Faamalosia A‘u e Ieova i O‘u Aso Uma
Talaaga o le Soifuaga
Faamalosia Aʻu e Ieova i Oʻu Aso Uma
UA FAAMATALAINA E FORREST LEE
Na seʻi faatoʻā uma lava ona faoesea e leoleo a matou fonokalafi ma lomiga faale-Tusi Paia. Ona o le Taua Lona Lua a le Lalolagi na maua ai e tagata tetee se faamolemolega e tauanau ai se kovana sili fou o Kanata, e faalauiloa mai e faapea e lē faaletulafono le galuega a Molimau a Ieova. Na tupu lenei mea ia Iulai 4, 1940.
I LE lē matataʻu ona o le mea sa tupu, na matou aumaia ai le tele o lomiga mai le mea na teu ai ma faaauau ai la matou talaʻiga. Ou te manatua pea upu na fai mai ai Tamā i lena taimi e faapea: “E lē faigofie ona taofia i tatou. Ua poloaʻiina i tatou e Ieova ina ia talaʻi.” I le taimi lena, o aʻu o se tama tiotio e sefulu tausaga. Ae e oo mai lava i aso nei, o loo faamanatu mai ai pea lava pea e le maumauaʻi o Tamā ma lona maelega mo le faiva le auala o loo faamalosia ai e lo tatou Atua, o Ieova, ana auauna faamaoni.
O le isi taimi na taofi ai i matou e leoleo, sa lē gata ina latou aveina a matou lomiga, ae na latou aveina foʻi Tamā i le falepuipui, ae tuua ai na o Tinā ma tamaiti e toʻafā. Na tupu lena mea ia Setema 1940, i Saskatchewan. Sa leʻi pine mulimuli ane, ae tuli ese loa aʻu ma le aʻoga ona o le mulimuli i loʻu lotofuatiaifo ua aʻoaʻoina e le Tusi Paia i le lē fāʻalo i le fuʻa ma le lē pese i le vii o le atunuu. O le faaauauina o laʻu aʻoga e ala i aʻoga fetusiaʻi, na mafai ai ona ou faia se faasologa e fetuutuunaʻi, ma faia atoatoa ai soʻu sao i le galuega talaʻi.
I le 1948, na aumai ai se valaaulia mo paeonia, o faifeʻau faataimi atoa a Molimau a Ieova, ina ia ō atu i le talafatai i sasaʻe o Kanata. O lea na ou alu ai e paeonia i Halifax, i Nova Scotia, ma i Cape Wolfe, i Prince Edward Island. I le tausaga na sosoo ai, na ou talia ai se valaaulia ina ia ou galue i le ofisa o le lālā o Molimau a Ieova i Toronto mo ni vaiaso se lua. Na iʻu ina faaumiumi atu lena lua vaiaso i le sili atu i le ono tausaga tauia o le auaunaga. Mulimuli ane, na ma feiloaʻi ai ma Myrna, o lē sa
tutusa o ma alofa ia Ieova, ma ma faaipoipo ai ia Tesema 1955. Na ma faamautū i Milton, i Ontario, ma e leʻi pine lava ae faavaeina loa se faapotopotoga fou iinā. Na avea le fogafale i lalo o lo ma fale ma Maota o le Malo.Faanaunauga Ina ia Faalautele Atu la Ma Faiva
I tausaga mulimuli ane, na vave lava ona maua sa ma fanau e toʻaono. Na muamua lava ona maua la ma tama teine o Miriam. Ona sosoo ai lea ma le isi teine o Charmaine, o le tama o Mark, le teine o Annette, le tama o Grant ae mulimuli lava i le tama o Glen. Sa masani lava ona ou sau i le fale mai i laʻu galuega ma maua mai ia tamaiti o nonofo faataamilomilo i le taʻinafi i le fola o le fale, a o faitau atu e Myrna ma faamatala tala o le Tusi Paia ia i latou, ma na tāmau ai i o latou loto le alofa moni mo Ieova. Ona o lana lagolagosua ma le alofa, na maua uma ai e la ma fanau le tele o le poto mai i le Tusi Paia a o laiti lava.
O le maelega o loʻu tamā mo le faiva na tāmau ai i loʻu mafaufau ma loʻu loto se taʻaiga e lē mafai ona aveesea. (Faataoto 22:6) O lea, i le 1968, ina ua valaaulia aiga Molimau a Ieova ina ia ō atu i Amerika Tutotonu ma Amerika i Saute e fesoasoani i le galuega talaʻi, sa faanaunau ai lo matou aiga e tali atu i lea valaau. O le taimi lena e amata mai i le 5 faasolo atu i le 13 tausaga le matutua o la ma fanau, ma e leai lava ma se isi o i matou na ilafia sina upu faa-Sepania. O lea, i le mulimuli i le faatonuga na tuuina mai, na ou faimalaga atu ai i atunuu eseese e vaai pe faapeʻī tulaga o le olaga iinā. Ina ua ou foʻi mai, na talanoaina ai e lo matou aiga faatasi ma le tatalo la matou faaiʻuga ma filifili ai e siitia atu i Nicaragua.
Auauna i Nicaragua
Na matou taunuu i lo matou aiga fou ia Oketopa 1970, ma i le tolu vaiaso, na tuuina mai ai ia te aʻu se vaega puupuu o le polokalame o le sauniga a le faapotopotoga. Sa ou tauivi i laʻu vaega i se faa-Sepania panupanu lea sa ou iloa ma faaiʻu ai i le valaauliaina o le faapotopotoga atoa i lo matou fale mo se cerveza i le 9:30 i le taeao o le Aso Toonai. O le mea moni sa tatau ona ou faapea atu o le servicio, le auaunaga i le fanua, ae o lea ua ou valaauliaina tagata uma e ō mai mo se inuga pia. O le mea moni sa avea ma luʻitau le aʻoaʻoina o le gagana!
I le taimi muamua, sa ou tusia ai se taulimaga i loʻu alofilima ma faataʻitaʻi a o ou alu atu i lea fale i lea fale. Sa ou faapea atu: “O le tusi e sau ai le suʻesuʻega faale-Tusi Paia i le aiga e aunoa ma se totogi.” Na faapea mai mulimuli ane se tasi o lē na taliaina le ofo, e tatau ona ia alu atu i a matou sauniga ina ia iloa ai po o le ā le mea lea sa ou taumafai e taʻu atu ia te ia. Na avea lenei tamāloa o se tasi o Molimau a Ieova. Maʻeu le moni o lenei mea e faapea, o le Atua na te faatupuina fatu o le upu moni i ē lotomaulalo, e pei lava ona faailoa mai e le aposetolo o Paulo!—1 Korinito 3:7.
Ina ua mavae le tusa ma le lua tausaga i le laumua o Managua, na talosagaina ai i matou ina ia
siitia atu i le vaega i saute o Nicaragua. O iinā na matou galulue ai ma le faapotopotoga i Rivas faapea ma ni vaega tū mamao ese o tagata lotofiafia. O Pedro Peña, o se Molimau faamaoni ua matua, na ma ō faatasi ina ua ma asiasia nei vaega. O le tasi vaega, sa tū i se motu o maugamū i Lake Nicaragua, o iinā sa na o le tasi le aiga Molimau a Ieova na iai.E ui e lē tele ni meafaitino a lenei aiga, ae na latou faia se taumafaiga sili e faaalia ai lo latou talisapaia o la ma asiasiga. I le afiafi na ma taunuu atu ai, ua uma ona saunia se taumafataga mo i maʻua. Sa ma nonofo ai mo se vaiaso, ma o le toʻatele o tagata peleina iinā o ē sa naunau i le Tusi Paia, sa latou faasoa mai a latou meaʻai ma i maʻua. Sa faafiafiaina i matou ona o le 101 o i latou na auai i le lauga lautele faale-Tusi Paia i le Aso Sa.
Ou te lagona sa faaalia le faamalosi mai o le mana o Ieova ina ua oo i le tasi taimi, sa tatau ai ona ma asiasi atu i se vaega o tagata fiafia i atumauga e latalata ane i le tuaoi ma Costa Rica. I le aso na tuu ma te ō ai, na sau ai Pedro e ma te ō, ae sa ou taoto ua ou maʻi i le fiva malalia. Sa ou fai atu: “Pedro, e lē mafai ona ou alu.” Sa tuu mai ona lima i loʻu muaulu, ma faapea mai: “Ua e matuā fiva lava, ae e tatau ona e sau! O loo faatali mai le ʻauuso.” O lea na ia faia ai se tasi o tatalo mai i lona loto ou te leʻi faalogo muamua lava i ai.
Ina ua uma lena, sa ou fai atu loa: “Alu e fai sau fresco (se vai inu e fai i fualaau). O lea o le a ou alu ou te sauni mo se sefulu minute.” E lua ni aiga Molimau e nonofo i le vaipanoa lea na ma asia, ma sa latou tausia lelei lava i maʻua. I le aso na sosoo ai, na matou ō faatasi ai ma i latou i le galuega talaʻi, e ui lava ina ou faalogoina le vaivai ona o le fiva. Maʻeu se faamalosiau i le vaai atu i le silia ma le selau tagata na auai i la matou sauniga i le Aso Sa!
Ua Toe Siitia Foʻi
I le 1975 na fanau ai la ma tama lona fitu na igoa ia Vaughn. I le tausaga na sosoo ai, sa matou toe foʻi atu ai i Kanata ona o māfuaaga tautupe. Sa leʻi faigofie ona tuua Nicaragua, auā sa matou iloa moni le faamalosi mai o le mana o Ieova a o matou nonofo ai. I le taimi na matou ō ese ai, sa sili atu i le 500 tagata i le oganuu a la matou faapotopotoga na auai i sauniga.
Muamua atu, ina ua tofia i maʻua ma loʻu afafine o Miriam e avea o ni paeonia faapito i Nicaragua, na talosaga mai ai Miriam ia te aʻu e faapea: “Papa, afai ae e toe foʻi i Kanata, pe mafai ona ou nofo pea iinei?” Sa leʻi iai foʻi soʻu faanaunauga e toe tuua Nicaragua, o lea na ou fai atu ai: “Ia, ua lelei!” O lea ina ua matou ō, sa nofo ai pea Miriam e faaauau lana faiva faataimi atoa. Mulimuli ane, na ia faaipoipo atu ai ia Andrew Reed. I le 1984, na la auai ai i le vasega lona 77 o Kiliata, le aʻoga faamisionare a Molimau a Ieova, sa faatūina i lena taimi i Brooklyn, Niu Ioka. O loo auauna nei Miriam ma lana tane i le Dominican Republic, i le faataunuuina o le faanaunauga na totōina ia te ia e misionare lelei i Nicaragua.
I le taimi e tasi, sa olaola pea i loʻu loto ia upu a Tamā e faapea, “e lē faigofie ona taofia i tatou.” O lea, i le 1981 ina ua lava a matou tupe na sefe e toe foʻi atu ai i Amerika Tutotonu, ona matou toe siitia foʻi lea, i le taimi lena i Costa Rica. A o matou auauna ai iinā, na valaaulia ai i matou e fesoasoani atu i le galuega o faugafale i fale fou a lo latou lālā. Ae peitaʻi, i le 1985, na manaʻomia ai ona vaai se fomaʻi i la ma tama tama o Grant, o lea na matou toe foʻi atu ai i Kanata. Na nofo Glen i Costa Rica e galue i le polokalame o faugafale a le lālā, a o Annette ma Charmaine sa auauna o ni paeonia faapito. O i matou o ē na tuua Costa Rica sa leʻi taitai lava ona iai se manatu e faapea o le a matou lē toe foʻi atu i ai.
Feagai ai ma Tulaga Faigatā
Ia Setema 17, 1993, o se aso matagofie ma le susulu manaia o le lā. Sa ma galulue ai ma loʻu atalii matua o Mark, i le atoina o se fale. Sa ma galulue faatasi lava ma talatalanoa i mea faaleagaga, e pei
ona ma masani ai. Ae peitaʻi, sa lē mau laʻu tū ma ou paʻū ifo ai mai le taualuga. Ina ua ou toe malamalama ane, na pau lava mea na ou vaaia o le pupula o molī ma tagata ofu papaʻe. O le potu lea o le falemaʻi mo faalavelave faafuaseʻi.Ona o mea o loo fai mai ai le Tusi Paia, o laʻu tala muamua lava na fai atu: “E leai se toto, e leai se toto!” (Galuega 15:28, 29) Maʻeu se faamautinoaga ina ua ou faalogo atu ia Charmaine o faapea mai: “E lē āfaina Tamā. O lea e matou te iinei uma.” Sa ou iloa mulimuli ane ai e faapea, na vaai fomaʻi i oʻu faamaumauga o le falemaʻi, ma o le faaaogāina o le toto sa leʻi taitai ona avea o se finauga. Sa gau loʻu ua ma pē atoa ai loʻu tino, ua oo foʻi ina lē mafai ai ona ou mānava lava aʻu.
I le lē mafai ona gaoioi, sa sili atu ai ona ou manaʻomia le faamalosi mai o Ieova na i lo o se isi lava taimi. Sa faia se taotoga lea na faia ai se pū i le ala savili i loʻu faaʻī ma momono atu ai se faagaʻau ina ia faaalu atu ai le ea i totonu o oʻu māmā, ae sa poloka ai le ea agaʻi i oʻu alaleo. Sa lē mafai ona ou tautala. Sa vaavaai mai tagata i oʻu laugutu ina ia malamalama ai i le mea lea sa ou taumafai e fai atu ai.
Sa vave ona oso i luga le tele o tupe faaalu. Sa ou taumanatu po o le a tuua ai e laʻu avā ma le toʻatele o laʻu fanau o loo i le faiva faataimi atoa lenei auaunaga, ona o le tausia o nei tiute tauave tautupe. Ae peitaʻi, na mafai ona maua e Mark se galuega, o lea, i le na o le tolu lava masina ae mafai ona maua tupe sa fesoasoani e totogia ai le tele o nei tupe faaalu. O le iʻuga, sa mafai e i latou uma ona tumau i le faiva faataimi atoa seʻi vaganā ai i maʻua ma laʻu avā.
E faitau selau pepa ma tusi o moomooga alofa mai i atunuu e ono, na faapipiiina i puipui o loʻu potu i le falemaʻi. Na faamalosi moni mai lava Ieova ia te aʻu. Sa fesoasoani foʻi le faapotopotoga i loʻu aiga i le saunia o taumafataga mo i latou i se vaitaimi e tusa o le lima ma le ʻafa masina na tausia ai aʻu i le falemaʻi. O aso uma lava, e faaalu ai e se toeaina Kerisiano taimi o le aoauli e ma te faitauina faatasi ai le Tusi Paia ma lomiga faale-Tusi Paia, faapea foʻi ma le faamatalaina mai o ni mea faalaeiau na tutupu. E toʻalua ni tagata o loʻu aiga e matou te sauniuni faatasi mo sauniga taʻitasi a le faapotopotoga, o lea e lē mafai ai lava ona ou misia meaʻai tāua faaleagaga.
A o ou iai pea i le falemaʻi, na faia ai sauniuniga ina ia ou auai i le polokalame o le aso faapitoa o fonotaga. Na fuafuaina e le ʻaufaigaluega a le falemaʻi se tamaʻitaʻi tausimaʻi pasi ma se tamaʻitaʻi e poto faapitoa i le faaaogāina o le masini e faamānava ai, e matou te ō faatasi i le fonotaga mo le aso atoa. Maʻeu le fiafia ona o le toe aufaatasi ma oʻu uso ma tuafāfine Kerisiano! E lē mafai ona galo ia te aʻu le vaaia o le faitau selau o uso ma tuafāfine o tutū i le laina, e faatalitali mo le taimi e faafeiloaʻi mai ai ia te aʻu.
Tausisia o le Tulaga Faaleagaga
Pe tusa ma se tausaga talu ona mavae le faalavelave na tupu, ae mafai loa ona ou toe foʻi atu i loʻu aiga, e ui lava sa ou manaʻomia pea le tausiga a se tausimaʻi mo le 24 itula. O se veni na faaauupegaina faapitoa ina ia mafai ai ona ou alu i sauniga, lea e seāseā ai lava ona ou misia. E ui i lea, ou te faapea atu, e manaʻomia lava le maumauaʻi ina ia ou alu. Talu ona ou toe foʻi mai i le aiga, ou te leʻi misia ai lava loʻu auai i tauaofiaga itumalo uma.
Mulimuli ane, ia Fepuari 1997, na toe maua ai loʻu malosi e tautala ai i se tulaga e faatapulaaina. O nisi o tamaʻitaʻi tausimaʻi sa vaaia aʻu, e faalogologo ma le talisapaia, a o ou talanoa atu ia i latou e uiga i loʻu faamoemoe e faavae i le Tusi Paia. Na faitau mai e se tasi tamaʻitaʻi tausimaʻi ia te aʻu le tusi atoa o le Jehovah’s Witnesses—Proclaimers of God’s Kingdom faapea ai ma isi lomiga a le Olo Matamata. E matou te fetusiaʻi ma tagata e ala i le faaaogāina o se fasilaau e oomi ai ki o le komepiuta. E ui lava o se mea faigatā lenei auala e lolomi ai tusi, ae o le mafai pea ona faia o se sao i le faiva, o se mea e tauia.
O loo ou matuā tigāina lava ona o le tigā o neura o loʻu tino. Ae peitaʻi, e foliga mai pe a ou talanoa atu i upu moni o le Tusi Paia i isi pe faalogo foʻi a o faitauina mai nei mea ia te aʻu, ou te lagona ai lava sina mapu. O nisi taimi, ou te molimau atu ai i le alatele faatasi ma le lagolagosua a laʻu avā, o lē e faamatala upu mo aʻu pe a ou manaʻomia se fesoasoani. I nisi o taimi, sa mafai ai ona ou auauna e avea o se paeonia lagolago. Ua ou lagona ai le fiafia i le avea o se toeaina Kerisiano, aemaise lava pe a ō mai uso ia te aʻu i sauniga pe asiasi atu foʻi ia te aʻu i loʻu fale ma mafai ai ona ou fesoasoani ma faalaeiauina i latou.
Ou te taʻutino atu e faigofie lava ona oo i le lotomafatia. O lea, i so o se taimi e oo ai ia te aʻu lena lagona, ou te tatalo loa lava ina ia mafai ona ou maua le olioli. Ou te tatalo pea lava i le ao ma le pō ina ia lagolago mai pea Ieova ia te aʻu. E faafiafiaina pea lava aʻu pe a maua mai se tusi pe asiasi mai foʻi se tasi. O le faitauina o mekasini o Le Olomatamata po o le Ala Mai! e faatumuina ai foʻi loʻu mafaufau i manatu e atiina aʻe ai. I nisi taimi, e eseese lava tausimaʻi e latou te faitauina mai nei lomiga ia te aʻu. Talu mai le faalavelave na tupu ia te aʻu, ua faafitu ona ou faalogo i le faitauina o le Tusi Paia atoa ua puʻeina i kaseti. O nei mea faatasi ai ma isi auala eseese, ua lagolagoina ai aʻu e Ieova.—Salamo 41:3.
O le suia o loʻu tulaga, ua mafai ai ona tele le taimi ou te manatunatu loloto ai i le auala o loo aʻoaʻoina ai i tatou mo le ola e lo tatou Aʻoaʻo Sili, o Ieova. Ua ia aumaia ia i tatou le poto saʻo e uiga i lona finagalo ma lana fuafuaga, se faiva uigā, fautuaga i le ala e maua ai le fiafia i le aiga, ma le faautauta e iloa ai le mea e fai pe a oo i taimi o mafatiaga. Ua faamanuia Ieova ia te aʻu e ala i le iai o se avā faamaoni ma le lelei. O loo lagolagosua mai foʻi ma le faamaoni laʻu fanau, ma o se fiafiaga mo aʻu ona sa maua uma e i latou se avanoa e auai ai i le faiva faataimi atoa. O le mea moni, ia Mati 11, 2000, na faauu ai le ma tama tama o Mark ma lana avā o Allyson mai le vasega lona 108 o le Aʻoga i Kiliata, ma tofia ai i laʻua i Nicaragua. Sa mafai ona ma auai atu ma laʻu avā i lo la faauuga. Ua mafai ona ou faapea atu ma le faamaoni, ua suia e mafatiaga loʻu olaga, ae lē o loʻu loto.—Salamo 127:3, 4.
Ou te faafetai ia Ieova mo le atamai ua ia aumai ua mafai ai ona ou tuufaasolo atu i loʻu aiga le tofi faaleagaga ua ou maua. Ua faamalosia ma faalaeiauina aʻu i le vaai atu i laʻu fanau o auauna i Lē na Foafoaina i latou, faatasi ma uiga e pei lava o uiga o loʻu tamā, o lē na faapea mai, “E lē faigofie ona taofia i tatou. Ua poloaʻiina i tatou e Ieova ina ia talaʻi.” O le mea moni, o loo faamalosia e Ieova aʻu ma loʻu aiga i o matou aso uma lava.
[Ata i le itulau 24]
O matou ma Tamā, oʻu uso, ma loʻu tuafafine, i tafatafa o le taavale na avea ma o matou fale sa faaaogā i taimi a o matou paeonia. O aʻu i le itu taumatau
[Ata i le itulau 26]
O i maʻua ma laʻu avā o Myrna
[Ata i le itulau 26]
O se ata talu ai nei o lo matou aiga
[Ata i le itulau 27]
O loo oʻu molimau atu pea e ala i tusi