Molimau A Ieova Agaʻi i Luma ma le Mautinoa Atoatoa!

Lipoti o le Fonotaga Faaletausaga

I NEI aso o uiga lē mautinoa ma le masalosalo, ua tū matilatila ai Molimau a Ieova o ni Kerisiano o loo iai se mautinoa atoatoa. Na faamanino mai lenei manatu i le fonotaga faaletausaga a le Watch Tower Bible and Tract Society of Pennsylvania, sa faia i le Maota Fono o Molimau a Ieova i le Aai o Jersey, i New Jersey, i le Aso Toonai, Oketopa 7, 2000. *

I lana saunoaga amata, na taʻua ai e le taʻitaʻifono, o John E. Barr, o ia o se sui o le Vaega Pule o Molimau a Ieova e faapea: “E mai le faitau fia piliona uma o le lalolagi, ua tatou iloa lelei ma talitonu o Keriso Iesu, le Alo pele o Ieova, ua faanofotupuina nei i le lagi, o loo pule ai i totonu o ona fili.” Sa aumaia faamaoniga o lena mautinoa atoatoa i ni lipoti mataʻina se ono mai le lalolagi aoao.

O le Upu Moni o le Tusi Paia o Loo Faatoʻilaloina ai Faiga Faaagaga i Haiti

E taatele faiga faaagaga i Haiti. Na faamatala mai e John Norman, o le sooupu a le Komiti o le Lālā iinā e faapea: “E masani lava ona faatino e tagata le voodoo ina ia puipuia ai i latou.” O se tasi fomaʻi faataulāitu na oso aʻe ni ona masalosaloga ina ua motu le isi ona vae i se faalavelave faafuaseʻi. Ona ia taumanatu lea, ‘E mafai faapefea ona tupu lenei mea ia te aʻu pe afai o lea o loo puipuia aʻu e agaga?’ I le pei o le toʻatele o isi, sa oo ina aʻoaʻoina lenei tamāloa i le upu moni e Molimau a Ieova ma mafai ai ona saʻoloto mai faiga faaagaga. Ua aliali mai se faatelega e ono tupu aʻe i Haiti pe a fua atu ia Aperila 19, 2000, lea na auai atu ai i le Faamanatuga o le maliu o Keriso se aofaʻiga e faafā ona toʻatele atu na i lo le aofaʻi o le ʻautalaʻi o le Malo i lena atunuu.

Maelega i le Oganuu Telē i Korea

I Korea, o le 40 pasene o Molimau a Ieova iinā o loo auai i le auaunaga faataimi atoa. Na taʻua e Milton Hamilton, o le sooupu a le Komiti o le Lālā e faapea: “Ona o lenei ʻautau matuā toʻatele, ua mafai ai nei ona faatasi i le masina ona galueaʻiina la matou oganuu e silia ma le 47 miliona tagata o iai.” E faapitoa lava ona mataʻina le tuputupu aʻe o faapotopotoga ia e faaaogāina ai le gagana faagūgū. I se tasi matagaluega e faaaogā ai le gagana faagūgū, e tusa ma le 800 suʻesuʻega faale-Tusi Paia i aiga ua faia ai. Ua iai i lenei aofaʻiga se faatatauga e tasi le suʻesuʻega a le tagata talaʻi. E faanoanoa lava, talu ai o loo faafalepuipuiina pea uso talavou ona o lo latou solitū. Ae peitaʻi, o loo lelei ona tausia nei Kerisiano faamaoni e ē o loo vaavaaia falepuipui, ma e masani lava ona tuu atu ia i latou ni galuega e manaʻomia ai le maufaatuatuaina.

 Tausiaina Manaʻoga o le Tuputupu Aʻe i Mekisikō

Sa iai se tumutumuga e 533,665 o ē folafola le Malo na lipotia mai la latou auaunaga i le fanua i Mekisikō ia Aokuso o le 2000. E sili atu i le faatoluina o lena aofaʻi le aofaʻiga o ē na auai i le Faamanatuga. Na taʻua e Robert Tracy, o le sooupu a le Komiti o le Lālā e faapea: “O lo matou sini mo lenei tausaga ina ia fausia atili nisi Maota o le Malo se 240.” Na ia toe faapea mai: “Ae o lea lava matou te manaʻomia foʻi nisi maota se tele.”

O loo avea ma faaaʻoaʻoga lelei talavou a Molimau a Ieova i Mekisikō. O le faamatalaga a se patele Katoliko e faatatau i se tasi talavou e faapea: “Ou te manaʻo ina ia iai se tasi e pei tonu lava o ia i aʻu tagata lotu. E mataʻina tele i laʻu vaai nei tagata ona o lo latou naunau malosi ma le atamai o lo latou faaaogāina o le Tusi Paia. Ua mafai ona latou tali puipui atu mo le Atua, e tusa lava pe lamatia ai o latou ola.”

Faamaoni e Ui Ina Lotolotoi i Vevesi i Sierra Leone

Talu mai Aperila i le 1991, ina ua gāpā le taua i le vā o tagata o Sierra Leone lava latou, e faitau afe tagata na fasiotia, o isi na manunuʻa, po ua oo lava ina faaleagaina tumau ai o latou tino. Na lipotia mai e Bill Cowan, o le sooupu a le Komiti o le Lālā e faapea: “Ua avea taua ma faigatā ma itu e oo ai ni aafiaga loloto i tagata. O le toʻatele o i latou sa faalēfiafia mai i la matou feʻau ae o lenei ua naunau e faalogologo mai. E lē o se mea fou le teʻi lava ua afea o matou Maota o le Malo e tagata feofeoaʻi i le alatele ma auai mai ai mo se uluaʻi taimi i le sauniga. E masani lava ona latou taofia uso i le auala ma talosaga ane i ai mo se suʻesuʻega faale-Tusi Paia.” E ui lava i le tulaga lē mautū o loo iai pea le atunuu, ae o loo fua mai le galuega talaʻi o le Malo i Sierra Leone.

Le Polokalame Tele Tau Faugafale i Aferika i Saute

Talu ai nei lava, ua iai se manaʻoga mo se faitau afe o ni Maota o le Malo i le oganuu lea ua vaaia e le ofisa o le lālā i Aferika i Saute. E faitau selau maota ua uma ona fausia. Na taʻua e John Kikot, o le sui o le Komiti o le Lālā e faapea: “Na i lo le toe faatasitasi i ni fale laupola po o lalo o se laau e pei ona sa iai muamua, ae ua mafai nei e o matou uso ona faatasitasi i se nofoaga talafeagai ma lelei mea e saofafaʻi ai. E ui o le tele o nei Maota o le Malo e lē o matuā soona taugatā naʻuā ni fausaga o fausia ai, ae masani lava ona matilatila ese mai o ni maota sili ona mataʻina i o latou vaipanoa o iai. I nisi vaipanoa, ua mātauina faapea e māeʻa loa ona fausia se Maota o le Malo, ona sili atu lea i le faaluaina le oso aʻe o le aofaʻiga o le faapotopotoga a o faagasolo le tausaga e sosoo ai.”

Se Tupulaga Fou o Molimau i Ukraine

A o faagasolo le tausaga faaleauaunaga i le 2000, na maua ai e lenei atunuu se tumutumuga e 112,720 o le ʻautalaʻi. E sili atu i le 50,000 o i latou nei ua aʻoaʻoina upu moni o le Tusi Paia a o faagasolo tausaga e lima ua tuanaʻi atu. Na faapea mai John Didur, o le sooupu a le Komiti o le Lālā: “O le mea moni, ua faatupu aʻe e Ieova se tupulaga fou, o Molimau maelega latou te folafolaina lona suafa!” Na ia toe faapea mai: “I tausaga e lua na mavae nei, sa matou ofoina ai le silia ma le 50 miliona mekasini, lea e tutusa ma le faitau aofaʻi o tagata o le atunuu. I masina taʻitasi, o loo matou mauaina se faatatauga e afe tusi mai tagata lotonaunau o loo latou tāpā mai ai nisi faamatalaga atili.”

Isi Vala Faagaeeloto o le Polokalame

Na tauaaoina mai e Daniel Sydlik, o ia o se sui o le Vaega Pule, se lauga faatupu manatu. O le mataupu ua faamatuaina “Le Itu e Eseese ai le Vaega Pule ma se Sosaiete ua Lesitalaina Faaletulafono,” o loo lomia i lenei mekasini, e faavae aʻe i lena lauga e aʻoaʻoina ai.

Na fofogaina mai e Theodore Jaracz mai le Vaega Pule se lauga faatupu manatu na faamatuaina “Ovasia ma Auauna o le Faiva ua Tofia Faatiokarate.” O se tasi o mataupu o loo i lenei mekasini e faavae aʻe i lena mataupu.

Sa aofia ai foʻi i le fonotaga faaletausaga se lauga faagaeeloto na fofogaina mai e David Splane, o se sui o le Vaega Pule e faatatau i le mau o le tausaga mo le 2001. Na faavae aʻe i upu a le aposetolo o Paulo, ua faapea ai: “Ia outou tumau ua atoatoa ona lelei, ma ua mautinoa le finagalo uma lava o le Atua.” (Kolose 4:12, LT) Ua filifili maumauaʻi Molimau a Ieova mai itu uma o le lalolagi ina ia latou faia lena mea a o latou talaʻia ma le faamaoni le tala lelei o le Malo o le Atua i le lalolagi aoao.—Mataio 24:14.

[Faamatalaga pito i lalo]