Le Faasilasilaga Faapitoa

I LE faaiʻuga o le fonotaga faaletausaga a le Watch Tower Bible and Tract Society of Pennsylvania ia Oketopa 7, 2000, na faia ai le faasilasilaga faapitoa e le taʻitaʻifono, o John E. Barr mai le Vaega Pule. O lenei faasilasilaga na faavae mai i lauga sa tauaaoina muamua atu i lena lava aso e Theodore Jaracz ma Daniel Sydlik.—Tagaʻi i itulau 12-16 ma le 28-31 o lenei mekasini.

I le faamaʻoti mai o se manatu na matuā mataʻina lava, na taʻua ai e le uso o John Barr e faapea: “Ua tuuina atu i le vaavaaiga a ‘le auauna faamaoni ma le mafaufau’ ma lana Vaega Pule manaʻoga e sili atu ona maualuluga ma sili atu ona tele mea e aofia ai na i lo manaʻoga ua tuuina atu i sosaiete ua lesitala faaletulafono. Ua faatulaga atu i le faavae o na faalapotopotoga taʻitasi ni mataupu ua faatapulaa mai ona latou faatinoina. Peitaʻi ane, ua tofia e lo tatou Matai, o Iesu Keriso, le vasega o le auauna faamaoni na te pulea ana ‘mea’ uma, po o manaʻoga o le Malo iinei i le lalolagi.”—Mataio 24:45-47.

E tusa ai o le sosaiete a Pennsylvania, na faapea mai atili le uso o Barr: “Talu mai lava lona faavaeina i le 1884, o loo faatino pea e le Watch Tower Bible and Tract Society of Pennsylvania se matafaioi tāua i lo tatou talafaasolopito i ona pō nei. Ae peitaʻi, ua na o se meafaigaluega faaletulafono, ua faaaogā e ‘le auauna faamaoni ma le mafaufau’ pe a manaʻomia.”

I lauga sa faia e le uso o Daniel Sydlik ma le uso o Theodore Jaracz, na la faamalamalama mai ai faapea, e ui ina tuuina atu i le vaavaaiga a “le auauna faamaoni ma le mafaufau” mea uma lava a le Alii o loo iai i le lalolagi, ae ua lē taofia ai le vasega o le auauna mai lo latou faatagaina o ni tane agavaa mai “isi mamoe” ina ia tausia ni tofiga tau le pulega o loo faatinoina faasolosolo. (Ioane 10:16) E leai foʻi se māfuaaga faale-Tusi Paia e manaʻomia ai ona avea o ni Kerisiano faauuina i latou uma ua fai ma faatonu o faalapotopotoga faaletulafono, lea e faaaogā e Molimau a Ieova.

Na taʻu atu e le uso o John Barr i le aofia e faapea, talu ai nei lava, na tauofo mai ai nisi sui o le Vaega Pule a Molimau a Ieova o ē na auauna o ni faatonu ma ni ofisa maualuluga, ina ia see ese mai o latou tulaga sa iai i ni komiti o faatonu i sosaiete uma sa faaaogā e “le auauna faamaoni ma le mafaufau” i le Iunaite Setete. Ona palotaina ai lea o ni uso maufaatuatuaina mai le vasega o isi mamoe ina ia latou faaauauina na tofiga.

E matuā aogā lava lenei faaiʻuga. Ua mafai ai e sui o le Vaega Pule ona faaalu le sili atu o le taimi i le sauniunia o meaʻai faaleagaga ma isi galuega mo le tausia o manaʻoga faaleagaga o le ʻauuso i le lalolagi aoao.

I le faaiʻuga, na taʻu mai ai e le taʻitaʻifono i le aofia sa faalologo ma le naunautaʻi e faapea: “E ui ina tofia atu nisi o tiute eseese faaletulafono ma le itu tau pulega i ovasia o ē ua iai le tomai, . . . o i latou uma lava o loo auauna i lalo o le taʻitaʻiga faaleagaga a le Vaega Pule. . . . Tatou te saʻili uma atu faatasi ai ma le tatalo ia Ieova mo lana faamanuiaga i a tatou taumafaiga autasi i le faia o lona finagalo, e viia ma faamamaluina ai lona suafa silisili.”