iai i aso nei, pe mafai ea e lenei faitau miliona o tagata ona gaoioi ia ōgatasi ma le finagalo o le Atua? E leai, “auā o le Atua, e le o le Atua ia o le faasoesa, a o le filemu.” (1 Korinito 14:33) Ae faapefea le ʻauuso faava-o-atunuu o auauna a Ieova? (1 Peteru 2:17) O se saʻiliʻiliga faaeteete ua faamaonia ai ‘e faaatoatoaina i latou e le Atua e ona le filemu i galuega lelei uma lava, ina ia faia lona finagalo.’—Eperu 13:20, 21.
3. O le ā na tupu i Ierusalema i le Penetekoso 33 T.A., ma aiseā?
3 O le mea moni lava, o le aofaʻiga o i latou o loo auaufaatasi ma Molimau a Ieova e lē o se tulaga lea e faamautinoa ai pe o finagalo malie mai le Atua ia i latou; e lē faaofoina le Atua i ni faatelega o aofaʻiga o iai. Na te leʻi filifilia le fanauga a Isaraelu ona sa “sili ona toatele” i nuu uma. O le mea moni lava, o i latou na “sili ona toaitiiti” i nuu uma. (Teuteronome 7:7) Peitaʻi na faamaonia le lē faamaoni o Isaraelu, o lea, i le Penetekoso 33 T.A., na aveese mai ai e Ieova lona finagalo malie ae tuuina atu i le faapotopotoga fou sa faia aʻe i soo o Iesu Keriso. Sa faauuina i latou i le agaga paia o Ieova ma ō atu ai ma le maelega e faalauiloa i isi upu moni e uiga i le Atua ma Keriso.—Galuega 2:41, 42.
O Loo Agaʻigaʻi Pea i Luma
4. Aiseā o le a e faapea mai ai sa agaʻigaʻi pea i luma le uluaʻi faapotopotoga Kerisiano?
4 I le uluaʻi senituri, sa agaʻigaʻi pea i luma le faapotopotoga Kerisiano, sa tatalaina oganuu fou, sa faia soo, ma maua le malamalama faateleina i fuafuaga a le Atua. Sa ō faatasi pea uluaʻi Kerisiano ma le malamalama faaleagaga lea na saunia e ala mai i tusi na faagaeeina tauatua. I le faagaeetia i asiasiga a le ʻauaposetolo ma isi, sa latou faaiʻuina la latou faiva. Ua matuā faamaonia lelei mai nei mea i Tusitusiga Kerisiano Eleni.—Galuega 10:21, 22; 13:46, 47; 2 Timoteo 1:13; 4:5; Eperu 6:1-3; 2 Peteru 3:17, 18.
5. Aiseā o loo agaʻigaʻi ai i luma le faalapotopotoga a le Atua i aso nei, ma aiseā e tatau ai ona tatou ō faatasi pea ma lea faalapotopotoga?
5 I le pei o uluaʻi Kerisiano, e faapena foʻi ni amataga toʻalaiti na tuputupu mai ai Molimau a Ieova i ona po nei. (Sakaria 4:8-10) Talu mai le faaiʻuga o le lona 19 senituri, ua matuā manino mai le iai o le agaga o le Atua i lana faalapotopotoga. Ona o loo tatou faalagolago atu, e lē i le malosi faaletagata, ae i le taʻitaʻiga a le agaga paia, ua faaauau ai ona tatou agaʻigaʻi i luma i lo tatou malamalamaga i le Tusi Paia ma i le faia o le finagalo o le Atua. (Sakaria 4:6) O lenei la ua tatou iai i “aso e gata ai,” e matuā tāua ai ona tatou ō faatasi pea ma le faalapotopotoga o loo agaʻigaʻi i luma a Ieova. (2 Timoteo 3:1-5) O le faia faapea e mafai ai ona tatou faaolaolaina pea lo tatou faamoemoe ma auai i le avatuina o se molimau e uiga i le Malo ua faavaeina o le Atua, a o leʻi oo mai le iʻuga ma aveesea ai lenei faiga o mea.—Mataio 24:3-14.
6, 7. O ā vala e tolu o le a tatou talanoaina lea ua agaʻigaʻi ai i luma le faalapotopotoga a Ieova?
6 O loo tatou iai faatasi ma i latou na amata ona auaufaatasi ma le faalapotopotoga a Ieova i vaitausaga na amata mai le 1920, 1930, ma le 1940. I tuā i na uluaʻi tausaga, o ai o i tatou na ʻiluʻilu ma talotalo o le a iai se faatelega mataʻina ma se tuputupu aʻe faasolosolo o le faalapotopotoga e pei ona oo mai i aso nei? Seʻi manatu i mea mataʻina na tutupu lea ua oo mai i lo tatou talafaasolopito i ona po nei! E matuā tauia moni ai lava faaleagaga, pe a toe tomanatu i mea ua faataulauina e Ieova e ala mai i ona tagata ua faamaopoopoina faatiokarate.
7 Sa matuā maofa lava Tavita o aso anamua a o ia manatunatu i galuega ofoofogia a Ieova. Na ia faapea mai: “E le mafai ona laulauina atu ai ia te oe; ou te fia faailoa ma tautala i ai, a e le mafaitaulia lava.” (Salamo 40:5) E faapena foʻi le gata mai o se tomai o loo ia i tatou, e lē o mafai ona tatou faamatalatalaina le anoanoaʻi o galuega tetele ma le viiviia o loo faia e Ieova i o tatou aso. E ui i lea, seʻi o tatou talanoaina vala e tolu ua agaʻigaʻi ai i luma le faalapotopotoga a Ieova: (1) le malamalama auiluma faaleagaga, (2) le faiva ua faaleleia atili ma faalauteleina, ma le (3) o fetuutuunaʻiga i taimi talafeagai i taualumaga a le faalapotopotoga.
Lotofaafetai mo le Malamalama Faaleagaga
8. I le ōgatusa ma le Faataoto 4:18, o le ā ua mafai ona tatou iloa e faatatau i le Malo, talu ai le malamalama faaleagaga?
8 Ua moni le Faataoto 4:18 e tusa ai o le malamalama auiluma faaleagaga. O loo faapea mai: “O le ala o e amiotonu, e tusa ia ma le malamalama o le ao, o loo tupu pea lona malamalama e oo i le tutonu o le la.” Maʻeu so tatou lotofaafetai ona o le malamalama auiluma faaleagaga lea ua tatou tofo i ai! I le tauaofiaga i Cedar Point, Ohio, i le 1919, sa faamatilatila ai le Malo o le Atua. E faaaogā e Ieova le Malo e faapaiaina lona suafa ma faaeaeaina lana pule silisili ese. O le mea moni, o le malamalama faaleagaga ua mafai ai ona tatou iloa e mai lava i le Kenese e oo atu i le Faaaliga, o loo molimau ai le Tusi Paia i le fuafuaga a Ieova ina ia faapaiaina lona suafa e ala mai i le Malo ua pulea e lona Alo. O iinā o loo iai le faamoemoe sili mo ē uma e alolofa i le amiotonu.—Mataio 12:18, 21.
9, 10. I tausaga e amata mai le 1920, o le ā na aʻoaʻoina ai e faatatau i le Malo ma e faatatau i faalapotopotoga feteenaʻi e lua, ma ua faapefea ona aogā lenei mea?
9 I le tauaofiaga i Cedar Point i le 1922, na uunaʻia ai e le failauga autū, o J. F. Rutherford, tagata o le Atua ina ia “faalauiloa, faalauiloa, faalauiloa, le Tupu ma lona malo.” I le mataupu “Fanau Mai o le Nuu,” sa lomia i le Watch Tower o Mati 1, 1925, na tataʻi atu ai manatu i se malamalamaga faaleagaga e faatatau i valoaga sa faasino atu i le faavaeina o le Malo o le Atua i le 1914. Sa mātauina ai foʻi i vaitausaga na amata mai i le 1920 e faapea, e lua ni faalapotopotoga feteenaʻi—le faalapotopotoga a Ieova ma le faalapotopotoga a Satani. O loo iai se feteenaʻiga i lo la vā, ma e na o le pau le auala e mafai ai ona tatou iai i le itu manumalo pe afai tatou te ō faatasi pea ma le faalapotopotoga a Ieova.
10 Ua faapefea ona aogā ia i tatou lenei malamalama faaleagaga? Talu ai o le Malo o le Atua ma le Tupu o Iesu Keriso e lē ni ō le lalolagi, e lē o i tatou foʻi la o se vaega o le lalolagi. E ala i lo tatou vavae ese pea mai le lalolagi, ua faaalia ai o loo tatou i le itu a le upu moni. (Ioane 17:16; 18:37) Pe a tatou mātauina faafitauli lavelave o loo pagatia ai lenei faiga o mea amioleaga, maʻeu so tatou lotofaafetai ona o le leai o sa tatou vaega i le faalapotopotoga a Satani! Ma e maʻeu le alofagia o i tatou i le mauaina o le saogalemu faaleagaga i totonu o le faalapotopotoga a Ieova!
11. O le ā le igoa faale-Tusi Paia sa taliaina e tagata o le Atua i le 1931?
11 I le tauaofiaga i Columbus, Ohio, i le 1931, na fai ai se faatatauga talafeagai o le Isaia 43:10-12. Sa talia ai e Tagata Aʻoga o le Tusi Paia le igoa iloga o Molimau a Ieova. Maʻeu se faaeaga sili o le faalauiloa atu o le suafa o le Atua ina ia mafai ai e isi ona latou valaau atu i ai ma mafai ai ona faaolaina!—Salamo 83:18; Roma 10:13.
12. O le ā le malamalama faaleagaga e faatatau i le motu o tagata e toʻatele na saunia mai i le 1935?
12 A o leʻi oo i vaitausaga na amata mai le 1930, e toʻatele tagata o le Atua sa tau lē mautonu e uiga i lo latou faamoemoe mo le olaga i le lumanaʻi. O nisi sa mafaufau i le olaga faalelagi ae sa tosina foʻi o latou mafaufau i aʻoaʻoga a le Tusi Paia e uiga i se lalolagi parataiso. I le tauaofiaga i Washington, D.C., i le 1935, sa faagaeetia ai ina ua aʻoaʻoina faapea o le vao tele o tagata, po o le motu o tagata e toʻatele, o loo taʻua i le Faaaliga mataupu e 7, o se vasega e iai le faamoemoe faalelalolagi. Talu mai lena taimi, ua matuā televave ai ona faateleina le agaʻi i luma o le aoaoina o le motu o tagata e toʻatele. Pe tatou te lē lotofaafetai ea ona ua lē o toe lilo ia i tatou le faailoaina mai o le motu o tagata e toʻatele? O le tulaga moni o tagata ua aoaoina i ni aofaʻiga tetele mai atunuu uma, o ituaiga, ma gagana ua uunaʻia ai i tatou ina ia tatou galulue ma le faamalolosi a o ō faatasi pea ma le faalapotopotoga a Ieova.
13. O le ā le finauga sili sa faamatilatila mai i le tauaofiaga i St. Louis i le 1941?
13 O le finauga sili e ao ona manatu mamafa i ai tagata o lea sa faamatilatila mai i le tauaofiaga i St. Louis, Missouri, i le 1941. O le pule lea i le aoao o mea, po o le pule silisili ese. O le finauga lenei e ao ona vave faaleleia, ma ua matuā faaloloʻi mai lava le aso sili ma le mataʻutia e faatinoina ai lena fuafuaga! I le 1941 na aumaia ai foʻi i lumamea le finauga i le faamaoni lea e fesootaʻi atu i ai, lea ua tatou maua ai le avanoa e faaalia ai po o fea tatou te taʻitoʻatasi ma tutū ai e faatatau i le pule silisili ese a le Atua.
14. I le tauaofiaga faava-o-atunuu i le 1950, o le ā na aʻoaʻoina ai e faatatau i alii na e taʻua i le Isaia 32:1, 2?
14 I le tauaofiaga faava-o-atunuu i le 1950 lea na tauaofia i le Aai o Niu Ioka, sa faailoa tonu mai ai alii na e taʻua i le Isaia 32:1, 2. Sa avea o se taimi na matuā faagaeetia ai ina ua lauga atu le uso o Frederick Franz i lenei mataupu ma faamatala mai faapea, o loo iai faatasi ma i tatou i aso nei ē o le a avea ma alii o le lalolagi fou. I lena tauaofiaga ma isi tauaofiaga na sosoo atu ai, sa faasusulu mai ai le anoanoaʻi o isi malamalama faaleagaga. (Salamo 97:11) Maʻeu so tatou lotofaafetai ona o lo tatou ala “e tusa ia ma le malamalama o le ao, o loo tupu pea lona malamalama”!
Agaʻi i Luma i la Tatou Faiva
15, 16. (a) Na faapefea ona tatou agaʻi i luma i la tatou faiva a o faagasolo vaitausaga e amata mai le 1920 ma le 1930? (e) O ā lomiga ua uunaʻia malosi ai le faiva faa-Kerisiano i ni sefulu tausaga talu ai?
15 O le auala lona lua ua agaʻi ai i luma le faalapotopotoga a Ieova e fesootaʻi lea ma la tatou galuega autū—le talaʻia o le Malo ma le faia o soo. (Mataio 28:19, 20; Mareko 13:10) Ina ia faataunuuina lenei galuega, ua faamamafa mai ai pea ia i tatou e le faalapotopotoga le tāua o le faalauteleina atu o la tatou faiva. I le 1922, na faalaeiauina ai Kerisiano uma ina ia auai i le galuega talaʻi. Sa tuu i le tagata lava ia e faasusulu atu lona malamalama ma faia sana vaega totino i le avatuina o se molimau i le upu moni. (Mataio 5:14-16) I le 1927 na faia ai fuafuaga ina ia faaavanoa le Aso Sa mo le faiva i le fanua. E amata mai ia Fepuari i le 1940, na avea ai o se mea masani le vaaia o Molimau i auala i vaipanoa o pisinisi o loo ofoina atu Le Olomatamata ma le Consolation (ua taʻua nei o le Ala Mai!).
16 O le tausaga e 1937 na faalauiloa mai ai le tamaʻitusi o le Model Study, sa faamamafa ai le manaʻoga mo le faia o toe asiga ina ia aʻoaʻoina ai isi i upu moni o le Tusi Paia. I tausaga na sosoo ai, sa matuā faamamafa ai lava le faia o suʻesuʻega faale-Tusi Paia. Sa uunaʻia malosi lenei vala o le faiva e ala i le lolomia o le tusi “Let God Be True” i le 1946 ma O Le Upu Moni E Taʻitaʻi Ai I Le Ola Faavavau i le 1968. I le taimi nei, o loo tatou faaaogāina le tusi o Le Poto e Taʻitaʻia ai i le Ola e Faavavau. O le talanoaina o na tusi ua faataatia ai se faavae mautū faale-Tusi Paia mo le faia o soo.
Agaʻi i Luma Faatasi ma Fetuutuunaʻiga a le Faalapotopotoga
17. I le ōgatusa ma le Isaia 60:17, ua faapefea ona agaʻi i luma le faalapotopotoga a Ieova?
17 O le auala lona tolu ua agaʻi ai i luma le faalapotopotoga a Ieova e faasino atu lea i fetuutuunaʻiga a le faalapotopotoga. E tusa ai o le Isaia 60:17, na folafola mai e Ieova: “Ou te aumaia le auro e sui aʻi le ʻapa memea; ou te aumaia foi le ario e sui aʻi le uamea, ma le ʻapa memea e sui aʻi laau, ma uamea e sui aʻi maa; e avea foi e aʻu ou alii [ovasia] ia filemu, ma ou faipule ia amiotonu.” I le ōgatasi ma lenei valoaga, ua faia ai ni fuafuaga ina ia faaleleia atili le vaavaaiga o le galuega talaʻi o le Malo ma le leoleoina o le lafu mamoe.
18, 19. O ā fetuutuunaʻiga a le faalapotopotoga ua iai a o faagasolo mai tausaga?
18 I le 1919 na tofia ai se tagata e avea ma faatonu o le auaunaga i faapotopotoga taʻitasi ia sa talosagaina ina ia faamaopoopoina mo le auaunaga i le fanua. O lenei faatulagaga na uunaʻia malosi ai la tatou faiva i le fanua. Na faamuta le toe palotaina o toeaina ma tiakono i le 1932, ma faailogaina ai lo tatou see ese mai faiga faatemokalasi. O le isi laasaga mataʻina na ausia i le 1938, ina ua amata ona tofia auauna uma i le faapotopotoga i se faiga e sili atu ona tali tutusa ma fuafuaga mo tofiga faatiokarate i le faapotopotoga a uluaʻi Kerisiano. (Galuega 14:23; 1 Timoteo 4:14) O le 1972 na tofia ai ovasia ma auauna o le faiva e auauna, e pei ona sa faia e na tane i le vaitaimi o uluaʻi Kerisiano. Na i lo le iai na o se tane e toʻatasi e auauna o se ovasia o se faapotopotoga, ae i le Filipi 1:1 ma isi mau ua faailoa mai ai faapea o i latou o loo ausia agavaa faale-Tusi Paia mo ovasia e ao ona faia aʻe ai se ‘autoeaina.—Galuega 20:28; Efeso 4:11, 12.
19 I le 1975 na faia ai se fuafuaga mo komiti a le Vaega Pule o Molimau a Ieova latou te vaavaaia galuega a le faalapotopotoga a le Atua i le lalolagi aoao. Sa tofia Komiti o Lālā latou te vaavaaia le galuega i oganuu o loo latou iai. Talu mai lena taimi, ua uaʻi atu ai manatu i le faafaigofieina o le galuega i ofisaulu ma i lālā a le Sosaiete o le Olo Matamata ina ia “faamautinoa i mea e sili ona tāua.” (Filipi 1:9, 10, NW) Ua tuu atu i leoleo mamoe lagolago a Keriso tiute tauave e aofia ai le taʻimua i le galuega faaevagelia, le aʻoaʻo atu i totonu o le faapotopotoga, ma le leoleoina lelei o le lafu mamoe a le Atua.—1 Timoteo 4:16; Eperu 13:7, 17; 1 Peteru 5:2, 3.
Le Taʻitaʻiga Olaola a Iesu
20. O le ō faatasi pea ma le faalapotopotoga a Ieova e manaʻomia ai ona tatou amanaʻia le ā e faatatau i le tulaga o Iesu?
20 O le ō faatasi pea ma le faalapotopotoga auiluma a Ieova e manaʻomia ai lo tatou amanaʻia o le matafaioi a Iesu Keriso na tofia i ai e le Atua, e avea ma ‘ulu o le ekalesia.’ (Efeso 5:22, 23) E lelei foʻi ona mātau le Isaia 55:4, lea o loo taʻu mai ai ia i tatou e faapea: “Faauta, ua ou [Ieova] avatua o ia e fai ma molimau i le nuu, o le taʻimua ma le pule i le nuu.” E silafia lelei lava e Iesu le auala e fai ai lana taʻitaʻiga. E na te silafia foʻi ana mamoe ma a latou galuega. O le mea moni, ina ua ia asiasia faapotopotoga e fitu i Asia Itiiti, e faalima ona ia fetalai mai: “Ua ou iloa au galuega.” (Faaaliga 2:2, 19; 3:1, 8, 15) E silafia foʻi e Iesu o tatou manaʻoga, e pei ona silafia mai e lona Tamā, o Ieova. A o leʻi tuuina mai le Tatalo Faaaʻoaʻo, na fetalai Iesu: “Ua silafia e lo outou Tamā mea ua outou matitiva ai, a o lei ole atu outou ia te ia.”—Mataio 6:8-13.
21. Ua faapefea ona faatino le taʻitaʻiga a Iesu i totonu o le faapotopotoga Kerisiano?
21 Ua faapefea ona faatino le taʻitaʻiga a Iesu? O se tasi o auala, e ala mai i ovasia Kerisiano, o “mea alofa i tagata.” (Efeso 4:8) O loo taʻua i le Faaaliga 1:16 faapea o ovasia faauuina o loo i le aao taumatau o Keriso, i lalo o lana taʻitaʻiga. I aso nei, o loo faatonutonu e Iesu le faatulagaga mo toeaina, e tusa lava po o na tane ua ia i latou le faamoemoe faalelagi po o le faamoemoe i le lalolagi. E pei ona faamatalaina i le mataupu na muamua atu, ua tofia i latou e le agaga paia i le ōgatusa ma agavaa faale-Tusi Paia. (1 Timoteo 3:1-7; Tito 1:5-9) I le uluaʻi senituri, sa faia aʻe ai le vaega pule i se vaega o tane matutua i Ierusalema, ina ia latou vaavaaia faapotopotoga ma le galuega talaʻi o le Malo i se tulaga lautele. O le ata foʻi lena o loo mulimuli ai le faalapotopotoga a Ieova i aso nei.
Ia Ō Faatasi Pea!
22. O le ā le fesoasoani ua saunia e le Vaega Pule?
22 O manaʻoga o le Malo i luga o le lalolagi ua faatuatuaina atu i tausiga a “le auauna faamaoni ma le mafaufau,” lea ua avea ai ma sui le Vaega Pule o Molimau a Ieova. (Mataio 24:45-47) O le naunautaʻiga autū lava o le Vaega Pule ina ia saunia mai faatonuga ma taʻiala faaleagaga mo le faapotopotoga Kerisiano. (Galuega 6:1-6) Ae peitaʻi, pe a aafia uso tapuaʻi i mala faalenatura, ona talosagaina lea e le Vaega Pule se sosaiete po o ni sosaiete ua lesitalaina faaletulafono ina ia latou saunia fesoasoani laveaʻi ma ia toe faaleleia pe toe fausia fale ma Maota o le Malo ua faatamaʻia. Pe afai e iai ni Kerisiano ua faia i ai ni faiga inainā po ua sauāina, ona uia lea o ni laasaga e faamalosia ai lo latou itu faaleagaga. Ma i “ona aso e le taugalemu ai,” ua faia taumafaiga uma ina ia faamautinoa o loo agaʻigaʻi pea i luma le galuega talaʻi.—2 Timoteo 4:1, 2.
23, 24. E ui lava po o ā mea e oo mai i tagata o Ieova, ae o le ā e faaauau pea ona ia saunia maia, ma o le ā la tatou filifiliga maumauaʻi e tatau ona iai?
23 E tusa lava po o ā mea e oo mai i tagata o Ieova, ae faaauau pea ona ia saunia maia meaʻai faaleagaga ma taʻiala manaʻomia. E foaʻi mai foʻi e le Atua le tofamamao ma le utaga poto i uso faatuatuaina ina ia sauniunia ai mo nisi faaauilumaina atili ma ni fetuutuunaʻiga i le faamaopoopoga faatiokarate. (Teuteronome 34:9; Efeso 1:16, 17) Ma le mautinoa lava, ua saunia mai e Ieova mea tatou te manaʻomia ina ia faataunuu ai lo tatou tofiga o le faia o soo ma ia faaiʻuina la tatou faiva i le lalolagi aoao.—2 Timoteo 4:5.
24 Ua tatou matuā mautinoa o le a lē taitai ona tuulafoaʻia e Ieova ona tagata faamaoni; o le a ia laveaʻiina i latou nai le “puapuaga tele” o loo fotuaʻi mai. (Faaaliga 7:9-14; Salamo 94:14; 2 Peteru 2:9) Ua ia i tatou māfuaaga uma e tausisia ai le mautinoa lea sa muaʻi ia i tatou seʻia oo atu lava i le iʻuga. (Eperu 3:14) O lea la, seʻi o tatou filifili maumauaʻi e ō faatasi pea ma le faalapotopotoga a Ieova.
O le a Faapefea Ona E Tali?
• Aiseā e mafai ai ona tatou faapea atu o loo agaʻigaʻi pea i luma le faalapotopotoga a Ieova?
• O le ā se faamaoniga e iloa ai o loo maua e tagata o le Atua se malamalama auiluma faaleagaga?
• Na faapefea ona iai ni faaleleiga atili i le faiva faa-Kerisiano?
• O ā fetuutuunaʻiga talafeagai ua faia i faatulagaga a le faalapotopotoga a tagata o Ieova?
[Fesili mo le Suʻesuʻega]
[Ata i le itulau 17]
I le pei o Tavita, e lē mafai ona tatou faamatalaina galuega ofoofogia uma a Ieova
[Ata i le itulau 18]
Ua maua e le lafu mamoe a le Atua aogā mai fetuutuunaʻiga talafeagai i faatulagaga a le faalapotopotoga