O le ā le Parataiso Faaleagaga?

NA OLA aʻe Gustavo i se aai itiiti i Pasili. * Talu mai a o tamaitiiti, na aʻoaʻoina ai o ia faapea e ō atu i le lagi tagata lelei pe a maliliu. Sa leai ma sona iloa i le fuafuaga a le Atua lea o le a ola fiafia ai i se aso tagata faamaoni i le olaga lelei atoatoa i se lalolagi parataiso. (Faaaliga 21:3, 4) Sa iai foʻi ma se isi mea na te leʻi iloa. E na te leʻi iloa faapea, e oo lava i le taimi nei, e mafai ona iai o ia i se parataiso faaleagaga.

Pe sa e faalogo ea i lena parataiso faaleagaga? Pe e te silafia po o le ā lea mea ma o le ā foʻi e manaʻomia ina ia avea ai ma sona vaega? So o se tasi e manaʻo ia fiafia moni e manaʻomia ona ia malamalama e uiga i lena parataiso.

Mauaina o le Parataiso Faaleagaga

E peiseai e lē moni le faalogo atu i se faamatalaga faapea, e oo lava i aso nei e mafai e se tagata ona ola i se parataiso. Ua matuā lē foliga lava lenei lalolagi i se parataiso. E toʻatele naʻuā tagata ua oo i ai le tulaga lea na faamatala mai e se tupu Eperu anamua: “Faauta foi i loimata o e ua sauaina, ua leai foi se na te faamafanafanaina i latou; ua lima malosi foi e na saua ia te i latou; a ua leai se na te faamafanafanaina i latou.” (Failauga 4:1) Ua lē mafaitaulia le toʻatele o tagata ua mafatia i le piʻopiʻo o faiga faapolotiki, faalotu ma faiga tau tamaoaiga, ma ua leai so latou mapusaga, ua leai “se na te faamafanafanaina” i latou. E toʻatele isi o loo tauivi e tau totogi a latou pili, e tausia aʻe a latou fanau, ma fai le anoanoaʻi o isi mea o loo manaʻomia mo le ola. E mautinoa le talia foʻi e i latou nei o sē na te faamāfanafanaina i latou, se tasi e tau faamāmā avega mai. I manatu o na tagata uma, ua matuā mamao lava se talitonuina o se olaga faaparataiso.

O fea la le parataiso faaleagaga? Manatua, o le upu faa-Samoa “parataiso” e fesootaʻi atu i upu faa-Eleni, faa-Peresia, ma le faa-Eperu lea e tauave uma ai lava le manatu o se paka po o se togalaau, o se nofoaga toʻafilemu e toe faafouina ai le tino ma le mafaufau. Ua folafola mai e le Tusi Paia faapea, e iai se aso o le a avea ai le lalolagi ma parataiso faaletino, o se aiga e pei se togalaau mo le nonofo ai o le fanau a tagata e leai ni a latou agasala. (Salamo 37:10, 11) I le manatuaina o lenei manatu, ua tatou iloa ai o le parataiso faaleagaga o se siʻomaga e faamalieina ai le vaai ma faatoʻafilemu ai, ma maua ai e se tasi le olioli i le filemu ma le isi ona uso a tagata faapea foʻi ma le Atua. I aso nei, e pei ona iloa e Gustavo, o loo iai se parataiso faapena, ma o loo iai se vaega faatuputupulaʻia o tagata.

Ina ua 12 tausaga o Gustavo, sa ia manaʻo e avea o ia ma se patele Katoliko Roma. Ina ua malilie i ai ona mātua, sa ia ulu atu loa i le seminario a le lotu. O iinā na aafia ai o ia i musika, o ata tifaga, ma faiga faapolotiki, o mea sa uunaʻia e le lotu le faia ina ia faatosina mai ai le tupulaga. Sa ia iloa e faatalitalia se patele ina ia tuutoina atu atoa o ia i tagata ma e lē mafai ona faaipoipo. Peitaʻi, o nisi patele ma tama sa iai i le seminario e masani ai Gustavo, sa latou faia ni amioga lē mamā. O se ituaiga o siʻomaga faapena, na vave ai lava ona faateteleina le inu ʻava malosi a Gustavo. E mautinoa lava, sa ia leʻi mauaina i lena taimi le parataiso faaleagaga.

I se tasi aso, na faitau ai e Gustavo se sāvali faale-Tusi Paia sa talanoaina ai se parataiso i le lalolagi. Na avea lea ma itu na ia mafaufau ai i le fuafuaga o le olaga. Fai mai a ia: “Na amata loa  ona ou faitauina soo le Tusi Paia, peitaʻi sa ou lē malamalama i ai. Sa ou leʻi iloa foʻi e iai se suafa o le Atua.” Na tuua e ia le seminario ae alu atu i Molimau a Ieova, e saʻili se fesoasoani ina ia malamalama ai i le Tusi Paia. Mulimuli ane, sa vave lona agaʻigaʻi i luma ma e leʻi umi ae tuuina atu loa lona ola i le Atua. Sa aʻoaʻoina e Gustavo mea e uiga i le parataiso faaleagaga.

Se Nuu mo le Suafa o le Atua

Na aʻoaʻoina e Gustavo faapea o le suafa o le Atua, o Ieova, e lē na o se manatu e tau ina faafiafia ai se tagata suʻesuʻe o le Tusi Paia. (Esoto 6:3) O se vaega matuā tāua o le tapuaʻiga moni. Na aʻoaʻo atu e Iesu ona soo ina ia tatalo: “Lo matou Tamā e, o i le lagi, Ia paia lou suafa.” (Mataio 6:9) I le taʻua o tagata o Nuu Ese ua avea ma Kerisiano, na faapea mai ai le soo o Iakopo: ‘Ua silasila atu le Atua i nuu ese e maua ai se nuu mo lona suafa.’ (Galuega 15:14) I le uluaʻi senituri, sa avea ai le faapotopotoga Kerisiano ma “nuu mo lona suafa.” Po o iai ea se nuu mo le suafa o le Atua i aso nei? Ioe, na oo ina iloa e Gustavo, o lena nuu o Molimau a Ieova ia.

O loo galulue Molimau a Ieova i le 235 atunuu ma teritori. E silia ma le ono miliona o latou faifeʻau, ma le isi valu miliona o tagata fiafia ua auai atu i a latou sauniga. I le lauiloa i la latou faiva i le lautele, ua latou faataunuu ai fetalaiga a Iesu: “E talaʻiina atu foi lenei tala lelei o le malo i le atu laulau uma, e fai ma molimau i nuu uma.” (Mataio 24:14) Ae aiseā, na manatu ai Gustavo ua ia maua le parataiso faaleagaga i le aufaatasi ma Molimau a Ieova? Fai mai a ia: “Sa ou faia se faatusatusaga o mea na ou vaaia i le lalolagi aemaise lava i le seminario, ma mea ia ua ou iloa i Molimau a Ieova. O le eseesega tele lava o le alofa lea i le vā o Molimau.”

E tali faapena foʻi faamatalaga a isi e faatatau i Molimau a Ieova. Na faapea mai Miriama, o se tamaʻitaʻi talavou mai Pasili: “Sa ou lē iloa pe faapefea ona ou fiafia, sa lē maua e oo lava i totonu o loʻu aiga. O le uluaʻi taimi lava na ou vaaia ai le faatinoga o le alofa, o totonu o Molimau a Ieova.” Na faapea mai se alii e suafa ia Kilisi: “Sa iai taimi e fai lava ma ou faia mea faaagaga, peitaʻi sa lē tāua ia te aʻu lotu. Sa sili atu ona tāua ia te aʻu loʻu tulaga i le olaga ma laʻu galuega o se inisinia. Peitaʻi, ina ua amata ona suʻesuʻeina e laʻu avā le Tusi Paia faatasi ma Molimau a Ieova, sa ou vaaia ai se suiga ia te ia. Sa ou maofa foʻi i foliga olioli ma le maelega o fafine Kerisiano sa asiasi mai ia te ia.” Aiseā e faia ai e tagata na faamatalaga e uiga i Molimau a Ieova?

O le ā le Parataiso Faaleagaga?

O se tasi o itu e matilatila ai Molimau a Ieova o lo latou talisapaia lea o le poto faale-Tusi Paia. E latou te talitonu e moni le Tusi Paia ma o le Afioga lea a le Atua. O lea, ua lē faamalieina ai i latou i le tau ina iloa o talitonuga faavae o la latou lotu. E iai sa latou polokalame faifai pea o suʻesuʻega totino ma le faitauga Tusi Paia. O le umi lava e auaufaatasi ai se tagata ma Molimau a Ieova, o le tele foʻi lena o mea na te aʻoaʻoina e uiga i le Atua ma Lona finagalo e pei ona faaalia mai i le Tusi Paia.

O lena poto ua faasaʻoloto ai Molimau a Ieova mai mea o loo aveesea ai le fiafiaga o tagata, e pei o faiga faataulāitu ma manatu e faaleagaina ai. Na fetalai Iesu: “E tuu saʻoloto foi outou e le upu moni,” ma e ioeina e Molimau a Ieova le moni o lena fetalaiga. (Ioane 8:32) O Fernando, lea sa faia faiga faataulāitu i se tasi taimi, ua faapea mai: “O se mapusaga tele le iloaina e iai se ola e faavavau. Sa ou fefe ina neʻi feoti oʻu mātua po o aʻu foʻi.” Na faasaʻolotoina e le upu moni Fernando mai lona fefe i le lalolagi o agaga ma le talitonuga ua taʻua o se olaga i tala atu o le oti.

O loo taʻua i le Tusi Paia faapea o le poto e uiga i le Atua e fesootaʻi vavalalata atu ma le parataiso. Na faapea mai le perofeta o Isaia: “Latou te le faia se mea leaga, latou te le faaumatia foi se mea i loʻu mauga paia uma; auā e tumu le lalolagi i le malamalama o Ieova, e pei ona ufitia o le iliti tai i le suāsami.”—Isaia 11:9.

O le mea moni, e lē lava le iai na o le poto ina ia aumaia ai le filemu lea na valoia e Isaia. E tatau  ona gaoioi le tagata e tusa ai o mea o loo aʻoaʻoina. O se faamatalaga lenei a Fernando: “Pe a ati aʻe e se tagata fua o le agaga, o lona sao lena ua faia i le parataiso faaleagaga.” Sa faasino atu le manatu o Fernando i upu a le aposetolo o Paulo, o lē na taʻua uiga lelei ia e tatau i se Kerisiano ona atiina aʻe, o “fua o le Agaga.” Sa ia lisiina mai na fua e pei “o le alofa, o le olioli, o le filemu, o le onosai, o le mataalofa, o le agalelei, o le faamaoni, o le agamalu, ma le le gaoiā.”—Kalatia 5:22, 23, LT.

Po o mafai ona e mātau maia le pogai e mafai ai e le auaufaatasi ma se vaega o tagata o loo tauivi e ati aʻe na uiga, ona avea moni lava e peiseai ua iai i le parataiso? O le a iai i na tagata le parataiso faaleagaga lea na valoia mai e le perofeta o Sefanaia. Na ia taʻua faapea: “Latou te le faia amioletonu, latou te le tala pepelo foi; e le iloa foi i o latou gutu le laulaufaiva faaʻoleʻole; a e latou te aai, ma taooto, e leai foi se faamatau mai.”—Sefanaia 3:13.

Le Matafaioi Tāua a le Alofa

Atonu o e mātauina o le uiga lava lea e muamua i fua o le agaga na taʻua e Paulo o le alofa. O le uiga lenei o loo tele ina tautala i ai le Tusi Paia. Na fetalai Iesu: “O le mea lea e iloa ai e tagata uma lava o oʻu soo outou, pe afai ua outou fealofani.” (Ioane 13:35) O le mea moni, e lē lelei atoatoa Molimau a Ieova. E iai nisi taimi e tutupu ai ni faafitauli i lo latou vā e pei lava foʻi ona sa tutupu i aposetolo o Iesu. Peitaʻi e latou te fealofani moni lava, ma latou te tatalo mo le lagolago mai a le agaga paia a o latou atiina aʻe lenei uiga.

O le iʻuga, ua tutasi ai lava lo latou ʻauuso. E leai ni faasilisiliga o ituaiga na tupuga mai ai po o ni uiga faalotonuu fevaevaeaʻi i lo latou vā. O le mea moni, o le toʻatele o Molimau na iai i le taimi o fasiotiga tagata sa faia i vā o ituaiga ma lanu a o faagasolo tausaga faaiʻuiʻu o le lona 20 senituri, sa latou taumafai e puipuia isi o latou uso e tusa lava pe sa lamatia ai o latou lava ola. E ui ina eseese “atu nuu uma, ma aiga, ma nuu, ma gagana eseese” e ō mai ai, ae ua latou olioli i se autasi e matuā faigatā lava ona faavasega i le mafaufau seʻi vaganā ua e tofo lava oe i ai.—Faaaliga 7:9.

Le Parataiso mo i Latou o Ē Faia le Finagalo o le Atua

E lē faatagaina i le parataiso faaleagaga le matapeʻapeʻa, o amioga lē mamā, ma le manatu faapito. Ua taʻu mai i Kerisiano: “Aua foi tou te amio faatasi ma lenei lalolagi, a e peitai ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.” (Roma 12:2) Pe a tatou ola i ni olaga mamā tau amio ma faia le finagalo o le Atua i isi auala, e mafai ona tatou fesoasoani ai e ati aʻe le parataiso faaleagaga ma tatou saosaolaumea ai i le mauaina o lo tatou lava fiafiaga. Na iloa e Kalala le moni o lenei manatu. Ua ia faapea mai: “Sa aʻoaʻoina aʻu e loʻu tamā ia ou galue mamafa ina ia mafai ona ou tausia aʻu lava i le tulaga tau seleni. Peitaʻi, e ui lava sa ou lagona ua malupuipuia aʻu ona o tulaga sa iai aʻu aʻoaʻoga i iunivesite, ae sa ou misia le autasi o se aiga ma le ituaiga o saogalemu lea e na o le poto mai le Afioga a le Atua e mafai ona aumaia ia i tatou.”

O le mea moni, o le mauaina o le parataiso faaleagaga e lē aveesea ai faafitauli faaletino o le olaga. E apoia pea Kerisiano i maʻi. E ono aafia le atunuu o loo latou nonofo ai i taua i le vā o ona lava tagata. O loo onosaia e le toʻatele o tagata  le olaga mativa. Peitaʻi, o le iai o se faiā vavalalata ma Ieova le Atua—lea ua avea ma vaega e sili ona tāua o le parataiso faaleagaga—o lona uiga e mafai ona tatou saʻili atu ia te ia mo le lagolagosua. O le mea moni, ua ia valaauliaina i tatou ina ia ‘tuuina atu ia te ia mea tatou te popole vale ai,’ ma e toʻatele ua latou molimauina le moni o le auala matagofie lea ua ia lagolagoina ai i latou i tulaga e sili ona faigatā. (Salamo 55:22; 86:16, 17) Ua folafola mai e le Atua lona iai faatasi ma ona tagata tapuaʻi e tusa lava pe o iai “i le vanu o le ata o le oti.” (Salamo 23:4) O le mautinoa i le nofosauni o le Atua e lagolagoina i tatou, ua avea lea o se fesoasoani i le faasaoina o lo tatou ‘manuia mai le Atua, e silisili lava i mea uma e manatu i ai,’ lea ua avea ma ki i le parataiso faaleagaga.—Filipi 4:7.

Saosaolaumea i le Parataiso Faaleagaga

E fiafia le toʻatele o tagata e asiasi atu i se paka po o se togalaau. Latou te fiafia e savalivali solo ai pe atonu foʻi e nofonofo ai i se nofoa ma matamata solo i mea o loo siʻosiʻomia ai. Ua faapena foʻi ona toʻatele tagata e fiafia e auaumea faatasi ma Molimau a Ieova. E latou te lagona le faafouina i totonu o lo latou ʻauuso, e maua le filemu, ma toe faafouina ai le malosi. Ae peitaʻi, e manaʻomia e se togalaau matagofie ona tausia lelei i taimi uma pe a fia avea pea faapei o se parataiso. I se tulaga talitutusa, na pau le pogai ua mafai ai ona iai le parataiso faaleagaga i totonu o lenei lalolagi ua matuā lē foliga i se parataiso, talu ai o loo atiina aʻe e Molimau a Ieova, ma o loo faamanuia mai le Atua i a latou taumafaiga. E mafai faapefea la e se tasi ona faia se sao uigā i lena parataiso?

Muamua, e manaʻomia ona e auaufaatasi ma se faapotopotoga o Molimau a Ieova, ia suʻesuʻeina le Tusi Paia ma i latou, ma maua ai le poto faale-Tusi Paia lea ua avea ma faavae o le parataiso faaleagaga. Na taʻua e Kalala faapea: “E leai se parataiso faaleagaga e aunoa ma ni meaʻai faaleagaga.” E aofia ai i lenei itu le faitauina e lē aunoa o le Afioga a le Atua ma mafaufau i mea o loo e faitauina. O le poto e maua mai ai o le a e uaʻi vavalalata atu ai i a Ieova le Atua, ma oo ai ina e alofa ia te ia. O le a e iloa ai foʻi ona talanoa atu ia te ia i le tatalo ma ole atu mo lana taʻitaʻiga ma lona agaga ina ia lagolago mai ia te oe a o e faia lona finagalo. Na taʻu mai e Iesu ia i tatou ina ia finafinau i le tatalo. (Luka 11:9-13) Na faapea mai le aposetolo o Paulo: “Ia tatalo e le aunoa.” (1 Tesalonia 5:17) O le faaeaga o le talanoa atu i le Atua i le tatalo faatasi ai ma le mautinoa atoatoa e faafofoga mai o ia ia te oe, o se vaega tāua lea o le parataiso faaleagaga.

A o faagasolo taimi, o le a faaleleia ai lou olaga e ala i mea ua e aʻoaʻoina, ma iʻu ai ina e manaʻo e talanoa atu i isi e faatatau i ia mea. Ona mafai ai lea ona e usitaia le poloaʻiga a Iesu: “Ia . . . pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tamā o i le lagi.” (Mataio 5:16) O le tufa atu i isi o le poto e uiga ia Ieova le Atua ma Iesu Keriso faapea le faaneeneeina o le alofa sili ua faaalia mai e i laʻua i tagata, e aumaia ai le fiafiaga tele.

Ua lata mai le taimi o le a avea ai le lalolagi atoa o se parataiso faaletino—o se nofoaga e pei se togalaau e aunoa ma se faapolusioneina ma o se nofoaga ua fetaui lelei mo tagata faamaoni. O le iai o le parataiso faaleagaga i nei “aso faigata,” o se faamaoniga lea o le mana o le Atua ma o se faailoaga mai o mea e mafai ona ia faia ma o le a ia faataulauina i le lumanaʻi.—2 Timoteo 3:1.

E oo lava i le taimi nei, ua tofo ai i latou o loo olioli i le parataiso faaleagaga, i le faataunuuga faaleagaga o le Isaia 49:10: “Latou te le fia aai, latou te le fia inu foi; e le ogotia i latou i le vevela po o le la; auā o le ua alofa ia i latou, na te ave ia te i latou, na te taʻitaʻiina foi i latou i vaipuna.” O le a molimau atu Iose i le moni o lena mea. Sa moemiti o ia i le fia avea o se faimusika taʻutaʻua, peitaʻi na ia mauaina faapea e sili atu ona faamalieloto le auauna i le Atua faatasi ma le faapotopotoga Kerisiano. Ua ia faapea mai: “O lenei ua ou olioli i le iai o se olaga uigā. Ua ia te aʻu lagona saogalemu i le iai faatasi ma le ʻauuso Kerisiano, ma loʻu iloaina o Ieova o ia o se Tamā alofa o lē e mafai ona tatou faatuatuaina.” O le fiafiaga o Iose—faapea foʻi le faitau miliona o isi e pei o ia—lea o loo faamatalaina i le Salamo 64:10: “E fiafia lē amiotonu ia Ieova, ma faalagolago ia te ia.” Maʻeu le matagofie o le faamatalaina o le parataiso faaleagaga!

[Faamatalaga pito i lalo]

[Ata i le itulau 10]

A o olioli i le parataiso faaleagaga, e tatau ona tatou fesoasoani i le faalauteleina atu!