Le Auala e Maua ai le Fiafiaga Moni

NA TAʻUA e se taʻitaʻi o le lotu Puta, le Dalai Lama, e faapea: “Ou te talitonu o le fuafuaga autū o lo tatou olaga o le saʻilia o le fiafia.” Ona ia faamatala mai lea faapea ua ia talitonu e mafai ona maua le fiafia e ala i le toleniina, po o le pulea lelei o le mafaufau ma le loto. Na ia faapea mai: “O le mafaufau, o se meafaigaluega autū lea tatou te manaʻomia ina ia mauaina le fiafiaga atoatoa.” Na maumaututū lava lona manatu e lē manaʻomia ona talitonu i le Atua. *

I se faaeseesega, seʻi manatu ia Iesu, o lē sa matuā malosi lona faatuatua i le Atua ma o ana aʻoaʻoga foʻi na taaʻina ai le faitau selau miliona o tagata a o faagasolo senituri. Sa naunau Iesu ina ia fiafia tagata. Na amata lana Lauga taʻutaʻua i le Mauga i faaamuia e iva—o faaupuga e iva e amata i le: “E fiafia . . . ” (Mataio 5:1-12, NW) I lena lava lauga, na ia aʻoaʻo atu ai i lana ʻaufaalogologo ina ia iloiloina, faamamā ma pulea lelei o latou mafaufau ma loto—ia suia manatu sauā, lē mamā ma le manatu faapito i manatu e toʻafilemu, mamā ma agaalofa. (Mataio 5:21, 22, 27, 28; 6:19-21) E pei ona timaʻi mai se tasi o ona soo mulimuli ane e faapea, e ao ona tatou “manatunatu” i mea ua ‘moni, ua taʻuleleia, ua tonu, ua mamā, ua matagofie, ua logoleleia, e amio lelei ma e viia.’—Filipi 4:8.

Na silafia e Iesu o le fiafiaga moni e aofia ai faiā ma isi. O se tulaga masani le mananaʻo o i tatou, o tagata, e faifaimea ma isi, o lea, e lē mafai ona tatou fiafia moni pe afai tatou te faaesea i tatou lava mai isi po o le faifai pea ona tatou faia ni feteenaʻiga ma i latou o loo siʻomia i tatou. E faatoʻā mafai lava ona tatou fiafia pe afai tatou te lagonaina le alofagia ma pe afai foʻi tatou te alolofa i isi. Na aʻoaʻoina e Iesu faapea, o le faavae o lena alofa, o la tatou faiā lea ma le Atua. E faapitoa lava iinei le eseesega o le aʻoaʻoga a Iesu ma le aʻoaʻoga a le Dalai Lama, auā na aʻoaʻo Iesu e faapea e lē mafai ona fiafia moni tagata pe a tutoʻatasi ese mai le Atua. Aiseā ua faapea ai?—Mataio 4:4; 22:37-39.

Mafaufau i Ou Manaʻoga Faaleagaga

O se tasi o faaamuia e faapea: “E fiafia i latou e manatu mamafa i o latou manaʻoga faaleagaga.” (Mataio 5:3, NW ) Aiseā na fetalai ai Iesu faapea? Talu ai, i lo tatou lē pei o manu, e iai o tatou manaʻoga faaleagaga. Ona sa foafoaina i le faatusa o le Atua, ua mafai ai ona tatou atiina aʻe e ui i se tulaga faatapulaaina, uiga tauatua, e pei o le alofa, faamasinotonu, agaalofa, ma le atamai. (Kenese 1:27; Mika 6:8; 1 Ioane 4:8) O o tatou manaʻoga faaleagaga e aofia ai le manaʻomia ona iai se fuafuaga i o tatou olaga.

E mafai faapefea ona tatou faamalieina na manaʻoga faaleagaga? E lē auala mai i le manatunatu loloto e faaaogā ai faiga faataulāitu po o le tilofaʻia e le tagata o ia lava. Na i lo lea, na fetalai Iesu: “E le na o mea e ʻai e ola ai le tagata, a o afioga uma e tulei mai i le fofoga o le Atua.” (Mataio 4:4) Matau, na fetalai Iesu faapea o le Atua o le puna o “afioga uma” e tāua mo le ola. E na o le Atua e mafai ona fesoasoani ia i tatou e taliina nisi o fesili. O lena malamalama e fetaui lelei lona tāua i aso nei, ona ua faateleina ia manatu faaletagata e uiga i le fuafuaga o le olaga ma le auala e maua ai le fiafiaga.  Ua faapitoa ese lava i faletusi nisi vaega atoa o fatatusi, mo tusi o loo folafola mai ai i le ʻaufaitau le soifua mālōlōina, tamaoaiga, ma le fiafiaga. Ua setiina ni polokalame i le Initineti o loo talanoa patino ai lava i le fiafiaga.

E ui i lea, ua masani lava ona faasesēina manatu o tagata i nei itu. E agaʻi atu ai i le faamalieina o faanaunauga manatu faapito po o le faatāuaina o le tagata lava ia. E faavae aʻe i le atamai ma le poto masani e faatapulaa, ma e masani lava e faalagolago i manatunatuga sesē. Mo se faaaʻoaʻoga, ua faatupulaʻia se masaniga a tusitala o tusi ia e saʻili i ai e tagata lava latou ni fesoasoani mo i latou, le faavaeina lea o o latou manatu i mafaufauga faaevolusione, lea o loo manatu faapea o faalogona faaletagata e pogai mai i manu ia e faapea na o tatou tupuga mai ai. O le mea moni lava, o so o se taumafaiga ina ia saʻilia le fiafia e faavae aʻe i se manatu lea e lē amanaʻia ai le matafaioi a Lē na Foafoaina i tatou, e lē aogā ma o le a iʻu atoatoa atu ai i le lē fiafia. Na faapea mai se perofeta anamua: “Ua faamāina ē popoto. . . . Faauta, ua latou lafoai le afioga a Ieova; se a foi se poto ua ia te i latou?”—Ieremia 8:9.

E silafia e Ieova le Atua le auala na foafoaina ai tatou ma le mea o le a tatou maua ai le fiafiaga moni. Na te silafia le māfuaaga na ia tuuina ai le tagata i le lalolagi ma o le ā o i le lumanaʻi, ma ua ia faasoa mai lena faamatalaga ia i tatou e ala mai i le Tusi Paia. O mea ua ia faaalia mai i lena tusi faagaeeina ua aumaia ai se tali lelei i tagata taʻitoʻatasi o loo ua saunia ma le tonu ma e faagaeetia ai le fiafia. (Luka 10:21; Ioane 8:32) O le mea lena na tupu i soo e toʻalua o Iesu. Sa laʻua atuatuvale ina ua mavae le maliu o Iesu. Ae ina ua mavae ona la aʻoaʻoina mai ia Iesu lava ia o lē ua toe faatūina, lana matafaioi i fuafuaga a le Atua mo le faaolataga o tagata, ona la faapea mai lea: “E lei mu ea o ta loto i totonu ia i taua, ina ua fetalai o ia ia te i taua i le ala, ina ua faamatala mai foi e ia o Tusi ia te i taua?”—Luka 24:32.

E faamalosia lena olioli pe a tatou lotomalilie e taʻitaʻia o tatou olaga e upu moni o le Tusi Paia. I lenei itu, e mafai ona faatusa ai le fiafia i se nuanua. E aliaʻe le nuanua pe a lelei le tulaga o le tau, ae e sili atu ona feilafi mai—e oo lava foʻi ina pei e lua ni nuanua—pe a lelei atoatoa le tulaga o le tau. Seʻi o tatou vaai nei i nai faaaʻoaʻoga i le auala e mafai ai ona atili tele le fiafiaga e maua e ala i le faatatauina o aʻoaʻoga o le Tusi Paia.

Ia Faafaigofie Lou Olaga

Muamua lava, tagaʻi i le fautuaga a Iesu e uiga i le tamaoaiga. Ina ua māeʻa ona avatu fautuaga i le avea o le saʻilia o le tamaoaiga ma vaaiga autū i le olaga, ona ia faia lea o se faamatalaga e matuā uigaese lava. Na ia fetalai: “Pe afai foi e lelei ou mata [“faafaigofie lau vaai,” NW ], e malamalama uma ai lou tino.” (Mataio 6:19-22) O le mea moni, sa ia fetalai faapea afai tatou te maelega e saʻilia le tamaoaiga, le tulaga pule, po o se isi lava sini ua faataatia e tagata mo i latou lava, o le a tatou lē maua mea faaleagaga e sili atu ona tāua. Auā na fetalai Iesu i se tasi taimi e faapea, “e le ola se tasi i le tele o ana mea ua ia te ia.” (Luka 12:15) Afai tatou te faamuamuaina mea e matuā tāua, e pei o la tatou faiā ma le Atua, mea manaʻomia e le aiga, ma isi mataupu e  fesootaʻi atu i ai, ona ‘faigofie’ lea o la tatou “vaai,” e lē faalavelaveina.

Matau, sa leʻi fautuaina e Iesu le faafitia o faanaunauga totino po o le matuā teena atoatoa e le tagata o ona manaʻoga totino uma. Auā sa leʻi teena e Iesu ona lava faanaunauga. (Mataio 11:19; Ioane 2:1-11) Na i lo lea, na ia aʻoaʻo atu faapea o i latou e manatu i le olaga faapea ua na o se avanoa e faateleina ai ʻoa, e mautinoa lo latou misia ai o isi vala aogā o le olaga.

I se manatu o se fomaʻi faapitoa o le mafaufau i San Francisco, i le Iunaite Setete o Amerika, e uiga i nisi o ē na matuā mauʻoa a o leʻi matutua tele, na ia taʻua ai e faapea o le tupe i na tagata o le “puna lea o le mafatia o faalogona ma le lē mautonu.” Na ia faaopoopo mai faapea, o nei tagata, “latou te faatauina fale e lua pe tolu, o se taavale ma faaalu tupe i le tele o mea. Pe a oo la ina lē taulau lena tulaga mo i latou [o lona uiga, i le faafiafiaina o i latou], ona latou mafatia lea, ua lagona le lē aogā ma le lē mautonu i le mea o le a fai i o latou olaga.” I se faaeseesega, o i latou e utagiaina le fautuaga a Iesu ina ia ola i se olaga faigofie faaletino ma ia faaavanoa mo mea faaleagaga, e sili atu ona mautinoa lo latou maua o le fiafiaga moni.

O Toma, o se kamuta e nofo i Hawaii, na tauofo e fesoasoani i le fausiaina o nofoaga mo le tapuaʻiga i motu o le Pasefika, lea e faalētele ni meafaitino a tagata. Na mātauina e Toma se mea i nei tagata lotomaulalo. Na ia faapea mai: “O loo fiafia moni lava oʻu uso ma tuafāfine Kerisiano i nei atumotu. Na latou fesoasoani mai ia te aʻu ina ia manino i laʻu vaai, e lē o tupe ma meafaitino e maua ai le fiafiaga moni.” Na ia mātauina foʻi le ʻaufaigaluega tauofo na latou galulue i nei motu ma ia iloa ai le faamalieina o loo ia i latou. Na faapea mai Toma: “E mafai ona latou maua le tele o tupe. Ae ua latou filifili e tausia le faamuamuaina o mea faaleagaga ma faatumauina se olaga faigofie.” Ona ua uunaʻia e nei faaaʻoaʻoga, na faafaigofie ai e Toma lona lava olaga ina ia mafai ona ia faaalu se taimi e sili atu, i lona aiga ma mea faaleagaga—o se gaoioiga e leʻi faanoanoa ai lava o ia.

Fiafia ma le Taʻuaogāina o le Tagata Lava Ia

E tāua mo le mauaina o le fiafia, se faalogona o le faamamaluina totino, po o le taʻuaogāina e le tagata o ia lava. Ona o tulaga lē lelei atoatoa faaletagata ma vaivaiga ua iʻu i ai, ua oo ai i isi se vaaiga lē mautinoa ia i latou lava, ma mo le toʻatele, o na faalogona na amata mai lava a o laiti. Atonu e faigatā ona manumalo i ni faalogona ua mauaa, ae e mafai lava ona faia faapea. O le vaifofō e ala lea i le faatatauina o le Afioga a le Atua.

Ua faamatala mai e le Tusi Paia lagona o Lē na Foafoaina mea e uiga ia i tatou. Pe e lē sili atu ea ona tāua lana silafaga na i lo se manatu o so o se tagata—e oo lava foʻi ia i tatou? I le avea o le faaalitinoina moni o le alofa, ua silasila mai ai le Atua ia i tatou e aunoa ma se faaituʻau po o se faanaunauga e faatigāinaina i tatou. E silasila mai o ia i le tulaga o loo tatou iai, e faapena foʻi i le tulaga e mafai ona tatou iai. (1 Samuelu 16:7; 1 Ioane 4:8) O le mea moni, e manatu o ia ia i latou o loo mananaʻo e faafiafiaina o ia o ni ē tautele, ioe, e manaʻomia, e tusa lava po o ā o latou vaivaiga.—Tanielu 9:23; Hakai 2:7.

O le mea moni, e lē faapea e lē amanaʻia e le Atua o tatou vaivaiga ma so o se agasala tatou te faia. Na te faatalitalia i tatou ina ia taumafai malosi e faia le mea saʻo, ma e na te lagolagoina i tatou pe a tatou faia faapea. (Luka 13:24) O lea, ua faapea mai ai le Tusi Paia: “E faapei ona alofa mutimuti vale o le tamā i lana fanau, e faapea lava ona alofa mutimuti vale o Ieova i e matatau ia te ia.” O loo faapea atili mai: “Ioa e, afai e te mataulia le amio leaga, le Alii e, o ai se na te mafaia ona tulai? A o ia te oe le faamagaloina  o sala, ina ia matautia oe.”—Salamo 103:13; 130:3, 4.

O lea ia e taumafai e iloa po o le ā le silafaga a le Atua ia te oe. I le iloaina e manatu o ia i ē alolofa ia te ia o ni ē e manaʻomia ma o loo iai lona mautinoa ia i latou—e ui lava atonu latou te manatu ia i latou lava o ni ē e lē aogā—e mafai ona telē sona aogā i le faateleina o le fiafia o se tasi.—1 Ioane 3:19, 20.

Faamoemoe—E Matuā Tāua mo le Mauaina o le Fiafia

O se aʻoaʻoga lauiloa e leʻi leva tele atu ona aliaʻi mai, e taʻua o le mautinoa faalemafaufau, ua taʻua mai ai e faapea, o le mautinoa i le faaleleia o tulaga o mea, lea e ati aʻe i manatunatuga mautinoa ma taulaʻi atu i uiga e malosi ai se tasi, e mafai ona taʻitaʻia ai i le fiafia. E toʻaitiiti o le a teena le vaaiga mautinoa i le faaleleia o tulaga o mea i le olaga ma le lumanaʻi lea e faateleina ai lo tatou fiafia. Peitaʻi, o lena vaaiga e ao ona faavae aʻe i mea moni, ae lē na o ni moomooga faalupe i eleele naumati. E lē gata i lea, e tusa lava po o le ā le tele o manatu o le a faaleleia le tulaga o mea po o manatu mautinoa, ae lē mafai ona tafiesea ai taua, matelāina, faamaʻi, faapolusione, tino matua, po o le oti—o mea o loo aveesea le fiafia mai le toʻatele o tagata. E ui i lea, e iai lava le itu e lelei ai le vaaiga mautinoa o le a faaleleia le tulaga o mea.

Ae o le mea e ao ona manatua, e lē o faaaogāina e le Tusi Paia le faaupuga o le vaaiga mautinoa o le a faaleleia le tulaga o mea; o loo faaaogā se upu e sili atu ona malosi—faamoemoe. Ua faamatala mai e le Vine’s Complete Expository Dictionary le “faamoemoe” e pei ona faaaogā ai i le Tusi Paia o le “faatalitali ma le mautinoa ma le talafeagai, . . . o le nofo fiafia e faatalitalia se mea lelei.” I le faaaogāina i le Tusi Paia, e sili atu le faamoemoe na i lo se vaaiga mautinoa o le a faaleleia le tulaga o mea. O loo faasino atu foʻi i le mea o loo faaautū atu i ai le faamoemoe o se tasi. (Efeso 4:4; 1 Peteru 1:3) Mo se faaaʻoaʻoga, o le faamoemoe o Kerisiano e faapea, o mea lē lelei uma lava ia na taʻua i le palakalafa ua mavae atu o le a lē pine ae aveesea. (Salamo 37:9-11, 29) Peitaʻi o loo aofia ai ma nisi mea e tele atu.

O loo tulimataʻia e Kerisiano le taimi i le lumanaʻi o le a maua ai tagata faamaoni uma lava i se olaga lelei atoatoa i se lalolagi parataiso. (Luka 23:42, 43) I le faalauteleina o lena faamoemoe, ua faapea mai ai le Faaaliga 21:3, 4 (LF): “Faauta, ua i ai le afioaga o le Atua faatasi ma tagata, e mau foi o ia ma i latou; e fai foi i latou mona nuu. . . . E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”

O so o se tasi na te faatalitalia lona mauaina o sea lumanaʻi, ua ia te ia māfuaaga uma e fiafia ai, e tusa lava po ua lē lelei le tulaga o mea o loo iai i lenei taimi. (Iakopo 1:12) Aiseā e lē saʻiliʻili ai i le Tusi Paia ma vaai le māfuaaga ua mafai ona e talitonu i ai. Ia faamalosia lou faamoemoe e ala i le faaalu o se taimi i aso taʻitasi e faitau ai le Tusi Paia. O le faia faapea o le a faaʻoaina faaleagaga ai oe, fesoasoani ia te oe e ʻalofia tulaga ia o loo aveesea ai le fiafia o tagata, ma ati aʻe ai lou lagona faamalieina. Ioe, o le auala silisili lava i le fiafiaga moni o le faia lea o le finagalo o le Atua. (Failauga 12:13) O se olaga e faavae aʻe i le usitaia o mataupu silisili o le Tusi Paia, o se olaga fiafia, auā na fetalai Iesu faapea: “E sili ona manuia [“fiafia,” NW] o e faalogo i le afioga a le Atua, ma tausi i ai.”—Luka 11:28.

[Faamatalaga pito i lalo]

[Ata i le itulau 5]

E lē mafai ona maua le fiafiaga i le matuā saʻilia o le tamaoaiga, faaesea e le tagata o ia lava, po o le faatuatuaina o le poto faatapulaa o le tagata

[Ata i le itulau 6]

O se olaga e faavae aʻe i le usitaia o le Afioga a le Atua o se olaga fiafia lea

[Ata i le itulau 7]

O le faamoemoe faa-Kerisiano e maua ai e le tagata le fiafia