Cyril ma Methodius—O Tagata Faaliliu o le Tusi Paia na Faavaeina se Alafapeta

“Ua papatisoina lo matou atunuu ae o lea e leʻi iai so matou faiaʻoga. E matou te lē malamalama i le faa-Eleni, e lē malamalama foʻi i le faa-Latina. . . . E matou te lē malamalama i mataʻitusi, e lē malamalama foʻi i o latou uiga; o lea ia auina mai ni o matou faiaʻoga o ē e mafai ona faamalamalamaina upu o le Tusi Paia ma o latou uiga.”—Rostislav, le perenise o Moravia, 862 T.A.

I ASO nei, o le silia ma le 435 miliona o tagata o loo tautatala i gagana e tupuga mai i Slavic ua mafai ona latou faaaogāina se faaliliuga o le Tusi Paia i la latou lava gagana. * E 360 miliona i latou e faaaogāina le alafapeta Cyrillic. Ae i le 12 senituri ua mavae, sa leʻi iai se gagana tusitusi po o se alafapeta foʻi i vaega o gagana (dialect) sa tautatala ai o latou tuaa. O tane na fesoasoani e faasaʻo lena tulaga, o o la suafa o Cyril ma Methodius, o se ʻauso. O tagata e fiafia i le Afioga a le Atua o le a latou iloa faapea o taumafaiga malolosi ma le fou a lenei ʻauso e toʻalua, ua avea ma vaega faaoso naunau i le talafaasolopito o le faasaoina ma le faasalalauina atu o le Tusi Paia. O ai nei alii, ma o ā toʻatugā na la fesagaʻia?

“Le Faifilosofia” ma le Kovana

O Cyril (827-869 T.A., sa igoa muamua ia Konesetatino) ma Methodius (825-885 T.A.) sa fananau mai i se aiga taualoa i Tesalonia, i Eleni. O le taimi lena sa avea ai Tesalonia ma aai e tautatala i ni gagana se lua; sa tautatala ona tagata i le gagana Eleni ma se ituaiga o le gagana Slavic. Ona o le toʻatele o tagata Slav sa nonofo ai, faapea le sootaga vavalalata i le vā o tagatanuu Tesalonia ma vaega o tagata Slav sa siʻomia ai, atonu na māfua ai ona maua e Cyril ma Methodius se avanoa e malamalama lelei ai i le gagana a tagata Slav e nonofo i le itu i saute. Ma e taʻua foʻi e se tasi o lē e fai ni ana tusitusiga e uiga ia Methodius e faapea, o lo la tinā e tupuga mai Slav.

Ina ua maliu lona tamā, ona siitia atu lea o Cyril i Constantinople, le laumua o le Emepaea o Byzantine. O iinā sa aʻoaʻoina ai o ia i le iunivesite a le malo ma faifaimea faatasi ai ma faiaʻoga atamamai. Sa avea o ia ma tausi tusi mo le Hagia Sophia, o le fale o le lotu sa sili ona taʻutaʻua i Sasaʻe, ma mulimuli ane avea ai o ia ma polofesa i filosofia. O le mea moni, ona o tomai tau aʻoaʻoga na ia ausia, na iʻu ai ina valaau Cyril e tagata i le igoa o Le Faifilosofia.

O le taimi lena, o loo tulituliloa ai e Methodius le galuega lea sa fai e lona tamā—i mataupu tau pulega faapolotiki. Na ia ausia le tulaga o le alii sili (kovana) i se oganuu i se itumalo i Byzantine lea sa toʻatele tagata Slav e nonofo ai. E ui i lea, na ia toe faamaamulu ae alu atu i se monaseri i Pitunia, i Asia Itiiti. Na faatasi atu Cyril ia te ia iinā i le 855 T.A.

I le 860 T.A., na auina atu ai e le augatamā o  Constantinople le ʻauso e toʻalua i se galuega faapitoa e faia i se isi atunuu. Na aauina atu i laʻua i le ʻau Khazar, o tagata e aumau i le itu i matū i sasaʻe o le Sami Uliuli, o ē sa faalotolotolua pea po o lē fea le ituaiga e auai atu i ai, po o le faa-Isalama, le faa-Iutaia, po o le Faa-Kerisiano. A o agaʻi atu Cyril iinā, na nofo ai mo sina taimi i Chersonese, i Crimea. E talitonu nisi tagata atamamai e faapea o iinā na ia aʻoaʻoina ai le faa-Eperu ma le faa-Samaria ma ona faaliliuina ai loa le kalama Eperu i le gagana a tagata Khazar.

Se Valaaulia Mai Moravia

I le 862 T.A., na auina atu ai e Rostislav, le perenise o Moravia (e aofia ai i aso nei le vaega i sasaʻe o Czechia, le vaega i sisifo o Slovakia ma le vaega i sisifo o Hagakeri) i le emeperoa Byzantine o Mekaeli III, le talosaga lea o loo taʻua i le palakalafa amata—ina ia aauina mai ni faiaʻoga o le Tusi Paia. O le taimi lea ua leva ona aʻoaʻoina tagatanuu Moravia e tautatala i le gagana Slavic i aʻoaʻoga faalotu na sa faia e misionare mai le malo o East Frankish (ua taʻua i aso nei o Siamani ma Oseteria). Peitaʻi, sa manatu mamafa Rostislav i taaʻiga faapolotiki ma taaʻiga faalotu a ituaiga Siamani. Sa ia faamoemoe o le a fesoasoani noataga faalelotu ma Constantinople e tausia ai le tumaʻoti o lona lava atunuu i faiga faapolotiki ma faiga faalelotu.

Na filifili le emeperoa e auina atu Methodius ma Cyril i Moravia. Sa lava saunia le ʻauso e toʻalua, i le itu tau le mafaufau, tau aʻoaʻoga ma gagana ina ia la tauaveina ai lena galuega faapitoa. Ua taʻu mai ia i tatou e se alii tusitala e uiga i olaga o tagata sa iai i le senituri lona iva, le māfuaaga na augani ane ai le emeperoa ia i laʻua e ō i Moravia e faapea: “O oulua uma o tagatanuu moni o Tesalonia, ma o tagata Tesalonia uma e lelei tele le latou tautatala i le gagana Slav.”

Ua Saunia se Alafapeta ma se Faaliliuga o le Tusi Paia

I ni masina a o la leʻi malaga ese atu, na sauniuni ai Cyril mo lenei galuega faapitoa e ala i lona saunia o se alafapeta tusitusia mo tagata Slav. Ua faapea mai se faamatalaga, e vave lava ona mauaina e ia le faaleoga o upu o gagana pe a faalogologo i ai. O lea, i le faaaogāina o mataʻitusi o le gagana Eleni ma le gagana Eperu, na ia taumafai ai e tuu se mataʻitusi i faaleoga taʻitasi uma lava i le gagana Slavonic. * E talitonu nisi tagata suʻesuʻe faapea ua leva ona ia faaaluina ni tausaga se tele e faataatia ai le faavae o lea alafapeta. Ma o loo iai pea se lē mautonu e uiga i le foliga tonu lava o alafapeta lea na fuafuaina e Cyril.—Tagaʻi i le pusa “Alafapeta Cyrillic po o le Glagolitic?”

I le taimi e tasi, na amata ai e Cyril se polokalame faanatinati o le faaliliuina o le Tusi Paia. E tusa ai o talatuu, sa ia amata i le faaliliuina mai o le gagana  Eleni i le gagana Slavonic o le uluaʻi faaupuga o le Evagelia a Ioane, e faaaogā ai le alafapeta fou lea sa faavaeina, e faapea: “I le amataga sa iai le Upu . . . ” Na faasolosolo atu ai lava ona faaliliu e Cyril, o Evagelia e fā, o tusi a Paulo, ma le tusi o Salamo.

Pe sa galue na o ia? E matuā foliga mai lava sa fesoasoani atu Methodius i le galuega. E lē gata i lea, ua taʻua e le tusi, Cambridge Medieval History e faapea: “E mautinoa lava sa iai isi na fesoasoani i a [Cyril], o ē e mautinoa lava o tagatanuu moni na tupuga mai i tagata Slav ae sa aʻoaʻoina i le gagana ma filosofia faa-Eleni. Pe afai tatou te iloiloina faaliliuga tuai lava, . . . e tatou te matuā faamaonia ai, o se gagana Slavonic e sili ona lelei sa faaaogāina, lea e tatau ona faapea atu sa faaaogā e ni tagata na galulue faatasi ma Cyril, ma o i latou foʻi o ni tagata Slav.” O le isi vaega na totoe o le Tusi Paia na faamāeʻa mulimuli ane e Methodius, e pei o lea o le a tatou vaai i ai.

“E Pei o ni Oreva i Luga o se Nesa”

I le 863 T.A., na amata ai loa e Cyril ma Methodius le la galuega faapitoa i Moravia, o iinā sa faafeiloaʻia ai ma le māfana i laʻua. E aofia ai i le la galuega le aʻoaʻoina o se vaega o tagata i lena lava vaipanoa i le alafapeta fou sa saunia i le gagana Slavonic, e ese mai le faaliliuina o mau faale-Tusi Paia ma mau faalelotu.

Ae peitaʻi, sa leʻi faigofie uma na mea. Na matuā tetee atu ma le ita tele faifeʻau Frankish i Moravia i le faaaogāina o le gagana Slavonic. Sa latou taofiofimamau i le manatu e na o le tolu lava gagana autū, i le maumauaʻi faapea e na o le faa-Latina, faa-Eleni ma le faa-Eperu e taliaina ona faaaogā i tapuaʻiga. I le faamoemoe o le a lagolagoina e le pope le la gagana tusitusi fou sa faia, na malaga atu ai le ʻauso i Roma i le 867 T.A.

Ina ua afea Venice, na fetaiaʻi ai foʻi Cyril ma Methodius ma se tasi vaega o taʻitaʻi lotu Latina e maumauaʻi i le manatu faapea e na o le tolu lava gagana e tatau ona faaaogā mo le tapuaʻiga. Ua taʻu mai ia i tatou e se alii tusitala anamua o lē na tusitusia faamatalaga i le olaga o Cyril e faapea, na faia e a latou epikopo, o patele ma monike ni faamatalaga faatigā ia te ia “e pei o ni oreva i luga o se nesa.” E tusa ai o lena tala, na tali fuaitau atu i ai Cyril e ala i lona siiina atu o upu o le 1 Korinito 14:8, 9 e faapea: “Auā foi a faaletonu le leo o le pu, o ai ea se na te sauni e tau! E faapea foi outou, afai tou te le sauniuni atu i o outou laulaufaiva ni upu matala, e iloa ea faapefea le upu ua tautala aʻi? Auā e tautala atu outou i le gaogao.”

Ina ua iʻu lava ina taunuu le ʻauso i Roma, na avatu ai e Pope Adrian II se faatagaga atoatoa mo lo la faaaogāina o le gagana Slavonic. Ina ua mavae ni masina, ma a o iai pea i Roma, na maʻi tigāina ai Cyril. E leʻi atoa lelei le lua masina mulimuli ane ae maliu loa Cyril i le 42 o ona tausaga.

Sa faalaeiauina Methodius e Pope Adrian II ina ia toe foʻi e galue i Moravia e latalata i le taulaga o Nitra, i le vaipanoa lea ua taʻua i aso nei o Slovakia. Ona o lona naunau ia matuā lagolagoina o ia e tagata o lena vaipanoa, na tuu atu ai e le pope ia Methodius ni tusi e faamaonia ai lona faaaogāina o le gagana Slavonic ma tofia o ia e avea ma akiepikopō. Ae peitaʻi, i le 870 T.A., na lokaina ai Methodius e le epikopō Frankish o Hermanrich, e ala i le fesoasoani ane a le perenise o Svatopluk mai Nitra. Sa faafalepuipuiina o ia mo le lua ma le ʻafa tausaga i se monaseri i le itu i saute i sasaʻe o Siamani. Mulimuli ane lava, na aumaia ai se faatonuga mai lē na sosoo ane ia Adrian II, o Pope Ioane VIII, ina ia tatalaina i tua Methodius. Sa toe faafoʻisia ia te ia lana matagaluega, ma toe faamautūina le lagolago a le pope i le faaaogāina o le gagana Slavonic i le tapuaʻiga.

Ae na faaauau pea teteega mai faifeʻau Frankish. Na taulau manuia le taumafaiga a Methodius e puipuia o ia mai tuuaʻiga faapea sa tetee i aʻoaʻoga a le lotu, ma na mulimuli ane sa ia maua se tusi aloaʻia mai ia Pope Ioane VIII o loo patino mai ai le faatagaga mo le faaaogāina o le gagana Slavonic i le lotu. E pei ona ioeina e le pope o loo iai nei, o Ioane Paulo II, sa faaaluina le olaga o Methodius “i femalagaaʻiga, na lē tagolima, sa fesagaʻi ma mafatiaga, o teteega matuitui ma sauāga, . . . sa iai foʻi se vaitaimi na faafalepuipui ma faia i ai faiga sili ona lē alofa.” E faateʻia ai, ona o lenei mea sa faia e epikopo ma perenise o ē sa foliga na latou lagolago atu ia Roma.

Ua Faaliliuina le Tusi Paia Atoa

E ui i le faatautee e lē masani aʻi, ae na faamāeʻaina lava e Methodius faatasi ai ma le fesoasoani a nisi o tusitala e faaaogāina faamaumauga pupuu (shorthand), le faaliliuina o le vaega o loo totoe o le Tusi Paia i le gagana Slavonic. E tusa ai ma talatuu, na ia faaumaina lenei galuega tele i le na o le valu masina. Peitaʻi, na te leʻi faaliliuina le tusi faaapokalifa a le ʻau Makapaio.

I aso nei, e lē faigofie ona fuafuaina ma le saʻo  aʻiaʻi se lelei o iai le faaliliuga lea na fai e Cyril ma Methodius. E lē o toe tele ni kopi o manusikulipi o loo iai pea e talitutusa atu aso na tusia ai, i le aso na amata ai le uluaʻi faaliliuga. E ala i le iloiloina o na mea anamua ae ua seāseā toe maua, ua iloa ai e tagata e tomai faapitoa i gagana faapea sa saʻo lelei le faaliliuga ma o loo faigofie ma sologa lelei le faitauina. Ua taʻua e le tusi Our Slavic Bible e faapea, sa tatau i le ʻauso e toʻalua ona “fafau aʻe le tele o ni upu fou ma ni faaupuga fou . . . Ma e ofoofogia le saʻo aʻiaʻi o le auala na la faia ai lenei galuega [ma] avea ai le gagana Slavic o se gagana e matuā lē mafaatusalia lona tamaoaiga i upu.”

Se Faamanuiaga o Loo Tumau Pea

Ina ua maliu Methodius i le 885 T.A., na tuliesea ona soo mai Moravia e tagata Frankish na tetee ane. Na latou sulufaʻi atu i Bohemia, i le itu i saute o Polani ma Palakeria. O lea na faaauau ai pea ma salalau atu le galuega sa fofoa mai e Cyril ma Methodius. Sa faapena ai ona olaola, sa tuputupu pea ma mulimuli ane ai faateleina i ni vaega eseese le gagana Slavonic, lea sa sauniunia e le ʻauso e toʻalua le auala e tusitusia ai ma tuu i sona tulaga mautū. I aso nei, ua aofia ai i gagana sa tupuga mai i Slavic nisi gagana maʻoti se 13 ma le tele o vaega o gagana.

E lē gata i lea, o taumafaiga lototetele a Cyril ma Methodius e faaliliuina le Tusi Paia, ua maua ai le anoanoaʻi o faaliliuga eseese o le Tusi Paia i gagana ma vaega o gagana na tupuga mai i Slavic lea o loo maua i aso nei. O le faitau miliona o ē tautatala i nei gagana, ua latou maua aogā e ala i le faitauina o le Afioga a le Atua i la latou lava gagana. E ui lava i teteega matuiā, ae maʻeu le saʻo o upu nei: “O le afioga a lo tatou Atua, e tumau lea e faavavau.”—Isaia 40:8.

[Faamatalaga pito i lalo]

[Pusa i le itulau 29]

Alafapeta Cyrillic po o le Glagolitic?

O le faatulagaga o le alafapeta lea sa fafau aʻe e Cyril na faapogaia ai le tele o vevesi, talu ai sa lē mautonu tagata atamamai i gagana po o le ā lea ituaiga o alafapeta. O le alafapeta na faaigoa i le igoa o Cyril, le Cyrillic, e tele lava ina fafau aʻe i le alafapeta faa-Eleni, faatasi ai ma isi mataʻitusi faaopoopo pe ā ma le sefululua sa fafau aʻe ina ia maua ai faaleoga o ni mataʻitusi i le gagana Slavonic lea e lē o maua i le gagana Eleni. Peitaʻi ane, o nisi o manusikulipi ua leva lava ua tusia i le gagana Slavonic, o loo faaaogā ai se alafapeta e matuā ese lava, ua taʻua o le Glagolitic, ma e iai le talitonuga o le toʻatele o tagata atamamai faapea, o Cyril na ia fafauina aʻe lenei alafapeta. E iai ni nai mataʻitusi o le alafapeta Glagolitic e foliga e puna mai i mataʻitusi tusilima o le gagana Eleni po o le gagana Eperu. O nisi mataʻitusi atonu e maua mai i ituaiga o mataʻitusi sa iai i tuā i le vā o le 500 T.A. e oo i le 1500 T.A., ae o le tele lava o mataʻitusi e lavelave ma fou le fafauina aʻe. E foliga mai o le alafapeta Glagolitic, e matuā matilatila lava lona tuese mai, ma e faavae mai i uluaʻi mataʻitusi ia na fafau aʻe. Peitaʻi ane, o le alafapeta Cyrillic lea ua puna mai ai i aso nei le alafapeta mo le gagana Rusia, Ukraine, Serbia, Palakeria, ma Maketonia, e ese mai i isi gagana e 22, o nisi o na gagana e lē o ni gagana Slavonic.

[Artwork—Cyrillic and Glagolitic characters]

[Faafanua i le itulau 31]

(Tagaʻi i le lomiga mo le ata atoa)

Baltic Sea

(Polani)

Bohemia (Czechia)

Moravia (Czechia i Sasaʻe, Slovakia i Sisifo, Hagakeri i Sisifo)

Nitra

LE MALO O FRANKISH I SASAʻE (Siamani & Oseteria)

ITALIA

Venice

Roma

Sami Metitirani

PALAKERIA

ELENI

Tesalonia

(Crimea)

Sami Uliuli

Pitunia

Constantinople (Istanbul)

[Ata i le itulau 31]

Le Tusi Paia i le gagana Slavonic i tusitusiga Cyrillic mai le 1581

[Faamatalaga i Ata]

Tusi Paia: Narodna in univerzitetna knjiz̆nica-Slovenija-Ljubljana