Le “Mea e Malosi ai Lou Pute”

E TALITONUINA faapea, o le anoanoaʻi o maʻi o le fanau a tagata, e māfua mai i faalogona mafatia e pei o le fefe, faanoanoa, matauʻa, teulotoina o le ita, ʻinoʻino, ma lagona nofosala. I le manatu atu i lenei mea, maʻeu le faamāfanafanaina i le faamatalaga a le Tusi Paia e faapea, o le “mataʻu ia Ieova” e fai lea ma “mea e malosi ai lou pute, ma mea e su ai ou ivi”!—Faataoto 3:7, 8.

O ponaivi o le lagolago malosi lea i le fausaga o le tino. I lea, ua faaaogā faafaatusa ai e le Tusi Paia le upu “ivi,” e faamatala ai le tagata lava ia—aemaise lava ina ua aafia i faalogona loloto ma lagona ootia. Ae e faapefea i le mataʻu ia Ieova ona avea ma mea e “malosi ai lou pute”?

E eseese manatu o tagata aʻoga o le Tusi Paia e faatatau i le taʻua o le “pute” i lenei fuaitau. Ua faapea mai se tasi tagata faitōfā, talu ai ona o le pute “o le vaega ogatotonu o le tino,” atonu ua fai la le “pute” ma sui o totoga tāua uma lava. Ua faapea mai se tasi tagata aʻoga, o le upu “pute” atonu e uiga i le uso o le pute, e pei ona faaaogā ai i le Esekielu 16:4. Afai o lea le manatu, atonu la ua faamamafaina mai e le Faataoto 3:8 le manaʻomia ona tatou faalagolago atoa atu i le Atua—e pei o se pepe i totonu o le manava o le tinā e lē mafai ona ia faia se mea ma e matuā faalagolago atoatoa atu i lona tinā mo le fafagaina. E iai foʻi le isi manatu e faapea, o le “pute” iinei atonu o loo faasino atu i musele ma uaua i sooga o le tino. I lenei fuaiupu, atonu ua faatusatusa atu nei vaega i “ivi”—o mea e sili ona malolosi o loo faia aʻe ai le tino.

Po o le ā lava le uiga patino, ae tasi lava le mea ia mautinoa: O le faaalia o le mataʻu ma le migao ia Ieova, o le amataga lena o le atamai. O le ōgatasi ma tapulaa a le Atua e mafai ona saosaolaumea i lo tatou lelei faaletino i le taimi nei. E sili atu i lena, e mafai ona tatou maua ai le finagalo malie o Ieova, lea o le a taʻitaʻiina atu ai i le ola e lē uma i le soifua mālōlōina lelei atoatoa—i le faaletino ma tau i faalogona ootia—i lana lalolagi fou o loo fotuaʻi mai.—Isaia 33:24; Faaaliga 21:4; 22:2.

[Faamatalaga i Ata i le itulau 32]

Dr. G. Moscoso/SPL/Photo Researchers