Ola Faatasi ma Lamatiaga

“O mea uma lava e mafai ona e faia i aso taʻitasi—e aofia ai le moe—e iai lava lamatiaga e ono lamatia ai lou ola.”—le mekasini o le Discover.

UA FAATUSAINA le olaga i le savalivali i se laufanua o loo tatao ai ni maina, talu ai e mafai ona faafuaseʻi ona faamanuʻalia pe oti ai, ma e masani lava ona tupu e aunoa ma se lapataʻiga. E eseese lava lamatiaga mai lea atunuu i lea atunuu. E aofia ai faalavelave tau taavale, o taua i vā o tagata lava o se atunuu, o oge, le AIDS, le kanesa, le maʻifatu, ma le tele o isi mea. Mo se faaaʻoaʻoga i atunuu i le itu i saute o le Sahara i Aferika, ua numera tasi ai le AIDS i le fasiotia o tagata, ma i se tausaga lata mai nei na “maliliu ai le 2.2 miliona tagata, e tusa lea ma le faasefulu taimi e sili atu ai na i lo le aofaʻi o tagata na maliliu mai taua uma lava i le vā o tagata Aferika lava latou,” o se faamatalaga lea a le U.S. News & World Report.

I le taimi nei, ua faaaluina e le lalolagi le fia piliona tālā i le tau faafualoaina o le ola ma faaitiitia le lamatiaga o le aafia i maʻi ma le lē atoatoa o le malosi. O le tele o manatu o loo faatulaʻi, e pei o le fuafua lelei o le ʻai ma le inu ma le faia o faamalositino, e mafai ona maua ai ni nai iʻuga aogā. Peitaʻi ane, o loo iai se puna o faamatalaga maufaatuatuaina i vala tāua uma o le olaga lea e mafai ona fesoasoani ia te oe ina ia e olioli i se olaga e sili atu ona malupuipuia, e sili atu ona saogalemu. O lena puna o le Tusi Paia lea. O loo iai taʻiala mo le taulimaina o le tele o popolega lea e aafia ai lo tatou soifua mālōlōina ma lo tatou tulaga lelei. O le mea moni, e lē o faamatalaina e le Tusi Paia auʻiliʻiliga uma o faafitauli taʻitasi. Peitaʻi, o loo saunia maia mataupu silisili e sili ona lelei e taʻitaʻia ai i tatou i na mataupu e pei o le auala masani e taumafa ai, o faamalosi tino, o uiga faalemafaufau, o feusuaʻiga, le faaaogāina o le ʻava malosi, le tapaa, ma mea ua taʻua o fualaau e faafiafia ai, ma le anoanoaʻi o isi mea.

E toʻatele tagata ua matuā mafatia o latou olaga i toʻatugā tautupe. O iinei foʻi e fesoasoani mai ai le Tusi Paia. E lē gata ua fesoasoani mai ina ia iai se vaaiga atamai i tupe ma le faasoasoaina, ae o loo faaalia mai ai foʻi le auala e avea ai o se tagata faigaluega lelei po o sē e pule lelei i se galuega. Pe a faafaigofie le manatu, ua avea le Tusi Paia ma taʻiala aogā, e lē mo na o le tulaga tautupe ma se lelei faaletino, ae mo le olaga lava ia. Pe e te fia iloa le aogā o loo mafai ona iai le Tusi Paia i aso nei? Seʻi faaauau pea la le faitau faamolemole.