Pe Mafai Ona E Fiafia Moni?

SA FAAFEILOAʻI e Siaosi tagata uma lava i le ʻata. Sa manatu o ia, o le ola o se meaalofa tāua lea e ao ona olioli ai. O lona fiafiaga ma le vaavaai atu mo mea lelei sa avea ma ona uiga iloga—lea na sili atu ona ia faaalia ina ua amata ona ia fesagaʻia mafatiaga o le tino matua. E oo lava i le aso na ia maliu ai, sa lauiloa pea Siaosi o se tagata e fiafia. Pe o e fiafia e pei o Siaosi? Pe e te manatu i aso fou taʻitasi o se meaalofa e ao ona olioli ai? Pe o le tulimataʻia o se aso fou e oo ai ia te oe faalogona o le lē fiafia po o le popole vale foʻi? Pe iai se mea o aveesea le fiafia mai ia te oe?

Ua faamatalaina le fiafia o se tulaga sologa lelei e masani ona tumau. E mātaulia i faalogona e faasolo mai le lotomalie i se olioli tele ma se faanaunauga moni ina ia faaauau pea ona iai i se tulaga sologa lelei. Pe e iai moni lava se fiafiaga faapena?

I aso nei, ua faaauiluma ai e sosaiete o tagata le vaaiga faapea e pau lava le auala o le a fiafia ai tagata pe afai e matuā mauʻoa. E faitau miliona tagata o loo maumauaʻi pea i se olaga faanatinati i a latou taumafaiga pisi vale ina ia mauʻoa ai. I le faia faapea, ua faataulaga ai e le toʻatele a latou faiā totino ma isi mea tāua i le olaga. I le pei o loi i o latou faamoega i se mea maupuʻepuʻe, o loo faaauau pea ona latou faanatinati solo ma ua itiiti ai se taimi latou te mafaufau ai i a latou gaoioiga ia po o isi foʻi. O le mea moni “ua faateleina le aofaʻi o tagata ua oo i ai le lotomafatia,” e pei ona taʻua i se lipoti a le Los Angeles Times, “ma o i latou o loo pagatia i le lotomafatia ua faateteleina ona amata mai i tausaga talavou. . . . O fualaau e faateʻa ai le lotomafatia (antidepressants) ua avea ma fualaau e sili ona taulia.” E faitau miliona o loo latou faaaogāina fualaau faasāina po o le taumafai foʻi e foʻia o latou faafitauli i le faaaogāina o le ʻava malosi. O nisi e ō ma soona faaalu a latou tupe pe a latou lagona le lotomafatia.  I se tasi suʻesuʻega na faia, na taʻua ai e le nusipepa Peretania o le Guardian e faapea: “Ua faaalia le avea o le itupa o tamaʻitaʻi ma ē e sili atu ona maua i le mea lea o le soona fai o faatauga e avea o se vaifofō. E faatoluina e sili atu ai ona latou faia soo faatauga pe a lotomafatia na i lo alii.”

Ae peitaʻi, o le fiafiaga moni e lē maua i se faleoloa, e lē maua i le ʻava malosi, i se fualaau, se tui faasāina, po o se teuga tupe. E lē faatauina le fiafia; e maua fua. O fea e mafai ona tatou maua ai se meaalofa tāua faapena? O le a tatou talanoaina lena manatu i le mataupu o sosoo mai.