Ia Tumau ma le Mautinoa Atoatoa

“Se Galuega Aupito Lelei”

E MAI lava i le amataga o lo latou talafaasolopito i aso nei, sa matuā naunau ai Molimau a Ieova i se tasi o valoaga a Iesu Keriso e faapea: “E talaʻiina atu foi lenei tala lelei o le malo i le atu laulau uma, e fai ma molimau i nuu uma; ona oo mai ai lea o le gataaga.” (Mataio 24:14) A o latalata mai le 1914—le amataga o “aso e gata ai”—na faia ai ma le talitonu maumauaʻi i se tulaga sa leʻi faapea ona faia ai muamua i le lalolagi aoao e Tagata Aʻoga faamaoni o le Tusi Paia se tauiviga sili tau aʻoaʻoga sa faavae i le Tusi Paia.—2 Timoteo 3:1.

Ina ia taulau lo latou sini o le folafolaina atu o le tala lelei i le lalolagi aoao, na faaaogā ai e nei auauna a Ieova se auala fou, o se mea sa uiga ese ma olaola. Ina ia iloa atili e uiga i lena auala, seʻi tatou toe foʻi lava i tua i aso ua mavae.

Se Auala Fou e Folafola ai le Tala Lelei

O Ianuari lea i le tausaga e 1914. Seʻi manatu faapea o loo tou nofonofo faatasi ma le toʻa 5,000 o isi tagata i se potu pogisa i le Aai o Niu Ioka. I ou luma, o loo iai se ie lautelē o loo faaali ai se ata gaoioi. Ua aliaʻi mai i le ata se tamāloa ulusinā o loo ofuina se ofu telē e gata i ona tulivae. Atonu sa e vaai i ni ata e lē tautala, ae o lea ua tautala mai lenei tamāloa, ma ua mafai ona e faalogo atu i ana upu. Ua e vaaia le uluaʻi faaaliga o se mea fou ua faatinoina, ma e matuā tutasi lava le feʻau. O le failauga, o Charles Taze Russell, le uluaʻi peresitene o le Sosaiete o le Olo Matamata, ma o le galuega na saunia o le “Ata o le Tala o le Foafoaga” (“Photo-Drama of Creation”).

Sa iloa e C. T. Russell le telē o le avanoa mo le faaaogāina o ni ata gaoioi ina ia matamata ai le anoanoaʻi o tagata. O lea la, i le 1912, na amata ai ona ia saunia le “Ata o le Tala o le Foafoaga.” I le iʻuga, na avea o se galuega e valu itula le umi, sa faaaogā ai ni ata lē gaoioi (slide) ma ata gaoioi atoa ma lanu ma le leo.

Na fuafuaina ina ia faaalia i ni vaega se fā, ma na faaalia ai i le “Ata o le Tala o le Foafoaga” vaaiga e amata mai i le foafoaga ma faasolo mai i le talafaasolopito o le tagata seʻia oo i le tumutumuga o le fuafuaga a Ieova le Atua mo le lalolagi ma tagata i le faaiʻuga o le Pulega faa-Meleniuma a Keriso. Na mavae le tele o tausaga faatoʻā mafai ona faaaogāina lenei lava poto faatekinisi i se tulaga taulau tautupe. Ae peitaʻi, e faitau miliona na matamata i le “Ata o le Tala o le Foafoaga” e aunoa ma se totogi!

E tulaga maualuga le puʻeina o musika faapea ma lauga e 96 na puʻeina i fonokalafi na saunia mo le “Ata o le Tala o le Foafoaga.” Sa matuā matagofie ata na valiina i luga o fasi tioata mafolafola laiti, sa faaalia ai le talafaasolopito o le lalolagi. Sa manaʻomia foʻi ona faia le faitau selau o ata fou felanulanuaʻi ma ata tusi. O nisi o ata lē gaoioi ma ata gaoioi o ni galuega taulima sa valiina ma le matuā faaeteete lava. Ma sa faia pea lava pea nei mea ma iʻu ina  maua ai seti e 20 o ata e taʻifā vaega. O lenei mea na mafai ai ona faaalia se vaega o le “Ata o le Tala o le Foafoaga” i aai eseese e 80 i so o se aso na atofaina!

A o Faaalia le Ata

O le ā le mea na tupu a o faaalia le “Ata o le Tala o le Foafoaga”? Na faapea mai le Tagata Aʻoga o le Tusi Paia o Alice Hoffman: “Na amata le Ata i le faaalia mai o le uso o Russell. A o aliaʻi mai o ia i le ata ma amata ona tautala, na amata ai foʻi ona tāina le fonokalafi . . . ma sa matou fiafia e faalogo atu i lona leo.”

I le faasino atu i se faasologa o ata lē gaoioi, o loo faaalia lemu ai le faagasologa o se mea o loo tupu, e manatua ai e le tamaʻitaʻi o Zola Hoffman e faapea: “Sa ou nofo ai iinā ma oʻu mata ua matuā pūpū tetele i le maofa a o matou matamata i le faaataina mai o aso o le foafoaga. Sa iai lili iinā ma na faasolosolo malie ane ona matala mai a o matou matamata atu i ai.”

Na faaopoopo mai ia Karl F. Klein o se tasi o le Vaega Pule o Molimau a Ieova e matuā fiafia tele i musika e faapea: “I le taimi lava lena a o faaali nei ata, na faasau faatasi ai ma musika matuā lelei lava, o na musika matuā matagofie e pei o le Narcissus ma le Humoreske.”

Sa iai foʻi isi mea na tutupu e lē mafai ona galo. E manatua e Clayton J. Woodworth, Jr. e faapea: “I se tasi taimi sa iai foʻi ni mea sesē ae mālie na tutupu. I se tasi taimi a o tāina le pese ‘⁠Flee as a Bird to Your Mountain,’ (Sola e Pei o se Manulele i Lou Mauga) na aliaʻi mai ai le ata o se manu matuā tele lava, le gigantosaurus, sa ola a o leʻi oo i le Lolo”!

E ese mai i le “Ata o le Tala o le Foafoaga,” sa leʻi pine ae iai foʻi ma seti o le “Eureka Drama.” (Tagaʻi i le pusa.) O le tasi na faia aʻe i lauga, faapea ma musika na tapuʻeina. O le isi sa faia aʻe i mea e tāina i le fonokalafi ma ata lē gaoioi. E ui lava sa leai ni ata gaoioi i le “Eureka Drama,” ae sa aogā tele pe a faaalia i vaipanoa e tau lē toʻatele ni tagata e nonofo ai.

Se Meafaigaluega Malosi mo le Molimau Atu

E oo atu i le faaiʻuga o le 1914, na faaalia ai le “Ata o le Tala o le Foafoaga “i ni aofia e sili atu i le 9,000,000 pe a tuufaatasi i Amerika i Mātū, Europa, ma Ausetalia. E ui ina toʻaitiiti le faitau aofaʻi, ae sa leʻi faapea ua leai se talitonuga maumauaʻi lea sa manaʻomia e Tagata Aʻoga o le Tusi Paia ina ia folafola atu le tala lelei i lenei auala fou. Sa latou foaʻi atu ma le fiafia ia tupe sa manaʻomia e totogi ai fale talafeagai mo le faaaliga o nei ata. O lea, o le auala lena na faia ai e le “Ata o le Tala o le Foafoaga” se galuega sili e faamasani tagata na matamata ai i le Afioga a le Atua ma ana fuafuaga.

I se tusi na avatu ia C. T. Russell, na tusi atu ai se tasi tagata e faapea: “O laʻu uluaʻi matamataga i la outou Ata, na matuā suia atoatoa ai loʻu olaga; pe e ao foʻi ona ou faapea atu, na matuā suia ai loʻu malamalama e uiga i le Tusi Paia.” Na faapea mai se tasi fafine: “Na toetoe lava a taaʻina atu aʻu i mailei e faavaivaia ai loʻu faatuatua, ma na ou lagona ua faaolaina aʻu ona o le ‘Ata o le Tala o le Foafoaga’ lea na faaalia iinei i le tau māfanafana ua mavae. . . . Ua ou maua nei lena filemu lea e lē mafai e le lalolagi ona aumaia ma o le a lē mafai foʻi ona ou tuuesea ona o le tamaoaiga uma o le lalolagi.”

Na faapea mai Demetrius Papageorge, o sē ua loa ona galue i le ofisa ulu o le Sosaiete: “O le ‘Ata o le Tala o le Foafoaga’ o se galuega aupito sili ona lelei, pe a tatou mafaufau atu i le aofaʻiga faatauvaa o Tagata Aʻoga o le Tusi Paia ma ona o le utiuti o le tupe na maua. O le mea moni sa iai le agaga paia o Ieova i tua o nei mea uma!”

[Pusa/Ata i le itulau 8, 9]

Le “Eureka Drama”

I le valu masina ina ua mavae le faaaliga muamua o le “Ata o le Tala o le Foafoaga,” na iloa ai e le Sosaiete le manaʻoga ina ia saunia se isi ata e pei o lena ata ma na faaigoaina o le “Eureka Drama.” A o faaauau pea ona faaali le ata atoa o le “Ata o le Tala o le Foafoaga” i aai tetele, na faasalalau atu foʻi e seti o le “Eureka” lena lava feʻau faavae i nuu ma nofoaga i tua. O le tasi vaega o le “Eureka Drama” sa faamatalaina ai e faapea e avatu ai “i tuafāfine se isi avanoa mataʻina” e talaʻi ai. Aiseā? Auā e māmā le pusa lea e feaveaʻi ai mea e tāina i le fonokalafi e na o le 30 pauna [14 kilokalama] le mamafa. Ae i so o se faaaliga lava o le ata e manaʻomia ona ave se fonokalafi.