Le Tauiviga Faasaga i le Mativa—Po o se Taua e Lē Mafai Ona Manumalo Ai?
Le Tauiviga Faasaga i le Mativa—Po o se Taua e Lē Mafai Ona Manumalo Ai?
O TURISI o loo asiasi atu i Malo Aufaatasi i le Aai o Niu Ioka, ua latou vaavaai i le Maota Fono o le Komiti o Mataupu Tau Tamaoaiga ma le Vafealoaʻi, o loo iai paipa fetaiaʻi o loo aliali mai i le fāʻalo o le potu e nofoia e tagata lautele a o faagasolo fonotaga a le komiti. Ua faamatala mai e le tamaʻitaʻi e faasinoina tagata asiasi atu e faapea: “O le ‘lē māeʻa’ ona faia o le fāʻalo, e masani lava ona avea o se faailoga e faamanatu mai ai, o le galuega tau tamaoaiga ma le vafealoaʻi a Malo Aufaatasi e leʻi taitai ona uma; o loo iai pea lava se mea e sili atu e mafai ona faia ina ia faaleleia ai tulaga o loo ola ai tagata o le lalolagi.”
E ui lava ua faia e le Komiti se taumafaiga aogā o le uunaʻia lea o se tulaga e sili ona maualuga o le olaga mo tagata uma, ae e foliga mai e leai se iʻuga o lenei galuega. Ae o se mea e faatupu manatu, i le taimi o le faiva a Iesu Keriso i le lalolagi i le uluaʻi senituri T.A., na ia fetalai ai e faapea: “Ua i oʻu luga le Agaga o le Alii [o Ieova], auā ua na faauu mai ia te au e folafola le tala lelei i e matitiva.” (Luka 4:18) O le ā le “tala lelei” lea na ia folafola? O le feʻau o le Malo lea ua avea ai Iesu Keriso ma tupu, o le a faavaeina e Ieova le Atua o lē ua avea ma “malosi . . . i le ua mativa i lona puapuaga.” O le ā o le a faataunuuina e lena Malo? Na valoia e Isaia e faapea: “E faia e Ieova o ʻau . . . mo nuu uma le faigaai o mea lelei, o le tausamiga o uaina ua tuu ai ʻalu; o mea e silisili ona lelei, o uaina ua faamaninoina sa tuu ai ʻalu. E faaumatia e ia le oti e faavavau; e soloiesea foi e le Alii o Ieova o loimata i mata uma lava.”—Isaia 25:4-6, 8.
Pe e te fia iloa atili e uiga i le auala o le a faia e le Malo o le Atua e “faaleleia ai tulaga o le olaga mo tagata i le lalolagi,” ina ia lē toe iai se mativa? Tagaʻi i le pito i lalo ina ia e silafia ai le auala e mafai ona e maua ai se faiaʻoga agavaa e asiasi atu ia te oe e faailoa atili atu mea o loo fai mai ai le Tusi Paia e uiga i na mataupu.