Taotoga e Lē Faaaogāina ai le Toto—“Se Togafitiga Faafomaʻi ua Masani Ai”

I LALO o le ulutala “Taotoga e ‘Lē Faaaogāina ai le Toto’,” i le mekasini o le Maclean’s, na lipotia mai ai e faapea o fomaʻi i Kanata, ua latou “faia aʻe ni togafitiga fou, i le lima tausaga ua mavae, ma ua avea ai le taotoga e lē faaaogāina ai le toto ma se togafitiga faafomaʻi ua masani ai.” O se tasi o i latou na, o Brian Muirhead, o se fomaʻi faapitoa o vailaau faamoe i le Health Sciences Centre i Winnipeg. O le ā na uunaʻia ai lana saʻiliga mo ni togafitiga e sui ai le faaaogāina o le toto?

I le 1986, na faia ai e Dr. Muirhead se galuega fitā, o le faia lea o se taotoga o se tamāloa e 70 tausaga le matua sa aafia i le maʻi o le piliki o le toto ona ua papala se vaega o lona taufale, ona o ia o se Molimau a Ieova, ma ona o ona talitonuga e faavae i le Tusi Paia, na ia talosagaina ai se togafitiga e aunoa ma le toto. (Galuega 15:28, 29) Ua lipotia mai e le Maclean’s “na faaaogāina [e Dr. Muirhead] se togafitiga sa seāseā ona faia, o le tuiina lea o le vai masima i le tagata maʻi ina ia tumau ai le fua talafeagai o lona toto. Sa taulau manuia lea taualumaga, ma sa faamalosia ai le talitonuga o Muirhead e faapea, ‘e tele naʻuā tuiga toto sa matou faia. Sa ou manatu o le taimi lenei e tatau ona vaavaai atu ai mo ni togafitiga e lē faaaogāina ai le toto.’”

O le saʻiliga mo taotoga e lē faaaogāina ai le toto “sa faapogaia e lē gata i popolega e uiga i toto o le a maua i le lumanaʻi—ae faapea foʻi ma le fefefe o le toʻatele o tagata mamaʻi i le aafia i faamaʻi ona o tuiga toto.” Ona o saʻiliʻiliga a fomaʻi sogasogā, ua lē na o Molimau a Ieova ua maua ai aogā, ae faapena foʻi ma le toʻatele o isi. Ua faapea mai le Maclean’s: “E lē gata i le soloia ai o le manaʻoga mo tuiga toto i le tele o tulaga, ae ua faaitiitia ai foʻi e taotoga e lē faaaogāina ai le toto ia lamatiaga— e ui lava o se aafiaga laʻitiiti—le pisia lea ona o le toto e lē mamā.” Ae e oo lava i se toto e “mamā” e ono lamatia ai, talu ai o le tuiga toto e taofia ai mo sina taimi gaoioiga a sela o le tino ia e puipuia ai mai faamaʻi.

O le ā le pogai o le talitonuga maumauaʻi o Molimau a Ieova e tusa ai ma togafitiga e lē faaaogāina ai le toto? Atonu o le a e fiafia e faitau i le polosiua Pe Mafai Faapefea e le Toto Ona Faasaoina Lou Ola? O le a fiafia Molimau a Ieova e fetufaaʻi ma oe i lenei polosiua.