Ia Loto Atu i la le Agaga ma Ola Ai!
Ia Loto Atu i la le Agaga ma Ola Ai!
“O le loto i la le Agaga o le ola lea.”—ROMA 8:6.
1, 2. O le ā le faaeseesega ua faia e le Tusi Paia i le vā o le “tino” ma le “agaga”?
E LĒ o se galuega faigofie le tausisia o se tulaga mamā tau amio i luma o le Atua a o lotolotoi i se sosaiete o tagata amioleaga, lea o loo faasilisilia ai le faamalieina o tuʻinanauga o le tino. Ae peitaʻi, ua faia e le Tusi Paia se faaeseesega i le vā o le “tino” ma le “agaga,” ma aumaia ai se tuueseesega manino i le vā o āuga mataʻutia pe a faataga e se tasi o ia lava e pulea e le tino agasala, ma iʻuga manuia pe a iai le faanaunauga e taaʻia e le agaga paia o le Atua.
2 Mo se faaaʻoaʻoga, na fetalai Iesu Keriso e faapea: “O le agaga lea e tupu ai le ola, e le aoga le tino i se mea; o upu ou te fai atu ia te outou, o le agaga ia, o le ola foi ia.” (Ioane 6:63) Na tusi atu le aposetolo o Paulo i Kerisiano i Kalatia: “O le tino ua tuʻinanau lea e tetee atu i le Agaga, ua tuʻinanau foi le Agaga e tetee atu i le tino; ua [feteenaʻi] foi ia mea.” (Kalatia 5:17) Na faapea atu foʻi Paulo: “O sē lulu i la lona tino, e selesele mai ai e ia i la le tino le mea e pala; a o sē lulu i la le Agaga, e selesele mai ai e ia i la le Agaga le ola faavavau.”—Kalatia 6:8.
3. O le ā e manaʻomia ina ia mafai ona saʻoloto mai ai i tuʻinanauga ma faanaunauga sesē?
3 O le agaga paia o Ieova—lona malosi galue—e mafai ona matuā liaʻieseina ai “tuʻinanau [lē mamā] o le tino” ma le pule e malaia ai, a lo tatou tino agasala. (1 Peteru 2:11) Ina ia saʻoloto mai saisaitiaga a faanaunauga sesē, e matuā tāua le ia i tatou o le fesoasoani a le agaga o le Atua, auā na tusi mai Paulo: “O le loto i la le tino o le oti lea; a o le loto i la le Agaga o le ola lea ma le manuia.” (Roma 8:6) O le ā le uiga o le loto i la le agaga?
“Le Loto i la le Agaga”
4. O le ā le uiga o le “loto i la le Agaga”?
4 Ina ua tusi Paulo e faatatau i “le loto i la le agaga,” sa ia faaaogā se upu Eleni e faauiga atu i le “auala o mafaufauga, le faatulagaga o le mafaufau, . . . sini, faagaeega, tauiviga.” O se veape e fesootaʻi atu i ai e faauiga i le “ia mafaufau, ia manatunatu i se auala patino.” O lea, o le loto i la le agaga e uiga i le faatonutonuina, le puleaina, ma le uunaʻia e le malosi galue o Ieova. E faaalia mai ai o loo tatou lotomalie e faataga o tatou mafaufauga, o faanaunauga, ma faagaeega, ina ia taaʻina atoatoa e le agaga paia o le Atua.
5. O le ā le tele e tatau ona tatou gauaʻi atu ai i taaʻiga a le agaga paia?
5 Sa faamamafa mai e Paulo le tele e tatau ona tatou gauaʻi atu ai i taaʻiga a le agaga paia, ina ua ia tautala e faatatau i le avea ma ‘auauna [pologa] i la le agaga.’ (Roma 7:6) E faavae aʻe i lo latou faatuatua i le taulaga togiola a Iesu, ua faasaʻolotoina ai Kerisiano mai le pule a le agasala ma ua pei ai ua “oti” i lo latou tulaga sa iai muamua o ni pologa a le agasala. (Roma 6:2, 11) O i latou ua oti faafaatusa i se auala faapena o loo ola pea i le tulaga faaletino ma ua saʻoloto nei e mulimuli atu ia Keriso i le avea ma “auauna [“pologa,” NW] a le amiotonu.”—Roma 6:18-20.
Se Toe Fuataʻiga Uigaese
6. O le ā le toe fuataʻiina ua tofo i ai i latou o loo avea ma “auauna a le amiotonu”?
6 O le toe fuataʻiina mai le avea ma “auauna [pologa] a le agasala” ae auauna atu i le Atua o se “auauna a le amiotonu” e matuā uigaese lava. E tusa ai o nisi o ē na tofo i lena suiga, na tusi mai ai Paulo e faapea: ‘Ua taeele outou, ua faapaiaina outou, ua taʻuamiotonuina outou i le suafa o le Alii o Iesu Keriso, i le Agaga foi o lo tatou Atua.’—Roma 6:17, 18; 1 Korinito 6:11, LF.
7. Aiseā e tāua ai le mauaina o le silafaga a Ieova i mataupu?
7 Ina ia mafai ona oo i lena toe fuataʻiina ofoofogia, e manaʻomia muamua ai lava ona tatou aʻoaʻoina le auala e silasila ai Ieova i mataupu. I senituri ua mavae, sa ʻaiʻoi faatauanau atu ai le faisalamo o Tavita i le Atua e faapea: “Ieova e, ia e faailoa mai ia te au ou ala . . . Ia e taʻitaʻi mai ia te au i le mea moni mai ia te oe, ma aʻoaʻo mai ia te au.” (Salamo 25:4, 5) Sa faafofoga atu Ieova ia Tavita, ma e mafai foʻi ona Ia tali mai i se tatalo faapena a ana auauna i aso nei. Talu ai e mamā ma paia ala o le Atua ma lana upu moni, o le a aogā ai le mafaufau loloto i na mea pe afai e faaosoosoina i tatou ina ia faamalieina tuʻinanauga lē mamā o le tino.
Le Matafaioi Tāua a le Afioga a le Atua
8. Aiseā ua matuā tāua ai ona tatou suʻesuʻeina le Tusi Paia?
8 O le Afioga a le Atua, le Tusi Paia, o se fua o galuega a lona agaga. O lea, o se auala tāua e faapogaia ai lena agaga ina ia galue mai ia i tatou, e ala lea i le faitauina ma le suʻesuʻeina o le Tusi Paia—i aso taʻitasi pe afai e mafai. (1 Korinito 2:10, 11; Efeso 5:18) O le faatumuina o o tatou mafaufau ma loto i upu moni ma mataupu silisili o le Tusi Paia, o le a fesoasoani lea ia i tatou e tetee atu ai i mea o loo osofaʻia maia lo tatou itu faaleagaga. Ioe, pe a mapuna aʻe ni faaosoosoga ina ia faia amioga lē mamā, e mafai e le agaga o le Atua ona toe fafagu mai i o tatou mafaufau mea o loo faamanatu mai i le Tusi Paia faapea foʻi mataupu silisili o loo avea ma taʻiala, e mafai ona faamalosia ai la tatou filifiliga ina ia gaoioi ai e ōgatusa ma le finagalo o le Atua. (Salamo 119:1, 2, 99; Ioane 14:26) Ona lē mafai ai lea ona faasesēina i tatou e mulimuli atu i se ala sesē.—2 Korinito 11:3.
9. E faapefea i le suʻesuʻeina o le Tusi Paia ona faamalosia ai la tatou filifiliga ia faapelepeleina la tatou faiā ma Ieova?
9 A o faaauau ona tatou suʻesuʻeina faamaoni ma le maelega le Tusi Paia faatasi ai ma le fesoasoani a lomiga faale-Tusi Paia, e taaʻina o tatou mafaufau ma loto e le agaga o le Atua, ma atili ai ona loloto lo tatou faaaloalo i tapulaa a Ieova. E oo ina avea ai la tatou faiā ma le Atua o se mea e sili ona tāua i o tatou olaga. Pe a fesagaʻi ma faaosoosoga, o le a tatou lē faatagaina ai mafaufauga faapea e manaia le faia o se mea sesē, ina ia faaauau pea ona mafaufau i ai. Ae na i lo lea, e vave lava ona tatou manatu mamafa i le tausisia o lo tatou faamaoni ia Ieova. O se talisapaia loloto o la tatou faiā ma ia e uunaʻia atili ai i tatou e tauivi, ina ia tetee atu i so o se faanaunauga e ono faaleaga pe faatamaʻia ai lena faiā.
“Ua Tele Lava Loʻu Naunau i Lau Tulafono!”
10. Ina ia loto atu i la le agaga, aiseā e tatau ai ona usitai atu i tulafono a Ieova?
10 Pe afai tatou te fia loto atu i la le agaga, e lē lava le iai o le poto i le Afioga a le Atua. Sa matuā lelei le malamalamaga o le tupu o Solomona i tapulaa a Ieova, peitaʻi na lē taulau ona ia usitaia na tapulaa i le vaega mulimuli o lona olaga. (1 Tupu 4:29, 30; 11:1-6) Pe afai o tatou o ni tagata e mafaufau faaleagaga, o le a tatou amanaʻia ai le manaʻoga, e lē na o le iloa o mea o fai mai ai le Tusi Paia ae ia usiusitai foʻi ma le lotoatoa i tulafono a le Atua. O lona uiga o le faia o se iloiloga faamaoni i tapulaa a Ieova ma taumafai ma le naunautaʻi e usitaia. Sa iai i le faisalamo lenei ituaiga o uiga. Na ia pese e faapea: “Ua tele lava loʻu naunau i lau tulafono; ou te mafaufau i ai i le aso atoa.” (Salamo 119:97) Pe a oo ina tatou manatu mamafa moni i le usitaia o le tulafono a le Atua, ona uunaʻia lea o i tatou e faaalia uiga faale-Atua. (Efeso 5:1, 2) Na i lo le lolo atu e aunoa ma se puipuiga i le faia o mea sesē, o lo tatou faaalia o fua o le agaga, atoa ma se faanaunauga e faafiafia Ieova e mafai ona tataʻi ese ai i tatou mai “galuega [matagā] a le tino.”—Kalatia 5:16, 19-23; Salamo 15:1, 2.
11. O le a faapefea ona e faamatala mai e faapea o le tulafono a Ieova e faatatau i le faasāina o le faitaaga o se puipuiga lea mo i tatou?
11 E faapefea ona tatou faatupu aʻe se faaaloalo loloto ma le alofa mo tulafono a Ieova? O se tasi o auala o le iloiloina lea ma le faaeteete o lo latou aogā. Seʻi manatu i le tulafono a le Atua lea e faatapulaa ai feusuaʻiga i totonu o le liʻo o le faaipoipoga ae faasāina le faitaaga ma le mulilua. (Eperu 13:4) Po o taofia mai ea ia i tatou se mea lelei ona o le usiusitai atu i lenei tulafono? Pe o le a faia ea e se Tamā alofa faalelagi se tulafono e faafitia ai mai ia i tatou se mea e aogā? E matuā leai lava! Seʻi tagaʻi i le mea o loo tupu i ola o le toʻatele o ē ua lē ola e ōgatusa ma tapulaa a Ieova i amioga tatau. O ni maʻitō sa lē manaʻomia e masani ona iʻu ai i le faapaʻūtama pe atonu o ni faaipoipoga e fai faamalosi ma e lē fiafia. E toʻatele ua latou tausia ai se tamaitiiti e aunoa ma se tane po o se avā. E lē gata i lea, o i latou e faia le faitaaga ua latou tuuina i latou lava i se tulaga e ono aafia ai i faamaʻi pipisi e ala i feusuaʻiga. (1 Korinito 6:18) Ma pe afai e faia e se auauna a Ieova le faitaaga, e mafai ona matuā mafatia i āuga tau i faalogona. O le taumafai e faateʻa atu le fagufagu mai pea o le lotofuatiaifo ua agasala e mafai ona lē maua ai se moe ma mafatia ai le mafaufau. (Salamo 32:3, 4; 51:3) Po ua lē manino ea la, o le tulafono a Ieova lea e faasāina ai le faitaaga ua fuafuaina mo le puipuia o i tatou? Ioe, e iai se aogā tele o le tausisia o le mamā tau amio!
Tatalo Atu mo le Fesoasoani a Ieova
12, 13. Aiseā e talafeagai ai ona tatalo pe a lofia i tuʻinanauga o le agasala?
12 O le loto atu i la le agaga e mautinoa le manaʻomia ai o se tatalo ma le lotoatoa. E talafeagai ona ole atu mo le fesoasoani a le agaga o le Atua, auā na fetalai Iesu: “Afai ua iloa e outou ona avatu o mea lelei mā a outou fanau, e le sili ea ona foaiina mai e lo outou Tamā o i le lagi le Agaga Paia i e ole atu ai ia te ia?” (Luka 11:13) I le tatalo, e mafai ai ona tatou faaali atu lo tatou faalagolago i le agaga mo se fesoasoani e tusa ai o o tatou vaivaiga. (Roma 8:26, 27) Pe afai tatou te iloa o loo aafia i tatou i tuʻinanauga po o uiga o le agasala, pe afai foʻi ua taʻu mai ia i tatou e so tatou uso talitonu e alofa lenei mea, o se mea poto la le faapatino atu o lena faafitauli i a tatou tatalo ma ole atu mo le fesoasoani a le Atua i le foʻiaina o nei faanaunauga.
13 E mafai ona fesoasoani mai Ieova ia i tatou ina ia tatou uaʻi atu i mea e tonu, e mamā, e lelei, ma e viia. Ma e maʻeu le talafeagai ona naunautaʻi e faatoga atu ia te ia ina ia mafai e ʻle manuia [“filemu,” NW ] mai le Atua’ ona leoleomaluina o tatou loto ma tomai faalemafaufau! (Filipi 4:6-8) O lea, seʻi o tatou tatalo atu mo le fesoasoani a Ieova ina ia tatou “tausisi atu i le amiotonu, ma le amio Atua, ma le faatuatua, ma le alofa, ma le onosai, ma le agamalu.” (1 Timoteo 6:11-14) O le fesoasoani mai o lo tatou Tamā faalelagi, o le a lē oo ai popolega ma faaosoosoga i se tulaga e puleaina i tatou. Na i lo o lea, o le a mātaulia o tatou olaga i le toʻafilemu mai le Atua.
Aua le Faatigā i le Agaga
14. Aiseā ua avea ai le agaga o le Atua ma uunaʻiga mo le amio mamā?
14 Ua faatatauina totino e auauna taʻumatuaina a Ieova le fautuaga a Paulo e faapea: “Aua tou te tineia le Agaga.” (1 Tesalonia 5:19) Talu ai o le agaga o le Atua o “le agaga e paia lea,” o lona uiga e mamā, e lē ponā, e paia. (Roma 1:4) Pe a galue mai ia i tatou, o le a avea ai lena agaga ma uunaʻiga mo le paia, po o le mamā. E aogā ina ia tatou tumau ai pea i se ala mamā o le olaga lea e mātaulia i le usiusitai i le Atua. (1 Peteru 1:2) So o se gaoioiga lē mamā e tutusa lea ma le lē amanaʻiaina o lena agaga, ma e mafai ona oo mai ai āuga mataʻutia. E faapefea?
15, 16. (a) E faapefea ona tatou ono faatigā i le agaga o le Atua? (e) E faapefea ona tatou ʻalofia le faatigā i le agaga o Ieova?
15 Na tusi mai Paulo: “Aua foi tou te faatiga i le Agaga Paia o le Atua, ua faamaufaailogaina ai outou ia te ia, seia oo i le aso e faaolaina ai.” (Efeso 4:30) E taʻua e le Tusi Paia le agaga o Ieova o se faamaufaailoga, po o se “faailoga o le mea o le a aumai,” mo Kerisiano faamaoni o ē ua faauuina. O le ola faalelagi lea e lē mafai ona oti. (2 Korinito 1:22, NW; 1 Korinito 15:50-57; Faaaliga 2:10) E mafai e le agaga o le Atua ona taʻitaʻia ē faauuina ma a latou aumea o ē maua se faamoemoe i le lalolagi, i se olaga faamaoni ma fesoasoani ai ia i latou e ʻalofia galuega a le agasala.
16 Na lapataʻi mai le aposetolo e faatatau i le faalolololo atu i le pepelo, le gaoi, le anovale, ma isi mea faapena. Pe afai tatou te faatagaina i tatou lava e lolo atu i na mea, o le a tatou tetee atu la i fautuaga a le Afioga a le Atua lea na faagaeeina e le agaga. (Efeso 4:17-29; 5:1-5) E tusa lava lena ua tatou faatigā i le agaga o le Atua ma e mautinoa o se mea tatou te mananaʻo e ʻalofia. I lena tulaga, pe afai e iai se tasi o i tatou ua amata ona lē amanaʻiaina fautuaga a le Afioga a Ieova, atonu la o le a tatou ono amata ona faaalia uiga po o amioga e ono iʻu atu ai i le agasala e faia ma le loto i ai ma oo ina leiloa atoatoa atu ai le finagalo malie o le Atua. (Eperu 6:4-6) E ui atonu tatou te lē o faatinoina le agasala i le taimi lava lenei, ae mafai ona tatou agaʻigaʻi atu i lena itulagi. O le faaauau pea ona faatautee atu i le taʻitaʻiga a le agaga, o le a avea lea o so tatou faatigā i ai. O le a oo ai foʻi ina tatou teena Ieova ma faatigā ia te ia, le puna o le agaga paia. Talu ai tatou te alolofa i le Atua, o le a lē taitai ai ona tatou mananaʻo e faia lena mea. Na i lo o lea, tau ina ia tatou tatalo atu mo le fesoasoani a Ieova ina ia tatou lē faatigā i lona agaga, ae ia mafai ona tatou faamamaluina lona suafa paia e ala i le faaauau pea ona loto atu i la le agaga.
Ia Loto Atu Pea i la le Agaga
17. O ā nisi o sini faaleagaga tatou te ono faatutū, ma aiseā o le a atamai ai le taumafai ina ia ausia nei sini?
17 O se ala lelei mo i tatou ina ia loto atu ai pea i la le agaga, o le faatutū lea o ni sini faaleagaga ma taumafai e ausia na sini. E tusa ai o o tatou manaʻoga ma tulaga, e ono aofia i o tatou sini le faaleleia o auala masani tatou te suʻesuʻe ai, le faateleina o so tatou sao i le galuega talaʻi, po o le aapa atu mo se faaeaga patino o le auaunaga, e pei o le faiva o le paeonia faataimi atoa, le auaunaga i Peteli, po o le galuega faamisionare. O lena mea o le a tumau ai pea ona uaʻi atu o tatou mafaufau i manaʻoga faaleagaga ma o le a fesoasoani ia i tatou e teena ai le lolo atu i o tatou vaivaiga faaletagata po o le matuā taaʻina i faanaunauga matapeʻapeʻa ma tuʻinanauga e lē faale-Tusi Paia o loo taatele i lenei faiga o mea. E mautinoa lava le atamai o lenei mea, auā na faalaeiau mai Iesu: “Aua tou te toloʻaʻi oa mo outou i le lalolagi, o i ai le mogamoga ma le ele e faaumatia ai; o i ai foi tagata gaoi e eli atu, ma gaoi ai. A ia outou toloʻaʻi oa mo outou i le lagi, e le o i ai se mogamoga, po o se ele e faaumatia ai; e le o i ai foi tagata gaoi e eli atu, ma gaoi ai. Auā o le mea ua i ai lo outou oa, e i ai atoa foi ma o outou loto.”—Mataio 6:19-21.
18. Aiseā e tāua tele ai le loto atu pea i la le agaga i nei aso e gata ai?
18 O le loto atu i la le agaga ma le puleaina o tuʻinanauga faalelalolagi e mautinoa lava o le ala poto lea i nei “aso e gata ai.” (2 Timoteo 3:1-5) Aemaise, o loo “mavae atu foi le lalolagi, atoa ma lona tuʻinanau, a o lē fai le finagalo o le Atua, e tumau lea e faavavau.” (1 Ioane 2:15-17) Mo se faaaʻoaʻoga, pe afai e tuliloaina e se talavou Kerisiano le sini o le auaunaga faataimi atoa, e ono avea lenei o se taʻiala i ona tausaga talavou seʻia faasolo atu ina avea o se tagata matua, lea e sili ona fesagaʻi ai ma luʻitau. Pe a tofotofoina e lolo atu i se mea sesē, o le a iai i lena tagata se vaaiga manino i mea o loo ia manaʻo e faataunuu i le auaunaga ia Ieova. O se tagata faaleagaga faapena o le a vaai i ai o se ala e lē atamai, pe o se mea valea foʻi, le lafoaʻi o le ausiaina o sini faaleagaga ona o le tuliloaina o mea faaletino po o se isi lava fiafiaga e aumaia e le agasala. Ia manatua, o Mose o lē na faanaunau i mea faaleagaga, sa ‘filifili o ia e agaleagaina faatasi ma tagata o le Atua, na i lo le ia te ia o le fiafia i le agasala e vave mavae.’ (Eperu 11:24, 25) Pe e talavou pe matua, e tutusa uma lava le filifiliga tatou te faia pe a tatou loto atu pea i la le agaga na i lo i le tino augavale.
19. O ā aogā o le a tatou olioli ai pe afai tatou te loto atu pea i la le agaga?
19 “O le loto i la le tino o le ita lea i le Atua,” ae “o le loto i la le Agaga o le ola lea ma le manuia [“filemu,” NW].” (Roma 8:6, 7) Pe afai tatou te loto atu pea i la le agaga, o le a tatou tofo ai i le filemu tautele. O le a atili ai ona puipuia malu o tatou loto ma tomai faalemafaufau mai aafiaga a lo tatou tulaga agasala. O le a atili ai ona saunia lelei i tatou e tetee atu i faaosoosoga ina ia faia se mea sesē. Ma o le a tatou maua ai le fesoasoani tauatua ina ia manumalo mai se tauiviga faifai pea i le vā o le tino ma le agaga.
20. Aiseā e mafai ai ona tatou mautinoa e mafai ona tatou manumalo i le taua i le vā o le tino ma le agaga?
20 E ala i le faaauau ona loto atu i la le agaga, tatou te tausisia ai pea se fesootaʻiga tāua ma Ieova, le puna o le ola ma le agaga paia. (Salamo 36:9; 51:11) O loo faia e Satani le Tiapolo ma ana ʻau taumafaiga uma lava latou te mafaia ina ia faatamaʻia ai la tatou faiā ma Ieova le Atua. Latou te taumafai e pulea o tatou mafaufau, i le iloa e faapea, pe afai tatou te lolo atu, e mulimuli ane o le a oo atu lenei mea ina avea ai i tatou ma fili o le Atua ma oo atu ai i le oti. Peitaʻi, e mafai ona tatou manumalo i lenei taua i le vā o le tino ma le agaga. O le mea lena sa tupu ia Paulo, auā i lana tusi mai e faatatau i lana lava taua, na muamua ona ia fesili mai: “O ai sē laveai ia te au ai le tino o lenei oti?” I lona faapea mai e mafai lena laveaʻiga, na ia alaga ai: “Ou te faafetai lava i le Atua, auā o Iesu Keriso lo tatou Alii”! (Roma 7:21-25) E mafai foʻi e i tatou ona faafetai atu i le Atua e ala ia Keriso mo le saunia mai o le auala e mafai ona tatou gafatia ai vaivaiga faaletagata ma loto atu ai pea i la le agaga faatasi ai ma le faamoemoe ofoofogia o le ola e faavavau.—Roma 6:23.
Pe E te Manatua?
• O le ā le uiga o le loto atu i la le agaga?
• E faapefea ona tatou faataga le agaga o Ieova e galue ia i tatou?
• Faamatala mai le māfuaaga, e matuā tāua ai lo tatou suʻesuʻeina o le Tusi Paia, le usiusitai i tulafono a Ieova, ma le tatalo ia te ia a o tatou tauivi e tetee atu i le agasala.
• E faapefea i le faatutūina o sini faaleagaga ona faatumauina ai i tatou i le ala o le ola?
[Fesili mo le Suʻesuʻega]
[Ata i le itulau 16]
E fesoasoani suʻesuʻega faale-Tusi Paia ia i tatou ina ia tetee atu i mea o loo osofaʻia ai lo tatou itu faaleagaga
[Ata i le itulau 17]
E talafeagai ona tatalo mo le fesoasoani a Ieova ina ia manumalo mai ai i tuʻinanauga o le agasala
[Ata i le itulau 18]
E mafai e sini faaleagaga ona fesoasoani ia i tatou ina ia loto atu ai pea i la le agaga