O le ā le Mea Moni e Uiga i Tusi Tāʻai o le Sami Mate?

I le silia ma le 50 tausaga ua mavae, na togi ai e se leoleo mamoe Bedouin se maa i totonu o se ana ma iʻu ai ina maua le mea lea ua taʻua e nisi o le mea e sili ona maoaʻe na maua mai suʻesuʻega i le eleele o le senituri lona 20. Na lagona atu e le tagata Bedouin le taʻe o se fagu ele i le maa. Ina ua ia iloiloina, sa ia tau atu ai i uluaʻi tusi tāʻai ia na iʻu ina lauiloa o Tusi Tāʻai o le Sami Mate.

UA AVEA nei tusi tāʻai ma taulaʻiga o manatu ma feteenaʻiga e lē gata i vaega o tagata atamamai ae faapena foʻi ma le ʻaufaasalalau i le lautele. Sa matuā taatele le fenuminumiaʻi ma faamatalaga lē saʻosaʻo na maua i le lautele. Na feaveaʻi solo ni faamatalaga se tele e faatatau i se faiga e aua ai neʻi faailoaina ia tusitusiga, na uunaʻia e popolega faapea o loo faaalia e tusi tāʻai ni mea moni o le a matuā faavaivaia ai le faatuatua o Kerisiano ma tagata Siū. Ae o le ā le uiga moni o nei tusi tāʻai? Ua mavae le silia ma le 50 tausaga, pe mafai ea ona iloa ia mea moni?

O ā Tusi ua Taʻua o Tusi Tāʻai o le Sami Mate?

O Tusi Tāʻai o le Sami Mate o ni manusikulipi Iutaia anamua, o le tele lava o na manusikulipi na tusia i le faa-Eperu, o nisi i le faa-Arama, ma sina vaega i le faa-Eleni. O le tele o nei tusi tāʻai ma nisi o ona vaega ua silia ma le 2,000 tausaga talu ona iai, na tusiaina a o leʻi soifua mai Iesu. E aofia ai i uluaʻi tusi tāʻai na maua mai i tagata Bedouin ia manusikulipi uumi e fitu ma ua iai i se tulaga o le faasolosolo ina leaga. A o suʻeina le tele o ana, na maua ai foʻi isi tusi tāʻai ma le faitau afe o vaega o tusi tāʻai. I le vā o le tausaga e 1947 ma le 1956, na maua ai ni ana se 11 sa iai tusi tāʻai e latalata ane i Qumran, i le mea o loo iai le Sami Mate.

Ina ua māeʻa ona faavasega uma ia tusi tāʻai faapea foʻi ma ona vaega, na maua ai le aofaʻi e 800 manusikulipi. Pe ā o le tasi vae fā, po o le sili laʻitiiti aʻe lava i le  200 manusikulipi, o ni kopi o vaega o le Tusi Paia Eperu. O isi manusikulipi o kopi o tusitusiga anamua a Iutaia e lē faale-Tusi Paia, e aofia ai le Apokerifa ma le Pseudepigrapha. *

O nisi o tusi tāʻai ia o loo matuā faagaeetia ai lava tagata atamamai sa lē o ni tusitusiga na lauiloa muamua. E aofia ai le faamatalaina mai o mataupu o le tulafono faa-Iutaia, ni tulafono patino mo tagata o le vaega faalelotu na nonofo i Qumran, o solo ma tatalo faalelotu, e faapena foʻi i tusitusiga faalotu o loo faaalia ai manatu e uiga i le faataunuuga o valoaga o le Tusi Paia ma aso e gata ai. E iai foʻi faamatalaga tusitusia e uiga i le Tusi Paia e tutasi lava, o nei faamatalaga ua matuā leva ona iai na i lo faamatalaga tusitusia faaonaponei, e faatatau i le faamalamalamaina o fuaiupu taʻitasi o le Tusi Paia.

O Ai na Tusia Tusi Tāʻai o le Sami Mate?

Ua iloa i auala eseese e fuafua ai po o anafea na tusia ai faamatalaga anamua e faapea, o nei tusi tāʻai sa toe sii mai pe na faatulagaina foʻi i le vā o le senituri lona tolu T.L.M. ma le senituri muamua T.A. Ua faatū mai le manatu o nisi tagata atamamai faapea sa natia tusi tāʻai i ana e tagata Iutaia mai Ierusalema a o leʻi faaumatiaina le malumalu i le 70 T.A. Ae peitaʻi, o le toʻatele o tagata atamamai ua suʻesuʻeina tusi tāʻai ua latou mafaufau faapea e lē ōgatusa lena manatu ma faamatalaga o loo tusia ai i tusi tāʻai lava latou. O le tele o tusi tāʻai o loo faaatagia mai ai manatu ma tū e feteenaʻi ma manatu o le ʻaumautofi i lotu i Ierusalema. Ua faailoa mai e nei tusi tāʻai se vaega o tagata na latou talitonu faapea na teena e le Atua ia ositaulaga ma le auaunaga i le malumalu i Ierusalema ma na silasila o ia i tapuaʻiga sa faia e la latou vaega faalotu i le toafa o se tapuaʻiga ua suitulaga i le auaunaga i le malumalu. E foliga mai ailoga na natia e le ʻaumautofi i le malumalu i Ierusalema se tuufaatasiga o ni tusitusiga ia sa aofia ai ma na tusi tāʻai.

E ui e foliga mai sa iai se vaega o tagata sii tusi i Qumran, ae atonu o le tele lava o tusi tāʻai sa aoaoina mai isi vaipanoa ma auina atu ai iinā e tagata o le lotu. I se isi uiga, o Tusi Tāʻai o le Sami Mate o se tuufaatasiga o tusi tāʻai na matuā lautele lona aoaoina. E pei lava ona iai i so o se tuufaatasiga o tusi, o tusi o loo iai e ono aofia ai se vaaiga lautele i manatu, ae e lē o atagia mai i tusi uma le vaaiga faalotu a ana tagata faitau. Peitaʻi, o tusitusiga lea e tele ona kopi e maua ai, e foliga mai o loo atagia mai ai se naunau faapitoa ma talitonuga o lena vaega o tagata.

Pe sa Avea Tagata e Aumau i Qumran ma ʻau Essene?

Afai o nei tusi tāʻai o ni tusi sa i Qumran, o ai la sa aumau ai? O le polofesa o Eleazar Sukenik, o lē na ia mauaina tusi tāʻai e tolu mo le Hebrew University i Ierusalema i le 1947, o ia lea na uluaʻi faaalia lona manatu faapea o tusi tāʻai nei a tagata o le ʻau Essene.

O le ʻau Essene o se vaega faalotu Iutaia na taʻua e tusitala o le uluaʻi senituri o Josephus, Philo mai Alesania, ma Pliny the Elder. O le tupuaga moni mai o le ʻau Essene o se mataupu o loo taumatemate i ai, ae e foliga mai na mānu aʻe lena vaega a o faagasolo le vaitaimi o fevesiaʻiga ina ua mavae le fouvalega a le ʻau Makapaio i le senituri lona lua T.L.M. * Na lipotia mai e Josephus e uiga ia i latou i lena vaitaimi a o ia auʻiliʻiliina mai le auala na ese ai la latou vaaiga faalelotu mai le vaaiga a le ʻau Faresaio ma le ʻau Satukaio. Na taʻua e Pliny le nofoaga o se vaega o le ʻau Essene e latalata i le Sami Mate i le vā o Ieriko ma Enokati.

Na taʻua e le polofesa o James VanderKam, o se tagata poto faapitoa i Tusi Tāʻai o le Sami Mate e faapea, “o le ʻau Essene na nonofo i Qumran, ua na o se vaega toʻaitiiti lea o le faalapotopotoga atoa o le ʻau Essene,” lea na fuafua e Josephus lo latou aofaʻi e pe ā ma le fā afe i latou. E ui e lē fetaui atoatoa uma i ai faamatalaga, ae o faamatalaga na aoaoina i tusitusiga mai Qumran e foliga mai e fetaui lelei ma le ʻau Essene na i lo se isi lava vaega o tagata Iutaia sa lauiloa o lena vaitaimi.

Ua faapea mai isi na amata mai le faa-Kerisiano i Qumran. E ui i lea, e tele ia eseesega matilatila e  mafai ona mātauina i le vā o talitonuga faalotu a vaega faalotu i Qumran ma uluaʻi Kerisiano. Ua faaalia i tusitusiga a Qumran le maumaututū tele o tulafono o le Sapati ma e matuā manatu mamafa naʻuā i le mamā e tusa ai ma tū faaletapuaʻiga. (Mataio 15:1-20; Luka 6:1-11) E tai faapena foʻi le uiga o le tū ese mai o le ʻau Essene mai isi vaega o tagata, o lo latou talitonuga i iʻuga tuupoina ma le solu e lē mafai ona oti ma lo latou faamamafaina o le nofofua faapea manatu faamalamalamagatā e uiga i le auai faatasi ma agelu i la latou tapuaʻiga. Ua faailoa mai ai i lenei mea lo latou feteenaʻi ma aʻoaʻoga a Iesu ma uluaʻi Kerisiano.—Mataio 5:14-16; Ioane 11:23, 24; Kolose 2:18; 1 Timoteo 4:1-3.

Leai se Tulaga Faalilolilo, Leai ni Tusi Tāʻai o Natia

I tausaga mulimuli ane ai talu mai le mauaina o Tusi Tāʻai o le Sami Mate, na saunia ai lomiga eseese ina ia faigofie ona maua ai e tagata popoto faapitoa i le lalolagi aoao faamatalaga ia faatoʻā uma ona mauaina. Ae peitaʻi, o le faitau afe o vaega o tusi tāʻai mai se tasi o ana, na lauiloa o le Ana lona 4, sa avea ma pogai o le tele o faafitauli. Sa taulimaina nei vaega o tusi tāʻai e se vaega toʻaitiiti faava-o-malo o tagata popoto na faavaeina i Ierusalema i Sasaʻe (se vaega o Ioritana i lena taimi) i le Palestine Archaeological Museum. E leai ma se tagata Siū po o se tasi mai Isaraelu na iai i lenei vaega o tagata popoto faapitoa.

Na ati aʻe e le vaega se faatulagaga o le lē faatagaina lea ona vaai o se tasi e ese mai ia i latou i tusi tāʻai seʻi vaganā ina ua māeʻa ona lomiaina faaiʻuga aloaʻia o a latou saʻiliʻiliga loloto. Na faatapulaa le faatulagaina o le aofaʻi o tagata suʻesuʻe na iai i lena vaega. Pe a maliu se tasi o le vaega, e na o le tasi lava se tagata suʻesuʻe fou e faaopoopo i ai e suitulaga ia te ia. O le telē o le galuega na moomia ai se vaega e sili ona toʻatele, ma i nisi o tulaga, e moomia ai ni tagata e sili atu lo latou atamamai i le faa-Eperu ma le faa-Arama anamua. Na taʻua e James VanderKam e faapenei: “E ui ina atamamai le toʻavalu lea na iloiloina, ae sa lē faigofie le galuega o le iloiloina o le faitau sefulu afe o vaega o tusi tāʻai.”

Ona o le Taua e Ono Aso i le 1967, na pulea ai Ierusalema i Sasaʻe ma ona tusi tāʻai e Isaraelu, ae e leai ma se faatulagaga na suia mo le vaega suʻesuʻe o tusi tāʻai na faaofi ane i ai. Talu ai le faatuatuai ona lomia tusi tāʻai mai le Ana lona 4 mai le faitau tausaga i le faitau sefulu o tausaga, na faalogoina ai le tetee mai o ni tagata popoto. I le 1977, na taʻua ai lea tulaga e le polofesa o Geza Vermes o le Oxford University e faapea o le faiga piʻopiʻo tau aʻoaʻoga sili ona maoaʻe lea o le senituri lona 20. Na amata ona salalau tala salatua e faapea, sa natiaina ma le loto i ai e le Lotu Katoliko faamatalaga mai tusi tāʻai o le a faatamaʻia ai le Faa-Kerisiano.

I le sefulu tausaga e amata mai i le 1980, na faateleina ai i le 20 tagata popoto faapitoa e i le vaega suʻesuʻe. Mulimuli ane, i le 1990, i lalo o le taʻitaʻiga a lona faatonu sili fou o Emanuel Tov o le Hebrew University i Ierusalema, na toe faateleina ai foʻi i le 50 tagata popoto faapitoa e i le vaega suʻesuʻe. Na faavae ai ma se faasologa maumauaʻi mo le lomiaina o lomiga a tagata popoto faapitoa e uiga i tusi tāʻai na totoe.

Ae iai se mea na tupu faafuaseʻi i le 1991. Muamua lava, na lomiaina le Preliminary Edition of the Unpublished Dead Sea Scrolls. Sa mafai ona tuufaatasia lenei lomiga e ala i le faaaogāina o se komepiuta ma sa faavaeina lenei tuufaatasiga i se faasino tusi sa saunia e le vaega suʻesuʻe. Na sosoo ai ma le faalauiloaina e le Huntington Library i San Marino, i Kalifonia, e faapea o le a latou faaavanoaina mo so o se tagata poto faapitoa lava, le latou tuufaatasiga atoa o ata o tusi tāʻai. E leʻi umi lava, ae maua loa le lomiga o le Facsimile Edition of the Dead Sea Scrolls, lea na oo ina faigofie ai ona maua ata o tusi tāʻai sa iai e leʻi faamatalaina muamua.

O lea la, mo le sefulu tausaga lea ua tuanaʻi atu, ua mafai ai ona maua uma Tusi Tāʻai o le Sami Mate mo saʻiliʻiliga. Ua faaalia e le suʻesuʻega le leai o se tulaga faalilolilo; e leai ni tusi tāʻai o natia. A o lomiaina ia lomiga faaiʻu aloaʻia o nei tusi tāʻai, ua na o le vaitaimi lenei e amata ai se iloiloga atoatoa. Ua faapea ona iai se vaega suʻesuʻe fou o nei tusi tāʻai. Ae o le ā le uiga o lenei saʻiliʻiliga loloto mo tagata aʻoga o le Tusi Paia?

[Faamatalaga pito i lalo]

[Ata i le itulau 3]

O nisi o ana e latalata ane i le Sami Mate ia na maua ai tusi tāʻai anamua

[Faamatalaga i Ata i le itulau 3]

Se fasi vaega o le tusi tāʻai: Itulau 3, 4 ma le 6: Courtesy of Israel Antiquities Authority

[Faamatalaga i Ata i le itulau 5]

Courtesy of Shrine of the Book, Israel Museum, Jerusalem