Le Auala ua Latou Teena ai Omiga Mai Aumea

O LE faanaunauga ia talia, ua taaʻina ai le toʻatele e lolo atu i mafaufauga ma gaoioiga a a latou aumea. Ua manaʻomia faapitoa ai lava e tagata talavou le malosi e fai atu ai e leai i faiga e lamatia ai, e pei o le faaaogāsesēina o fualaau faasāina ma amioga lē mamā faaleituaiga. E mafai faapefea ona latou teena omiga mai a latou aumea?

Na tusi mai talu ai nei ni teine talavou se toʻalua mai Polani e faapea: “O loo faaalia manino mai lava le agaga o le lalolagi i le toʻatele o a ma aumea. E latou te kopi i a latou mataupu o suʻega i aʻoga, tautatala i gagana matagā, ma e fiafia tele i ofu o āʻega ma musika malomaloā lē mamā. Maʻeu lo ma fiafia ona o le maua o mataupu e faatonu ai i matou le ʻautalavou ma puipuia ai i matou mai taaʻiga a talavou e lē faamalieina ma fouvale!

“E lē lava upu e faamatalaina ai lo maʻua lotofaafetai mo mataupu i Le Olomatamata ua faamatilatila mai ai ia i matou e faapea, i le avea o ni tagata talavou, e manaʻomia i matou ma e talisapaiaina. O fautuaga mai le Tusi Paia ia matou te mauaina ua fesoasoani ia i matou e faatonu lelei ai o matou laasaga ina ia faafiafia ai pea Ieova le Atua. Ua ma talitonu e faapea, o le auauna faamaoni ia Ieova o le auala sili lea ona lelei o le olaga.”

Ioe, e mafai lava e tagata talavou ona teena omiga mai a latou aumea. E ala i le toleniina o o latou “tomai e mafaufau ai,” ua aʻoaʻoina ai e talavou Kerisiano ona faia faaiʻuga atamai e lē o atagia atu ai ‘le agaga o le lalolagi’ a o “le agaga mai le Atua.”—Eperu 5:14, NW; 1 Korinito 2:12.