Faaolataga mo i Latou e Filifilia le Malamalama

“O Ieova, o loʻu malamalama ia, ma loʻu olataga: o ai ea se ou te fefe ai?”—SALAMO 27:1.

1.O ā sauniuniga foaʻi ola ua faia e Ieova?

O IEOVA o le Puna o le malamalama o le lā lea ua mafai ai ona ola mea i le lalolagi. (Kenese 1:2, 14) O ia foʻi o Lē na Foafoaina le malamalama faaleagaga, lea e tafiesea ai le pouliuli malaia o le lalolagi a Satani. (Isaia 60:2; 2 Korinito 4:6; Efeso 5:8-11; 6:12) O i latou ua filifilia le malamalama e mafai ona faapea mai faatasi ma le faisalamo: “O Ieova, o loʻu malamalama ia, ma loʻu olataga: o ai ea se ou te fefe ai?” (Salamo 27:1a) Peitaʻi ane, e pei ona tupu i taimi o Iesu, o i latou o ē filifilia le pouliuli e na o se faamasinoga lē manuia e mafai ona latou faatalitalia.—Ioane 1:9-11; 3:19-21, 36.

2. I taimi anamua, o le ā na tupu ia i latou o ē na teena le malamalama o Ieova ma i latou o ē na faalogo atu i lana afioga?

² I aso o Isaia, o le toʻatele lava o tagata o ē sa osi feagaiga ma Ieova sa latou teena le malamalama. O le iʻuga, na vaaia e Isaia le faaumatiaga o le malo i le itu i mātū, le nuu atoa o Isaraelu. Ma i le 607 T.L.M., na faaumatia ai Ierusalema ma lona malumalu ae ave faatagataotauaina i latou na ʻaināina Iuta. Ae peitaʻi, o i latou sa faalogo atu i le afioga a Ieova sa faalototeleina i latou e tetee atu i faiga faaaposetasi o na aso. E faatatau atu i le 607 T.L.M., na folafola e Ieova faapea, o i latou o ē faalogo atu ia te ia o le a faasaoina. (Ieremia 21:8, 9) I aso nei, e mafai e i  tatou, o ē fiafia i le malamalama, ona aʻoaʻoina ni lesona se tele mai le mea na tupu i tuā iinā.—Efeso 5:5.

Le Fiafiaga o i Latou o Loo i le Malamalama

3. I aso nei, o le ā le mautinoa e mafai ona ia i tatou, o le ā le “nuu amiotonu” tatou te alolofa i ai, ma o le ā le “aai malosi” ua maua e lena “nuu”?

³ “Ua ia te i tatou le aai malosi; o le faaolataga na . . . faia lea [e le Atua] ma pa ma ʻolo. Ina to mai ia e outou o puipui, ina ia ulufale mai ai le nuu amiotonu o e tausi le mea moni.” (Isaia 26:1, 2) O upu faaviivii nei a tagata o ē sa faatuatua atu ia Ieova. O tagata Iutaia faamaoni o aso o Isaia, sa latou faatalitali atu i a Ieova, ae lē i atua sesē sa tapuaʻia e isi tagata o lo latou nuu, auā e na o ia le Puna moni o le saogalemu. I aso nei, ua tatou lagonaina ai lena lava mautinoa. E lē gata i lea, tatou te alolofa i le “nuu amiotonu” a Ieova—‘le Isaraelu a le Atua.’ (Kalatia 6:16; Mataio 21:43) E alofa foʻi Ieova i lenei nuu ona o ana amioga faamaoni. Faatasi ai ma lana faamanuiaga, ua maua ai e le Isaraelu a le Atua sona “aai malosi,” o le faalapotopotoga pei se aai lea e lagolagoina ma puipuia o ia.

4. O le ā le mafaufauga e lelei ona tatou atiina aʻe?

⁴ O i latou o loo i totonu o lenei “aai” ua latou iloaina lelei e “leoleoina [e Ieova] ia fifilemu lava le ua mausali lona loto; auā ua ia faatuatua ia [Ieova].” E lagolagoina e Ieova i latou ua faanaunau e faatuatua ia te ia ma usiusitai i ana mataupu silisili amiotonu. O lea, na utagia ai e tagata faamaoni i Iuta le timaʻiga a Isaia e faapea: “Ina faatuatua ia outou ia Ieova e faavavau lava; auā o Ioa Ieova, o le papa e faavavau ia.” (Isaia 26:3, 4; Salamo 9:10; 37:3; Faataoto 3:5) O i latou o loo iai lena mafaufauga e latou te vaai atu ia “Ioa Ieova” ua na o ia le Papa e saogalemu. E latou te mauaina ai pea le ‘filemu’ faatasi ma ia.—Filipi 1:2; 4:6, 7.

Le Faalumaina o Fili o le Atua

5, 6. (a) Na faapefea ona faalumaina Papelonia anamua? (e) O le ā le auala na faalumaina ai “Papelonia o le aai tele”?

⁵ Ae faapefea pe a mafatia i ni puapuaga i latou o loo faatuatua atu ia Ieova? E lē tatau ona latou matataʻu. E faataga e Ieova na mea e tutupu mo sina taimi, peitaʻi e mulimuli ane, ona ia aumaia lea o se mapusaga, ma e na te faamasinoina i latou o loo faapogaia puapuaga. (2 Tesalonia 1:4-7; 2 Timoteo 1:8-10) Seʻi manatu i le mea na tupu i se “aai sa maualuga.” Ua faapea mai Isaia: “Ua . . . lafotuina i lalo [e Ieova] e sa nonofo i le mea maualuga; o le aai sa maualuga ua faamaulaloina e ia, ua faamaulaloina ua oo i le eleele, ua faagatasia ma le efuefu.  E solia ia e vae, o vae lava o e tigaina, o vae foi o e matitiva.” (Isaia 26:5, 6) Atonu o Papelonia e faasino i ai le aai sa maualuga lea o loo taʻua iinei. E mautinoa lava sa faapuapuagatiaina e lena aai le nuu o le Atua. Ae o le ā na tupu ia Papelonia? I le 539 T.L.M., na faatoʻilaloina ai e Metai ma Peresia. Pagā se faatoʻilaloina!

⁶ I o tatou aso, ua lelei ona faamatalaina mai ai e upu faavaloaga a Isaia le tulaga ua tupu ia “Papelonia o le aai tele” talu mai le 1919. Na mafatia lena aai maualuga i se paʻū faalumaina i lena tausaga ina ua faamalosia o ia e faasaʻoloto tagata o Ieova mai le faaaunuuaina faaleagaga. (Faaaliga 14:8, LT ) Ae sili atu ai la ona faalumaina le mea na sosoo ai. Na liliu atu lea vaega toʻaitiiti o Kerisiano ma “solia” i lalo lē na muaʻi puʻea i latou. I le 1922, na amata ai ona latou faasilasilaina atu le oo mai o le iʻuga o Kerisinetoma, ma folafola atu i le lautele iliga pū a agelu e toʻafā o le Faaaliga 8:7-12 ma auēga e tolu o loo valoia mai i le Faaaliga 9:1–11:15.

“Ua Laugatasi le Ala o Le ua Amiotonu”

7. O le ā le taʻitaʻiga ua maua e i latou o ē liliu atu i le malamalama o Ieova, o ai o loo latou faamoemoe atu i ai, ma o le ā le mea ua latou faapelepele i ai?

⁷ E saunia mai e Ieova le faaolataga mo i latou e liliu atu i lona malamalama, ma na te taʻitaʻia o latou ala, e pei o lea o le a faaalia mai e Isaia: “Ua laugatasi le ala o le ua amiotonu; o oe na lē amiotonu, ua e faalauleleiina le ala o le ua amiotonu. E moni, Ieova e, ua matou faatalitali ia te oe i le ala o au faamasinoga; o le manao o matou loto o loo i ai lea i lou suafa, ma le faamanatuga ia te oe.” (Isaia 26:7, 8) O Ieova o ia o le Atua amiotonu, ma o i latou e tapuaʻi ia te ia e ao ona usiusitai i ana tapulaa amiotonu. Pe a latou faia, ona taʻitaʻia lea o i latou e Ieova, ma faalauleleiina o latou ala. O le utagiaina o ana taʻiala, e faaalia ai e nei tagata agamalu e latou te faamoemoe atu ia Ieova ma latou faapelepeleina ma le lotoatoa lona suafa—o lona “faamanatuga” lea.—Esoto 3:15.

8. O le ā le uiga na faaalia e Isaia, lea ua avea ma faaaʻoaʻoga lelei?

⁸ Sa faapelepele Isaia i le suafa o Ieova. E faamaonia lena i ana upu o loo sosoo mai: “Ua manao loʻu loto ia te oe i le po; e moni, e ala saili ia te oe loʻu agaga i totonu ia te au; auā e aʻoaʻoina e o nonofo i le atu laulau, pe a faia au faamasinoga i le lalolagi.” (Isaia 26:9) Sa faanaunau atu Isaia i a Ieova ma lona “loto”—o lona tagata atoa. Seʻi faaata i le mafaufau le faaaogāina e le perofeta o taimi filemu o le pō e tatalo ai i a Ieova, e faaleo atu i ai ona manatunatuga loloto ma saʻili ma le naunautaʻi i le taʻitaʻiga a Ieova. Maʻeu se faaaʻoaʻoga lelei! E lē gata i lea, na aʻoaʻoina e Isaia le amiotonu mai faamasinoga a Ieova. I lenei tulaga, ua ia faamanatu mai ai ia i tatou le manaʻoga ina ia vilivilitaʻi e lē aunoa, ia mataala pea ina ia iloa le finagalo o Ieova.

E Filifilia e Nisi le Pouliuli

9, 10. O ā gaoioiga o le agalelei na faatino e Ieova i lona nuu lē faamaoni, ae na faapefea la latou tali ane?

⁹ Sa faaalia e Ieova le tele o le alofa agalelei ia Iuta, ae faanoanoa lava, ona sa leʻi tali lelei ane tagata uma. Sa masani lava, ona filifili le  toʻatele o i latou e fouvale ma tetee na i lo le filifilia o le malamalama o le upu moni a Ieova. Na faapea mai Isaia: “E alofagia le ua amio leaga, a e le aʻoaʻo lava o ia i le amiotonu; o le nuu o i ai le amiotonu e agafaapiopio ai o ia, na te le manatua foi le mamalu o Ieova.”—Isaia 26:10.

¹⁰ I aso o Isaia ina ua faaloaloa atu e Ieova lona aao e puipuia Iuta mai i ona fili, sa mumusu le toʻatele e amanaʻia lenei gaoioiga. Ina ua ia faamanuiaina i latou i lona filemu, sa leʻi faaalia e le nuu se agaga faafetai. O lea, na lafoaʻia ai i latou e Ieova ina ia auauna atu i “nisi alii,” ma oo ai lava ina ave faatagataotauaina sā Iutā i Papelonia i le 607 T.L.M. (Isaia 26:11-13) E ui i lea, mulimuli ane, sa toe foʻi mai se vaega totoe o le nuu, ua aʻoaʻia, i lo latou nuu moni.

11, 12. (a) O le ā se lumanaʻi na maua e i latou na puʻea Iuta? (e) I le 1919, o le ā le lumanaʻi na maua e i latou sa muaʻi puʻea auauna faauuina a Ieova?

¹¹ Ae faapefea i latou na puʻea Iuta? Ua tali faavaloaga mai Isaia: “Ua oti i latou, latou te le toe ola; o agaga i latou [“ua lē toe iai se malosi i le oti,” NW ], latou te le toe tutū; auā ua e faasalaina, ma faaumatia i latou, ua e faagaloina lava le manatu uma ia i latou.” (Isaia 26:14) Ioe, ina ua mavae lona paʻū i le 539 T.L.M., sa leʻi toe iai se lumanaʻi mo Papelonia. Mulimuli ane, sa lē toe iai se aai. Sa avea o ia e pei o sē “ua lē toe iai se malosi i le oti,” ma o lona emepaea tele sa tuuina atu e faatafunaina. Pagā se lapataʻiga mo i latou o loo tuu o latou faamoemoega i tagata malolosi o lenei lalolagi!

¹² Sa iai se faataunuuga o vala o lenei valoaga ina ua faataga e le Atua ana auauna faauuina e faaaunuuaina faaleagaga i le 1918, ma toe faasaʻolotoina mai i le 1919. Mai lena taimi, sa puaoa le lumanaʻi na iai mo lē na muaʻi puʻeina i latou, lea e faaautū lava i Kerisinetoma. Peitaʻi, sa matuā ʻoa lava faamanuiaga na faatalitalia maia tagata o Ieova.

“Ua E Faatoateleina le Nuu”

13, 14. O ā faamanuiaga faaʻoaina ua olioli ai auauna faauuina a Ieova talu mai le 1919?

¹³ Sa faamanuia e le Atua le uiga salamō o ana auauna faauuina i le 1919 ma foaʻi atu ia i latou se faatelega. Muamua, sa uaʻi atu i le aoaoina o sui mulimuli o le Isaraelu a le Atua, ona sosoo ai lea ma le aoaoina o “le motu o tagata e toatele” o “isi mamoe.” (Faaaliga 7:9; Ioane 10:16) Na valoia mai nei faamanuiaga i le valoaga a Isaia e faapea: “Ua e faatoateleina le nuu, Ieova e, ua e faatoateleina le nuu; ua viia lava oe; ua e faamamaoina tuaoi uma o le nuu. Ieova e, na latou sailiili ia te oe i lo latou puapuaga, na latou faapaūina atu le tatalo ona o lau aoaiga sa ia te i latou.”—Isaia 26:15, 16.

¹⁴ I aso nei, ua faalautele atu i itu uma o le lalolagi tuaoi o le Isaraelu a le Atua, ma ua faaopoopoina nei le aofaʻi o le motu o tagata e toʻatele i le tusa ma le ono miliona i latou o loo maelega e faia se sao i le galuega o le talaʻiina o le tala lelei. (Mataio 24:14) Maʻeu se faamanuiaga mai ia Ieova! E maʻeu foʻi se mamalu ua aumaia e lenei mea i lona suafa! Ua lagonaina lena suafa i aso nei i le 235 atunuu—o se faataunuuga matagofie o lana folafolaga.

15. O le ā le toetū faafaatusa lea na tupu i le 1919?

¹⁵ Sa manaʻomia e Iuta le fesoasoani a Ieova ina ia sosola ese ai mai le faatagataotauaina i Papelonia. Sa lē mafai ona latou faia na o i latou lava lenei mea. (Isaia 26:17, 18) I se uiga talitutusa, sa avea le faasaʻolotoga o le Isaraelu a le Atua i le 1919 ma faamaoniga o le lagolagosua a Ieova. Na semanū e lē mafai ona tupu pe ana lē seanoa o ia. Ma na matuā mataʻina le suiga i lo latou tulaga, lea ua faatusaina e Isaia i se toetū: “E toe ola mai ou tagata oti, o latou tino oti e toe tutū mai. Ina ala mai ia, ma alalaga fiafia outou e o nonofo i le efuefu; auā o lou sau e pei o le sau o le vao iti ia; e lafo atu foi e le eleele e ua oti.” (Isaia 26:19; Faaaliga 11:7-11) Ioe, o i latou ua lē o toe iai se malosi e gaoioi ai ona ua feoti, o le a peiseai e toe fanauina mai i latou, mo ni galuega ua toe faafouina!

Puipuiga i Taimi Mataʻutia

16, 17. (a) I le 539 T.L.M., o le ā na manaʻomia ona faia e tagata Iutaia ina ia mafai ai ona faasaoina mai le paʻū o Papelonia? (e) E foliga mai o ā “afeafe” i aso nei, ma ua faapefea ona tatou manuia ai?

¹⁶ E manaʻomia pea e auauna a Ieova lana puipuiga. Ae ua lē o toe mamao nei, ona faaloaloa  mai lea o lona aao mo le taimi mulimuli lava ina ia faaumatia le lalolagi a Satani, ma o le a matuā manaʻomia ai e ona tagata tapuaʻi lana fesoasoani e sili atu na i lo se isi lava taimi. (1 Ioane 5:19) E tusa ai o lena taimi mataʻutia, ua lapataʻia i tatou e Ieova: “Ina o mai ia, loʻu nuu e; ina ulu atu ia i o outou afeafe, ma pupuni o outou faitotoa; ia outou lalafi e pei se emo ona puupuu, seia mavae atu le toasa. Auā faauta, o loo afio mai Ieova ai le mea o afio ai o ia, ina ia faasalaina e o nonofo i le lalolagi ona o a latou amio leaga; e faaalia foi e le eleele lana toto, na te le toe ufitia foi lana fasi.” (Isaia 26:20, 21; Sefanaia 1:14) O lenei lapataʻiga na faaalia atu ai i tagata Iutaia le auala e sao ai mai le paʻū o Papelonia i le 539 T.L.M. O i latou na utagiaina sa nonofo pea i o latou fale, ma sao ai mai fitafita fasioti tagata sa feofeoaʻi i alatetele.

¹⁷ I aso nei, o “afeafe” o loo taʻua e le valoaga e foliga e faasino atu i le faitau sefulu o afe o faapotopotoga a tagata o Ieova i le lalolagi aoao. Ua avea na faapotopotoga o se puipuiga i aso nei, o se nofoaga e maua ai e Kerisiano le saogalemu i le aufaatasiga ma o latou uso, i le tausiga alofa a toeaina. (Isaia 32:1, 2; Eperu 10:24, 25) Ua faapitoa le moni o lenei manatu pe a fua atu i le lalata tele mai o le iʻuga o lenei faiga o mea lea o le a faalagolago le faasaoina i le usiusitai.—Sefanaia 2:3.

18. O le a faapefea ona toe o se aga ona ‘fasimatea lea e Ieova le tanimo o le vai’?

¹⁸ E tusa ai o lena taimi, ua vavalo mai Isaia: “O lea aso e faasalaina ai e Ieova o leviatana, o le gata tele vave, o leviatana lava, o le gata taataai, e faasalaina lava i lana pelu maaa, ma le tele ma le malosi; e fasimatea lava e ia le tanimo o loo i le vai.” (Isaia 27:1) O le ā le “leviatana” faaonaponei? E manino mai, o le “gata tuai,” o Satani lava ia, faatasi ai ma lana faiga o mea amioleaga, lea na te faaaogā e faasagatau mai ai i le Isaraelu a le Atua. (Faaaliga 12:9, 10, 17; 13:14, 16, 17) I le 1919, na lē toe pule ai Leviatana i tagata o le Atua. E oo mai se taimi, o le a mou atoatoa ese atu ai o ia. (Faaaliga 19:19-21; 20:1-3, 10) O lea, o le a ‘fasimatea ai e Ieova le tanimo o le vai.’ Ae i le taimi nei, e lē taitai ona aogā umi se taumafaiga a Leviatana ina ia tetee mai ai i tagata o Ieova. (Isaia 54:17) Maʻeu se faamāfanafanaloto o le mautinoa i lena mea!

“Le Tovine o Uaina Aalu”

19. O le ā le tulaga o le vaega totoe i aso nei?

¹⁹ I le tepa atu i lenei malamalama uma mai ia Ieova, po ua lē o ia i tatou ea māfuaaga uma e olioli ai? Ioe, e mautinoa lava! Ua matagofie ona faamatala mai e Isaia le olioli o tagata o Ieova ina ua ia tusi mai: “O lea aso ia outou pepese ai i le tovine [“o uaina aalu,” NW ]. O aʻu o Ieova, ou te leoleo i ai; ou te faasūsū pea lava i ai; ou te leoleo lava i ai i le po ma le ao, neʻi oo i ai se leaga.” (Isaia 27:2, 3) Ua tausia e Ieova lana “tovine,” le vaega totoe o le Isaraelu a le Atua, ma a latou aumea o loo galulue mamafa.  (Ioane 15:1-8) O le iʻuga, ua fuaina mai ai ni fua e aumaia ai le mamalu i lona suafa ma faapogaia ai le olioli tele i ana auauna o loo i le lalolagi.

20. E faapefea ona puipuia e Ieova le faapotopotoga Kerisiano?

²⁰ E mafai ona tatou matuā fiafia ona o le toʻatamaʻi o Ieova lea sa iai muamua i ana auauna—lea na ia tuuina atu ai i latou ina ia faatagataotauaina faaleagaga i le 1918—ua mou ese atu. O Ieova lava ia ua fetalai mai: “Ou te le ita lava aʻu; ta fia maua laau tuitui ma laau talatala i le taua; ou te alu atu ia te i latou, ou te susunu faatasi lava i latou. Pe seʻi tago o ia i loʻu malosi, ia mā lelei ma ia, e lelei foi o ia ma aʻu.” (Isaia 27:4, 5) Ina ia faamautinoa e faaauau pea ona maua mai i ona vine le tele o le “uaina aalu,” e nutipala ai ma faatamaʻia e Ieova so o se taaʻiga pei se laau talatala e mafai ona faaleagaina ai i latou. O lea, seʻi aua neʻi iai se tasi na te faapogaia se lamatiaga i le lelei o le faapotopotoga Kerisiano! Tau ina ia ‘tago atu tagata uma i le malosi o Ieova,’ e saʻili atu i lona finagalo malie ma lana puipuiga. O le faia faapea, tatou te maua ai le filemu ma le Atua—o se mea e matuā tāua lava, lea foʻi ua taʻua faalua ai e Isaia.—Salamo 85:1, 2, 8; Roma 5:1.

21. I le ā le auala ua faatumulia ai le laueleele fuatele mai i “fua”?

²¹ Ua faaauau mai faamanuiaga: “O ona po amuli e sosolo ai aa o Iakopo; e fuga mai ma mātala o Isaraelu, ona tumu ai lea o le fogāeleele uma i ona fua.” (Isaia 27:6) Ua faataunuuina lenei fuaiupu talu mai le 1919, ma aumaia ai ni faamaoniga ofoofogia o le mana o Ieova. Ua faatumuina e Kerisiano faauuina le lalolagi i “fua,” e aumaia ai taumafa faaleagaga. I le lotolotoi o se lalolagi piʻopiʻo, ua latou olioli ai e puipuia tapulaa maualuluga a le Atua. Ma e faaauau pea ona faamanuia e Ieova i latou i se faatelega. O le iʻuga, o le faitau miliona o a latou aumea, o isi mamoe, ‘o loo auauna i le Atua i le ao ma le po.’ (Faaaliga 7:15) Tau ina ia lē taitai ona galo ia i tatou le faaeaga sili o le faaaogāina o “fua” ma tufa atu i isi!

22. O ā faamanuiaga e maua e i latou o ē taliaina le malamalama?

²² I nei aso faigatā, pe a ufitia le lalolagi i le pogisa ma ufitia atunuu i le pouliuli mafiafia, pe tatou te lē lotofaafetai ea o loo faasusulu mai e Ieova le malamalama faaleagaga i luga o ona tagata? (Isaia 60:2; Roma 2:19; 13:12) Mo i latou uma e taliaina, ua uiga ai lena malamalama i le filemu o le mafaufau ma le olioli i le taimi nei aemaise le ola e faavavau i le lumanaʻi. O se māfuaaga lelei la, ua tatau ai ia i tatou o ē alolofa i le malamalama, ona vivii aʻe o tatou loto ia Ieova ma faapea atu faatasi ma le faisalamo: “O Ieova, o le malosi ia o loʻu ola; ou te mataʻu ea ia te ai? Ina faatalitali atu ia ia Ieova, ina loto tele ia, e faamalosia foi e ia lou loto; ina faatalitali lava ia ia Ieova.”—Salamo 27:1e, 14.

Pe E te Manatua?

• O le ā se lumanaʻi o iai mo i latou o ē faatigā i tagata o Ieova?

• O le ā le faatelega ua valoia mai e Isaia?

• O ā “afeafe” e tatau ona tatou nonofo ai pea, ma aiseā?

• Aiseā ua aumaia ai e le tulaga o tagata o Ieova, le viiga ia te ia?

[Fesili mo le Suʻesuʻega]

[Pusa i le itulau 22]

LOMIGA FOU

O le tele o faamatalaga ua talanoaina i nei mataupu o suʻesuʻega e lua sa tauaaoina atu o se lauga i le polokalame o le tauaofiaga itumalo mo le 2000/2001. I le iʻuga o le lauga, na tatalaina ai se lomiga fou, ua faamatuaina Isaiah’s Prophecy—Light for All Mankind I. O lenei tusi e 416 ona itulau, o loo faasolosolo mai ai ona talanoaina fuaiupu taʻitasi uma o uluaʻi mataupu e 40 o le tusi o Isaia.

[Ata i le itulau 18]

E na o ē amiotonu ua faataga e ulu atu i le “aai malosi” o Ieova, o lana faalapotopotoga

[Ata i le itulau 19]

Sa saʻili atu Isaia ia Ieova “i le po”

[Ata i le itulau 21]

E puipuia e Ieova lana “tovine” ma faia ina ia fuatele mai