“Amuia le Tagata na te Maua le Atamai”

O IA o se fatusolo, se tufuga tusi ata, ma o se tupu. Talu ai o lana tupe maua faaletausaga e silia ma le 200 miliona tālā, sa sili atu la lona tamaoaiga na i lo o se isi lava tupu i le lalolagi. Sa lauiloa foʻi lenei tamāloa i lona atamai. Sa matuā maofa le tupu tamaʻitaʻi na asiasi ane lea na ia faapea mai ai: “Faauta, e itiiti mea na talaina atu ia te au, a e tele mea na le talaina atu; ua sili lava lou poto [atamai], ma lou manuia i le tala na ou faalogo i ai.” (1 Tupu 10:4-9) O le tulaga lena o le Tupu o Solomona i Isaraelu anamua.

Sa ia Solomona le tamaoaiga ma le atamai. O lea, sa faapitoa ai ona agavaa o ia e filifili po o fea o mea ia e lua sa matuā manaʻomia moni lava. Na ia tusi mai e faapea: “Amuia le tagata na te maua le [“atamai,” NW], ma le tagata na te maua le mafaufau; auā e sili ona lelei o lona faatau i lo le faatau o le ario; ma mea e maua ai e sili lea i le auro. E sili ona lelei o ia i penina; ma au mea faafiafia uma lava e le tusa ma ia.”—Faataoto 3:13-15.

O fea la, e mafai ona maua ai le atamai? Aiseā ua sili atu ai lona tāua na i lo ʻoa? O ā ona vala faatosina o iai? O le mataupu lona 8 o le tusi o le Tusi Paia o Faataoto, lea sa tusia e Solomona, ua taliina ai nei fesili i se auala e matuā maofa ai. O iinā o loo pei ai le atamai o se tagata, e pei o loo mafai ona tautala ma gaoioi. Ua faailoaina totino mai e le atamai lona malosi e faatosina ai, faatasi ma lona aogā.

“Ua Alaga o Ia”

Ua amata le mataupu e 8 o Faataoto i le fesili faatupu manatu: “E le ua valaau ea le poto [atamai], ma leo tele mai le faautauta?”  * Ioe, o loo faaauau ona alaga mai le atamai ma le faautauta, e ese mai i le fafine amio lē mamā lea e lafilafi i mea pogisa ma musumusu atu upu taufaasesē i taliga o se talavou ua tuua na o ia, e leai sona poto masani. (Faataoto 7:12) “O loo tu o ia i le tumutumu o mea maualuga i tafatafa ane o le ala, i le fetaulaigāala; ua alaga o ia i le itu o le puipui, i le ala o le aai, i le mea e ui atu ai i le faitotoa.” (Faataoto 8:1-3) O le malosi ma le toʻa o le leo o le atamai ua lagonaina ma le manino i nofoaga faitele—i puipui, i māgafā, i mea e ui atu ai i le aai. E faigofie lava ona lagonaina e tagata lena leo ma tali atu i ai.

O ai na te faafitia le atamai faaleatua o loo tusia i le Afioga faagaeeina a le Atua, le Tusi Paia, lea e mafai ona mauaina, toetoe lava o tagata uma i le lalolagi o ē o loo naunau e fia maua? “O le Tusi Paia o le tusi aupito sili lea ona toʻatele ē e faitauina i le talafaasolopito,” o le faamatalaga lea a le World Book Encyclopedia. Ua faaopoopo mai le tusi: “E sili atu kopi ua tufatufaina atu o le Tusi Paia na i lo se isi lava tusi. Ua tele foʻi ina faaliliuina le Tusi Paia, i gagana e sili atu, na i lo se isi lava tusi.” O le mauaina o le Tusi Paia atoa po o se  vaega i le sili atu ma le 2,100 gagana ma vaega o se gagana (dialect), ua sili atu ai i le 90 pasene o le aiga faaletagata ua mauaina, a itiiti mai o se vaega o le Afioga a le Atua i a latou lava gagana.

Ua folafolaina i le lautele e Molimau a Ieova le feʻau a le Tusi Paia i mea uma lava. I atunuu e 235, ua latou maelega ai e talaʻia le tala lelei o le Malo o le Atua ma aʻoaʻoina tagata i upu moni o loo i le Afioga a le Atua. O a latou mekasini e faavae i le Tusi Paia o Le Olomatamata, ua lomiaina i gagana e 140, ma le Ala Mai!, ua lomia i gagana e 83, o loo tufatufaina atu i se aofaʻiga e silia ma le 20 miliona kopi o lomiga taʻitasi. Ua mautinoa o loo alaga le atamai i nofoaga faitele!

‘Ua Ou Leo Tele Atu i le Fanau a Tagata’

Ua tautala atu le atamai e pei o se tagata e faapea: “Ou te valaau ia te outou tagata; ma ou leo tele atu i le fanau a tagata. Outou e faigofie e, ia outou iloa le faautauta; ma outou ē valelea, ia loto matala outou.”—Faataoto 8:4, 5.

O le valaau a le atamai ua i so o se mea. Ua faasalafa atu le valaaulia i tagata uma lava. E oo lava i ē ua leai se poto masani ua valaaulia ina ia maua le faautauta, ma ē valelea, ia maua le malamalama. O le mea moni, ua talitonu Molimau a Ieova o le Tusi Paia o le tusi mo tagata uma, ma ua taumafai ma le lē manatu faapito e faalaeiau i tagata uma lava latou te feiloaʻi, ia saʻiliʻili i ai ina ia mauaina upu o le atamai o loo iai.

“E Tautala Loʻu Gutu ma le Faamaoni”

I le faalauteleina atu o lana valaau, ua faaauau ai le atamai e faapea: “Ia outou faalogologo mai, auā ou te tautalatala i mea sili; e tautala oʻu laugutu i mea tonu. Auā e tautala loʻu gutu ma le faamaoni; a o le amio leaga, e inosia lea i oʻu laugutu. O upu uma a loʻu gutu ua tonu ia; e le o i ai se upu faaʻoleʻole ma le faapiopio.” Ioe, o aʻoaʻoga a le atamai e matuā lelei ma faimeatonu, e faamaoni ma amiotonu. E lē o iai se upu faaʻoleʻole ma le faapiʻopiʻo. “E saʻo uma lava ia i le ua lagona; e tonu foi i e ua maua le poto.”—Faataoto 8:6-9.

Ua fetaui lelei le timaʻi mai a le atamai: “Ia outou talia laʻu aʻoaʻo atu, a e aua i le ario; ma ia talia le poto e sili i le auro e aupito lelei.” E fetaui lelei lenei olega, “aua e sili ona lelei le poto [atamai] i penina; ma mea faafiafia uma lava e le tusa ma ia.” (Faataoto 8:10, 11) Ae aiseā? O le ā le māfuaaga ua sili atu ai ona tāua le atamai na i lo ʻoa?

“O Laʻu Fua e Sili Ona Lelei Lea i le Auro”

O meaalofa ua aumaia e le atamai i lana ʻaufaalogologo e sili atu ona tautele na i lo auro, ario, po o penina. O le taʻua po o ā nei meaalofa, ua faapea mai ai le atamai: “O aʻu o le poto [atamai], ma te mau ma le faautauta; ou te maua foi le poto i mafaufau. O le mataʻu ia Ieova, o le ʻinoʻino lea i le leaga; o le faamaualuga, ma le loto fefete, ma le amio leaga, ma le gutu faapiopio, ou te ʻinoʻino i ai.”—Faataoto 8:12, 13.

 Ua avatu e le atamai le faautauta ma le tomai e mafaufau ai i lē ua mauaina. O le tagata ua iai le atamai faaleatua e iai foʻi ma le migao ma le mataʻu i le Atua, ona o “le mataʻu ia Ieova, o le amataga o le poto [atamai] lea.” (Faataoto 9:10) O lea, e ʻinoʻino o ia i mea e ʻinoʻino i ai Ieova. O le faasiasia, faamaualuga, amioga lē mamā, ma le tautala faapiʻopiʻo e matuā lē maua lava ia te ia. O lona ʻinoʻino i le mea leaga ua puipuia ai o ia mai i aafiaga leaga o le faaaogāsesēina o le pule. Maʻeu la le tāua o le saʻilia o le atamai e i latou o loo gafa ma tiute tauave i le faapotopotoga Kerisiano, faapea foʻi ma ulu o aiga!

“Ua ia te au le mafaufau ma le poto [atamai],” ua faaauau mai ai le atamai. “O aʻu nei lē atamai, ua ia te au le malosi. O aʻu e tupu ai tupu; e pule tonu ai foi alii. O aʻu e alii ai alii sili ma alii, o faamasino uma o le lalolagi.” (Faataoto 8:14-16) O fua o le atamai e aofia ai le faautaga, malamalama, ma le malosi—o itu ia e manaʻomia tele e tagata o loo taiulu, tagata i ofisa maualuluga, ma tagata aloaʻia. O le atamai e matuā manaʻomia tele e i latou o loo i tulaga pule ma i latou e fautuaina isi.

O le atamai moni ua avanoa nei mo le mauaina e tagata uma, ae e lē o tagata uma e mauaina. O nisi ua latou teena po o le ʻalofia foʻi, e tusa lava po o mauagofie. “Ou te alofa atu ia i latou o e alofa mai ia te au,” o le faamatalaga lea a le atamai, “o e sailiili mai foi ia te au, latou te maua aʻu.” (Faataoto 8:17) E na o i latou e pulunaunau e saʻilia le atamai e latou te maua.

O ala o le atamai e tonu ma amiotonu. E na te tauia ē saʻili ia te ia. Ua faapea mai le atamai: “O loo ia te au le oloa ma le mamalu; o le oloa anagata ma le amiotonu. O laʻu fua e sili ona lelei lea i le auro, o le auro lelei lava; o mea foi e tupu mai ia te au, e sili ona lelei ia i le ario sili. Ou te savali i le ala o le amiotonu, i magāala o le faamasinoga; ina ia ou avatua le oloa i e ua alofa ia te au, ia fai mo latou; ou te faatumuina foi mea e teu ai o latou oa.”—Faataoto 8:18-21.

I na uiga sili ona lelei ma uiga totino e pei o le poto e fai ai mea, tomai e mafaufau ai, lotomaulalo, faautauta, gaoioiga atamai, ma le malamalama, ua aofia i meaalofa a le atamai le tamaoaiga ma le mamalu. O se tagata atamai e ono mauaina le tamaoaiga e ala i auala amiotonu, ma oo ina manuia ai faaleagaga. (3 Ioane 2) E aumaia foʻi e le atamai le mamalu i le tagata. E lē gata i lea, na te mauaina le faamalieina mai i mea ua ia mauaina, ma e ia te ia le filemu o le mafaufau ma se lotofuatiaifo mamā i le Atua. Ioe, e olioli le tagata ua ia mauaina le atamai. O le mea moni, e sili atu fua o le atamai na i lo le auro e sili ona lelei ma le ario sili.

Maʻeu le fetaui o lenei fautuaga mo i tatou talu ai o loo tatou ola i se lalolagi matapeʻapeʻa, lea e tuu atu le faamamafaga i le mauaina o le tamaoaiga i so o se auala, tusa lava po o le ā le tulaga e oo i ai! Seʻi aua lava neʻi leiloa atu la tatou vaai i le tāua o le atamai po o le taumafai e mauaina le tamaoaiga e ala i  auala lē amiotonu. Ia aua lava neʻi o tatou lafoaʻia sauniuniga ia e aumaia ai le atamai—a tatou sauniga ma suʻesuʻega totino o le Tusi Paia ma lomiga ua saunia e “le auauna faamaoni ma le mafaufau”—i le tau lava o le mauaina o le tamaoaiga.—Mataio 24:45-47.

“Na Faauuina Aʻu Mai le Vavau”

O le atamai lea ua pei o se tagata i le mataupu e 8 o le Faataoto, ua lē na o se auala e faamatalaina ai ni tulaga patino o se uiga faalemafaufau. E faasino atu foʻi faafaatusa i le foafoaga sili ona tāua a Ieova. Ua faapea mai le atamai: “O Ieova e ona lava aʻu, o le amataga o lona ala, e muamua i ana galuega anamua. Na faauuina aʻu mai le vavau, mai le amataga, a o leai se lalolagi. Na fanaua au, a o leai ni mea loloto; a o leai foi ni puna e puna tele mai ai le vai; sa fanaua aʻu, a o lei faavaeina mauga, e leai foi ni mauga iti; a o lei faia e ia le laueleele ma le vao, ma le tumutumu o le efu o le lalolagi.”—Faataoto 8:22-26.

Maʻeu le saʻo o le faamatalaina o le atamai i le pei o se tagata lea e fetaui lelei ma le faamatalaga e faatatau i “le Upu” o loo i le Tusi Paia! Na tusi ai le aposetolo o Ioane: “Sa i le amataga, le Upu, sa i le Atua le Upu, o [“se atua,” NW] foi le Upu.” (Ioane 1:1, LF) O le atamai i le pei o se tagata ua fai ma sui faafaatusa o le Alo o le Atua, o Iesu Keriso, i lona soifuaga a o leʻi avea ma tagata. *

O Iesu Keriso o “le ulumatua o mea uma lava ua faia; auā na faia e ia o mea uma lava, o mea i le lagi ma mea i le lalolagi, o mea o vaaia ma mea e le o vaaia.” (Kolose 1:15, 16) “A o faatumauina e ia [Ieova] le lagi na ou i ai,” ona faaauau lea o le atamai ua pei o se tagata, “ina o tusi faataaliolio e ia i luga o le fogātai. A o faamauina e ia o ao i luga; a o faamauina e ia o puna o le moana. A o tofia e ia le tuaoi o le sami, ia le sopoia e lona suāsami lona matafaga; a o tusia e ia faavae o le lalolagi; na ou i ai ma ia, o aʻu o le tufuga; na fai foi aʻu mona fiafia i lea aso ma lea aso; sa ou olioli i ona luma i aso uma lava. Sa ou olioli i mea e mau ai tagata i lona lalolagi; o loʻu fiafia foi, sa i le fanau o tagata lea.” (Faataoto 8:27-31)Sa iai le Alo ulumatua o Ieova faatasi ma lona Tamā, na galue malosi faatasi ma ia—o Lē e lē mafaatusalia na Foafoaina Mea i le lagi ma le lalolagi. Ina ua foafoaina e Ieova le Atua le uluaʻi tagata, sa iai faatasi Lona Alo ma Ia i le galuega e avea ma Tufuga. (Kenese 1:26) E lētioa la a olioli ma fiafia le Alo o le Atua i tagata!

“Amuia le Tagata ua Faalogologo Mai ia te Au”

A o ia faaalitino mai le atamai, ua faapea mai le Alo o le Atua: “O lenei, le fanau e, faalogologo mai ia ia te au; amuia lava i latou o e tausi i oʻu ala. Ia outou faalogologo i mea e aʻoaʻo atu, ia outou popoto ai; aua foi le teena. Amuia le tagata ua faalogologo mai ia te au; o loo mataala i oʻu puipui i lea aso ma lea aso; o loo leoleo i pou o oʻu faitotoa. Auā o le ua maua aʻu, ua maua e ia le ola; e maua foi e ia le alofa mai ia Ieova. A o lē agasala mai ia te au, ua faasaunoa e ia lona lava ola; atoa uma o e ʻinoʻino ia te au, ua latou mananao i le oti.”—Faataoto 8:32-36.

O Iesu Keriso o le faatinoga atoatoa o le atamai o le Atua. “Ua ia te ia le oloa uma o le poto [atamai] atoa ma le malamalama, ua lilo ai.” (Kolose 2:3) O lea la, seʻi o tatou matuā faalogo lelei atu ia te ia ma mulimulituʻi i ona tulagaaao. (1 Peteru 2:21) O le teena o ia, o le faasaunoa lea o le tagata i lona lava ola ma ua manaʻo i le oti, auā “e leai foi se tasi ua i ai le ola.” (Galuega 4:12) O le mea moni, ia tatou taliaina Iesu o lē ua saunia e le Atua mo lo tatou faaolataga. (Mataio 20:28; Ioane 3:16) O lea, o le a tatou mauaina ai le fiafia lea e oo mai ona o le ‘mauaina o le ola ma le alofa mai ia Ieova.’

[Faamatalaga pito i lalo]

[Ata i le itulau 26]

E matuā manaʻomia le atamai i ē o loo gafa ma tiute tauave

[Ata i le itulau 27]

Aua neʻi tuulafoaʻia sauniuniga ia e maua ai le atamai