Ovasia ma Auauna o le Faiva ua Tofia Faatiokarate
Ovasia ma Auauna o le Faiva ua Tofia Faatiokarate
“O lenei, ina tausi ia outou ia te outou, atoa ma le lafu mamoe uma lava ua tofia ai outou e le Agaga Paia e fai ma [“ovasia,” NW].”—GALUEGA 20:28.
1, 2. Ua faapefea ona faataunuuina le Isaia 60:22?
UA LEVA ona valoia mai e Ieova se mea mataʻina o le a tupu i ona pō o le iʻuga. E ala mai i le perofeta o Isaia, ua taʻua ai faapea: “O le toaitiiti e fai ma toaafe, ma le ua faatauvaa e fai ma nuu malosi; o aʻu o Ieova, ou te faavave ona fai i ona lava aso.”—Isaia 60:22.
2 Pe iai ea se faamaoniga e iloa ai o loo faagasolo le faataunuuga o lenei valoaga i aso nei? Ioe, e iai! I vaitausaga na amata mai le 1870, na faavaeina ai se faapotopotoga a tagata o Ieova i Allegheny, Pennsylvania, i le Iunaite Setete o Amerika. E mai si na amataga toʻalaiti, e faitau fia sefulu afe faapotopotoga ua tutupu aʻe ai ma o loo lauolaola i le lalolagi aoao. E faitau miliona o ē folafolaina le Malo—o se nuu malosi—o loo auaufaatasi atu nei ma le silia i le 91,000 faapotopotoga i atunuu e 235 i itu eseese o le lalolagi. E aunoa ma se fesiligia, ua faamaonia ai nei o loo faatelevave e Ieova le aoaoina o tagata tapuaʻi moni a o leʻi gāpā mai le “puapuaga tele,” lea ua matuā lalata mai lava.—Mataio 24:21; Faaaliga 7:9-14.
3. O le ā le uiga o le papatiso “i le suafa o le Tamā, ma le Atalii, ma le Agaga Paia”?
3 Ina ua uma ona faia se tuuina atu a le tagata lava ia i a Ieova, ma ina ia ōgatusa ma faatonuga a Iesu, na papatisoina ai lenei faitau miliona “i le suafa o le Tamā, ma le Atalii, ma le Agaga Paia.” (Mataio 28:19) O le papatisoina “i le suafa o le Tamā” o lona uiga ua talia e nei tagata tuuina atu Ieova o lo latou Tamā faalelagi ma le Foaʻi Ola ma latou gauaʻi atu ai i lana pule silisili ese. O le papatisoga ‘i le suafa o le Atalii’ e faaatagia mai ai ua latou taʻutino o Iesu Keriso lo latou Togiola, o le Taʻitaʻi, ma le Tupu. Latou te amanaʻia foʻi le matafaioi a le agaga paia o le Atua, po o le malosi galue, i le taʻitaʻia o o latou olaga. E faaalia ai i lenei itu faapea ua papatisoina i latou ‘i le suafa o le Agaga Paia.’
4. Ua faapefea ona tofia faifeʻau Kerisiano?
4 I lo latou papatisoga, ua tofia ai soo fou e avea ma faifeʻau a Ieova le Atua. O ai e tofiaina i latou? I se faalautelega, e faatatau atu ia i latou upu o loo faamauina i le 2 Korinito 3:5: “O le Atua e mafai ai i matou [o ni faifeʻau].” E leai se isi mamalu e sili atu latou te ono moomoo i ai na i lo le tofia mai e Ieova le Atua lava ia! Pe a mavae lo latou papatisoga, o le a faaauau pea ona latou tuputupu aʻe faaleagaga o ni faifeʻau o le “tala lelei” i le umi lava latou te taliaina ai taʻitaʻiga a le agaga o le Atua ma faaauau ona faatatauina lana Afioga.—Mataio 24:14; Galuega 9:31.
Tofiga—E Faatiokarate —E Lē Faatemokalasi
5. Pe o filifilia ea faatemokalasi ovasia Kerisiano ma auauna o le faiva? Ia faamatala.
5 Ua manaʻomia se vaaiga taʻumatuaina mai ovasia agavaa ma se fesoasoani a auauna o le faiva ina ia tausia ai manaʻoga faaleagaga o le aofaʻiga faatuputupulaʻia o faifeʻau maelega. (Filipi 1:1) Ua faapefea ona tofia na tane faaleagaga? E lē faaaogāina ai auala na e faaaogā i Kerisinetoma. Mo se faataʻitaʻiga, e lē faia faatemokalasi le filifilia o ovasia Kerisiano, o lona uiga, e ala i le palotaina e se vaega toʻatele o tagata o loo iai i se faapotopotoga. Na i lo lea, o nei tofiga e faia faatiokarate. O le ā le uiga o lena mea?
6. (a) O le ā le faatiokarate moni? (e) Aiseā e faatiokarate ai le tofiaina o ovasia ma auauna o le faiva?
6 Pe a faafaigofie le manatu, o le faatiokarate moni e pulea mai e le Atua. Ua lotomalilie Molimau a Ieova e gauaʻi atu i lana pulega ma felagolagomaʻi faatasi ina ia faia le finagalo tauatua. (Salamo 143:10; Mataio 6:9, 10) O tofiga o ovasia Kerisiano po o toeaina ma auauna o le faiva, e faatiokarate ona fai auā o le faagasologa o le faatutū mai ma le tofiaina o na tane faatuatuaina ua faatinoina e tusa ai ma le faatulagaga a le Atua lea o loo folasia mai i le Tusi Paia. Ma ona o Ieova ua avea ma ulu e “silisili i mea uma lava,” e mautinoa ai lava le ia te ia o le aiā e filifilia ai le auala o le a faagaoioia ai lana faalapotopotoga vaaia.—1 Nofoaiga a Tupu 29:11; Salamo 97:9.
7. Ua faapefea ona puleaina Molimau a Ieova?
7 I le eseesega ma le tele o vaega faalotu i Kerisinetoma, o Molimau a Ieova e lē filifilia e i latou lava le ituaiga o faatulagaga faaleagaga e faatino ai a latou gaoioiga. E taumafai malosi nei Kerisiano faamaoni e pipii atu i tapulaa a Ieova. O o latou ovasia e lē tofia i ni tofiga mai se ituaiga o faatulagaga faalotu, e pei o se fuafuaga faalefaapotopotoga, o le faauluuluga o se lotu, po o se vaega o taʻitaʻi lotu e puleaina le ekalesia uma. Pe a taumafai vaega eseese a le lalolagi e faalavelave mai i nei tofiga, e lē lolo atu lava i ai tagata o Ieova. E latou te maumauaʻi e tausisia le tulaga lea na faailoa lelei mai e le ʻauaposetolo i le uluaʻi senituri ina ua latou faapea mai: “E tusa ona sili o lo matou anaana i le Atua i lo matou anaana i tagata.” (Galuega 5:29) O lona uiga, e gauaʻi atu Molimau i le Atua i mea uma lava. (Eperu 12:9; Iakopo 4:7) O le mulimuli atu i faatulagaga faatiokarate e finagalo malie i ai le Atua.
8. O le ā le eseesega i le vā o faatulagaga faatemokalasi ma faatulagaga faatiokarate?
8 I le avea o i tatou ma auauna a le Faatiokarate Sili, o Ieova, e lelei ai pe a teu i o tatou mafaufau eseesega i le vā o faatulagaga faatemokalasi ma faatulagaga faatiokarate. O faagasologa faatemokalasi e manaʻomia ai ona maua ni sui o se vaega, ma e masani ona mātaulia i faiga faatosina mo se sui o tauvā i se tulaga ma filifilia e ala i le palotaina e se aofaʻiga tele o tagata. O na faatulagaga e lē faia i tofiga faatiokarate. O nei tofiga e lē faaoo maia e ni tagata; e lē faaoo maia foʻi e se sosaiete ua lesitalaina faaletulafono. E foliga mai i le tau faaataata atu e Paulo o le tofiaina o ia lava e Iesu ma Ieova e avea o se “aposetolo o nuu ese,” na ia taʻu atu ai i Kerisiano i Kalatia e faapea na tofia o ia “e le mai tagata, e lei tofia foi e se tagata, a o Iesu Keriso, ma le Atua le Tamā, o le na toe faatuina mai o ia i e ua oti.”—Roma 11:13; Kalatia 1:1.
Ua Tofia e le Agaga Paia
9. O le ā ua fai mai ai le Galuega 20:28 e faatatau i le tofia o ovasia Kerisiano?
9 Na faamanatu atu e Paulo i ovasia sa nonofo i Efeso faapea na tofia i latou e le Atua e ala i le agaga paia. Na ia faapea atu: “O lenei, ina tausi ia outou ia te outou, atoa ma le lafu mamoe uma lava ua tofia ai outou e le Agaga Paia e fai ma [“ovasia,” NW], ia leoleo atu i le ekalesia a le Atua, ua faatauina e ia mona i lona lava toto [“i le toto o lona lava Alo,” NW].” (Galuega 20:28) Sa manaʻomia e na ovasia Kerisiano ona taʻitaʻia pea i latou e le agaga paia a o latou tauaveina o latou tiute o ni leoleo mamoe o le lafu mamoe a le Atua. Pe afai e iai se tane o lē o auauna i le faaeaga na tofia i ai ae ua lē o toe ausia e ia le tapulaa tauatua, e oo mai le taimi o le a gaoioi ai le agaga paia ina ia aveesea o ia mai lona tofiga.
10. Ua faapefea ona faatino e le agaga paia se matafaioi tāua tele i tofiga faatiokarate?
10 Ua faapefea ona faatinoina e le agaga paia se matafaioi tāua tele? Muamua lava, o le tusi o loo folasia mai ai agavaa mo le tofiga tau vaavaaiga faaleagaga sa faagaeeina e le agaga paia. I ana tusi ia Timoteo ma Tito, na otooto mai ai e Paulo tapulaa e ao ona ausia e ovasia ma auauna o le faiva. Pe a tuufaatasi, pe tusa ma le 16 ni agavaa na ia taʻua. Mo se faataʻitaʻiga, sa tatau i ovasia ona lē mataʻuleagaina, ia faautauta, ia mafaufau lelei, ia amio mamalu, ia alofa i tagata ese, ia mafai ona aʻoaʻo atu, ma o ni ulu o aiga o loo avea ma faaaʻoaʻoga lelei. Sa tatau ona latou paleni i le faaaogāina o le ʻava malosi, ia lē matapeʻapeʻa i tupe, ma ia lē gaoiā. I se tulaga tali tutusa, sa folasia foʻi tapulaa maualuluga mo tane o loo aapa atu mo tofiga o ni auauna o le faiva.—1 Timoteo 3:1-10, 12, 13; Tito 1:5-9, LT.
11. O ā nisi o agavaa e tatau ona ausia e tane o loo aapa atu mo tiute tauave i le faapotopotoga?
11 O se autaluga o nei agavaa e faaalia ai o i latou o taʻimua i le tapuaʻiga a Ieova e ao ona avea ma faaaʻoaʻoga lelei i amioga faa-Kerisiano. O tane o loo aapa atu mo tiute tauave i le faapotopotoga e ao ona latou faamaonia mai, o loo galue le agaga paia ia i latou. (2 Timoteo 1:14) E tatau ona iai se faamaoniga e iloa ai o loo fuaina e le agaga o le Atua i nei tane fua o le “alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā.” (Kalatia 5:22, 23, LT) O na fua o le a faaalia i a latou feutagaʻiga ma o latou uso talitonu atoa ma isi. O le mea moni, atonu e matilatila nisi i le faaalia o nisi fua o le agaga, a o isi atonu latou te ausia i se tulaga maualuga nisi agavaa mo ovasia. Ae peitaʻi, i le aotelega o o latou olaga, o i latou uma o loo faamoemoe e fia tofia e avea ma ovasia po o auauna o le faiva e tatau ona latou faaalia mai o i latou o ni tane faaleagaga, o loo ausia mea e manaʻomia e le Afioga a le Atua.
12. O ai e mafai ona faapea atu ua tofia e le agaga paia?
12 Ina ua tomatau atu Paulo i isi ina ia faaaʻoaʻo mai ia te ia, sa mafai ona ia faia faapea ma le saʻoloto e tautala atu auā o ia foʻi sa faaaʻoaʻo atu ia Iesu Keriso, o lē ‘na tuuina mai le faaaʻoaʻo mo i tatou, ina ia tatou mulimuli atu i ona tulagāaao.’ (1 Peteru 2:21; 1 Korinito 11:1) O i latou e ausia manaʻoga faale-Tusi Paia i le taimi e tofia ai o ni ovasia po o ni auauna o le faiva e mafai ona faapea atu ua tofia i latou e le agaga paia.
13. E faapefea ona fesoasoani le agaga paia ia i latou o loo faatutūina maia tane ina ia auauna i le faapotopotoga?
13 E iai le isi vala o loo faailoa mai ai le auala e gaoioi ai le agaga paia i le faatutūina mai o nisi ma le tofia e avea ma ovasia. Na fetalai Iesu faapea ‘e foaiina mai e le Tamā o i le lagi le Agaga Paia i e ole atu ia te ia.’ (Luka 11:13) Pe a fono la toeaina o se faapotopotoga ina ia iloa po o ai ni tane e ono faatutū mai mo ni tiute tauave i le faapotopotoga, latou te tatalo mo le agaga o le Atua e taʻitaʻia i latou. E faavae a latou tagata e faatutū i mea ua taʻua i le Afioga faagaeeina a le Atua, ma o le agaga paia e mafai ai ona latou iloa pe o le uso lea ua talanoaina mo se tofiga, o ia ausia agavaa faale-Tusi Paia. O i latou o faatutū maia uso e lē tatau ona taaʻina ma le lē tatau i latou i foliga vaaia, ni tomai tau aʻoaʻoga, po o ni tomai masani o ia uso. E ao ona taulaʻi tasi atu o latou manatu pe faamata o lea tagata o se tane faaleagaga, o se tasi o le a lē faatalatū tagata o le faapotopotoga e ō atu i ai mo ni fautuaga faaleagaga.
14. O le ā tatou te aʻoaʻoina mai le Galuega 6:1-3?
14 E ui ina auai faatasi toeaina ma ovasia femalagaaʻi i le faatutūina mai o ni uso e ono auauna o ni toeaina ma auauna o le faiva, ae o le faatinoga moni o tofiga e faia i le ōgatusa ma le faatulagaga na faataatia mai i le uluaʻi senituri. I se tasi taimi, na aliaʻe ai se manaʻoga mo ni tane agavaa faaleagaga latou te tausia se tofiga tāua. Ona aumai lea e le vaega pule le taʻiala lenei: “Ina filifili ia ni o outou se toafitu e taʻuleleia, e tutumu i le Agaga Paia ma le poto, ia matou tofia i latou i lenei faiva.” (Galuega 6:1-3) E ui sa faatutū mai e tane na gafa tonu ma le faafitauli suafa o uso mo le tofiga, peitaʻi o tofiga sa faia e tane faatuatuaina iinā i Ierusalema. E faapena foʻi le faatulagaga o loo mulimuli ai i aso nei.
15. Ua faapefea ona aafia le Vaega Pule i le mataupu o le tofiaina o tane?
15 E tofia tuusaʻo mai e le Vaega Pule o Molimau a Ieova sui uma o Komiti o Lālā. A o filifilia po o ai e mafai ona ia tauaveina lena tiute tauave mamafa, e manatua e le Vaega Pule le fetalaiga a Iesu: “O le ua foaiina atu i ai o mea e tele, e sueina atu foi ia te ia o mea e tele; o ia foi ua tuuina atu i ai o mea e tele, latou te fai atu ia te ia e au mai mea e sili ona tele.” (Luka 12:48) E lē gata i le tofiaina o sui o Komiti o Lālā, ae tofia foʻi e le Vaega Pule toeaina i le Peteli ma ovasia femalagaaʻi. Ae peitaʻi, latou te tofia ni uso faatuatuaina ina ia tauaveina ni tiute mo i latou i le faia o nisi tofiga. E iai foʻi se faaaʻoaʻoga faale-Tusi Paia mo le faia o lenei mea.
‘Ia Tofia, e Faapei Ona Ou Fai Atu ai ia te Oe’
16. Aiseā na tuu ai e Paulo Tito i Kereta, ma o le ā e faaalia mai e lenei mea e tusa ai o tofiga faatiokarate i aso nei?
16 Na taʻu atu e Paulo i lana aumea faigaluega o Tito: “O le mea lenei na ou tuu ai oe i Kereta, ina ia e faatonuina mea ua totoe, ma ia e tofia toeaina i lea aai ma lea aai, faapei ona ou fai atu ai ia te oe.” (Tito 1:5) Ona otooto atu lea e Paulo agavaa sa tatau ona tulimataʻia e Tito i tane o ē o le a agavaa mo na tofiga. O lea la, i aso nei, e tofia e le Vaega Pule uso agavaa i lālā e fai mo latou sui i le faia o tofiga mo toeaina ma auauna o le faiva. E iai le faaeteetega ia i latou o loo galulue e fai ma sui o le Vaega Pule, ina ia latou malamalama lelei ma mulimuli i taʻiala faale-Tusi Paia mo le faia o na tofiga. O lea, e tusa ai ma le taʻitaʻiga a le Vaega Pule, ua tofia ai tane agavaa e auauna i faapotopotoga o Molimau a Ieova i le lalolagi aoao.
17. E faapefea ona taulima e le ofisa o le lālā nisi ua faatutū atu mo ni tofiga o ovasia ma auauna o le faiva?
17 Pe a faaoo atu i se ofisa o le lālā a le Sosaiete o le Olo Matamata ni suafa o nisi ua faatūtū atu mo tofiga o ovasia ma auauna o le faiva, e faalagolago tane ua iai le tomai, i le agaga o le Atua mo le faia o tofiga. E lagona e nei uso le ono tali atu i sa latou gaoioiga e fai, ma iloa ai e lē tatau ona latou vave faaee atu se tofiga i se tane, ina neʻi faia ai sa latou vaega i ana agasala.—1 Timoteo 5:22.
18, 19. (a) Ua faapefea ona faaoo atu nisi tofiga? (e) Ua faapefea ona faatino le faagasologa atoa o le faatutū mai o nisi mo ni faaeaga ma le tofiaina o i latou?
18 E iai ni tofiga atonu e faaoo atu e ala i se tusi ua iai se saini aloaʻia a se sosaiete ua lesitalaina faaletulafono. O se tusi faapena atonu e faaaogā ina ia lē na o le toʻatasi se uso i le faapotopotoga e tofia atu ai.
19 Ua faia e Ieova tofiga faatiokarate e ala mai i lona Alo ma le auala vaaia a le Atua o loo i le lalolagi, “le auauna faamaoni ma le mafaufau” ma lana Vaega Pule. (Mataio 24:45-47) O le faagasologa atoa o lena faiga e faatūtū ai nisi mo ni faaeaga ma le tofiaina e taʻitaʻia, pe faatonutonuina, e le agaga paia. O le tulaga lena talu ai, ua folasia atu agavaa i le Afioga a le Atua lea ua faagaeeina e le agaga paia, ma e faaalia mai foʻi e lē ua tofia se faamaoniga o lona fuaina mai o fua o lena agaga. O lea la, e tatau ona manatu i tofiga o ni mea ua faia e le agaga paia. E pei lava ona sa tofia faatiokarate ovasia ma auauna o le faiva i le uluaʻi senituri, ua faapena foʻi le tulaga i aso nei.
Lotofaafetai mo le Taʻitaʻiga a Ieova
20. Aiseā tatou te auai ai i saafiafiga a Tavita na o loo faamauina i le Salamo 133:1?
20 I lenei taimi o le lauolaola faaleagaga ma le faatelega faatiokarate i le galuega talaʻi o le Malo, tatou te lotofaafetai ona o lea e gafa patino lava Ieova ma le tofiaina o ovasia ma auauna o le faiva. O lenei faatulagaga faale-Tusi Paia e fesoasoani ina ia tausisia ai tapulaa maualuluga amiotonu a le Atua ia i tatou o ni Molimau a Ieova. E lē gata i lea, o le agaga faa-Kerisiano ma taumafaiga naunautaʻi a nei tane ua telē so latou sao i lo tatou filemu ofoofogia ma le autasi o ni auauna a Ieova. O lea ua faagaeetia ai i tatou e pei o le faisalamo o Tavita, ina ia alalaga atu: “Faauta, o le mea e matuā lelei ma le matagofie lava, pe a nonofo faatasi lava o uso.”—Salamo 133:1.
21. Ua faapefea ona faataunuu le Isaia 60:17 i aso nei?
21 Maʻeu so tatou lotofaafetai i taʻitaʻiga a Ieova e ala mai i lana Afioga ma le agaga paia! Ma ua matuā uigā lava, upu o loo faamauina i le Isaia 60:17: “Ou te aumaia le auro e sui aʻi le ʻapa memea; ou te aumaia foi le ario e sui aʻi le uamea, ma le ʻapa memea e sui aʻi laau, ma uamea e sui aʻi maa; e avea foi e aʻu ou alii [“ovasia,” NW] ia filemu, ma ou faipule ia amiotonu.” A o faasolosolo pea ona faatatauina atoatoa faatulagaga faatiokarate a Molimau a Ieova, ua faapena ona tatou tofo ai i nei tulaga faamanuiaina i totonu o le faalapotopotoga a le Atua o loo i le lalolagi.
22. Mo ā mea ua tatau ai ona tatou lotofaafetai, ma o le ā e tatau ona tatou filifili maumauaʻi e fai?
22 Tatou te matuā lotofaafetai ona o faatulagaga faatiokarate o loo ia i tatou. Ma tatou te matuā talisapaia galuega mamafa ma le faamalieloto ua faia e ovasia ma auauna o le faiva, o ē ua tofiaina faatiokarate. Tatou te vivii atu ma le lotoatoa i lo tatou Tamā alofa i le lagi, o lē ua foaʻi maia ia i tatou le lauolaola faaleagaga ma ua ʻoa ana faamanuiaga ia i tatou. (Faataoto 10:22) O lea la, seʻi o tatou filifili maumauaʻi e ō faatasi pea ma le faalapotopotoga a Ieova. O le sili o na mea uma, seʻi o tatou auauna pea ma le autasi i le mamalu, le viiga, ma le faaneeneega o le suafa sili ma le paia o Ieova.
O le a Faapefea Ona E Tali?
• Aiseā e mafai ai ona tatou faapea atu o le tofiga o ovasia ma auauna o le faiva e faatiokarate, ae lē faatemokalasi?
• Ua faapefea ona tofia e le agaga paia tane Kerisiano faatuatuaina?
• Ua faapefea ona aafia le Vaega Pule i le tofiaina o ovasia ma auauna o le faiva?
• E tusa ai o tofiga faatiokarate, aiseā e ao ai ona tatou lotofaafetai ia Ieova?
[Fesili mo le Suʻesuʻega]
[Ata i le itulau 15]
Ua faaeaina toeaina ma auauna o le faiva e auauna e ala i tofiga faatiokarate