“E Moni ua Toetū le Alii”!

Seʻi manatu i le mafatia o soo o Iesu ina ua fasiotia lo latou Alii. Ua foliga mai ua mate lo latou faamoemoe e pei lava o le tino maliu lea na tuuina e Iosefa le Arimataia i le tuugamau. Na uma ai foʻi iinā ma so o se faamoemoega faapea, o le a faasaʻolotoina e Iesu tagata Iutaia mai le pologa ia Roma.

ANA faapea o le iʻuga lena o le mataupu, semanū la o le a leai atu ai foʻi ma soo o Iesu, e tai pei lava o soo o le tele o Mesia faatagafai. Peitaʻi sa soifua Iesu! E tusa ai ma faamatalaga a le Tusi Paia, sa faailoa atu o ia e ia lava i ona soo i nisi o taimi ina ua faatoʻā mavae lona maliu. O lea la, o nisi o i latou na alalaga faapea: “E moni, ua [toetū] le Alii”!—Luka 24:34.

Sa tatau ona puipuia e soo lo latou faatuatua ia Iesu o ia o le Mesia. O le faia faapea, ua latou faasino faapitoa atu ai i lona toetū mai i le oti o se faamaoniga moni o lona tulaga faa-Mesia. O le mea moni, “ua molitino atu e le au aposetolo ma le mana tele i le toe tu mai o le Alii o Iesu.”—Galuega 4:33.

Ana faamaonia e se tasi faapea o lenei toetū sa faatogafiti ona fai—atonu e ala i le tautino mai e se tasi o ona soo faapea o le saʻo lena, po o le faaalia foʻi sa iai pea le tino o Iesu i le tuugamau—semanū la e lē taulau le Faa-Kerisiano i le amataga. Ae e leʻi faapena. O le iloaina faapea sa soifua Keriso, sa ō atu ai soo o Iesu i mea uma ma folafola atu lona toetū mai, ma e toʻatele na oo ina talitonu i le Keriso na toe faatūina mai.

 Aiseā e mafai ai foʻi e oe ona e talitonu i le toetū mai o Keriso? O ā ni faamaoniga o loo iai faapea o se mea moni lava lenei na tupu?

Aiseā e Iloiloina ai Faamaoniga?

Ua iai i tala a Evagelia uma e fā faamatalaga e uiga i le toetū o Iesu. (Mataio 28:1-10; Mareko 16:1-8; Luka 24:1-12; Ioane 20:1-29) * O loo iai foʻi i isi vaega o Tusitusiga Kerisiano Eleni faamatalaga mautinoa e faatatau i le toe faatūina aʻe o Keriso mai i le oti.

E lētioa la folafola atu le toetū o Iesu e ona soo! Afai na faatūina moni aʻe o ia i le ola e le Atua, o se tala la e sili atu ona matuā faagaeetia ai na faalogo i ai le lalolagi. O lona uiga la, o loo soifua le Atua. E lē gata i lea, o lona uiga o loo soifua foʻi Iesu i le taimi lava lenei.

E faapefea la ona aafia ai i tatou i lena mea? Ia, sa tatalo Iesu: “O le ola faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea.” (Ioane 17:3) Ioe, e mafai ona tatou maua le poto e uiga ia Iesu ma lona Tamā lea e aumai ai le ola. E ala i le faatatauina o lena poto, e tusa lava pe tatou te oti, e mafai lava ona toe faatutūina i tatou, ona sa toe faatūina foʻi Iesu. (Ioane 5:28, 29) E mafai ona tatou maua le faamoemoe o le ola e faavavau i le lalolagi parataiso i lalo o le Malo faalelagi o le Atua i aao o lona Alo faamamaluina, o Iesu Keriso, le Tupu o tupu.—Isaia 9:6, 7; Luka 23:43; Faaaliga 17:14.

O lea la, e tāua tele le fesili pe sa toe faatūina moni Iesu mai i le oti. E aafia ai lo tatou ola i le taimi nei ma lo tatou faamoemoe mo le lumanaʻi. O le māfuaaga lena ua matou valaauliaina ai oe e iloiloina auala e fā o faamaoniga faapea sa maliu Iesu ma sa toe faatūina mai.

Sa Maliu Moni Lava Iesu i Luga o le Laau

Ua faapea mai nisi o tagata masalosalo, e ui sa faatautauina i le laau, ae sa leʻi maliu moni Iesu. Ua latou faapea mai sa na ona toetoe lava maliu o ia, ae sa toe faaolaina mai e ala i le mālū o le tuugamau. Ae peitaʻi, o faamatalaga uma o loo iai ua faamaonia ai faapea, o le tino sa lē o iai se ola o Iesu lea sa tuuina i le tuugamau.

Talu ai sa fasiotia Iesu i luma o le lautele, sa iai la molimau i le mea moni e faapea, sa maliu moni lava o ia i luga o le laau. Sa faamaonia lona maliu e le taʻitaʻi o le toʻaselau lea sa puleaina lona faasalaga oti. O lena taʻitaʻiʻau o se tagata e atamai faapitoa, e aofia ai i lana galuega le faamautinoaina ua maliu moni lava Iesu. E lē gata i lea, ina ua maua faamaoniga faapea ua maliu Iesu, ona faatoʻā tuuina atu ai loa e le Kovana Roma o Ponotio Pilato le tino maliu o Iesu ia Iosefa le Arimataia mo le tuuina i le tuugamau.—Mareko 15:39-46.

Na Maua le Tuugamau ua Gaogao

Na maua e soo le faamaoniga muamua o le toetū o Iesu ona o le tuugamau na gaogao, ma o lenei faamaoniga e leʻi toe finauina. Sa tanumia Iesu i se tuugamau fou, o se tuugamau sa leʻi faaaogāina muamua. E latalata le tuugamau i le mea sa faatautauina ai o ia ma i tuā iina sa faigofie lava ona mauaina. (Ioane 19:41, 42) E ioeina uma e tala a Evagelia faapea ina ua taunuu uō a Iesu i le tuugamau i le taeao lona lua ina ua mavae lona maliu, sa leʻi mauaina lona tino.—Mataio 28:1-7; Mareko 16:1-7; Luka 24:1-3; Ioane 20:1-10.

Sa matuā ofo fili o Iesu i le tuugamau na gaogao, e pei foʻi o ana uō. Ua loa ona taumafai malosi ona fili e faamautinoa ua maliu ma tanumia o ia. Ina ua faataunuuina lo latou sini, sa latou faamautinoa ua tofia se tagata e na te leoleoina ma sa faamauina foʻi le gutu o le tuugamau. Ae ui i lea, o le taeao o le uluaʻi aso o le vaiaso, sa gaogao le tuugamau.

Pe na aveesea ea e uō a Iesu lona tino mai i  le tuugamau? E mautinoa e leai, ona sa faaalia e tala a Evagelia e faapea sa latou matuā mafatia lava ina ua uma lona faasalaga oti. E lē gata i lea, e lē mafai fua e ona soo ona puapuagatia i sauāga ma le oti mo se mea e latou te iloaina o se pepelo.

O ai na faagaogaoina le tuugamau? O fili o Iesu o tagata mulimuli lava ia e latou te ono aveina le tino. Ae e tusa foʻi pe na latou aveina, e mautinoa lo latou toe aumaia i se taimi mulimuli ane ina ia faalēaogāina ai faamatalaga faapea, na toetū Iesu ma o loo soifua. Ae sa leʻi tupu lena tulaga, ona o le Atua lea na ia faia le gaoioiga.

I vaiaso mulimuli ane ai, sa leʻi faia e fili o Iesu se tetee malosi ina ua molimau atu Peteru e faapea: “Sema e, o outou Isaraelu e, faalogo mai ia i nei upu; o Iesu o le Nasareta, o le tagata ua faasinoina e le Atua ia te outou i mea mamana, ma vavega, ma faailoga ua faia e le Atua i o outou luma e ia, pei ona outou iloa foi; o ia ua tuuina mai e le pule tonu ma le fuafuaga a le Atua anamua, ma outou faamau i le laau ma fasioti i lima o tagata faaletaupulea. O ia ua faatuina mai e le Atua, ua na tatala i puapuaga o le oti, auā na le mafai ona taofiina ai o ia. Auā ua fai mai Tavita ia te ia, Na ou iloa atu le Alii i oʻu luma e le aunoa . . . O le mea lea . . . e malolo ai foi loʻu tino ma le faatalitali; auā e te le tuua aʻu i le tuugamau; e te le tuu atu foi lou tagata paia ia oo i ai le pala.”—Galuega 2:22-27, LF.

E Toʻatele na Vāai ia Iesu ua Toe Soifua Mai

I le tusi o Galuega, na taʻua ai e le tusitala o le Evagelia o Luka, e faapea: “I le au aposetolo . . . Ua mavae lona tiga, ona ia [Iesu] faailoa atu ai lea o ia e ia lava ia te i latou, ua toe soifua mai, ua faamaonia i faailoga e tele; e fagafulu po ua iloa ai o ia e i latou, ma na fetalai atu i mea a le malo o le Atua.” (Galuega 1:2, 3, LF ) E toʻatele soo na vaaia Iesu ina ua toetū mai i mea eseese—i le togalaau, i le auala, a o faia se taumafataga, i le Vai o Tiperia.—Mataio 28:8-10; Luka 24:13-43; Ioane 21:1-23.

Ua fesiligia e le ʻaufaitio le moni o nei faailoaina mai o Iesu. Ua latou faapea mai, na fafau aʻe lava e le ʻautusitala a latou faamatalaga po o lo latou siiina mai foʻi o manatu e foliga mai o ni manatu e feeseeseaʻi i ia tusitusiga. O le mea moni, o nai eseesega laiti i faamatalaga i tala a Evagelia ua faamaonia ai sa leʻi iai ni fuafuaga taufaasesē na iai. Ua faalauteleina lo tatou malamalamaga e uiga ia Iesu pe a aumaia e se tusitala faamatalaga auʻiliʻili, lea e faaopoopo atu i isi faamatalaga i mea patino na tutupu i le olaga faalelalolagi o Keriso.

Po o le faailoa mai ea o Iesu ina ua mavae lona maliu ua na o ni mea e tusa ma mafaufauga o tagata lava latou? E lē faamaoniaina so o se finauga lava i na tulaga, talu ai sa vaaia o ia e le toʻatele o tagata. O nisi o i latou o tagata faifaiva, fafine, se auauna sivili, ma e oo foʻi i le aposetolo masalosalo o Toma, o lē na faatoʻā talitonu ina ua vaai i le faamaoniga o le toetū mai o Iesu mai le oti. (Ioane 20:24-29) I nisi o mea na tutupu, sa leʻi iloaina muamua ai e soo o Iesu lo latou Alii ua toe faatūina. I se tasi taimi, e silia ma le 500 tagata na vāai ia te ia, o le toʻatele lava sa soifua pea ina ua faaaogā e le aposetolo o Paulo lena mea na tupu e avea o se faamaoniga o lana finauga e lagolagoina ai le toetū.—1 Korinito 15:6.

 O Iesu Soifua ua Iai se Aafiaga i Tagata

O le toetū o Iesu ua lē na o se mataupu o le naunau fia iloa po o le fefaaaliaʻiga o manatu. O le mea moni faapea o loo soifua o ia, ua aafia ai tagata i so o se mea i se auala mautinoa. Talu mai le uluaʻi senituri, e lē mafaitaulia tagata ua liliu mai i le matuā lē fiafia po o le tetee atoatoa i le Faa-Kerisiano, i le matuā talitonu aʻiaʻi faapea o le tapuaʻiga moni lea. O le ā na suia ai i latou? O le suʻesuʻeina o le Tusi Paia ua faamaonia atu ai ia i latou faapea sa toe faatūina mai e le Atua Iesu i le ola, e avea o se foafoaga agaga mamalu i le lagi. (Filipi 2:8-11) Ua latou faaalia le faatuatua ia Iesu ma le sauniuniga a Ieova le Atua mo le faaolataga e ala i le taulaga togiola a Keriso. (Roma 5:8) O na tagata taʻitoʻatasi, ua latou mauaina le fiafiaga moni e ala i le faia o le finagalo o le Atua ma ola e talafeagai ma aʻoaʻoga a Iesu.

Seʻi manatu i le mea na uiga atu i ai le avea ma Kerisiano i le uluaʻi senituri. Sa latou leʻi mauaina se mamalu, pule, po o le tamaoaiga. E matuā ese lava, o le toʻatele o uluaʻi Kerisiano sa ‘onosai i le vetega o a latou oloa ma le olioli’ ona o lo latou faatuatua. (Eperu 10:34) O le Faa-Kerisiano e manaʻomia ai se olaga faataulaga ma aumaia ai sauāga lea e oo atu ai i le faamaturoina i le tele o taimi.

A o leʻi avea ma soo o Keriso, o nisi sa iai ni faamoemoega lelei e tusa ai ma tulaga maualuluga ma le tamaoaiga. Sa aʻoaʻoina Saulo o Taso e le faiaʻoga lauiloa i Tulafono o Kamalielu, ma sa amata ona maualuga o ia i le vaaiga a tagata Iutaia. (Galuega 9:1, 2; 22:3; Kalatia 1:14) Peitaʻi, na oo ina avea Saulo ma le aposetolo o Paulo. O ia ma le toʻatele o isi na latou teena le mamalu ma le pule sa ofoina mai e lenei lalolagi. Aiseā? Ina ia folafola atu se feʻau o le faamoemoe moni e faavae i folafolaga a le Atua ma le mea moni faapea, o Iesu Keriso na toe faatūina mai le oti. (Kolose 1:28) Sa latou lotomalilie e tigāina mo se mea latou te iloa e faavae i mea moni.

Ua faapena foʻi i le faitau miliona o tagata i aso nei. E mafai ona e mauaina i latou i faapotopotoga a Molimau a Ieova i le lalolagi aoao. E valaaulia oe ma le māfana e Molimau i le faamanatuga faaletausaga o le maliu o Keriso, lea o le a faia pe a mavae le goto o le lā i le Aso Sa, Aperila 8, 2001. O le a latou fiafia pe a e auai atu i lena aso, faapea foʻi i a latou sauniga uma mo le suʻesuʻeina o le Tusi Paia e faia i o latou Maota o le Malo.

Aiseā e lē suʻesuʻe atili ai, e lē gata i le maliu ma le toetū o Iesu ae faapea foʻi ma lona soifuaga ma ana aʻoaʻoga? Ua ia valaauliaina i tatou e ō mai ia te ia. (Mataio 11:28-30) Ia gaoioi nei loa ina ia mauaina le poto saʻo o Ieova le Atua ma Iesu Keriso. O le faia faapea, e mafai ai ona maua le ola e faavavau e ala i le Malo o le Atua i aao o lona Alo pele.

[Faamatalaga pito i lalo]

[Ata i le itulau 7]

E faitau miliona ua mauaina le fiafiaga moni i le avea ma soo o Iesu Keriso

[Faamatalaga i Ata i le itulau 6]

Mai le Self-Pronouncing Edition of the Holy Bible, o loo iai le King James ma Revised version